Kaluwasan Gikan sa mga Siod sang Manugpamispis

“Kay [si Jehova] magaluwas sa imo sa siod sang manugpamispis.”—SALMO 91:3.

1. Sin-o ang “manugpamispis,” kag ngaa makatalagam sia?

ANG tanan nga Cristiano may katalagman sa isa ka indi kinaandan nga manunukob. Mas maalam sia kag mas malalangon sangsa tawo. Ginatawag sia sa Salmo 91:3 nga “manugpamispis.” Sin-o ining kaaway? Halin sang Hunyo 1, 1883 nga isyu sini nga magasin sa Ingles, ang ginapakilala sini nga kaaway amo si Satanas nga Yawa. Ining gamhanan nga kaaway malalangon nga nagatinguha sa pagpatalang kag sa pagsiod sa katawhan ni Jehova kaangay sang pagsiod sang manugpamispis sa isa ka pispis.

2. Ngaa ginpaanggid si Satanas sa manugpamispis?

² Sang dumaan nga panahon, ang mga pispis ginadakop bangod sang ila matahom nga paghuni kag maduagon nga mga bulbol, kag agod kaunon man ukon ihalad. Apang, mabudlay siuron ang mga pispis, kay kinaugali nga madali sila makamutik. Amo kon ngaa, sang panahon nga ginasulat ang Biblia, ginapanilagan anay sang isa ka manugpamispis ang mga hulag sang mga pispis nga luyag niya siuron. Pagkatapos, nagaimbento sia sing malalangon nga mga siod. Sa pagpaanggid kay Satanas sa isa ka manugpamispis, ginabuligan kita sang Biblia nga mahangpan ang iya mga pahito. Ginapanilagan kita sang Yawa subong mga indibiduwal. Ginapanilagan niya ang aton mga batasan kag mga kinaiya kag nagapaon sia sing malalangon nga mga siod agod madakop niya kita. (2 Timoteo 2:26) Kon masiod kita ni Satanas, nagakahulugan ini nga mautod ang aton kaangtanan sa Dios kag mahimo ini magdul-ong sa aton kalaglagan sa ulihi. Gani, agod maamligan naton ang aton kaugalingon, dapat naton hibaluon ang nanuhaytuhay nga mga pahito sang “manugpamispis.”

3, 4. Paano nagaanggid ang mga pahito ni Satanas sa mga pahito sang leon? sang man-ug nga dalitan?

³ Paagi sa maathag nga mga laragway, ginapaanggid man sang salmista ang mga pahito ni Satanas sa pahito sang totoy nga leon ukon sang man-ug nga dalitan. (Salmo 91:13) Kaangay sang leon, ginagamit kon kaisa ni Satanas ang dayag kag direkta nga mga pag-atake paagi sa paghingabot ukon pagdumili sang gobierno sa katawhan ni Jehova. (Salmo 94:20) Mahimo nga masandad ang pila sa sining tulad-leon nga mga pag-atake. Apang, masami nga nagabalandra ining dayag nga mga pag-atake kag nagaresulta sa pagpahiusa sa katawhan sang Dios. Kamusta naman ang malalangon kag tulad-man-ug nga mga pag-atake ni Satanas?

⁴ Subong sang pagbuntog sang isa ka nagapanago kag dalitan nga man-ug, ginagamit sang Yawa ang iya labaw sa tawo nga kinaalam sa iya malimbungon kag makamamatay nga mga pag-atake. Paagi sa sini, nagmadinalag-on ang Yawa sa paghilo sa hunahuna sang pila sa katawhan sang Dios, amo nga nalimbungan sila nga himuon ang iya kabubut-on sa baylo sang kabubut-on ni Jehova. Makapasubo ang resulta sini. Maayo na lang nga indi kita ignorante sa mga pahito ni Satanas. (2 Corinto 2:11) Binagbinagon naton karon ang apat sa makatalagam gid nga mga siod nga ginagamit sang “manugpamispis.”

Kahadlok sa Tawo

5. Ngaa epektibo gid ang siod nga “kahadlok sa tawo”?

⁵ Nahibaluan sang “manugpamispis” nga normal sa tawo ang paghandum nga batunon sia kag kahamut-an sang iban. Apektado man ang mga Cristiano sang ginahunahuna kag ginabatyag sang mga tawo sa palibot nila. Nahibaluan ini sang Yawa, kag ginahimuslan niya ang ila kabalaka sa kon ano ang isiling sang iban nga mga tawo. Halimbawa, ginagamit sang Yawa ang “kahadluk sa tawo” agod siuron ang pila sa katawhan sang Dios. (Hulubaton 29:25) Kon bangod sa kahadlok sa tawo, magbuylog ang mga alagad sang Dios sa paghimo sang ginadumilian ni Jehova ukon maglikaw  sa paghimo sang ginasugo sa ila sang Pulong sang Dios, nasiod na sila sang “manugpamispis.”—Ezequiel 33:8; Santiago 4:17.

