Nadaug sang Pagtuo sang Isa ka Iloy ang Trahedya
Nadaug sang Pagtuo sang Isa ka Iloy ang Trahedya
“Kon ginabasa ninyo ini nga sulat, buot silingon wala magmadinalag-on ang pag-opera sa akon kag wala na ako.”
AMO ini ang umpisa sang sulat ni Carmen, nga isa ka Cristiano nga iloy, sa iya tatlo ka anak nga babayi nga nagaedad sing 25, 19, kag 16. Subong sang natabo, wala magmadinalag-on ang pag-opera sa iya kag sing makapasubo, napatay si Carmen.
Masakit gid para sa isa ka iloy nga biyaan ang iya tatlo ka anak. Apang, nadaug niya ini nga trahedya bangod sang iya mabakod nga pagtuo kay Jehova kag sa Iya mga saad, kay naghatag ini sa iya sing kalinong sa kaugalingon nga mabatyagan gid sa iya makatalandog nga sulat. Basaha ang iya ginsiling sa iya mga anak.
“Una sa tanan, luyag ko nga mahibaluan ninyo nga palangga ko gid kamo. . . . Para sa akon, kamo ang pinakamaayo nga mga anak, kag ginapabugal ko gid kamo.
“Luyag ko gid kuntani nga updanay kita tubtob sa ginsaad sang Dios nga bag-ong kalibutan. . . , apang bangod indi ini posible, ginpangamuyo ko sa iya nga buligan niya kamo nga makapabilin nga matutom. Madamo na kita sing mga pagtilaw nga nalampuwasan, kag wala gid kita ginpabay-an ni Jehova. . . . Gani padayuna ninyo ang pagsalig sa panuytoy nga ginaaman niya paagi sa iya organisasyon, kag ang pagsakdag sa kongregasyon kag sa mga gulang. Pirme man kamo magbantala kag palanggaa ninyo ang tanan nga kauturan.
“Temporaryo man lang ining aton pagbulagay. . . . Pasayluha ninyo ako kon may nahimo ako nga kasaypanan kag kon may mga tion nga wala ko kamo mahangpan ukon wala ko mahambal sa inyo kon daw ano ko kamo kapalangga. . . . Nahibaluan ko nga kada isa sa inyo may mga kinahanglanon. Nahibaluan ini ni Jehova, kag iaman niya ang tanan ninyo nga kinahanglan kag padyaan niya ang inyo pagbatas.
“Indi pagkalimti ang inyo tulumuron—ang kabuhi sa bag-ong kalibutan—kag padayon kamo nga manikasog nga maagom ini. Kabay nga pakamaayuhon kag pabakuron kamo ni Jehova agod nga magmatutom kamo tubtob sa katapusan. . . . Indi kamo magkasubo, mga anak. Palangga ko gid kamo!”
Wala sing ginapili ang trahedya. “Ang tion kag kahigayunan nagakahanabu sa ila tanan,” sulat ni Hari Solomon sang una. (Manugwali 9:11) Apang, ang mga nagatuo gid sa Dios nagasalig man kaangay ni apostol Pablo, nga nagsiling: “Ginatalupangod ko nga bisan ang kamatayon, ukon kabuhi . . . ukon bisan ano nga iban nga tinuga, indi sarang makapahamulag sa aton sa gugma sang Dios nga yara kay Cristo Jesus nga aton Ginoo.”—Roma 8:38, 39; Hebreo 6:10.
