Ang Pulong ni Jehova Buhi

Talalupangdon nga mga Punto Gikan sa Tulun-an sang Ezequiel​—II

DISIEMBRE 609 B.C.E. Ginsugdan sang hari sang Babilonia ang iya katapusan nga paglikop sa Jerusalem. Ang nauna nga mensahe ni Ezequiel sa mga tinapok sa Babilonia nasentro sa isa ka tema: ang pagpukan kag paglaglag sa ila hinigugma nga siudad, ang Jerusalem. Apang karon, ang nangin tema sang tagna ni Ezequiel amo ang paglaglag sa pagano nga mga pungsod nga nagkasadya sang ginlaglag ang katawhan sang Dios. Sang mapukan ang Jerusalem pagligad sang 18 ka bulan, nag-bag-o liwat ang tema sang mensahe ni Ezequiel: ang makalilipay nga pagpasag-uli sa matuod nga pagsimba.

Ang Ezequiel 25:1–48:35 nagaunod sing mga tagna tuhoy sa mga pungsod sa palibot sang Israel kag sa pagluwas sa katawhan sang Dios. * Magluwas sa Ezequiel 29:17-20, ang rekord nagapasunod suno sa petsa kag suno man sa tema. Apang, ining apat ka bersikulo indi pasunod sing petsa kundi bahin sang tagna batok sa Egipto. Subong bahin sang inspirado nga Kasulatan, ang tulun-an sang Ezequiel may “buhi kag gamhanan” nga mensahe.—Hebreo 4:12.

‘INING DUTA MANGINKAANGAY SANG KATAMNAN SANG EDEN’

(Ezequiel 25:1–39:29)

Samtang ginapanan-aw ang ila reaksion tuhoy sa pagpukan sa Israel, ginpatagna ni Jehova si Ezequiel batok sa Amon, Moab, Edom, Filistia, Tiro, kag Sidon. Ang Egipto atihon. ‘Si Faraon nga hari sang Egipto kag ang iya kadam-an’ ginapaanggid sa sedro nga pudlon paagi sa “espada sang hari sang Babilonia.”—Ezequiel 31:2, 3, 12; 32:11, 12.

Mga anom ka bulan pagkatapos malaglag ang Jerusalem sang 607 B.C.E., ang nakapalagyo nag-abot kag nagreport kay Ezequiel: “Ang banwa naagaw!” ‘Indi na apa’ ang manalagna sa mga tinapok. (Ezequiel 33:21, 22) Ipahayag niya ang mga tagna tuhoy sa pagpasag-uli. “Magabutang [si Jehova] sing isa ka manugpahalab sa ila, ang [iya] alagad nga si David.” (Ezequiel 34:23) Ang Edom hapayon, kag ining duta, ang Juda, ‘manginkaangay sang katamnan sang Eden.’ (Ezequiel 36:35) Nangako si Jehova nga amligan niya ang iya ginpasag-uli nga katawhan gikan sa pagsalakay ni “Gog.”—Ezequiel 38:2.

Sabat sa mga Pamangkot sa Kasulatan:

29:8-12—San-o ginhapay ang Egipto sing 40 ka tuig? Sang malaglag ang Jerusalem sang 607 B.C.E., ang nagkalabilin sang Juda nagpalagyo padulong sa Egipto walay sapayan sang paandam ni manalagna Jeremias. (Jeremias 24:1, 8-10; 42:7-22) Wala gihapon sia nakapalagyo sa mga Babilonianhon, kay si Nabocodonosor nakig-away batok sa Egipto kag ginlutos ini. Mahimo nga pagkatapos sini nga pagkalutos nga ang Egipto nahapay sing 40 ka tuig. Bisan pa wala sing pamatuod ang sekular nga maragtas sa sini nga paghapay, makasalig kita nga natabo gid ini bangod si Jehova amo ang Manugtuman sang tagna.—Isaias 55:11.

29:18—Paano ang ‘tagsa ka olo naupaw kag ang tagsa ka abaga nadul-ak’? Ang paglikop sa suludlon nga siudad sang Tiro tuman gid kabudlay amo nga naupaw ang mga ulo sang mga hangaway ni Nabocodonosor bangod sang pagsulusag-id sang ila mga helmet kag nadul-ak ang ila mga abaga bangod sang pagpas-an sing mga materyales nga gamiton sa pagpatindog sing mga torre kag mga kuta.—Ezequiel 26:7-12.