6. Ano nga halimbawa ang nagailustrar kon paano ang isa ka pamatan-on mahimo masiod sang “manugpamispis”?

⁶ Halimbawa, mahimo nga maimpluwensiahan ang isa ka pamatan-on sang pang-engganyo sang iya mga kaeskwela nga manigarilyo man. Mahimo nga wala gid sa iya pensar ang manigarilyo sang magkadto sia sa eskwelahan sina nga adlaw. Apang, pila pa ka tion, ginahimo na niya ang butang nga makahalit sa iya lawas kag wala nagapahamuot sa Dios. (2 Corinto 7:1) Paano sia nasulay? Mahimo nga indi maayo ang iya mga kaupod kag nahangawa sia nga basi mangakig sila. Mga pamatan-on, indi pagtuguti ang “manugpamispis” nga masulay kamo kag masiod! Agod indi kamo masiod, magbantay batok sa magagmay lamang nga mga pagkompromiso. Pamatii ang paandam sang Biblia nga likawan ang malain nga mga kaupod.—1 Corinto 15:33.

7. Paano masulay ni Satanas ang iban nga mga ginikanan nga madula ang ila pagkabalanse sa espirituwal?

⁷ Ginatuman gid sang Cristiano nga mga ginikanan ang ila Makasulatanhon nga responsibilidad nga ihatag ang materyal nga mga kinahanglanon sang ila pamilya. (1 Timoteo 5:8) Apang, ginatinguhaan gid ni Satanas nga madula ang pagkabalanse sang mga Cristiano sa sini nga butang. Mahimo nga pirme lang sila nagapalya sa mga miting bangod ginapilit sila sang ila mga amo nga magtrabaho sing dugang pa nga inoras. Mahimo nga nahadlok sila maglisensia kon panahon sang distrito nga kombension agod makatambong sila sa tanan nga sesyon sini kag makaupod ang ila mga kauturan sa pagsimba kay Jehova. Ang proteksion batok sa sini nga siod amo ang ‘pagsalig kay Jehova.’ (Hulubaton 3:5, 6, NW) Dugang pa, mangin balanse gihapon kita kon tandaan naton nga kita tanan mga katapo sang panimalay ni Jehova kag ginaatipan niya kita. Mga ginikanan, may pagtuo bala kamo nga atipanon kamo ni Jehova kag ang inyo pamilya kon himuon ninyo ang iya kabubut-on? Ukon, masiod bala kamo sang Yawa kag mahaylo nga himuon ang iya kabubut-on bangod sang kahadlok sa tawo? Ginapangabay namon kamo nga binagbinagon ini nga mga pamangkot sing mapangamuyuon.

Ang Siod Sang Materyalismo

8. Sa ano nga paagi ginagamit ni Satanas ang ganyat sang materyalismo?

⁸ Ginagamit man ni Satanas ang ganyat sang materyalismo agod masiod kita. Masami nga ginapasanyog karon sang komersial nga sistema sang kalibutan ang madali makapamanggad nga mga pahito nga makalimbong bisan gani sa pila ka alagad sang Dios. Kon kaisa, mahimo nga engganyuhon ang mga indibiduwal: “Magbakas ka sa pagtrabaho. Pagkatapos, magpulupatawhay ka na lang kon masulhay na ang imo pangabuhi. Makapayunir ka pa gani.” Mahimo nga amo ini ang indi balanse nga pangatarungan sang pila ka utod sa Cristiano nga kongregasyon agod mahaylo man nila ang iban nga magbuylog sa ila negosyo. Hunahunaa sing maayo ang ila ginasiling nga magasulhay ang imo pangabuhi kag pagkatapos, magpulupatawhay ka na lang. Indi bala nga amo sina ang ginahunahuna anay sang “di-makatarunganon” nga manggaranon nga tawo sa ilustrasyon ni Jesus?—Lucas 12:16-21, NW.

