Mga Desisyon nga Magapahalipay sa Imo

“KUNTANI lain na lang ang ginhimo ko!” Pila ka beses na bala nga nasiling mo ini sa imo kaugalingon? Indi naton luyag nga hinulsulan ang mga desisyon nga ginhimo naton ilabi na kon ini nagaapektar sa aton kabuhi. Apang, paano kita makahimo sing mga desisyon nga magapahalipay sa aton?

Una sa tanan, dapat may yara kita sing masaligan gid nga mga talaksan. Apang may yara bala sini nga sahi sang talaksan karon? Madamo ang nagsiling nga wala. Suno sa isa ka surbe sa Estados Unidos, 75 porsiento sang mga estudyante nga manuggradwar sa kolehiyo ang nagapati nga wala sing talaksan para sa maayo kag malain kay depende ini sa “mga prinsipio kag gindak-an sang isa ka tawo.”

Maalamon ayhan hunahunaon nga ang moral nga talaksan depende na lang sa personal nga opinyon ukon sa kon ano ang ginabaton sang kadam-an? Indi gid. Mangin magamo lamang kon ang mga tawo magpinagustuhanay. Sin-o ang luyag magpuyo sa isa ka lugar nga wala sing kasuguan, wala sing korte, kag wala sing pulis? Isa pa, ang personal nga opinyon indi pirme masaligan. Ayhan naghimo kita sing isa ka butang nga abi naton husto apang sa ulihi narealisar naton nga nagsala gali kita. Napamatud-an na sa bug-os nga maragtas sang tawo nga matuod ang ginasiling sang prinsipio sang Biblia: “Wala sa tawo nga nagalakat sa pagmando sang iya mga tikang.” (Jeremias 10:23) Kon amo, diin ukon kay sin-o kita mangayo sing panuytoy kon nagahimo sing importante nga mga desisyon sa aton kabuhi?

Ang lamharon nga manuggahom nga ginhinambitan sa una nga artikulo nangayo sing panuytoy kay Jesus. Bilang sabat, ginkutlo ni Jesus ang Kasuguan sang Dios. Ginakilala ni Jesus nga si Jehova nga Dios Labing Maalam kag nakahibalo  Sia kon ano ang pinakamaayo para sa Iya mga tinuga. Amo nga nakasiling sia: “Ang akon pagtolon-an indi akon, kondi iya sang nagpadala sa akon.” (Juan 7:16) Matuod gid nga ang Pulong sang Dios isa ka masaligan nga panuytoy nga magabulig sa aton sa paghimo sing maalamon nga mga desisyon. Binagbinagon naton ang pila ka mga prinsipio nga masapwan sa Pulong sang Dios, nga kon iaplikar naton, makahatag sa aton sing kalipay.

Ang Bulawanon nga Talaksan

Sa iya bantog nga Sermon sa Bukid, nagtudlo si Jesus sing isa ka sadsaran nga prinsipio nga makabulig sa aton sa paghimo sing maalamon nga mga desisyon tuhoy sa aton kaangtanan sa iban. Amo ini ang ginsiling niya: “Ang tanan nga butang nga buut ninyo nga himoon sang mga tawo sa inyo, himoa man ninyo sa ila.” (Mateo 7:12) Ining prinsipio sang paggawi masami ginatawag nga Bulawanon nga Talaksan.

Naghimo man ang iban sing kaanggid sini nga ekspresyon apang sa negatibo nga porma: “Ang indi mo luyag nga himuon sa imo indi paghimua sa iban.” Agod makita ang kinatuhayan sang Bulawanon nga Talaksan kag sang negatibo nga porma sini, binagbinaga ang ilustrasyon ni Jesus tuhoy sa mabinuligon nga Samaritano. May isa ka Judiyo nga ginbakol kag ginbayaan nga halos patay sa dalan. Nalabyan sia sang saserdote kag sang ulihi sang Levita, pero nagdiretso lang sila. Bangod wala man nila ginhimuan sing malain ang tawo, masiling naton nga natuman nila ang negatibo nga porma sang Bulawanon nga Talaksan. Sa pihak nga bahin, sang makita sia sang Samaritano, nagdulog ini kag ginbulong niya ang mga pilas sang tawo kag gindala sia sa isa ka dalayunan. Ang luyag sang Samaritano nga himuon sa iya, ginhimo niya sa tawo. Gani, gin-aplikar niya ang Bulawanon nga Talaksan kag naghimo sia sing husto nga desisyon.—Lucas10:30-37.