 Mga Leksion Para sa Aton:

29:19, 20. Bangod nagpalagyo ang mga taga-Tiro padulong sa ila siudad nga pulo dala ang ila madamo nga manggad, diutay lang ang naati ni Hari Nabocodonosor sa Tiro. Walay sapayan nga si Nabocodonosor bugalon kag maiyaiyahon nga pagano nga manuggahom, ginpadyaan sia ni Jehova tungod sang iya serbisyo kag ginhatag sa iya ang Egipto subong ‘suhol sa iya mga hangaway.’ Kon nagabayad kita sing mga buhis sa mga panguluhan bangod sang mga serbisyo nila sa aton, ginailog naton ang matuod nga Dios. Obligasyon naton ini bisan ano pa ang ginahimo sang sekular nga mga awtoridad ukon bisan diin nila ginagamit ang mga buhis.—Roma 13:4-7.

33:7-9. Ang modernong-adlaw nga manugbantay nga klase—ang hinaplas nga nagkalabilin—kag ang iya mga kaupdanan indi gid dapat mag-isol sa pagbantala sing maayong balita sang Ginharian kag sa pagpaandam sa mga tawo tuhoy sa nagapakari nga “dakung kapipit-an.”—Mateo 24:21.

33:10-20. Matigayon lamang naton ang kaluwasan kon talikdan naton ang malain nga dalanon kag sundon ang ginapatuman sang Dios. Sa pagkamatuod, ang dalanon ni Jehova amo ang husto.

36:20, 21. Bangod sang indi nila pagkabuhi suno sa pagkakilala sa ila subong “katawohan sang GINOO,” ginpasipalahan sang mga Israelinhon ang ngalan sang Dios sa tunga sang mga pungsod. Indi gid dapat nga mangin mga sumilimba kita ni Jehova sa ngalan lamang.

36:25, 37, 38. Ang espirituwal nga paraiso nga ginaagom naton karon puno sang “panong nga sa halad.” Busa, dapat naton panikasugan nga huptan ini nga matinlo.

38:1-23. Daw ano gid ka makalilipay mahibaluan nga luwason ni Jehova ang iya katawhan gikan sa pagsalakay ni Gog sang duta sang Magog! Ang Gog amo ang ngalan nga ginhatag sa “punoan sini nga kalibutan,” si Satanas nga Yawa, sang gintabog sia sa langit. Ang duta sang Magog nagapatuhoy sa palibot sang duta, diin gintagbong si Satanas kag ang iya mga demonyo.—Juan 12:31; Bugna 12:7-12.

“IHUYUG ANG IMO TAGIPOSOON SA TANAN NGA IPAKITA KO SA IMO”

(Ezequiel 40:1–48:35)

Ini ang ika-14 nga tuig pagkatapos ginlaglag ang siudad sang Jerusalem. (Ezequiel 40:1) Mangin tinapok sila sing kalim-an kag anom pa ka tuig. (Jeremias 29:10) Mga 50 anyos na si Ezequiel. Nakita niya sa palanan-awon nga gindala sia sa pungsod sang Israel. Ginsilingan sia: “Anak sang tawo, tan-awa sang imo mga mata, kag pamatii sang imo idulungug, kag ihuyug ang imo tagiposoon sa tanan nga ipakita ko sa imo.” (Ezequiel 40:2-4) Nalipay gid si Ezequiel nga nakabaton sia sing isa ka palanan-awon tuhoy sa bag-o nga templo!

Ang matahom nga templo nga nakita ni Ezequiel may yara 6 ka ganhaan, 30 ka hulot-kalan-an, ang Balaan, ang Labing Balaan, kahoy nga halaran, kag halaran para sa mga halad nga sinunog. Nagailig ‘gikan’ sa templo ang tubig nga nangin kasulgan. (Ezequiel 47:1) Nakabaton man si  Ezequiel sing palanan-awon tuhoy sa pagbahinbahin sang duta sa mga tribo—ang tagsa ka bahin halin sa sidlangan pakatundan kag nagasakop sang mga bahin sa ulot sang Juda kag Benjamin. Diri nahamtang “ang santuario sang GINOO” kag “ang banwa” nga ginhingalanan nga Si Jehova Mismo Yadto Didto.—Ezequiel 48:9, 10, 15, 35.

