Kon Ngaa ang Kalautan Nagapadayon

“ANG Ginoo matarung sa tanan niyang dalanon,” siling sang Biblia. (Salmo 145:17; Bugna 15:3) Tuhoy sa iya, si manalagna Moises nagsiling: “Ang iya binuhatan himpit; kay ang tanan niyang dalanon katarungan. Dios sang katutom kag walay kalautan, matadlong kag matarung sia.” (Deuteronomio 32:4) “Ang Ginoo maluloy-on kag mainawaon,” siling sang Santiago 5:11, (Maayong Balita). Ang Dios wala nagahimo sing kalautan kag indi man sia ang kabangdanan sini.

Si disipulo Santiago nagsulat: “Walay tawo nga sang ginasulay sia magsiling, ‘Ginasulay ako sang Dios,’ kay ang Dios indi masulay sang malaut kag sia gid wala nagasulay sa bisan kay sin-o nga tawo.” (Santiago 1:13) Si Jehova nga Dios wala nagasulay ukon nagaganyat sa mga tawo nga maghimo sing kalautan. Kon amo, sin-o gali ang dapat basulon sa kalautan kag pag-antos?

Sin-o ang Dapat Basulon?

Suno sa manunulat sang Biblia nga si Santiago ang mga tawo mismo isa sa mga balasulon kon ngaa may kalautan. Sia nagsiling: “Ang tagsa ka tawo ginasulay kon ginabuyok sia kag ginahaylo sang iya kaugalingon nga kailigbon. Niyan ang kailigbon kon nakapanamkon nagapanganak sing sala; kag ang sala kon maggulang nagapamunga sing kamatayon.” (Santiago 1:14, 15) Ang mga tawo mahimo masulay sang ila sayop nga mga handum. Binagbinaga man ang napanubli nga sala sang tawo. Bangod sini, labi pa nga nagabaskog ang handum sang tawo nga maghimo sing malain nga nagaresulta sa makahalalit nga mga buhat. (Roma 7:21-23) Sa pagkamatuod, ang napanubli nga sala “naghari” sa katawhan, kag gin-ulipon ang katawhan sa paghimo sing malain nga mga butang nga nagresulta sa ila daku nga pag-antos. (Roma 5:21) Kag ang malain nga mga tawo nagaimpluwensia man sa iban nga maghimo sing kalautan.—Hulubaton 1:10-16.

Apang, ang panguna nga balasulon sa kalautan amo si Satanas nga Yawa. Sia ang nagdala sang kalautan sa kalibutan. Gintawag ni Jesucristo si Satanas nga “malaut” kag “manuggahum sang kalibutan,” ukon sang di-matarong nga katilingban sang katawhan. Ang katawhan sa kabilugan nagatuman kay Satanas paagi sa pagsikway sa matarong nga dalanon ni Jehova nga Dios. (Mateo 6:13; Juan 14:30; 1 Juan 2:15-17) “Ang bug-os nga kalibutan yara sa gahum sang  malauton,” siling sang 1 Juan 5:19. Ang matuod, si Satanas kag ang iya mga demonyo ang balasulon sa “kailo” kay ‘gindayaan nila ang bug-os nga kalibutan.’ (Bugna 12:9, 12) Gani, magluwas kay Satanas nga Yawa, wala na sang iban pa nga dapat basulon sa kalautan karon.

Ang isa pa ka kabangdanan sang pag-antos amo ang narekord sa Manugwali 9:11, nga nagasiling: “Ang tion kag ang kahigayonan nagakahanabu sa [aton] tanan.” Si Jesucristo nagsaysay sang isa ka insidente tuhoy sa pagkapukan sang torre sang Siloe nga ginbangdan sang pagkapatay sang 18 ka tawo. (Lucas 13:4) Natabuan nga didto sila sang mapukan ang torre amo nga napatay sila. Kaanggid man sini ang nagakatabo karon. Halimbawa, samtang ginakay-o ang isa ka mataas nga bilding, may nahulog nga hallow block kag naigo ang tawo nga nagalabay sa idalom. Dios bala ang dapat basulon? Indi. Isa ini ka aksidente kag wala ini ginapaabot nga matabo. Amo man sini ang kahimtangan kon magbalatian ang isa ka katapo sang pamilya kag kon hinali lang mapatay ang isa ka amay sang pamilya.

