Tudlui ang Inyo mga Anak nga Higugmaon si Jehova
Tudlui ang Inyo mga Anak nga Higugmaon si Jehova
“Subong sang mga baslay sa kamut sang gamhanan nga tawo amo man ang mga anak sang pagkapamatan-on.”—SALMO 127:4.
1, 2. Paano ang mga anak subong sang “mga baslay sa kamut sang gamhanan nga tawo”?
ISA ka manugpana ang nagahanda sa pagpana. Agod maigo ang iliguon, mahalungon nga ginplastar niya ang baslay kag bug-os kusog nga gin-unat ang pana. Walay sapayan sini, mahalungon kag mapailubon niya nga ginpuntariya ang baslay. Nian ginbuy-an niya ini! Maigo gid bala sang baslay ang iliguon? Ang sabat nagadepende sa pila ka butang, kag lakip sa sini amo ang kalantip sang manugpana, ang epekto sang hangin, kag ang kondisyon sang baslay.
2 Ginpaanggid ni Hari Solomon ang mga anak sa “mga baslay sa kamut sang gamhanan nga tawo.” (Salmo 127:4) Binagbinaga kon paano mahimo iaplikar ini nga ilustrasyon. Wala ginapadugay sang manugpana ang baslay sa iya pana. Dapat niya ini buy-an sing maabtik agod maigo niya ang iliguon. Sing kaanggid, ang tion sang mga ginikanan sa pagpalambo sang tinagipusuon nga gugma kay Jehova sa ila mga anak tuman lang kalip-ot. Pagligad sinang daw tuman lang kalip-ot nga tion, ang mga anak magahamtong kag magadesisyon para sa ila kaugalingon. (Mateo 19:5) Maigo bala nila ang iliguon? Buot silingon, padayon bala nila nga higugmaon kag alagaron ang Dios kon maghamtong na sila? Ang sabat nagadepende sa madamo nga butang. Ang tatlo sa sini amo ang kalantip sang ginikanan, ang kahimtangan diin magadaku ang mga anak, kag ang pagbaton sang “baslay,” ukon sang bata, sa paghanas sa iya. Usisaon naton sing detalyado ang kada isa sini. Una, binagbinagon naton ang pila ka kinaiya sang isa ka lantip nga ginikanan.
Ang Lantip nga mga Ginikanan Nagapahamtang sing Maayo nga Halimbawa
3. Ngaa dapat himuon sang mga ginikanan ang ila ginahambal?
3 Si Jesus isa ka halimbawa para sa mga ginikanan bangod ginhimo niya kon ano ang iya gintudlo. (Juan 13:15) Sa pihak nga bahin, ginpakamalaut niya ang mga Fariseo, nga “nagawali” apang “wala nagahimo.” (Mateo 23:3) Agod buyukon ang mga anak nga higugmaon si Jehova, dapat himuon sang mga ginikanan ang ila ginahambal. Ang hambal nga wala sing buhat walay pulos kag daw subong ini sang baslay nga wala sing pana.—1 Juan 3:18.
4. Ano ang dapat ipamangkot sang mga ginikanan sa ila kaugalingon, kag ngaa?
4 Ngaa ang halimbawa sang mga ginikanan importante gid? Subong nga ang mga hamtong makatuon nga higugmaon ang Dios paagi sa pag-ilog sa halimbawa ni Jesus, makatuon man ang mga anak nga higugmaon si Jehova paagi sa pag-ilog sa maayo nga halimbawa sang ila mga ginikanan. Ang mga kaupod sang isa ka bata mahimo nga makapabakod sa iya ukon ‘makadunut sang maayo nga mga pamatasan.’ (1 Corinto 15:33) Sa importante gid nga mga tinuig nga nagadaku ang isa ka bata, ang pinakasuod kag may pinakadaku sing impluwensia nga mga kaupod niya amo ang iya mga ginikanan. Gani, dapat pamangkuton sang mga ginikanan ang ila kaugalingon: ‘Ano bala ako nga sahi sang kaupod? Ang akon bala halimbawa nagapalambo sing maayo nga mga pamatasan sa akon mga anak? Ano nga halimbawa ang akon ginapahamtang sa importante gid nga mga butang bahin sa pangamuyo kag pagtuon sa Biblia?’