Sabat sa mga Pamangkot sa Kasulatan:

40:3–47:12—Ano ang ginalaragway sang templo sa palanan-awon ni Ezequiel? Ining daku kaayo nga templo nga nakita ni Ezequiel sa palanan-awon wala gid matukod. Naglaragway ini sa espirituwal nga templo sang Dios—sa iya tulad-templo nga kahimusan para sa matuod nga pagsimba sa panahon naton. (Ezequiel 40:2; Miqueas 4:1; Hebreo 8:2; 9:23, 24) Ang templo sa palanan-awon natuman sa “katapusan nga mga adlaw,” sang gin-ulay ang pagkasaserdote. (2 Timoteo 3:1; Ezequiel 44:10-16; Malaquias 3:1-3) Apang, may katapusan ini nga katumanan sa Paraiso. Ang templo sa palanan-awon isa ka garantiya sa Judiyo nga mga tinapok nga ang matuod nga pagsimba ipasag-uli kag ang tagsa ka Judiyo nga pamilya may yara palanublion sa duta.

40:3–43:17—Ano ang kahulugan sang pagtakus sa templo? Ang pagtakus sa templo isa ka tanda nga ang katuyuan ni Jehova tuhoy sa matuod nga pagsimba pat-od gid nga matuman.

43:2-4, 7, 9—Ano “ang mga bangkay sang ila mga hari” nga dapat kuhaon gikan sa templo? Ang mga bangkay maathag nga nagapatuhoy sa mga idolo. Gindagtaan sang mga manuggahom sang Jerusalem kag sang iya katawhan ang templo sang Dios sing mga idolo—kon sa aton pa, ginhimo ini nga mga hari nila.

43:13-20—Ano ang ginalaragway sang halaran nga nakita ni Ezequiel sa palanan-awon? Ang malaragwayon nga halaran amo ang kabubut-on sang Dios may kaangtanan sa halad gawad ni Jesucristo. Bangod sini nga aman, ang mga hinaplas ginpahayag nga matarong kag ang “dakung kadam-an” matinlo kag putli sa itululok sang Dios. (Bugna 7:9-14; Roma 5:1, 2) Ayhan amo ini kon ngaa ang “dagat nga tinunaw” sang templo ni Solomon—ang daku nga batya sang tubig para hulugasan sang mga saserdote—wala sa templo sa palanan-awon.—1 Hari 7:23-26.

44:10-16—Sin-o ang ginalaragway sang saserdotenhon nga klase? Ang saserdotenhon nga klase nagalaragway sa grupo sang hinaplas nga mga Cristiano sa panahon naton. Ang pag-ulay sa ila natabo sang 1918 sang naglingkod si Jehova subong “manugtunaw kag manug-ulay” sa iya kahimusan para sa putli nga pagsimba. (Malaquias 3:1-5) Mahimo padayunon sang mga matinlo ukon sang mga naghinulsol ang ila pinasahi nga pribilehiyo sa pag-alagad. Nian, dapat nila panikasugan nga huptan ang ila kaugalingon nga “walay dagta sa sining kalibutan,” sa amo mangin mga huwaran sa “dakung kadam-an,” nga ginalaragway sang indi saserdotenhon nga mga tribo.—Santiago 1:27; Bugna 7:9, 10.

45:1; 47:13–48:29—Ano ang ginalaragway sang “duta” kag sang pagbahinbahin sini? Ang duta nagalaragway sa kasangkaron sang hilikuton sang katawhan sang Dios. Bisan diin ang isa ka sumilimba ni Jehova, yara sia sa ginpasag-uli nga duta mientras ginasakdag niya ang matuod nga pagsimba. Ang pagbahinbahin sa duta may yara katapusan nga katumanan sa bag-ong kalibutan sa tion nga ang  tagsa ka matutom nga tawo makapanubli sing isa ka duog.—Isaias 65:17, 21.

45:7, 16—Ano ang ginalaragway sang pag-amot sang mga tawo para sa pagkasaserdote kag pagkapangulo? Nagapatuhoy ini ilabi na sa pagsakdag kag sa pagkooperar sa mga kahimusan sang Dios para sa matuod nga pagsimba.

47:1-5—Ano ang ginalaragway sang tubig sa suba nga nakita ni Ezequiel sa palanan-awon? Ang tubig nagalaragway sa mga kahimusan ni Jehova para sa kabuhi, lakip na ang halad gawad ni Cristo Jesus kag ang ihibalo tuhoy sa Dios nga masapwan sa Biblia. (Jeremias 2:13; Juan 4:7-26; Efeso 5:25-27) Ang suba amat-amat nga nagadalom agod maamanan ang pagdagsa sang mga bag-uhan nga nagabaton sang matuod nga pagsimba. (Isaias 60:22) Magailig sa suba ang labing masulog nga tubig sang kabuhi sa tion sang Milenyo, kag lakip sa mga tubig sini amo ang dugang pa nga paghangop sa “mga tolon-an” nga buksan sa sina nga tion.—Bugna 20:12; 22:1, 2.