Gani, maathag nga indi ang Dios ang balasulon sa kalautan kag pag-antos. Ang matuod, luyag gid ni Jehova nga dulaon ang kalautan kag laglagon ang mga malauton. (Hulubaton 2:22) Kag indi lamang ina. Ginasugid sa aton sang Kasulatan nga katuyuan man sang Dios paagi kay Cristo nga ‘laglagon ang mga binuhatan sang Yawa.’ (1 Juan 3:8) Dulaon man niya ang kakagod, dumot kag kalautan. Pahiran pa gani sang Dios “ang tagsa ka luha sa mga mata” sang tanan nga tawo, buot silingon, wala na sing pag-antos. (Bugna 21:4) Apang mahimo mamangkot ka: ‘Ngaa wala ini paghimua sang Dios sadto pa? Ngaa gintugutan niya nga magpadayon ang kalautan kag pag-antos tubtob karon?’ Ang sabat masapwan sa rekord sang Biblia tuhoy kanday Adan kag Eva.

Nag-utwas ang Isa ka Importante nga Hulusayon

Mahibaluan naton ang rason kon ngaa gintugutan sang Dios nga magpadayon ang kalautan tubtob karon kon usisaon naton ang natabo wala madugay pagkatapos niya gintuga ang una nga tawo. Ang insidente nga natabo sadto nagpautwas sang isa ka importante nga hulusayon tuhoy sa Manunuga mismo—isa ka hulusayon nga indi masolbar sing insigida. Tan-awon naton kon ano ang natabo.

Gintuga ni Jehova nga Dios ang una nga lalaki kag babayi nga himpit kag ginbutang sila sa Paraiso. Ginhatagan sila sing dulot nga naghimo sa ila nga tuhay sa mga sapat. Ini nga dulot amo ang kahilwayan sa pagbuot. (Genesis 1:28; 2:15, 19) Bangod sini nga dulot, mahimo gamiton ni Adan kag ni Eva ang ila ikasarang sa paghunahuna, kon bala pilion nila nga higugmaon, alagaron, kag tumanon ang ila Manunuga ukon indi.

Agod mapamatud-an ni Adan kag ni Eva nga ginahigugma nila ang matuod nga Dios, may isa ka butang nga gindumili sa ila. Ginsugo niya si Adan: “Makakaon ka sing hilway sang tagsa ka kahoy sang katamnan; apang gikan sa kahoy sang pagkilala sang maayo kag malaut dili ka magkaon sa iya, kay sa adlaw nga magkaon ka sa iya mapatay ka nga totoo.” (Genesis 2:16, 17) Agod kahamut-an sila sang Dios kag mangin malipayon ang ila mga kabataan, dapat indi pagkaunon ni Adan kag ni Eva ang bunga sining kahoy. Apang, himuon ayhan nila ini?

Ginasugiran kita sang Biblia kon ano ang natabo. Paagi sa man-ug nga iya humalambal, gin-istorya ni Satanas nga Yawa si Eva kag nagsiling: “Gali nagsiling bala ang Dios, ‘Dili kamo magkaon sang bisan ano nga kahoy sang katamnan’?” Bilang sabat, ginsulit ni Eva ang sugo sang Dios. Dayon nagsiling si Satanas: “Dili kamo mapatay nga totoo. Kay ang Dios nakahibalo nga sa adlaw nga magkaon kamo sa iya, niyan magamuklat ang inyo nga mata, kag manginkaangay sang Dios kamo, nga nakakilala sang maayo kag malaut.” Nian, daw nangin makagalanyat ang bunga sang kahoy kay Eva amo nga “nagkuha sia sang iya bunga kag nagkaon.” Ang rekord nagpadayon: “Kag ginhatagan man niya ang iya bana kaupod niya, kag nagkaon sila.” (Genesis 3:1-6) Apang gingamit ni Adan kag ni Eva ang ila kahilwayan sa pagbuot sa malain nga paagi kag ginlalis ang Dios, sa amo nakasala sila.

