“Magapamunga Pa Sila sa Katigulangon”

SA MGA kadutaan sa Mediteraneo, madamo ang nagatanom sing date nga palma sa ila ugsaran. Nakilala ini nga kahoy sa katahom kag manamit nga bunga sini. Dugang pa, kapin sa isa ka gatos ka tuig kon mamunga ini.

Mabinalaybayon nga ginlaragway ni Hari Solomon sang dumaan nga Israel ang kataason sang matahom nga Shulamita subong sang palma nga kahoy. (Ambahanon ni Solomon 7:7) Ang libro nga Plants of the Bible nagsiling: “Ang Hebreo nga tinaga para sa date nga palma amo ang ‘tàmâr.’ . . . Nangin simbulo ini sang katahom kag pagkaelegante para sa mga Judiyo kag masami ini ginahatag subong ngalan sa mga babayi.” Halimbawa, ang utod sa amay nga babayi ni Solomon ginhingalanan nga Tamar. (2 Samuel 13:1) Ini nga ngalan ginahatag gihapon sang pila ka mga ginikanan sa ila mga anak nga babayi.

Indi lamang ang matahom nga mga babayi ang ginapaanggid sa palma. Nag-amba ang salmista: “Ang matarung magalambo kaangay sang palma, magatubo sia kaangay sang cedro sa Libano. Ginatanum sila sa balay sang GINOO, magalambo sila sa mga luwang sang aton Dios. Magapamunga pa sila sa katigulangon, mapuno sila sang duga kag kalab-as.”—Salmo 92:12-14.

Sing malaragwayon, ang mga nga nagaalagad sing matutom sa Dios tubtob sa ila pagtigulang daw kaangay gid sa elegante nga palma. Ang Biblia nagsiling: “Ang ubanon nga olo amo ang purungpurung sang himaya; makita ini sa dalanon sang pagkamatarung.” (Hulubaton 16:31) Bisan pa nagaluya ang ila lawas samtang nagatigulang sila, mahuptan gihapon sang mga tigulang ang ila espirituwal nga kapagsik paagi sa regular nga pagtuon sa Pulong sang Dios, ang Biblia. (Salmo 1:1-3; Jeremias 17:7, 8) Bangod sa matahom nga mga pulong kag maayo nga halimbawa, nangin tuburan sang pagpalig-on ang mga tigulang para sa iban kag padayon sila nga nagapamunga kada tuig. (Tito 2:2-5; Hebreo 13:15, 16) Kaangay sang date nga palma, makapamunga gihapon ang mga may edad na bisan pa tigulang na sila.