Ang Lantip nga mga Ginikanan Nagapangamuyo Upod sa Ila mga Anak
5. Ano ang matun-an sang mga anak gikan sa mga pangamuyo sang ginikanan?
5 Madamo sing matun-an ang inyo mga anak tuhoy kay Jehova paagi sa pagpamati sa inyo mga pangamuyo. Kon mabatian nila ang inyo pagpasalamat sa Dios sa tion sang pagkaon kag ang inyo pangamuyo sa tion sang pagtuon sa Biblia, ano ang mahinakop nila? Matun-an nila nga si Jehova amo ang nagaaman sang aton pisikal nga mga kinahanglanon—nga tungod sini dapat sia pasalamatan—kag ginatudluan niya kita sang mga kamatuoran sa Biblia. Bilidhon gid ini nga mga leksion.—Santiago 1:17.
6. Paano mabuligan sang mga ginikanan ang mga anak nga mabatyagan nga interesado si Jehova sa ila subong mga indibiduwal?
6 Apang, kon wala labot sa tion sang pagkaon kag sang pangpamilya nga pagtuon sa Biblia, ginasambit ninyo sa inyo mga pangamuyo upod sa inyo pamilya ang espesipiko nga mga butang may kaangtanan sa inyo kag sa inyo mga anak, labi pa gid ang matigayon ninyo. Mabuligan ninyo ang inyo mga anak nga mabatyagan nga si Jehova bahin sang inyo pamilya, kag nagaulikid gid sia sa tagsatagsa sa inyo. (Efeso 6:18; 1 Pedro 5:6, 7) Ang isa ka amay nagsiling: “Sugod sang matawo ang amon anak nga babayi, kaupod namon sia sa pagpangamuyo. Sang magdaku na sia, ginpangamuyo namon ang tuhoy sa nagakaigo nga pagpakig-upod kag sa iban pa nga mga butang nga may kaangtanan sa iya. Adlaw-adlaw kami nga nagapangamuyo upod sa iya tubtob nga namana sia.” Makapangamuyo man bala kamo upod sa inyo mga anak kada adlaw? Mabuligan bala ninyo sila nga tamdon si Jehova subong Abyan, nga wala lamang nagaaman sang ila pisikal kag espirituwal nga mga kinahanglanon, kundi interesado man sa ila emosyonal nga mga kinahanglanon?—Filipos 4:6, 7.
7. Agod mangin espesipiko ang ila mga pangamuyo, ano ang dapat mahibaluan sang mga ginikanan?
7 Apang, agod mangin espesipiko ang inyo mga pangamuyo, dapat ninyo mahibaluan ang nagakatabo sa inyo anak. Talupangda ang komento sang isa ka amay nga may duha ka anak nga babayi: “Pagkatapos sang tagsa ka semana, ginapamangkot ko ang akon kaugalingon sing duha ka pamangkot: ‘Ano nga mga butang ang ginkabalak-an sang akon mga anak sini nga semana? Kag anong maayo nga mga butang ang natabo sa ila?’” Mga ginikanan, mapamangkot man bala ninyo ini sa inyo kaugalingon kag nian malakip ang pila ka sabat sa inyo mga pangamuyo upod sa inyo mga anak? Kon himuon ninyo ini, wala lamang ninyo sila ginatudluan nga magpangamuyo kay Jehova, nga amo ang Nagapamati sang pangamuyo, kundi nga higugmaon man sia.—Salmo 65:2.
Ang Lantip nga mga Ginikanan Nagapalig-on sing Maayo nga Ugali sa Pagtuon
8. Ngaa dapat buligan sang mga ginikanan ang ila mga anak nga ugalion ang pagtuon sa Pulong sang Dios?
8 Paano ang opinyon sang ginikanan sa pagtuon sa Biblia makaimpluwensia sa kaangtanan sang bata sa Dios? Agod maglambo kag magpabilin ang bisan ano nga kaangtanan sa ulot sang duha ka indibiduwal, indi lamang sila dapat maghambalanay kundi magpamati man sa isa kag isa. Ang isa sa mga paagi nga mapamatian naton si Jehova amo ang pagtuon sa Biblia sa bulig sang mga publikasyon nga gin-aman sang ‘matutum nga ulipon.’ (Mateo 24:45-47; Hulubaton 4:1, 2) Busa, agod mapalambo sang mga anak ang dayon kag mahigugmaon nga kaangtanan kay Jehova, dapat sila palig-unon sang mga ginikanan nga ugalion ang pagtuon sa Pulong sang Dios.
