“Maglikaw sa Tanan nga Pagkamahamkunon”
“Maglikaw sa Tanan nga Pagkamahamkunon”
“Ang kabuhi sang tawo indi sa kabuganaan sang mga butang nga naangkon niya.”—LUCAS 12:15.
1, 2. (a) Ano ang nakita mo nga ginahatagan gid sing atension sang mga tawo karon? (b) Paano kita mahimo maimpluwensiahan sini nga panimuot?
KUARTA, pagkabutang, kabantugan, mataas sing sueldo nga mga trabaho, pamilya—amo ini ang pila lamang sa mga butang nga ginakabig sang kalabanan nga makahatag sa ila sing kadalag-an ukon makagarantiya sing malig-on nga palaabuton. Maathag gid nga sa mainuswagon kag indi mainuswagon nga mga pungsod, ang atension sang madamo nga tawo nahugod lamang sa kon paano sila magmanggaranon. Sa pihak nga bahin, halos wala nila ginahatagan sing atension ang tuhoy sa ila pag-alagad sa Dios.
2 Amo gid ini ang ginatagna sang Biblia. Ini nagasiling: “Sa katapusan nga mga adlaw magaabut ang makahalanguyus nga mga tion. Kay ang mga tawo magamahigugmaon sang kaugalingon, mahigugmaon sang cuarta, . . . mahigugmaon sa kinasadya sa baylo sang sa Dios, nga may dagway sang pagkadiosnon apang nagapanghiwala sang gahum sini.” (2 Timoteo 3:1-5) Bangod ang matuod nga mga Cristiano nagakabuhi sa tunga sining mga tawo, pirme sila ginaipit nga ilugon man ini nga panimuot kag estilo sang pagkabuhi. Ano ang makabulig agod mapamatukan naton nga “magpauyon” sa kalibutan?—Roma 12:2.
3. Ano ang laygay ni Jesus nga binagbinagon naton karon?
3 Subong “pangolo kag manughimpit sang aton pagtoo,” si Jesucristo nagtudlo sa aton sing importante nga mga leksion tuhoy sa sini. (Hebreo 12:2) Isa ka bes, sang nagapakighambal si Jesus sa kadam-an agod ipaathag ang tuhoy sa matuod nga pagsimba, isa ka tawo ang nagsaligbat kag nagpangabay: “Manunudlo, sogoa ang akon utud nga lalaki nga bahinon namon ang palanublion.” Bilang sabat, ginlaygayan ni Jesus ang lalaki kag ang tanan nga nagapamati. Ginpaandaman niya sila batok sa pagkamahamkunon kag ginpabakod pa gid ini nga paandam paagi sa makapahunahuna nga ilustrasyon. Dapat pamatian gid naton ang ginsiling ni Jesus sa amo nga higayon kag tan-awon naton kon paano kita makabenepisyo sa pag-aplikar sini sa aton pagkabuhi.—Lucas 12:13-21.
Indi Nagakaigo nga Pangabay
4. Ngaa indi nagakaigo ang pagsaligbat sang tawo kay Jesus?
4 Antes magsaligbat ining tawo, nagapakighambal si Jesus sa iya mga disipulo kag sa iban pa tuhoy sa pag-andam batok sa pagkasalimpapaw, tuhoy sa maisugon nga pagtuad nga nahiusa sa Anak sang tawo, kag tuhoy sa bulig sang balaan nga espiritu. (Lucas 12:1-12) Dapat pamatian gid sang mga disipulo ining importante nga mga butang. Apang, samtang nagahambal sia, isa ka tawo ang hinali lang nga nagsaligbat kag nagpangabay nga husayon ni Jesus ang problema sang iya pamilya may kaangtanan sa materyal nga mga palanublion. Apang, may matun-an kita nga importante nga leksion sa sini nga hitabo.
