Sugilanon sang Kabuhi

Pag-alagad kay Jehova​—Isa ka Wala Kaangay nga Pribilehiyo

Panugiron ni Zerah Stigers

Napatay ang akon bana, nga matutom ko nga kaupod sa pag-alagad sing bug-os tion, sang 1938. Nabalo ako nga may alatipanon nga lapsag kag dies anyos nga anak nga lalaki. Bisan luyag ko pa nga mag-alagad sing bug-os tion, paano ko ini himuon? Pasugira anay ako tuhoy sa akon pagkabata antes ko ipaathag kon paano ko ini nahimo.

WALA pa lang madugay nga natawo ako sang Hunyo 27, 1907, sa Alabama, E.U.A., nagsaylo ang akon mga ginikanan kag kami nga apat ka mag-ulutod sa Georgia. Sang ulihi nagsaylo kami liwat sa Tennessee kag nian sa Tampa, Florida. Diri namon natan-aw sang 1916 ang salida nga may tunog nga “Photo-Drama of Creation.” Bag-o pa lang sadto ang industriya sa paghimo sing pelikula, kag nanamian gid ang tanan sa “Photo-Drama”!

Ang akon mga ginikanan makugi nga bumalasa sang Ang Lalantawan kag sang iban pa nga mga publikasyon pasad sa Biblia. Bisan pa nanamian si Tatay sa pagbasa sing mga literatura, wala sia nakig-upod sa mga Estudyante sang Biblia, nga amo anay ang pagtawag sa mga Saksi ni Jehova. Apang, kami nga mga bata gin-upod ni Nanay sa mga miting. Sa katunayan, wala pa lang madugay nga nagsaylo kami sa Niles, Michigan, masami kami nga nagalakbay sing kapin sa napulo ka milya sakay sa tren pakadto sa South Bend, Indiana, sa pagtambong sa mga miting.

 Sang ulihi, sang Hulyo 22, 1924, ginbawtismuhan ako bilang simbulo sang akon dedikasyon kay Jehova. Wala madugay pagkatapos sadto, ginhimos ni Nanay ang iya iskedyul agod mangin colporteur, nga amo anay ang pagtawag sa bug-os tion nga mga ministro sang mga Saksi ni Jehova. Bangod sang maayo niya nga halimbawa kag sang iban pa nga mga colporteur, ginhandum ko man nga mag-colporteur.

Nakapamana

Sang nagtambong ako sa isa ka daku nga kombension sa Indianapolis, Indiana, sang 1925, nakilala ko si James Stigers, nga taga-Chicago. Nakita ko dayon nga si James isa ka makugi nga alagad ni Jehova. Ang Chicago mga 160 kilometros ang kalayuon sa lugar namon, gani talagsa lang kami nagakitaay. Sadto nga tion, isa pa lang ang kongregasyon sa sining daku nga siudad, kag ang mga miting ginahiwat sa gin-arkilahan nga hulot sa ikaduha nga panalgan. Pirme ako ginasulatan ni James agod pabakuron ako sa akon pag-alagad kay Jehova. Nagpakasal kami sang Disiembre 1926, kag pagligad sang mga isa ka tuig, natawo ang amon panganay nga anak nga lalaki nga si Eddie.

Wala madugay pagkatapos sini, nagpayunir kami ni James. Nag-alagad kami sa walo ka estado—sa Michigan, Louisiana, Mississippi, South Dakota, Iowa, Nebraska, California, kag Illinois. Amo yadto ang pinakamalipayon nga mga tinuig sang amon kabuhi. Apang, sang nagmasakit si James, naupangan ang amon malipayon nga mga tion subong pamilya.

Bangod sang daku nga gasto sa pagmasakit ni James, nagpauli kami sa Chicago sang 1936 agod maglumon sa akon ugangan nga babayi, nga isa man ka Saksi. Antes mapatay si James kag samtang nagamabdos ako sang amon ikaduha nga anak, nagtrabaho ako sa kapiterya nga ang akon sueldo $1 ka dolyar kada adlaw. Ginpat-od sang akon pinalangga nga ugangan nga makakaon kami sing nagakaigo, kag wala niya ini ginpabayaran. Gin-atipan gid niya kami.

Duha ka tuig nga nagmasakit si James sing encephalitis, kag napatay sia sang Hulyo 1938. Sang nagmasakit sia, indi na sia makasarang sa pagmaneho sing salakyan ukon makapamalaybalay, apang ginhimuslan niya ang tanan nga kahigayunan agod makapanaksi sa iban. Agod makapiyanpiyan sa amon galastuhon, nag-untat ako sa pag-alagad sing bug-os tion. Bangod indi permanente, lainlain ang nangin trabaho ko.