9. Ngaa mahimo masiod ang mga Cristiano paagi sa paghandum sa mga butang?

⁹ Ginapalakat ni Satanas ang iya malaut nga sistema sa isa ka paagi nga ginahaylo sini ang mga tawo nga maghandum sa mga butang. Mahimo  nga sa ulihi maapektuhan sini nga handum ang kabuhi sang isa ka Cristiano, malumsan ang pulong kag ‘mangindimabungahon’ ini. (Marcos 4:19) Ginapalig-on kita sang Biblia nga mangin kontento na kon may pagkaon kita kag panapton. (1 Timoteo 6:8) Apang, madamo ang nasiod sang “manugpamispis” bangod wala nila ginapamatian ini nga laygay. Indi ayhan nga bangod sang bugal, indi mabiyaan sang iban ang isa ka estilo sang pagkabuhi? Kamusta naman kita? Ang aton bala pagsimba sa Dios ikaduha na lang sa aton kabuhi bangod sang aton handum nga matigayon ang mga butang nga aton ginahingamo? (Hageo 1:2-8) Makapasubo nga bangod sang mabudlay nga pangabuhi, ginsakripisyo sang iban ang ila espirituwalidad agod lamang mahuptan ang sahi sang pagkabuhi nga naandan na nila. Nalipay gid ang “manugpamispis” sa sining materyalistiko nga panimuot!

Ang Siod sang Makahalalit nga Kalingawan

10. Ano nga pag-usisa sa kaugalingon ang dapat himuon sang tagsa ka Cristiano?

¹⁰ Ang isa pa ka pahito sang “manugpamispis” amo ang pagpatiko sa kinaugali nga ikasarang sang tawo sa paghibalo kon ano ang maayo kag malain. Ang panghunahuna nga lapnag anay sa Sodoma kag Gomorra amo man ang nagapangibabaw karon sa industriya sang kalingawan. Bisan gani ang mga balita sa telebisyon kag sa mga pamantalaan nagapadaku sang kasingki kag nagapaayon man sa sobra nga interes sa sekso. Ang kalabanan nga kalingawan sa media karon nagahalit sa ikasarang sang mga tawo “sa pagpain sang maayo gikan sa malaut.” (Hebreo 5:14) Apang, dumduma ang ginsiling ni Jehova paagi kay manalagna Isaias: “Kailo sa mga nagatawag sang malaut maayo kag sang maayo malaut!” (Isaias 5:20) Naimpluwensiahan man bala sang “manugpamispis” ang imo panghunahuna sa sining makahalalit nga kalingawan? Kinahanglan nga usisaon naton ang aton kaugalingon.—2 Corinto 13:5.

11. Ano nga paandam tuhoy sa mga telenobela sa TV ang ginhatag sini nga magasin?

¹¹ Sang nagligad nga halos duha ka pulog-lima ka tuig na, mahigugmaon nga ginpaandaman sang Ang Lalantawan ang matuod nga mga sumilimba sang Dios tuhoy sa mga telenobela sa TV. * Amo sini ang komento tuhoy sa malalangon nga epekto sang popular nga mga telenobela: “Ang gugma ginagamit agod pakamatarungon ang bisan ano nga himuon. Halimbawa, ang isa ka nagabusong nga dalagita nagasiling sa iya abyan: ‘Apang ginahigugma ko si Victor. Wala ako sing labot bisan ano pa ang isiling sang iban. . . . Pinakaimportante gid sa akon ang amon bata!’ Bangod sang background nga matahom nga musika, wala na matalupangdan sang mga tawo nga imoral sia. Naluyagan mo man si Victor. May simpatiya ka sa dalagita. ‘Nahangpan’ mo sila. ‘Daw indi mapatihan kon paano napatiko ang imo panghunahuna,’ siling sang isa ka tumalan-aw nga nakamarasmas sang ulihi. ‘Nahibaluan naton nga malain ang imoralidad. . . . Apang narealisar ko sang ulihi nga nagapakigbahin ako sa sini paagi sa akon hunahuna.’”

12. Ano nga mga katunayan ang nagapakita nga nagakaigo gid ang paandam karon tuhoy sa pila ka programa sa TV?

 ¹² Halin sang ginbalhag ini nga mga artikulo, nagdamo pa ini nga sahi sang makapalain nga mga programa. Sa madamo nga lugar, 24 oras nga ginapagua ini nga mga programa kada adlaw. Amo sini nga sahi sang kalingawan ang masami nga ginapasulod sang mga lalaki, mga babayi, kag madamo nga mga tin-edyer sa ila hunahuna kag tagipusuon. Apang, indi naton dapat paglimbungan ang aton kaugalingon paagi sa sala nga pangatarungan. Sala kon mangatarungan ka nga ang malain nga programa nga ginatan-aw mo sa telebisyon pareho lang sa nagakatabo sa kalibutan karon. Paano masiling sang isa ka Cristiano nga wala sing malain kon nalingaw sia sa pagtan-aw sa sahi sang mga tawo nga indi gani niya pag-agdahon sa iya balay?