5. Bangod sang pangabay sang tawo, ano ang ginasugid sini tuhoy sa iya?
5 Ang isa ka awtor nagsiling nga “sa masami makilala mo ang isa ka tawo sa kon ano ang iya ginapamensar samtang nagapamati sia sing sermon ukon wali.” Samtang nagahambal si Jesus tuhoy sa espirituwal nga mga butang, mahimo nga ginapamensar sang tawo kon ano ang iya himuon agod madugangan ang iya materyal nga pagkabutang. Wala ginhinambitan sa Biblia kon bala makatarunganon gid man ang reklamo sining tawo tuhoy sa iya palanublion. Ayhan luyag niya hingalitan ang awtoridad kag katungdanan ni Jesus subong maalam nga hukom sa hilikuton sang mga tawo. (Isaias 11:3, 4; Mateo 22:16) Ano man ang rason, ang iya pangabay nagapakita nga may problema gid sia—wala gid niya ginapabaloran ang espirituwal nga mga butang. Indi bala maayo gid ini nga rason agod usisaon man naton ang aton kaugalingon? Halimbawa, samtang nagatambong sa Cristianong mga miting, mahapos lang maglagaw ang aton hunahuna ukon magpamensar kita sang aton himuon pagkatapos sang miting. Apang, dapat kita mamati sing maayo kag hunahunaon kon paano naton maaplikar ang aton nabatian agod mapauswag naton ang aton kaangtanan sa aton langitnon nga Amay, si Jehova nga Dios, kag sa aton mga masigkatumuluo.—Salmo 22:22; Marcos 4:24.
6. Ngaa wala ginhimo ni Jesus ang ginpangabay sang tawo?
6 Ano man ang rason sang tawo, wala ginhimo ni Jesus ang iya pangabay. Sa baylo, ginsilingan sia ni Jesus: “Tawo, sin-o bala ang naghimo sa akon nga hukom ukon manugbahin sa inyo?” (Lucas 12:14) Sa pagsiling sini, ginpatuhuyan ni Jesus ang butang nga nahibaluan gid sang mga tawo sadto, kay suno sa Mosaikong Kasuguan, ang mga hukom sa siudad amo ang gintangduan nga maghusay sini nga mga hiligut-anon. (Deuteronomio 16:18-20; 21:15-17; Rut 4:1, 2) Sa pihak nga bahin, ang ginkabalak-an ni Jesus amo ang mas importante nga mga butang—agod magpanaksi sa kamatuoran sang Ginharian kag agod tudluan ang mga tawo tuhoy sa kabubut-on sang Dios. (Juan 18:37) Bilang pagsunod sa halimbawa ni Jesus, sa baylo nga mabanga kita sa kinaandan nga mga ginakabalak-an sang mga tawo, ginagamit naton ang aton tion kag kusog sa pagbantala sang maayong balita kag ‘sa paghimo sing mga gintutun-an sa tanan nga kapungsuran.’—Mateo 24:14; 28:19.
Mag-andam Batok sa Pagkamahamkunon
7. Ano ang ginsiling ni Jesus nga nagapakita nga nahantop gid niya ang motibo sang tawo?
7 Bangod mahantop niya ang tagipusuon sang tawo, nahibaluan ni Jesus kon ano gid ang rason sang tawo sang ginpangabay niya si Jesus nga magpasilabot sa iya problema. Busa, sa baylo nga balibaran lamang ang iya pangabay, gintumod ni Jesus kon ano gid ang kabangdanan kag nagsiling: “Andam kamo, kag maglikaw sa tanan nga pagkamahamkonon; kay ang kabuhi sang tawo indi sa kabuganaan sang mga butang nga naangkon niya.”—Lucas 12:15.
8. Ano ang pagkamahamkunon, kag sa ano ini nagadul-ong?
8 Ang pagkamahamkunon indi lamang ang handum nga makatigayon sing kuarta ukon sing pila ka butang, kay ini nga mga butang mapuslanon man. Suno sa isa ka diksionaryo, ang pagkamahamkunon nagakahulugan sing “sobra nga paghandum sing manggad ukon pagkabutang ukon paghandum sa pagkabutang sang iban.” Mahimo ini magpatuhoy sa walay kabulusgan ukon makagod nga handum nga maangkon ang mga butang, ayhan ang pagkabutang sang iban, sa tuyo nga matigayon lamang ini, bisan indi gid man ini kinahanglan ukon wala ginahunahuna kon ano ang epekto sini sa iban. Ginapahanugutan sang mahamkunon nga tawo nga daugon sia sang iya pirme ginapamensar kag ginahimo amo nga ini na ang iya dios. Dumduma nga nagsiling si apostol Pablo nga ang isa ka mahamkunon nga tawo kaangay sang isa ka nagasimba sa idolo, nga indi makapanubli sang Ginharian sang Dios.—Efeso 5:5; Colosas 3:5, NW.
