Pagpangita sing Espirituwalidad

SA IYA bantog nga Sermon sa Bukid, si Jesus nagsiling: “Malipayon ang mga mahunahunaon sang ila espirituwal nga kinahanglanon.” (Mateo 5:3, NW) Ayhan nagaugyon ka sa sini. Ginabaton sang mga tawo bisan diin nga kinahanglan nila ang espirituwalidad sa ila kabuhi kag nagapati sila nga sa tion nga matigayon nila ini, magapahalipay ini sa ila. Apang, ano ang kahulugan sang tinaga nga “espirituwalidad”?

Suno sa isa ka diksionaryo, ang kahulugan sang espirituwalidad amo ang “pagkilala ukon pag-apresyar sa relihioso nga mga prinsipio” kag “ang kinaiya ukon kahimtangan subong espirituwal [nga tawo].” Busa, ang mga tinaga subong sang “espirituwalidad,” “espirituwal,” ukon “mahunahunaon sa espirituwal nga mga butang” ginatamod nga magkapareho sing kahulugan. Agod labi pa ini nga mahangpan, hunahunaa ini nga paanggid: Ang isa ka tawo nga sampaton sa negosyo ginasiling nga mahunahunaon sa negosyo. Subong man, ang isa ka tawo nga nagapabalor gid sa mga butang nga may kaangtanan sa pagpati sa Dios ginatawag nga mahunahunaon sa espirituwal nga mga butang.

Paano, nian, matigayon ang matuod nga espirituwalidad? Bisan pa nagasiling ang halos tanan nga relihion nga nahibaluan nila kon paano paayawan ang espirituwal nga kinahanglanon sang isa ka tawo, ang tagsatagsa lainlain sing ginasiling. Isa ka Protestante ang nagasiling nga ang kaluwasan matigayon paagi sa pagtambong sa mga miting nga nagapapagsik sang pagpati sa Dios. Isa ka Katoliko ang nagapangalawat sa Dios sa Misa. Isa ka Budhista ang nagapangita sing kasanagan paagi sa pagpamalandong. Isa ka Hindu ang nagapanikasog nga mahilway gikan sa siklo sang pagkabun-ag liwat paagi sa pagdingot sa kaugalingon. Tanan bala ini amo ang banas padulong sa matuod nga espirituwalidad? Ukon ang isa bala sini?

Para sa madamo, ang sabat sa sini nga mga pamangkot amo ang indi. Nagapati sila nga ang espirituwalidad amo ang pagpati sa isa ka dios kag indi na kinahanglan nga mangin katapo sang isa ka relihion. Nagapati naman ang iban nga ang espirituwalidad indi ang mabakod nga pagtuo sa Dios kundi ang handum nga matigayon ang kalinungan sa kaugalingon kag ang katuyuan sa kabuhi. Nagasiling sila nga indi kinahanglan sang isa nga nagapangita sing espirituwalidad ang relihion. Sa baylo, kinahanglan lamang nila nga usisaon kon ano gid ang ila ginabatyag. Ang isa ka manunulat nagsiling: “Ang matuod nga espirituwalidad isa ka butang nga masapwan sa aton mismo kaugalingon. Ini amo ang imo paagi sa paghigugma, pagbaton kag pagpakig-angot sa kalibutan kag sa mga tawo sa imo palibot. Indi ini masapwan sa isa ka relihion ukon paagi sa pagpati sa pila ka panudlo sang relihion.”

Maathag gid nga lainlain ang opinyon sang mga tawo tuhoy sa espirituwalidad. Linibo ka libro ang nagapangangkon nga nagatudlo sang dalan padulong sa espirituwalidad, apang sa masami ang mga bumalasa nagabatyag gihapon nga indi kontento kag indi makahangop. Apang, isa ka libro ang may yara masaligan nga panuytoy tuhoy sa espirituwal nga mga butang. Ini amo ang libro nga nagahatag sing ebidensia nga inspirado ini sang Dios. (2 Timoteo 3:16) Usisaon naton ang ginasiling sina nga libro, ang Biblia, tuhoy sa kahulugan sang espirituwalidad kag sa balor sini.