13, 14. Ano ang ginsiling sang pila kon paano sila nakabenepisyo sa mga paandam tuhoy sa TV?

¹³ Madamo ang nakabenepisyo sang ginpamatian nila ang paandam sang “matutom kag mainandamon nga ulipon.” (Mateo 24:45-47, NW) Pagkatapos mabasa ang prangka kag napasad sa Biblia nga laygay, nagsulat ang iban agod magpabutyag nga nabuligan gid sila sang mga artikulo. * Ang isa nagtu-ad: “Adik ako sa telenobela sa sulod sang 13 ka tuig. Nagdumdom ako nga indi ako maapektuhan kon magtambong lang ako sa Cristiano nga mga miting kag magbantala kon kaisa. Apang nalatnan ako sang panimuot nga ginapakita sa kalibutanon nga mga telenobela nga kon daw ginadaugdaug ka gani sang imo bana ukon sa banta mo nagbugnaw na ang iya gugma sa imo, wala sing malain kon manghilahi ka—kag bana mo ang salaon sa sini. Gani, ginhimo ko ini kag nakasala ako batok kay Jehova kag sa akon bana.” Nadisfellowship ini nga babayi. Sang ulihi, nakamaradmad sia, naghinulsol, kag nakapanumbalik liwat. Ang mga artikulo nga nagapaandam batok sa mga telenobela sa TV naghatag sa iya sing kusog nga indi na magtan-aw sang ginakangil-aran ni Jehova.—Amos 5:14, 15.

¹⁴ Ang isa pa ka bumalasa nga naapektuhan man nagsiling: “Naghibi ako sang mabasa ko ang mga artikulo, kay narealisar ko nga indi na gali bug-os ang akon tagipusuon kay Jehova. Nanaad ako sa Dios nga indi na gid ako magpaulipon sa sini nga mga telenobela.” Pagkatapos magpasalamat bangod sa mga artikulo, ginbaton sang isa ka Cristiano nga babayi nga naadik sia sa sini kag nagsulat: “Ginbinagbinag ko . . . kon naapektuhan na bala ang akon kaangtanan kay Jehova. Paano ko ‘sila’ mangin abyan kag mangin abyan ko man si Jehova?” Kon naapektuhan sini nga sahi sang mga programa sa TV ang mga tagipusuon sang nagligad nga 25 ka tuig, ano ayhan ang epekto sini karon? (2 Timoteo 3:13) Dapat gid naton tandaan nga ang tanan nga porma sang makahalalit nga mga kalingawan subong sang mga telenobela sa TV, masingki nga mga video game, ukon imoral nga mga music video isa ka siod ni Satanas.

Ang Siod sang Indi Paghangpanay

15. Paano nasiod sang Yawa ang iban?

¹⁵ Ginagamit ni Satanas ang indi paghangpanay subong isa ka siod agod magbahinbahin ang katawhan ni Jehova. Mahimo kita masiod sini bisan ano pa ang aton pinasahi nga pribilehiyo sa organisasyon. Nasiod sang Yawa ang iban  bangod gintugutan nila ang indi paghangpanay nga tublagon ang paghidait kag paghiusa sang matahom nga espirituwal nga paraiso nga ginpaluntad ni Jehova.—Salmo 133:1-3.

16. Paano si Satanas malalangon nga nagatinguha nga gamuhon ang aton paghiusa?

¹⁶ Sa tion sang Bug-os Kalibutan nga Inaway I, gintinguhaan ni Satanas nga laglagon ang dutan-on nga bahin sang organisasyon ni Jehova paagi sa direkta nga pag-atake, apang napaslawan sia. (Bugna 11:7-13) Sugod sadto, malalangon nga nagatinguha sia nga gamuhon ang aton paghiusa. Kon tugutan naton ang indi paghangpanay nga gamuhon ang aton paghiusa, ginahatagan naton ang “manugpamispis” sing lugar. Nian, mabalabagan naton ang hilway nga pag-ilig sang balaan nga espiritu sa aton mismo kabuhi kag sa kongregasyon man. Kon matabo ini, malipay gid si Satanas kay maapektuhan ang aton pagbantala nga hilikuton kon madula ang paghidait kag paghiusa sang kongregasyon.—Efeso 4:27, 30-32.