9. Ano ang pila ka sahi sang pagkamahamkunon? Maghatag sing pila ka halimbawa.
9 Talupangdon gid nga nagpaandam si Jesus nga “maglikaw sa tanan nga pagkamahamkunon.” Madamo sing sahi ang pagkamahamkunon. Ang katapusan sang Napulo ka Sugo naghinambit sang pila sini, nga nagasiling: “Dili ka magkaibog sang balay sang imo isigkatawo; dili ka magkaibog sang asawa sang imo isigkatawo, ukon sang iya alagad nga lalaki, ukon sang iya alagad nga babayi, ukon sang iya baka, ukon sang iya asno, ukon ano nga butang nga iya sang imo isigkatawo.” (Exodo 20:17) Sa Biblia madamo sing halimbawa sang mga nakahimo sing mabug-at nga sala bangod sang ila pagkamahamkunon ukon pagkaibog. Si Satanas amo ang una nga naibog sa butang sang iban—ang himaya, dungog, kag awtoridad nga iya gid lamang ni Jehova. (Bugna 4:11) Naibog si Eva sa kinamatarong nga magdesisyon para sa kaugalingon, kag ang iya ginhimo gintunaan sang paglakat sang tawhanon nga kaliwatan sa banas padulong sa sala kag kamatayon. (Genesis 3:4-7) Ang mga demonyo mga anghel anay nga nangin indi kontento sa “ila kaugalingon nga kahimtangan kundi nagbiya sang ila nagakaigo nga puluy-an” kabaylo sang mga butang nga indi para sa ila. (Judas 6; Genesis 6:2) Dumduma man sanday Balaam, Acan, Gehazi, kag Judas. Sa baylo nga makontento sa ila kahimtangan, nagpadaug sila sa sobra nga paghandum sa materyal nga pagkabutang amo nga gin-abusuhan nila ang responsibilidad nga gintugyan sa ila. Gintunaan ini sang ila kalaglagan.
10. Paano kita ‘makaandam,’ subong sang ginlaygay ni Jesus?
10 Nagakaigo gid nga gin-umpisahan ni Jesus ang iya laygay nga maglikaw sa pagkamahamkunon paagi sa ekspresyon nga “andam kamo”! Ngaa? Bangod mahapos lang matalupangdan sang isa ka tawo nga ang iban makagod ukon mahamkunon, apang indi gilayon niya matalupangdan nga sia gali mahamkunon man. Busa, si apostol Pablo nagsiling nga “ang gugma sa cuarta amo ang gamut sang tanan nga kalainan.” (1 Timoteo 6:9, 10) Si disipulo Santiago nagsiling nga ang kailigbon, “kon nakapanamkon nagapanganak sing sala.” (Santiago 1:15) Nahisanto sa laygay ni Jesus, dapat kita ‘mag-andam,’ nga wala naton ginahukman kon bala mahamkunon ang iban, sa baylo nagausisa sang aton kaugalingon kon ano ang handum sang aton tagipusuon, agod ‘malikawan naton ang tanan nga pagkamahamkunon.’
Kabuhi nga May Kabuganaan
11, 12. (a) Ano ang ginpaandam ni Jesus batok sa pagkamahamkunon? (b) Ngaa dapat naton tumanon ang paandam ni Jesus?
11 May dugang pa nga rason kon ngaa dapat kita maglikaw sa tanan nga pagkamahamkunon. Talupangda ang masunod nga ginsiling ni Jesus: “Ang kabuhi sang tawo indi sa kabuganaan sang mga butang nga naangkon niya.” (Lucas 12:15) Nagakaigo gid nga binagbinagon ini sing maayo kay ang kalabanan nga tawo karon materyalistiko, nga para sa ila kon ang isa ka tawo manggaranon, malipayon kag madinalag-on sia. Paagi sa iya pinamulong, ginpatalupangod ni Jesus nga ang makalilipay kag makaalayaw nga kabuhi wala naggikan ukon nasandig sa materyal nga mga pagkabutang, bisan ano pa kadamo sini.
12 Apang, madamo ang indi mag-ugyon sa sini. Mahimo sila mangatarungan nga kon madamo ang imo materyal nga pagkabutang mas masulhay kag makalilipay ang imo pagkabuhi. Busa, ginhugod nila ang ila kaugalingon sa pagtigayon sing materyal nga pagkabutang kag elektroniko nga mga kagamitan nga ila naluyagan. Abi nila makahatag ini sing masulhay nga kabuhi. Apang kon amo ini ang ila pagpati, wala nila mahangpan ang buot silingon ni Jesus.
