Ngaa Ginatugutan sang Dios ang Kalautan?

LAPNAG ang kalautan kag pag-antos bisan diin. Indi lamang mga soldado ang nagakapatay sa inaway kundi pati man ang mga sibilyan. Daw nangin kinaandan na lang ang krimen kag kasingki. Ayhan nangin biktima ka sang pag-ihig-ihig ukon inhustisya sining karon lang. Gani, mahimo namangkot ka, ‘Ngaa ginatugutan sang Dios ang kalautan?’

Ginpamangkot man ini sang mga tawo sang una. Mga 3,600 ka tuig ang nagligad, ang matutom nga alagad sang Dios nga si Job namangkot: “Ngaa bala nagakabuhi ang malauton?” (Job 21:7) Si propeta Jeremias nga nagkabuhi sang ikapito nga siglo B.C.E. natublag gid sa kalautan sang iya mga kasimanwa amo nga namangkot sia: “Ngaa bala nagauswag ang dalanon sang malauton? Ngaa bala nga matawhay sila tanan nga labi gid kamabudhion?” (Jeremias 12:1) Nagapati gid si Job kag si Jeremias nga ang Dios matarong. Apang, natingala sila kon ngaa lapnag ang kalautan. Mahimo nga ikaw amo man.

Ginabasol sang iban ang Dios bangod sa kalautan kag pag-antos. Ang pila naman namangkot: ‘Kon ang Dios gamhanan, matarong, kag mahigugmaon, ngaa wala niya ginadula ang kalautan kag pag-antos? Ngaa gintugutan niya nga magpadayon ang kalautan tubtob karon?’ Ang sabat sa sini kag sa iban pa nga importante nga mga pamangkot binagbinagon sa masunod nga artikulo.

[Credit Line sang piktyur pahina 3]

AP Photo/Adam Butler