17. Ano ang makabulig sa paghusay kon may indi paghangpanay ang duha ka utod?

¹⁷ Ano ang himuon mo kon wala kamo maghangpanay sang isa ka Cristiano nga utod? Matuod, lainlain ang tagsa ka kahimtangan. Apang, bisan pa madamo ang rason kon ngaa nagautwas ang mga problema, wala sing rason kon ngaa indi mahusay ang mga indi paghangpanay. (Mateo 5:23, 24; 18:15-17) Ang laygay sang Pulong sang Dios inspirado kag himpit. Kon iaplikar ang mga prinsipio sang Biblia, wala gid ini nagakapaslawi. Epektibo ini pirme!

18. Ngaa ang pag-ilog kay Jehova makabulig sa aton sa paghusay sang aton indi paghangpanay sa aton masigkatumuluo?

¹⁸ Si Jehova “handa sa pagpatawad,” kag nagahatag sia sing “matuod nga pagpatawad.” (Salmo 86:5; 130:4, NW) Ginapakita naton nga kita hinigugma nga mga anak ni Jehova kon ginailog naton sia. (Efeso 5:1) Makasasala kita tanan kag kinahanglan gid naton ang pagpatawad ni Jehova. Gani, dapat kita maghalong kon may huyog kita nga indi magpatawad sa aton masigkatumuluo. Mangin kaangay kita sang ulipon sa ilustrasyon ni Jesus nga wala magpatawad sa iya masigkaulipon nga nakautang sa iya sing gamay lamang kon ipaanggid sa utang nga ginpatawad na sa iya sang iya agalon. Sang ginpahibalo ini sa agalon, ginpabilanggo niya ang indi mapinatawaron nga ulipon. Ginhinakpan ni Jesus ang ilustrasyon sa pagsiling: “Amo man ang himoon sa tagsa sa inyo sang akon Amay nga langitnon, kon indi kamo magpatawad sing tinagiposoon sang inyo utud.” (Mateo 18:21-35) Ang pagpamalandong sa sini nga ilustrasyon kag pagbinagbinag kon pila na ka beses nga ginpatawad kita ni Jehova makabulig gid sa aton kon may indi paghangpanay kita sa aton masigkatumuluo!—Salmo 19:14.

May Kalig-unan sa “Tago nga Duog sang Labing Mataas”

¹⁹ Nagakabuhi kita sa makatalagam nga mga tion. Pat-od nga nalaglag na kuntani kita tanan ni Satanas kon indi bangod sa mahigugmaon nga pag-amlig ni Jehova. Busa, agod indi kita masiod sang “manugpamispis,” dapat kita magpabilin sa malaragwayon nga duog diin maamligan kita, nga “nagapuyo sa tago nga duog sang Labing Mataas,” nga ‘nagasapo sing dalayunan sa idalom sang landong sang Labing Gamhanan.’—Salmo 91:1, NW.

²⁰ Kabay nga tamdon naton pirme ang mga pahanumdom kag pagtuytoy ni Jehova subong pangamlig, indi gid mga pagdumili. May katalagman kita tanan sa isa ka manunukob nga may labaw sa tawo nga kinaalam. Kon wala sing mahigugmaon nga bulig ni Jehova, wala gid sing bisan isa sa aton nga makalikaw sa siod ni Satanas. (Salmo 124:7, 8) Gani mangamuyo kita nga luwason kita ni Jehova gikan sa mga siod sang “manugpamispis”!—Mateo 6:13.

[Mga Footnote]

Madumduman Mo Bala?

• Ngaa isa ka makamamatay nga siod ang “kahadlok sa tawo”?

• Paano ginagamit sang Yawa ang ganyat sang materyalismo?

• Paano nasiod ni Satanas ang iban paagi sa makahalalit nga kalingawan?

• Ano nga siod ang ginagamit sang Yawa agod gamuhon ang aton paghiusa?

[Mga Pamangkot sa Pagtinuon]

19, 20. Paano naton dapat tamdon ang “tago nga duog” kag “landong” ni Jehova sa sining makatalagam nga mga tion?

[Piktyur sa pahina 27]

Nasiod ang iban sang “kahadlok sa tawo”

[Piktyur sa pahina 28]

Nalingaw ka bala sa ginakangil-aran ni Jehova?

[Piktyur sa pahina 29]

Ano ang mahimo mo kon wala kamo nagahangpanay sang isa ka masigkatumuluo?