Ang amon anak nga si Bobby natawo sang Hulyo 30, 1938, walo ka adlaw pa lang nga napatay ang iya amay. Wala magpasugot ang akon ugangan nga magbata ako sa wala bayad nga ospital diin indi sampaton ang mga doktor. Sa baylo, ginpadala niya ako sa mas maayoayo nga ospital kag ginpaatipan sa iya doktor. Sia ang nagbayad sang tanan nga balayran, kag nagpasalamat gid ako sa ginpakita niya nga Cristianong gugma.

Nagpayunir Liwat

Naglumon kami sa akon ugangan tubtob sang mga duha ka tuig si Bobby, kag 12 anyos naman si Eddie. Walay sapayan sang akon bag-o nga mga kahimtangan, handum ko gihapon nga mag-alagad kay Jehova sing bug-os tion. Sang nagtambong kami sa kombension sa Detroit, Michigan sang 1940, nakilala ko ang isa ka payunir nga mag-asawa. Ginpalig-on nila ako nga magpayunir sa South Carolina. Gani nagbakal ako sing salakyan nga 1935 Pontiac sa bili nga $150 kag naghanda sa pagsaylo didto. Samtang nagapakig-away ang Estados Unidos sa Bug-os Kalibutan nga Inaway II sang 1941, naglakbay kami sang akon mga anak padulong sa nabagatnan nga bahin sang Estados Unidos, kag nagpayunir ako liwat.

Sang nagsaylo kami sa South Carolina, nagkadto kami primero sa Camden, masunod sa  Little River, kag nian sa Conway. Samtang sa Conway, nagbakal ako sing isa ka treyler nga balay. Ang mabuot nga tag-iya sang isa ka gasolinahan nagpasugot nga magparking ako malapit sa iya gasolinahan kag ginpagamit man niya ako sang iya gas kag elektrisidad, kag pati na sang iya kasilyas. Sadtong Bug-os Kalibutan nga Inaway II, ginrasyon ang gasolina, kag nabudlayan ako nga makakuha sing gasolina. Gani nagbakal ako sing bisikleta. Nian, sang 1943, sang daw imposible na gid nga magpadayon sa pagpayunir bangod wala na kami sing kuarta, gin-agda ako nga mangin espesyal payunir. Gani may mabaton na ako nga bulig kada bulan nga makapiyanpiyan sa amon galastuhon. Sa sulod sang madamo nga tinuig, ginbuligan gid ako ni Jehova!

Kami lang sadto ang mga Saksi sa Conway, kag nabudlayan kami sang akon mga anak sa paggua sa latagon nga kamihanon lamang. Gani nagsulat ako kag nagpangabay nga hatagan ako sing kaupod nga espesyal nga payunir, kag sang 1944, ginpadala ang mabuot gid nga si Edith Walker! Gindestino kami sa lainlain nga mga teritoryo sa sulod sang 16 ka tuig. Gani, nasubuan gid ako sang nagpauli sia sa Ohio bangod sang iya panglawason.

Indi Malipatan nga mga Pagpakamaayo

Tuhoy sa madamo kag makalilipay nga mga handumanan sadto nga mga tinuig, indi ko gid malipatan ang 13 anyos nga si Albertha, nga nagapuyo sa Conway kag nagaatipan sang iya paralisado nga lola kag duha ka manghod nga lalaki. Naluyagan niya ang mga kamatuoran sa Biblia nga gintudlo ko sa iya kag luyag man niya nga isugid ini sa iban. Naluyagan man niya ang pagpayunir, gani sang makatapos sia sing hayskul sang 1950, nagpayunir sia. Pagligad sang kapin sa 57 ka tuig, nagapayunir gihapon sia!

Sang 1951, gindestino kami ni Edith sa malip-ot nga tion sa Rock Hill, South Carolina, diin pila lamang ka Saksi ang nagapuyo. Pagkatapos sini, gindestino kami sing tatlo ka tuig sa Elberton, Georgia. Nian ginbalik kami sa South Carolina, diin nagpabilin ako halin sang 1954 tubtob 1962. Sa Walhalla, nakilala ko ang bungol nga tigulang nga babayi nga si Nettie, nga nagakabuhi sing isahanon sa isa ka uma. Kon magtuon kami, ginabasa niya anay ang parapo sa publikasyon, dayon ginatudlo ko ang pamangkot sa sina nga parapo sa ubos sang pahina, kag nian ginatudlo naman niya ang sabat sa parapo.

Kon may indi sia mahangpan, ginasulat niya ang iya pamangkot sa isa ka papel, kag nian ginasulat ko naman ang sabat sa ubos sini. Sang ulihi, naapresyar gid ni Nettie ang kamatuoran sa Biblia amo nga nagtambong sia sa mga miting sang kongregasyon kag nagpakigbahin sa pagpamalaybalay. Isahanon sia nga nagpamalaybalay, bisan pa nga sa masami, yara lang ako sa tabok-dalan kag handa magbulig sa iya kon kinahanglan.