9. Paano mapalambo sang mga anak ang maayo nga ugali sa pagtuon?
9 Paano mapalambo sang mga anak ang maayo nga ugali sa pagtuon? Sa liwat, paagi sa maayo gid nga halimbawa sang mga ginikanan. Pirme bala kamo makita sang inyo mga anak nga nagabasa ukon nagatuon sa Biblia? Mahimo masako gid kamo sa pag-atipan sa inyo mga anak, kag daw wala na kamo sing tiempo sa pagbasa kag sa pagtuon. Apang pamangkuta ang inyo kaugalingon, ‘Pirme bala ako makita sang akon mga anak nga nagatan-aw sing telebisyon?’ Kon amo, magamit bala ninyo ang iban sina nga tion agod makapahamtang sa ila sing maayo nga halimbawa bahin sa personal nga pagtuon?
10, 11. Ngaa kinahanglan gid ang regular nga pangpamilya nga pagtuon sa Biblia?
10 Ang isa pa ka praktikal nga paagi nga matudluan sang mga ginikanan ang mga anak sa pagpamati kay Jehova amo ang regular nga pangpamilya nga pagtuon sa Biblia. (Isaias 30:21) Apang, ang iban mahimo mamangkot, ‘Ngaa kinahanglan sang mga anak ang pangpamilya nga pagtuon kon regular naman sila nga ginaupod sang ila mga ginikanan sa mga miting sang kongregasyon?’ May yara madamong maayo nga mga rason. Ginahatagan ni Jehova ang mga ginikanan sing panguna nga salabton nga tudluan ang ila mga anak. (Hulubaton 1:8; Efeso 6:4) Ang pangpamilya nga pagtuon sa Biblia nagatudlo sa mga anak nga ang pagsimba indi isa ka pormal nga kinabatasan nga ginahimo lamang sing dayag, kundi bahin ini sang pribado nga kabuhi sang pamilya.—Deuteronomio 6:6-9.
11 Dugang pa, paagi sa isa ka maayo gid nga pangpamilya nga pagtuon, mahibaluan sang mga ginikanan kon ano ang ginahunahuna sang ila mga anak tuhoy sa espirituwal kag moral nga mga butang. Halimbawa, kon ang mga anak bata pa, magamit sang mga ginikanan ang libro nga Magtuon Gikan sa Daku nga Manunudlo. * Sa halos kada parapo sining bulig sa pagtuon sa Biblia, ang mga kabataan ginapangabay sa pagkomento tuhoy sa mga topiko nga ginahambalan. Paagi sa pagpangatarungan sa mga kasulatan nga ginasambit sa libro, mabuligan sang mga ginikanan ang ila mga anak sa pagpalambo sang ila ikasarang “sa pagpain sang maayo gikan sa malaut.”—Hebreo 5:14.
12. Paano mahimo ibagay sang mga ginikanan ang pangpamilya nga pagtuon sa mga kinahanglanon sang bata, kag ano ang nakita mo nga epektibo may kaangtanan sini?
12 Samtang nagadaku ang inyo mga anak, ibagay ang pagtuon sa ila mga kinahanglanon. Talupangda kon paano ginbuligan sang isa ka mag-asawa ang ila tin-edyer nga mga anak nga babayi sa pagpangatarungan sang naghingyo sila nga makadto sa isa ka binayle sa eskwelahan. Ang amay nagsiling: “Ginsingganan namon ang amon mga anak nga sa isa ka bahin sang amon masunod nga pagtuon subong pamilya, kami nga mag-asawa magatungod sang ila papel subong mga anak, kag sila naman magatungod sang amon papel subong mga ginikanan. Sila ang mamat-od kon sin-o ang Tatay ukon Nanay sa ila nga duha, apang dapat sila magbuligay sa pagpanalawsaw kag sa pagpangatarungan kon ano ang dapat himuon bahin sa mga binayle sa eskwelahan.” Ano ang resulta? “Nakibot gid kami kon daw ano kaayo nga gintungdan sang amon mga anak ang ila papel subong mga ginikanan samtang ginapaathag nila sa amon (subong mga anak) ang ila pasad-sa-Biblia nga mga rason kon ngaa indi maayo nga magkadto sa binayle,” padayon sang amay. “Nagdayaw pa gid kami sa ila mga panugda kon ano ang mahimo ibulos sa binayle. Paagi sini, nahantop gid namon ang ila panghunahuna kag luyag.” Walay sapayan nga kinahanglan ang kaukod kag pagkamapahituon agod huptan nga regular ang pangpamilya nga pagtuon kag ibagay ini sa mga kinahanglanon sang pamilya, ang mga benepisyo takus gid sa mga panikasog.—Hulubaton 23:15.