13. Ano ang timbang nga pagtamod tuhoy sa kabuhi kag mga pagkabutang?
13 Sa baylo nga magkonsentrar kon bala sayop ukon indi ang pagtigayon sing madamo nga pagkabutang, ginpatalupangod ni Jesus nga ang kabuhi sang tawo wala nasandig sa “mga butang nga naangkon niya,” nga amo ang mga butang nga ginapanag-iyahan na niya. Nahibaluan naton nga indi gid man naton kinahanglan ang madamo nga pagkabutang agod mabuhi. Pagkaon, panapton, kag ilistaran lamang ang kinahanglan naton. Ang mga manggaranon bugana sa sining mga butang, kag ang mga imol ayhan kinahanglan pa nga magbakabaka agod matigayon ini. Apang, pareho lang ang manggaranon kag imol kon mag-abot ang ila kamatayon—ang tanan wala na sing pulos. (Manugwali 9:5, 6) Busa, wala nasandig sa mga butang nga sarang matigayon ukon ginaangkon sang isa ka tawo ang katuyuan kag kabilihanan sang kabuhi. Amo gid sini ang aton matun-an kon usisaon naton ang sahi sang kabuhi nga ginapatuhuyan ni Jesus.
14. Ano ang buot silingon sang tinaga nga “kabuhi” nga ginagamit sa Biblia?
14 Sang nagsiling si Jesus nga “ang kabuhi sang tawo indi sa kabuganaan sang mga butang nga naangkon niya,” ang gingamit diri nga tinaga para sa “kabuhi” sa Ebanghelyo ni Lucas (sa Griego, zo·eʹ) nagapatuhoy, indi sa pamaagi ukon estilo sang pagkabuhi, kundi sa kabuhi mismo sang tawo. * Buot silingon ni Jesus nga manggaranon man kita ukon imol, nagakabuhi man kita nga may kabuganaan ukon pigado, indi gid naton kontrolado kon ano kalawig ang aton kabuhi ukon kon bala buhi pa kita buas. Nagsiling si Jesus sa iya Sermon sa Bukid: “Sin-o bala sa inyo nga bangod sa pagkabalaka makasugpon sang isa ka maniko sa kalawigon sang iya kabuhi?” (Mateo 6:27, NW) Maathag nga ginapakita sang Biblia nga si Jehova lamang “ang tuburan sang kabuhi,” ukon sia lamang ang makahatag sa mga matutom sing “kabuhi nga totoo,” ukon “kabuhi nga walay katapusan,” kabuhi nga dayon, sa langit man ukon sa duta.—Salmo 36:9; 1 Timoteo 6:12, 19.
15. Ngaa madamo ang nagasalig sa ila materyal nga mga pagkabutang?
15 Ang ginpamulong ni Jesus nagapatalupangod nga sa masami sayop ang pagtamod sang mga tawo tuhoy sa kabuhi. Manggaranon man ukon imol, ang tanan nga tawo di-himpit kag pareho lang ang ila madangatan. Si manalagna Moises nagsiling: “Ang mga adlaw sang amon mga tuig kapitoan ka tuig, ukon bisan bangod sang kabakud kawaloan ka tuig; apang ang ila bugal kabudlayan lamang kag kasubo; sa madali nagataliwan, kag nagalupad kami.” (Salmo 90:10; Job 14:1, 2; 1 Pedro 1:24) Bangod sini, ang mga tawo nga wala sing maayo nga kaangtanan sa Dios masami may prinsipio nga “magkaon kita kag mag-inom, kay buwas mapatay kita,” nga ginhinambitan ni apostol Pablo. (1 Corinto 15:32) Ang iban naman nga para sa ila ang kabuhi umalagi lamang kag walay kapat-uran, nagsandig sang ila kabuhi sa materyal nga pagkabutang agod makatigayon sila sing kalig-unan. Ayhan nagapati sila nga kon madamo ang ila materyal nga pagkabutang, may kalig-unan ang ila kabuhi. Busa, nagapangabudlay sila sing lakas agod makatipon sing manggad kag mga pagkabutang, bangod abi nila amo ini ang makahatag sa ila sing kalig-unan kag kalipay.—Salmo 49:6, 11, 12.