Naguba ang akon daan nga salakyan sang didto ako sa Walhalla. May ginbaligya nga salakyan nga $100 lang, apang wala ako sing kuarta. Gani, ginpahulam ako sing $100 sang isa ka negosyante nga Saksi. Wala madugay pagkatapos sini, nakabaton ako sing wala ko gid ginapaabot nga sulat halin sa akon manghod nga babayi. Nagsiling sia nga bag-o lang nila nahibaluan sang akon mga utod nga may kuarta pa gali si Tatay sa bangko sang mapatay sia. Ginhambalan nila kon ano ang himuon sa sini, kag sila tanan naghilisugot nga ipadala ini sa akon. Eksakto gid ini nga $100!

Pagpayunir Upod sa Akon mga Anak

Sang bata pa sanday Eddie kag Bobby, pirme sila nagaupod sa akon sa pagbantala sa mga pamalay. Ang mga tawo sadto wala pa sing problema sa droga, kag indi pa mabaskog ang imoral nga mga impluwensia. Bangod sang paghupot nga simple sang amon kabuhi kag pagpabilin nga masako sa pagbantala nga hilikuton, nalikawan ko ang madamo  nga problema nga ginaatubang karon sang mga ginikanan sa pagpadaku sa ila mga anak nga mangin mga alagad ni Jehova.

Nakatapos si Eddie sing ikawalo nga grado sa Camden, kag pagkatapos sini nagpayunir sia upod sa akon. Masadya kami sa amon pagpayunir sa sulod sang pila ka tuig. Nian, nag-alagad sia sa bug-os kalibutan nga ulong-talatapan sang mga Saksi ni Jehova sa Brooklyn, New York, halin sang 1947 tubtob 1957. Sang 1958 nagpakasal sila ni Albertha, ang akon anay estudyante sa Biblia, kag nagpayunir sila. Daw ano gid nga kalipay sang magkaupod kami nga tatlo nga nag-eskwela sa Pioneer Service School sang 2004!

Indi ko gid malipatan ang pangamuyo ni Bobby kay Jehova sang gamay pa sia. Nagpangamuyo sia nga kabay nga buligan ako ni Jehova nga makakuha sing bastante nga gasolina para sa akon salakyan agod makadtuan ko ang akon mga ginatun-an sing Biblia. Ginpakita ni Bobby sa iya bug-os nga kabuhi nga naluyagan niya ang ministeryo, kag nagpayunir sia sing pila ka tuig. Sing makapasubo, nakaeksperiensia man si Bobby sing trahedya sa iya pamilya. Sang 1970, napatay ang iya asawa sang nagbata sia sa ila anak nga kapid. Mga duha ka tuig lang sila nga nag-asawahay. Lapitay lang ang amon balay ni Bobby, kag suod gid kami sa isa kag isa.

Nagapayunir Gihapon!

Sang 1962, gindestino ako sa kongregasyon nga ginapakig-updan ko karon sa Lumberton, North Carolina. Kap-atan kag lima ka tuig na ako diri. Mga otsentahon na ang akon edad sang nag-untat ako sa pagmaneho sing salakyan. Sa karon, isa ka Saksi nga pamilya nga nagapuyo malapit sa akon balay ang nagasugat kag nagadul-ong sa akon kon magtambong ako sa mga miting sang kongregasyon kag kon maggua ako sa pagbantala.

May walker ako kag wheelchair, apang wala ko ini ginagamit kay masarangan ko pa nga maglakat nga wala sing bisan ano nga bulig. Nagapasalamat ako kay Jehova nga ginhatagan niya ako sing maayo nga panglawason, apang sining karon lang, indi na ako tanto makakita. Kon maayo man lang ang akon pamatyag, wala gid ako nagapalya sa pagtambong sa mga miting sa kongregasyon, kag walay sapayan sang akon kahimtangan, ginhatagan ako sing pinasahi nga konsiderasyon nga makaregular payunir gihapon.

Bangod malipayon ako nga nagapayunir sa sulod sang kapin sa 70 ka tuig, masiling ko gid nga ginabuligan ako ni Jehova. * Ginabaton ko nga indi ako maalam ukon maabtik maggiho, apang nahibaluan ni Jehova kon ano ang akon masarangan kag indi. Nagapasalamat kag nalipay ako nga ginagamit niya ako.

Bangod utang namon kay Jehova ang tanan nga butang, importante para sa akon nga alagaron sia sing bug-os. Tubtob masarangan ko, luyag ko gihapon magpayunir. Isa gid ini ka makalilipay nga pribilehiyo! Ginapangamuyo ko nga gamiton ako ni Jehova tubtob sa walay katubtuban.

[Footnote]

[Piktyur sa pahina 13]

Ang salakyan nga gingamit namon nga mag-asawa sa amon pagpayunir

[Piktyur sa pahina 14]

Upod sa akon mga anak sang 1941

[Piktyur sa pahina 15]

Upod sanday Eddie kag Bobby sining karon lang