Makita Ka Bala sang Dios?

SARANG bala makakita si Jehova, ang Batid nga Manunuga? Siempre! Ang Biblia nagapaathag: “Ang naghuman sang mata, indi bala sia magtan-aw?” (Salmo 94:9) Sarang makita ni Jehova ang indi makita sang tawo. Makita niya indi lamang ang aton naggua nga panagway, kundi sia man ang “nagatilaw sang mga tagiposoon,” kag “nagatimbang sang mga tagiposoon.” (Hulubaton 17:3; 21:2) Huo, sarang niya mausisa ang aton panghunahuna, motibo, kag tudok nga mga handum.

Makita ni Jehova ang mga kabudlayan nga naeksperiensiahan naton sa kabuhi, kag ginasabat niya ang aton mga pakitluoy. Ang salmista nagsulat: “Ang mga mata sang GINOO yara nayon sa mga matarung, kag ang iya mga idulungug bukas sa pagtuaw nila. Ang GINOO malapit sa mga boong sing tagipusuon, kag nagaluwas sang mga mahinulsulon sa espiritu.” (Salmo 34:15, 18) Makalulugpay gid nga mahibaluan nga nahangpan ni Jehova ang aton kahimtangan kag ginapamatian niya ang aton tinagipusuon nga mga pag-ampo!

Makita man ni Jehova nga Dios bisan ang mga butang nga ginahimo sing tago. Huo, “ang tanan hublas kag dayag sa mga mata niya nga hatagan ta sing husay.” (Hebreo 4:13) Gani, maayo man ukon malain ang aton ginahimo, ini tanan makita sang Dios. (Hulubaton 15:3) Halimbawa, ang Genesis 6:8, 9 nagsiling nga “si Noe nakapahamuut sa mga mata sang GINOO” kag sia “naglakat upud sa Dios.” Maathag nga natigayon ni Noe ang kahamuot kag pagpakamaayo ni Jehova bangod gintuman niya ang matarong nga mga talaksan sang Dios. (Genesis 6:22) Sa pihak nga bahin, ang mga tawo sang adlaw ni Noe masingki kag malaut. Ini nga kahimtangan wala nalipod sa Dios. “Nakita [niya] nga ang pagpakamalaut sang tawo daku sa duta, kag nga ang tagsa ka painoino sang mga hunahuna kag tagiposoon malaut gayud sing dalayon.” Sang ulihi, ginlaglag ni Jehova ang mga malaut apang ginluwas niya si Noe kag ang iya pamilya.—Genesis 6:5; 7:23.

Mahamuot bala si Jehova sa imo? Sa pagkamatuod, ang mga mata ni Jehova “nagapanoloktolok sa bug-os nga duta, sa pagpakita nga sia mabakud tungud sa ila nga may tagiposoon nga himpit ayon sa iya.” (2 Cronica 16:9) Sa indi madugay, laglagon niya liwat ang mga malaut diri sa duta kag luwason ang mga mapainubuson.—Salmo 37:10, 11.