Malig-on nga Palaabuton
16. Sa ano wala nasandig ang matuod nga balor sang kabuhi?
16 Ayhan matuod nga kon manggaranon ang isa ka tawo—may madamo nga pagkaon, panapton, ilistaran, kag iban pa nga mga pagkabutang—mas komportable ang iya kabuhi ukon matatap niya sing mas maayo ang iya panglawas amo nga mahimo mas malawig ang iya kabuhi. Apang, amo bala ini ang mas malipayon kag mas malig-on nga sahi sang pagkabuhi? Ang matuod nga balor sang kabuhi wala nasandig sa kalawigon sang edad ukon sa kadamuon sang iya materyal nga pagkabutang. Ginpatalupangod ni apostol Pablo ang katalagman sang pagsandig gid sa sini. Nagsulat sia kay Timoteo: “Tulini ang mga manggaranon sa sining kalibutan, nga indi sila magmatinaastaason, ukon magbutang sang ila paglaum sa dimasaligan nga mga manggad kundi sa Dios nga nagahatag sa aton sing bugana sang tanan nga butang nga pagkalipayan.”—1 Timoteo 6:17.
17, 18. (a) Anong talalupangdon nga mga halimbawa may kaangtanan sa materyal nga mga pagkabutang ang takus naton ilugon? (b) Ano nga parabola ni Jesus ang binagbinagon naton sa masunod nga artikulo?
17 Indi maalamon ang pagsandig sa manggad bangod ‘di-masaligan’ ini. Ang patriarka nga si Job manggaranon gid, apang sang hinali nga nag-abot ang kalamidad, wala makabulig sa iya ang iya manggad; hinali ini nga nadula. Ang iya mabakod nga kaangtanan sa Dios amo ang nakabulig sa iya nga maatubang ang tanan nga mga pagtilaw kag mga kapipit-an. (Job 1:1, 3, 20-22) Ang bugana nga manggad wala makaupang kay Abraham nga batunon ang mabudlay nga ginsugo sa iya ni Jehova, kag bangod sini, ginpakamaayo sia nga ‘mangin-amay sang kadam-an sang mga pungsud.’ (Genesis 12:1, 4; 17:4-6) Ini kag ang iban pa nga mga halimbawa takus gid nga ilugon naton. Bata man ukon tigulang, dapat naton usisaon kon ano gid ang importante sa aton kabuhi kag kon sa ano naton ginapahamtang ang aton paglaum.—Efeso 5:10; Filipos 1:10.
18 Ining malip-ot lamang nga pinamulong ni Jesus tuhoy sa pagkamahamkunon kag sa nagakaigo nga pagtamod sa kabuhi mapuslanon kag makapalig-on gid. Apang, may dugang pa nga inugtudlo si Jesus, kag ginpadayon niya ini paagi sa pagsaysay sing makapahunahuna nga parabola, ukon ilustrasyon, tuhoy sa isa ka indi makatarunganon nga manggaranon. Ngaa mapuslanon para sa aton karon ini nga ilustrasyon, kag ano ang aton matun-an sa sini? Sabton ini sang aton masunod nga artikulo.
[Footnote]
^ par. 14 Ang isa pa ka Griego nga tinaga nga ginbadbad nga “kabuhi” amo ang biʹos. Suno sa Vine’s Expository Dictionary of Old and New Testament Words, ang biʹos nagapatuhoy sa “hut-ong ukon kalawigon sang kabuhi,” sa “pamaagi sang pagkabuhi,” kag sa “estilo sang pagkabuhi.”
Ano ang Imo Sabat?
• Ano ang matun-an naton sa indi pagtuman ni Jesus sa ginpangabay sang tawo?
• Ngaa dapat kita mag-andam sa pagkamahamkunon, kag paano kita makaandam?
• Ngaa ang kabuhi wala nasandig sa materyal nga mga pagkabutang?
• Paano ang kabuhi mangin makalilipay gid kag malig-on?
[Mga Pamangkot sa Pagtinuon]
[Piktyur sa pahina 23]
Ngaa wala gintuman ni Jesus ang ginpangabay sang tawo?
[Piktyur sa pahina 23]
Makatalagam ang mga resulta sang pagkamahamkunon
[Mga piktyur sa pahina 25]
Paano ginpakita ni Abraham ang nagakaigo nga pagtamod sa materyal nga mga pagkabutang?