 Nahangpan mo na bala kon daw ano kalain ang ginhimo sang Yawa? Ginbaliskad sang Yawa ang ginhambal sang Dios kay Adan. Ang ginsiling ni Satanas nagpahangop nga makadesisyon si Adan kag si Eva kon ano ang maayo kag malain bisan wala si Jehova. Ginhangkat ni Satanas ang kinamatarong ni Jehova sa paggahom sa mga tawo. Gani ang importante gid nga hulusayon nga ginpautwas ni Satanas amo: May kinamatarong bala si Jehova nga gamhan ang katawhan? Paano ginsabat sang matuod nga Dios ini nga hangkat?

Kinahanglan ang Bastante nga Tion

May gahom si Jehova sa paglaglag sa tatlo ka rebelde—si Satanas, si Adan kag si Eva. Wala sing duhaduha nga mas gamhanan ang Dios sangsa ila. Apang indi ang gahom sang Dios ang ginhangkat ni Satanas kundi ang kinamatarong ni Jehova sa paggahom. Gani, ang tanan nga tinuga sang Dios nga may kahilwayan sa pagbuot nadalahig diri. Dapat nila gamiton sing maayo ini nga dulot, nga wala ginasupak ang pisikal, moral, kag espirituwal nga mga panuytoy gikan sa Dios. Kay kon indi, magabunga ini sing malain, subong nga mahimo mahalitan ang isa ka tawo kon maglumpat sia gikan sa atop sang isa ka mataas nga bilding bangod ginsupak niya ang kasuguan sang grabidad. (Galacia 6:7, 8) Agod makabenepisyo ang tanan nga intelihente nga mga tinuga, dapat nila makita ang malain nga resulta sang pagsikway sa paggahom sang Dios. Gani nagakinahanglan ini sing tion.

Mahangpan naton ini paagi sa isa ka ilustrasyon: Halimbawa, ginhangkat sang amay ni David ang amay ni Juan nga pamatud-an kon sin-o ang mas makusog sa ila. Ini nga hangkat mahapos lang lubaron. Mahibaluan kon sin-o ang mas makusog sa ila paagi sa paghakwat sang bato. Ang amay nga makahakwat sang pinakamabug-at nga bato amo ang mas makusog. Apang, ano abi kon ang pamangkot amo: Sin-o sa ila ang mahigugmaon nga amay kag ginapalangga man sang ila mga anak? Ukon sin-o gid sa ila ang maayo mag-atipan sang iya pamilya? Indi ini mapamatud-an paagi lamang sa kusog ukon mga tinaga. Kinahanglan nga magligad ang tion kag panilagan sila sing maayo agod mahibaluan kon sin-o ang mas maayo nga amay.

Kon Ano ang Ginapakita sa Pagligad sang Tion

Mga 6,000 ka tuig na ang nagligad sang ginhangkat ni Satanas ang kinamatarong sang Dios sa paggahom. Ano ang ginapakita sang maragtas? Binagbinaga ang duha ka butang nga ginapahangop sang panumbungon ni Satanas batok sa Dios. Maisugon nga nagsiling si Satanas kay Eva: “Dili kamo mapatay nga totoo.” (Genesis 3:4) Paagi sa pagsiling kay Adan kag kay Eva nga indi sila mapatay kon kaunon nila ang gindumili nga bunga, daw subong bala nga ginsiling niya nga butigon si Jehova. Isa gid ini ka serioso nga panumbungon! Kon ang Dios indi masaligan sa sini nga butang, paano sia masaligan sa iban pa? Apang ano ang ginapakita sa pagligad sang tion?