Panikasugi nga Mangin Malinong ang Puluy-an
13, 14. (a) Paano mapanikasugan sang mga ginikanan nga mangin malinong ang puluy-an? (b) Ano ang maayo nga resulta kon batunon sang ginikanan ang iya kasaypanan?
13 Mahimo gid nga maigo sang baslay ang iliguon kon ginapuntariya kag ginabuy-an ini sang manugpana sa malinong nga paniempo. Sing kaanggid, mahimo gid nga matun-an sang mga anak nga higugmaon si Jehova kon panikasugan sang mga ginikanan nga mangin malinong ang puluy-an. “Ang bunga sang pagkamatarung ginasab-ug sa paghidait sang mga nagapakighidait,” sulat ni Santiago. (Santiago 3:18) Paano mapanikasugan sang mga ginikanan nga mangin malinong ang puluy-an? Dapat huptan sang mag-asawa ang isa ka maayo kag mabakod nga kaangtanan. Matudluan gid sang mag-asawa ang ila mga anak nga higugmaon kag tahuron ang iban, lakip na si Jehova, kon maghigugmaanay man sila kag may pagtahod sa isa kag isa. (Galacia 6:7; Efeso 5:33) Ang gugma kag pagtahod nagapaluntad sing paghidait. Kag mahapos malubad sang mag-asawa nga may paghidait sa isa kag isa ang mga di-paghangpanay nga mahimo mag-utwas sa pamilya.
14 Sa pagkamatuod, bangod wala sing himpit nga mga pag-asawahay, wala man karon sing himpit nga mga pamilya sa duta. Mahimo nga indi mapakita kon kaisa sang mga ginikanan ang bunga sang espiritu kon nagapakig-angot sa ila mga anak. (Galacia 5:22, 23) Kon matabo ina, ano ang dapat himuon sang mga ginikanan? Kon batunon nila nga nagsayop sila, mabuhinan bala ang pagtahod sang bata sa ila? Binagbinaga ang halimbawa ni apostol Pablo. Kaangay sia sang isa ka espirituwal nga amay para sa madamo. (1 Corinto 4:15) Apang, ginbaton niya nga nakahimo sia sing kasaypanan. (Roma 7:21-25) Sa baylo nga mabuhinan, labi pa gid naton sia nga gintahod bangod sang iya pagkamapainubuson kag pagkabunayag. Walay sapayan sang iya mga kasaypanan, si Pablo may kompiansa nga nagsulat sa kongregasyon sa Corinto: “Magmanug-ilog kamo sa akon, subong nga ako manug-ilog ni Cristo.” (1 Corinto 11:1) Kon batunon man ninyo ang inyo mga kasaypanan, indi na ini pagdumdumon pa sang inyo mga anak.
15, 16. Ngaa dapat hanason sang mga ginikanan ang ila mga anak nga higugmaon ang ila Cristianong mga kauturan, kag paano ini mahimo nga himuon?