47:12—Ano ang ginalaragway sang nagapamunga nga mga kahoy? Ang malaragwayon nga mga kahoy nagalaragway sa espirituwal nga mga aman sang Dios agod mapasag-uli ang katawhan sa kahimpitan.

48:15-19, 30-35—Ano ang ginalaragway sang siudad sa palanan-awon ni Ezequiel? “Ang siudad” nahamtang sa duta nga “indi balaan” [NW], kag nagapahangop nga nagalaragway ini sa isa ka butang nga dutan-on. Ang siudad daw nagalaragway sa dutan-on nga pagdumalahan nga may mga benepisyo sa magahuman sa matarong nga “bag-ong duta.” (2 Pedro 3:13) Bangod bukas ang mga ganhaan sa tanan nga bahin, ini nagakahulugan nga madali ini kadtuan. Ang mga manugtatap sa tunga sang katawhan sang Dios dapat nga mahapos palapitan.

Mga Leksion Para sa Aton:

40:14, 16, 22, 26. Ang mga larawan sang mga palma sa mga dingding sa mga gawang nagapakita nga ang mga matarong lamang ang ginatugutan sa pagsulod. (Salmo 92:12) Nagatudlo ini sa aton nga ang aton pagsimba kalahamut-an lamang kay Jehova kon matarong kita.

44:23. Nagapasalamat gid kita sa mga serbisyo sang modernong-adlaw nga saserdotenhon nga klase! Ang “ulipon nga matutum kag mainandamon” nagapanguna sa pag-aman sing suno-sa-tion nga espirituwal nga pagkaon nga nagabulig sa aton nga mahantop kon ano ang di-matinlo kag kon ano ang matinlo sa itululok ni Jehova.—Mateo 24:45.

47:9, 11. Sa panahon naton, ang ihibalo—nga isa ka importante nga bahin sang malaragwayon nga tubig—nagapang-ayo. Bisan diin man ini kuhaon, nagahatag ini sing kabuhi sa mga tawo nga malambutan sini bangod nagabulig ini sa ila nga makatigayon sing suod nga kaangtanan sa Dios. (Juan 17:3) Sa pihak nga bahin, ang mga nagasikway sa tubig nga nagahatag sing kabuhi ‘itugyan sa asin’—laglagon sing permanente. Importante gid nga ‘magtinguha kita sing maayo gid sa paggamit sing matadlong sang polong sang kamatooran’!—2 Timoteo 2:15.

“Pakabalaanon Ko ang Akon Dakung Ngalan”

Sang ginpahalin ang katapusan nga hari sa kaliwat ni David, ginpaligad anay sang matuod nga Dios ang malawig nga tion antes sang pagkari sang Isa nga “may kinamatarung” sa paghari. Apang, wala ginsikway sang Dios ang pagpakigkatipan niya kay David. (Ezequiel 21:27; 2 Samuel 7:11-16) Ginasambit sang tagna ni Ezequiel ang tuhoy sa “akon alagad nga si David,” nga mangin “manugpahalab” kag “hari.” (Ezequiel 34:23, 24; 37:22, 24, 25) Ini sia wala sing liwan kundi si Jesucristo nga magahari sa Ginharian. (Bugna 11:15) “Pakabalaanon [ni Jehova ang iya] dakung ngalan” paagi sa Mesianikong Ginharian.—Ezequiel 36:23.

Sa indi na gid lang madugay, ang tanan nga nagapasipala sa balaan nga ngalan sang Dios laglagon. Apang ang mga nagapakabalaan sini nga ngalan sa ila kabuhi paagi sa pagsimba kay Jehova sing kalahamut-an magabaton sing kabuhi nga walay katapusan. Busa, himuslan naton ang mga tubig sang kabuhi nga nagailig sing masulog sa aton adlaw kag himuon naton ang matuod nga pagsimba nga pinakaimportante gid sa aton kabuhi.

[Footnote]

[Piktyur sa pahina 9]

Ang mahimayaon nga templo sa palanan-awon ni Ezequiel

[Piktyur sa pahina 10]

Ano ang ginalaragway sang suba sang kabuhi sa palanan-awon ni Ezequiel?

[Credit Line]

Pictorial Archive (Near Eastern History) Est.