Madamo sing paagi nga mapakita naton ining talaksan sang paggawi kag may makalilipay nga mga resulta. Halimbawa, may isa ka pamilya nga bag-o lang nagsaylo sa inyo lugar. Ngaa indi mo sila pagpangilalahon kag abiabihon? Mahimo mo man sila buligan nga mangin pamilyar sa inyo lugar. Paagi sa pagpakita sing pag-ulikid sa imo mga kasilingan mapalambo mo ang maayo nga kaangtanan sa ila. Kag mangin malipayon ka bangod nahibaluan mo nga nahamuot sa sini ang Dios. Indi bala isa ini ka maalamon nga desisyon?

Mga Desisyon nga Napasad sa Gugma sa Iban

Magluwas sa Bulawanon nga Talaksan, naghatag si Jesus sing iban pa nga panuytoy agod makahimo ka sing maalamon nga mga desisyon. Sang ginpamangkot sia kon ano ang labing daku nga sugo sa Mosaikong Kasuguan, si Jesus nagsabat: “‘Higugmaa ang Ginoo nga imo Dios sa bug-os mong tagiposoon, kag sa bug-os mong kalag, kag sa bug-os mong hunahuna.’ Ini amo ang daku kag nahaunang sogo. Kag ang ikaduha kaangay sini, ‘Higugmaa ang imo isigkatawo subong sa imo kaugalingon.’ Sa sining duha ka sogo natingub ang bug-os nga kasogoan kag ang mga manalagna.”—Mateo 22:36-40.

Sang gab-i antes sia mapatay, naghatag si Jesus sa iya mga disipulo sing “bag-ong sugo,” nga maghigugmaanay sila. (Juan 13:34) Ngaa nagsiling sia nga isa ini ka bag-o nga sugo, kay nasambit na niya sa ila nga ang paghigugma sa isigkatawo isa sa duha ka sugo diin napasad ang bug-os nga Kasuguan? Sa Mosaikong Kasuguan, ginsugo ang mga Israelinhon: “Higugmaon mo ang imo isigkatawo subong sang imo kaugalingon.” (Levitico 19:18) Apang, karon indi lang amo sina ang luyag ni Jesus nga himuon sang iya mga disipulo. Sa sina man nga gab-i, ginsilingan ni Jesus ang iya mga disipulo nga malapit na niya ihatag ang iya kabuhi para sa ila. Dayon ginsilingan niya sila: “Ini amo ang akon sogo, nga maghigugmaanay kamo subong nga ako naghigugma sa inyo. Walay tawo nga may gugma nga daku pa sini, nga ihatag sang isa ka tawo ang iya kabuhi tungud sa iya mga abyan.” (Juan 15:12, 13) Isa ini ka bag-o nga sugo kay kinahanglan unahon naton ang kaayuhan sang iban sangsa aton kaugalingon.

Madamo sing paagi nga mapakita naton nga ginauna naton ang kaayuhan sang iban.  Halimbawa, nagaistar ka sa apartment. Nanamian ka gid mamati kon matunog ang musika pero nagahuran naman ang imo kaingod. Handa ka bala magpasunaid agod indi madisturbo ang imo kaingod? Kon sa aton pa, handa ka bala nga unahon ang iya kaayuhan?

Binagbinaga ang isa pa ka kahimtangan. Matugnaw sadto kag nagaulan sing yelo sa Canada sang magduaw ang mga Saksi ni Jehova sa isa ka tigulang nga lalaki. Sa ila pag-istoryahanay, nasambit sang tigulang nga wala niya mahawanan ang ila ugsaran nga natabunan sang yelo bangod may balatian sia sa tagipusuon. Pagligad sang mga isa ka oras nabatian niya nga may nagapamala. Nagbalik gali ang duha ka Saksi kag ginhawanan ang iya alagyan. “Naeksperiensiahan ko karon ang matuod nga Cristianong gugma nga ginapakita paagi sa buhat,” siling niya sa iya sulat sa sanga talatapan sang mga Saksi ni Jehova sa Canada. “Nadula gid ang akon negatibo nga pagtamod sa mga tawo karon kag nadugangan pa gid ang akon pagtahod sa inyo bug-os kalibutan nga hilikuton.” Ang pagboluntaryo sa pagbulig bisan sa diutay lamang nga paagi, may positibo gid nga epekto sa iban. Ang pagsakripisyo para sa ila magapahalipay gid sa imo!

Mga Desisyon nga Napasad sa Gugma sa Dios

Ang isa pa ka butang nga dapat naton binagbinagon kon nagahimo kita sing mga desisyon amo ang ginsiling ni Jesus nga labing daku nga sugo—ang paghigugma sa Dios. Ginhatag ni Jesus ini nga sugo sa mga Judiyo nga bilang isa ka pungsod nadedikar na kay Jehova. Apang, dapat magdesisyon ang tagsa ka Israelinhon kon bala alagdon nila ang Dios sing bug-os tagipusuon kag bug-os kalag.—Deuteronomio 30:15, 16.