15 Ano pa ang himuon sang mga ginikanan agod higugmaon sang mga anak si Jehova? Si apostol Juan nagsulat: “Kon ang isa nagasiling, ‘Ako nagahigugma sa Dios,’ kag nagadumut sa iya utud, butigon sia; kay ang wala nagahigugma sa iya utud nga iya makita, indi makahigugma sa Dios nga wala niya makita.” (1 Juan 4:20, 21) Gani, kon ginahanas ninyo ang inyo mga anak nga higugmaon ang ila Cristianong mga kauturan, ginatudluan man ninyo sila nga higugmaon ang Dios. Dapat pamangkuton sang mga ginikanan ang ila kaugalingon, ‘Ang akon bala pirme ginahambal tuhoy sa kongregasyon makapalig-on ukon mamulayon?’ Paano ninyo ini mahibaluan? Pamatii ang ginahambal sang inyo mga anak tuhoy sa mga miting kag sa mga katapo sang kongregasyon. Mahimo gid nga mabanaag ang inyo panghunahuna sa ila mga ginahambal.
16 Ano ang himuon sang mga ginikanan agod buligan ang ila mga anak nga higugmaon ang ila Cristianong mga kauturan? Si Peter, nga isa ka amay nga may duha ka tin-edyer nga anak nga lalaki, nagsiling: “Sugod sang bata pa ang amon mga anak, pirme namon ginaagda nga magkaon sa amon balay ang hamtong sa espirituwal nga mga kauturan. Nalipay gid kami sa pagpakig-upod sa ila. Nagdaku ang amon mga anak nga nagapakig-upod sa mga tawo nga nagahigugma kay Jehova, kag nakita nila nga ang pag-alagad kay Jehova isa ka makalilipay nga dalanon sang kabuhi.” Si Dennis, nga isa ka amay nga may lima ka anak nga babayi, nagsiling: “Ginapalig-on namon ang amon mga anak nga makig-abyan sa may edad nga mga payunir sa kongregasyon, kag kon posible ginaamuma namon ang nagalakbay nga mga manugtatap kag ang ila mga asawa.” Mabuligan man bala ninyo ang inyo mga anak nga tamdon ang kongregasyon subong bahin sang inyo pamilya?—Marcos 10:29, 30.
Salabton Sang Isa ka Anak
17. Ano nga desisyon ang dapat himuon sa ulihi sang mga anak?
17 Binagbinaga liwat ang ilustrasyon tuhoy sa manugpana. Bisan pa nga ayhan lantip sia, indi gid niya maigo ang iliguon kon ang iya baslay naglubag ukon nagbawod. Sa pagkamatuod, tinguhaan gid sang mga ginikanan nga tadlungon ang naglubag nga baslay, kon sa aton pa, paagi sa pagpanikasog nga tadlungon ang sayop nga panghunahuna sang bata. Apang sa ulihi, ang mga anak mismo ang magadesisyon kon bala magapadihon sila sa sini nga kalibutan ukon ‘magapatuytoy’ sila kay Jehova.—Hulubaton 3:5, 6; Roma 12:2.
18. Ano ang epekto sang desisyon sang isa ka anak sa iban?
18 Walay sapayan nga ang mga ginikanan may mabug-at nga salabton nga padakuon ang ila mga anak “sa disciplina kag sa pagtudlo sang Ginoo,” ang anak amo mismo ang magadesisyon kon mangin ano nga sahi sia sang tawo pagdaku niya. (Efeso 6:4) Gani, mga anak, pamangkuta ang inyo kaugalingon, ‘Batunon ko bala ang mahigugmaon nga paghanas sang akon mga ginikanan?’ Kon batunon mo ini, ginapili mo ang pinakamaayo nga dalanon sang kabuhi. Mapahalipay mo gid ang imo mga ginikanan. Labaw sa tanan, mapasadya mo ang tagipusuon ni Jehova.—Hulubaton 27:11.
[Footnote]
^ par. 11 Ginbalhag sang mga Saksi ni Jehova.
Madumduman Mo Bala?
• Paano makapahamtang sing maayo nga halimbawa ang mga ginikanan bahin sa pangamuyo kag pagtuon sa Biblia?
• Paano mapanikasugan sang mga ginikanan nga mangin malinong ang puluy-an?
• Ano nga desisyon ang dapat himuon sang mga anak, kag ano ang epekto sini sa iban?
[Mga Pamangkot sa Pagtinuon]
[Piktyur sa pahina 28]
Nagapahamtang ka bala sing maayo nga halimbawa sa imo anak sa personal nga pagtuon?
[Piktyur sa pahina 29]
Ang malinong nga kahimtangan sa pamilya nagapahalipay
