Mga Pamangkot Gikan sa mga Bumalasa

Sanglit ginsugo ang mga Judiyo nga ‘dili magkaon sing bisan ano nga may tapay’ sa panahon sang Paskua, ngaa naggamit si Jesus sing alak—ang ginpaaslom nga duga sang ubas—sang ginpatok niya ang Memoryal sang iya kamatayon?—Exodo 12:20; Lucas 22:7, 8, 14-20.

Ang pagsaulog sing Paskua, nga nagapahanumdom sang paggua sang mga Israelinhon gikan sa Egipto, ginsugdan sang 1513 B.C.E. Sang maghatag sing sugo para saulugon ini, nagsiling si Jehova: “Dili kamo magkaon sing bisan ano nga may tapay; sa inyo tanan nga mga puluy-an magkaon kamo sing tinapay nga walay tapay.” (Exodo 12:11, 20) Ini nga pagdumili sang Dios naaplikar lamang sa isa ka sahi sang tinapay nga pagakaunon sa panahon sang Paskua. Wala nalakip ang alak.

Ang panguna nga rason kon ngaa gindumilian ang lebadura amo nga nagadalidali gid ang mga Israelinhon sang magbiya sila sa Egipto. “Gindala sang katawohan ang ila linamas sa wala pa magkumbo,” paathag sang Exodo 12:34, “nga nagabagtong sang ila lamasan upud sa ila panapton sa ila mga abaga.” Ang indi paggamit sing lebadura sa masunod nga mga pagsaulog sing Paskua magapahanumdom sa ulihi nga kaliwatan sining importante nga katunayan.

Sang ulihi, masami ginatamod ang lebadura subong simbulo sang sala kag kalautan. Halimbawa, nagapatuhoy sa imoral nga tawo sa sulod sang Cristianong kongregasyon, namangkot si apostol Pablo: “Wala bala kamo makahibalo nga ang diotay nga tapay nagalatum sang bug-os nga linamas?” Nian nagsiling sia: “Panghugas kamo gikan sa daan nga tapay agud nga manginbag-o kamo nga linamas, subong nga wala kamo sing tapay. Kay ang aton pascua nga cordero, si Cristo, nahalad na. Busa hiwaton ta ang piesta, indi sa daan nga tapay, sa tapay sang kalainan kag kalautan, kondi sa tinapay nga walay tapay sang kabunayag kag kamatooran.” (1 Corinto 5:6-8) Ang tinapay nga walay tapay lamang ang mahimo gamiton bilang simbulo sang walay sala nga lawas ni Jesus.—Hebreo 7:26.

Ang paggamit sing alak sa pagsaulog sang Paskua gindugang sang ulihi sang mga Judiyo. Mahimo nga gindugang ini sang makabalik na sila gikan sa pagkatapok sa Babilonia. Wala kita sing mabasa sa Biblia nga ginpamatukan ini, busa nagakaigo nga naggamit si Jesus sing alak sa panihapon sang Paskua. Ang natural nga pag-aslom sang alak sang dumaan nga tion tuhay sa pag-aslom sang tinapay. Para mag-aslom ang harina nga linamas, dapat ini mikslahan sing tapay, ukon lebadura. Apang ang alak halin sa ubas indi na kinahanglan simbugan sing pangpaaslom kay pagkatapos maipo ang ubas, magaaslom ini sa ulihi. Amo kon ngaa wala sing puro nga duga sang ubas nga magamit sa tion sang Paskua nga ginahiwat kon tigpamulak kay ang ubas ginapang-ipo kon tigragas.

Gani, ang paggamit ni Jesus sing alak subong emblema sa Memoryal wala nagasumpakil sa instruksion tuhoy sa lebadura may kaangtanan sa pagsaulog sing Paskua. Ang bisan ano nga mapula nga alak nga wala ginpatam-is, ginpaisog, ukon gindugangan sing mga rekado ukon mga dahondahon, nagakaigo nga gamiton subong simbulo sang “hamiling dugo” ni Cristo.—1 Pedro 1:19.