Ginapakita sang imo mga desisyon kon ano ang imo ginabatyag tuhoy sa Dios. Halimbawa, samtang nagadugang ang imo ihibalo kag apresasyon sa kapuslanan sang Biblia, kinahanglan ka man maghimo sing desisyon. Batunon mo bala ang isa ka pormal nga pagtuon sa Biblia agod mangin sumulunod ka ni Jesus? Kon batunon mo, mangin malipayon ka gid, kay nagsiling si Jesus: “Malipayon ang mga mahunahunaon sang ila espirituwal nga kinahanglanon.”—Mateo 5:3, NW.

Wala kita makahibalo kon bala ginhinulsulan sang lamharon nga manuggahom ang iya desisyon. Apang, nahibaluan naton kon ano ang panimuot ni apostol Pedro pagkatapos sang malawig nga tion nga nagsunod sia kay Jesucristo. Sang mga 64 C.E., sang dali na lang mapatay si Pedro, ginpalig-on niya ang iya mga masigkatumuluo: ‘Magmakugihon agud nga masapwan kamo sang Dios nga walay dagta ukon kasawayan, kag sa paghidait.’ (2 Pedro 1:14; 3:14) Maathag gid nga wala maghinulsol si Pedro sa desisyon nga iya ginhimo 30 ka tuig ang nagligad, kag ginpalig-on niya ang iban nga magpadayon man sa ila desisyon.

Ginasunod naton ang laygay ni Pedro kon batunon naton ang mga katungdanan subong isa sang mga disipulo ni Jesus kag tumanon ang mga sugo sang Dios. (Lucas 9:23; 1 Juan 5:3) Mahimo mabudlay ini himuon, apang ginapasalig kita ni Jesus: “Kari sa akon, tanan kamo nga ginabudlayan kag ginabug-atan, kag papahuwayon ko  kamo. Itakud ang akon gota sa inyo, kag magtoon kamo sa akon; kay ako mapainubuson kag malolo sa tagiposoon, kag makakita kamo sing kapahuwayan sa inyo mga kalag. Kay ang akon gota mahulas, kag ang akon lulan mamag-an.”—Mateo 11:28-30.

Binagbinaga ang eksperiensia ni Arthur. Sa edad nga dies anyos, nagtuon si Arthur sing byolin kag handum niya nga mangin propesyonal sa sini. Sang 14 anyos sia, nakilala na sia nga nagatokar sing byolin sa mga konsierto. Apang, indi sia malipayon. Ang iya amay madamo sing pamangkot tuhoy sa katuyuan sang kabuhi kag ginaagda niya ang mga manunudlo sang relihion sa ila balay; apang indi sia kontento sa ila mga sabat. Ginaistoryahan nila subong pamilya kon bala nagaluntad gid man ang Dios kag kon ngaa ginatugutan niya ang kalautan. Nian, naistorya sang amay ni Arthur ang mga Saksi ni Jehova. Nakumbinsi sia sa ila mga sabat amo nga nagtuon sa Biblia ang iya bug-os nga pamilya.

Sang ulihi, paagi sa pagtuon ni Arthur sa Biblia nahangpan niya kon ngaa ginatugutan sang Dios ang pag-antos kag nasapwan niya ang matuod nga katuyuan sang kabuhi. Upod sa tatlo ka katapo sang iya pamilya, si Arthur naghimo sing desisyon nga wala gid niya ginhinulsulan. Gindedikar niya ang iya kabuhi kay Jehova. “Nalipay gid ako sa mga pagpakamaayo ni Jehova. Nasapwan ko ang kamatuoran kag nahilway ako sa paghinisaay nga kinaandan na sa propesyonal nga mga musikero. Ginahimo nila ang tanan agod mangin bantog.”

Nanamian gihapon si Arthur magtokar sang byolin sa paglingaw sa iya mga abyan. Apang ang iya kabuhi wala nasentro sa sini kundi nasentro ini sa pag-alagad sa Dios. Nagaalagad sia sa isa sa mga sanga talatapan sang mga Saksi ni Jehova. Kaangay ni Arthur kag sang minilyon pa, apang indi kaangay sang manggaranon nga manuggahom, makahimo ka man sing desisyon nga makahatag sa imo sing daku gid nga kalipay, kon batunon mo ang pangagda ni Jesus nga mangin iya sumulunod.

[Piktyur sa pahina 6]

Ang imo desisyon makabulig sa iban

[Piktyur sa pahina 7]

Tun-an mo bala ang Biblia kag mangin sumulunod ni Jesus?