Si Adan kag si Eva nagmasakit, nag-antos, nagtigulang kag sang ulihi napatay. “Ang bug-os nga mga adlaw nga ginkabuhi ni Adan, siam ka gatus kag katloan ka tuig; kag napatay sia,” siling sang Biblia. (Genesis 3:19; 5:5) Ining makaluluoy nga kahimtangan ginpapanubli ni Adan sa tanan nga tawo. (Roma 5:12) Pagligad sang tion napamatud-an nga “butigon [si Satanas] kag amay sang kabutigan” apang si Jehova napamatud-an nga “Dios sang kamatuoran.”—Juan 8:44; Salmo 31:5.

Ginsilingan man ni Satanas si Eva: “Ang Dios nakahibalo nga sa adlaw nga magkaon kamo [sang ginadumilian nga kahoy], niyan magamuklat ang inyo mga mata, kag manginkaangay sang Dios kamo [Adan kag Eva], nga nakakilala sang maayo kag malaut.” (Genesis 3:5) Paagi sa malimbungon nga mga tinaga, ginpresentar ni Satanas ang sayop nga kahigayunan sa mga tawo nga gamhan ang ila kaugalingon. Luyag ni Satanas paguaon nga mas maayo ang kahimtangan sang mga tawo kon sikwayon nila ang paggahom sang Dios. Nangin matuod bala ini?

Sa bug-os nga maragtas, nagbuslanay ang mga emperyo. Natilawan na sang tawo ang tanan nga sahi sang pagginahom. Apang, nag-antos lamang  ang katawhan. “Ang isa ka tawo may gahum sa isa sa iya kasamaran,” maalamon nga paghinakop sang manunulat sang Biblia mga 3,000 ka tuig na ang nagligad. (Manugwali 8:9) “Wala sa tawo nga nagalakat sa pagmando sang iya mga tikang,” sulat ni propeta Jeremias. (Jeremias 10:23) Walay sapayan sang pag-uswag sang siensia kag teknolohiya napamatud-an nga husto ining mga pulong. Gani, pagligad sang tion napamatud-an lamang nga wala gid nagsala ang Biblia.

Ano ang Himuon Mo?

Ang tion nga gintugot sang Dios nagpamatuod nga sayop ang ginsiling ni Satanas nga wala sing kinamatarong si Jehova sa paggahom sa tawo. Si Jehova nga Dios lamang ang Soberano sang uniberso. Sia lamang ang may kinamatarong sa paggahom sa iya mga tinuga, kag ang iya paggahom amo ang pinakamaayo. Nagaugyon sa sini ang mga tinuga sang Dios sa langit nga madugay na nga nagpasakop sa iya paggahom, amo nga nakasiling sila: “Takus ka, Ginuo kag Dios namon, sa pagbaton sang himaya kag dungog kag gahom, kay ikaw ang nagtuga sang tanan nga butang, kag bangod sang imo kabubut-on nangin-amo kag gintuga sila.”—Bugna 4:11.

Ano ang masiling mo tuhoy sa sini nga hulusayon? Nagapati ka bala nga takus ang Dios sa paggahom sa imo? Kon huo ang imo sabat, dapat mo kilalahon ang pagkasoberano ni Jehova. Mahimo mo ini kon iaplikar mo sa tanan nga aspekto sang imo kabuhi ang bilidhon nga kamatuoran kag laygay nga masapwan sa iya Pulong, ang Biblia. “Ang Dios gugma,” kag ang iya mga kasuguan kag mga pagsulundan napasad sa gugma. (1 Juan 4:8) Wala kita ginadingutan ni Jehova sang maayo nga mga butang. Gani dapat mo dumdumon ang laygay sang Biblia: “Salig sa GINOO sa bug-os mo nga tagiposoon, kag dili magsandig sa imo kaugalingon nga paghangup. Sa tanan mo nga dalanon kilalaha sia, kag magatuytuy sia sa imo mga banas.”—Hulubaton 3:5, 6.

[Piktyur sa pahina 7]

Mahimo mo pilion ang paggahom sang Dios paagi sa pagtuon sa Biblia kag pag-aplikar sang mga instruksion sini sa imo kabuhi

[Credit Line sang piktyur sa pahina 4]

© Jeroen Oerlemans/Panos Pictures