Pagsulat​—Ang Importansia Sini sa Dumaan nga Israel

NABASA mo na bala ang Iliad ukon ang Odyssey, ang duha ka bantog nga sugilanon sang mga baganihan sang dumaan nga Gresya? Ginapatihan nga ginsulat ini mga 2,800 ukon 2,700 ka tuig na ang nagligad. Ano ang kinatuhayan sini sa Biblia, nga ginsulat siniglo pa antes nahimo ini nga mga sinulatan? Ang libro nga The Jewish Bible and the Christian Bible nagsiling: “Ang Biblia nagsambit sang indi magkubos sa 429 ka mga sinulatan kag dokumento. Talalupangdon gid ini kay ang Iliad nagsambit sing isa lamang ka sinulatan samtang ang Odyssey wala gid.”

Ginapaathag sang The Oxford Encyclopedia of Archaeology in the Near East nga “ang pagsulat mahimo nga nangin daku nga bahin sang pagsimba sang Israel sang una.” Halimbawa, ang Kasuguan nga katipan ginsulat kag sang ulihi dayag nga ginbasa sing regular sa bug-os nga katawhan, nga nagalakip sa mga lalaki, mga babayi kag kabataan. Ginbasa man ini kag gintun-an subong grupo kag subong indibiduwal. Sa tapos mabinagbinag ang pila ka bahin sang Kasuguan, ang propesor nga si Alan Millard sang University of Liverpool naghinakop: “Ang pagbasa kag pagsulat dayag nga nagaapektar sa kabuhi sang tanan nga Israelinhon.”—Deuteronomio 31:9-13; Josue 1:8; Nehemias 8:13-15; Salmo 1:2.

Ginpaathag ni apostol Pablo kon paano dapat tamdon sang mga Cristiano ang balaan nga mga sinulatan: “Kay ang bisan ano nga nasulat sadto anay ginsulat sa pagtudlo sa aton, agud nga paagi sa pagkalig-on kag pagpabakud sang mga kasulatan may paglaum kita.” Regular mo bala nga ginabasa ang Biblia agod ipakita nga ginaapresyar mo ini?—Roma 15:4.