Mga Pamangkot Gikan sa mga Bumalasa

Sayop bala ang ginhimo ni Jacob nga pagpakunokuno nga sia si Esau, nga narekord sa Genesis 27:18, 19?

Mahimo nahibaluan mo ang tuhoy sa sini nga sugilanon. Sang tigulang na si Isaac ginsugo niya si Esau nga mangayam sing lalaki nga usa, nga nagasiling: ‘Pakan-a ako, agud nga pakamaayohon ko ikaw sa wala pa ako mapatay.’ Bangod nabatian ni Rebeka ang ginsiling sang iya bana, nagluto sia sing manamit nga pagkaon kag ginsugo si Jacob: “Dalhon mo ini sa imo amay nga kaonon niya, agud nga pakamaayohon ka niya sa wala pa sia mapatay.” Nian si Jacob nga nagasul-ob sang panapton ni Esau kag may panit sang tinday nga kanding sa iya mga kamot kag liog, nagdala sing manamit nga linuto sa iya amay. Sang ginpamangkot sia ni Isaac, “Sin-o ka bala, anak ko?” nagsabat si Jacob: “Ako si Esau nga imo panganay.” Nagpati gid si Isaac sa iya gani ginpakamaayo niya si Jacob.—Genesis 27:1-29.

Wala ginatul-id sang Biblia kon ngaa nahimo yadto ni Rebeka kag ni Jacob, apang ginapakita nga wala nila ginplano ang natabo. Tandaan naton nga wala ginapakamaayo ukon ginapakamalaut sang Pulong sang Dios ang ginhimo ni Jacob kag ni Rebeka, gani indi naton ini magamit nga rason nga puede kita makabutig ukon makalimbong. Apang ang Biblia nagpaathag tuhoy sa sini nga hitabo.

Una, maathag nga ginapakita sang Biblia nga indi si Esau kundi si Jacob ang may kinamatarong sa pagpakamaayo sang ila amay. Legal nga nabakal na ni Jacob ang kinamatarong subong panganay gikan sa iya di-mainapresyahon nga kapid nga si Esau, nga nagbaligya sang iya pagkapanganay kabaylo sang pagkaon agod mabusog sia. “Gintamay ni Esau ang iya pagkapanganay.” (Genesis 25:29-34) Gani, ang pagpakamaayo nga ginpangayo ni Jacob nagakadapat gid para sa iya.

Ikaduha, sang nahibal-an ni Isaac nga ang pagpakamaayo nahatag niya kay Jacob, wala niya ini ginbawi. Mahimo nadumduman niya ang ginsiling ni Jehova kay Rebeka antes mabun-ag ang kapid: “Ang magulang magaalagad sa kamanghuran.” (Genesis 25:23) Talalupangdon man nga sang manuglakat si Jacob padulong sa Haran, ginhatagan sia ni Isaac sing dugang pa nga pagpakamaayo.—Genesis 28:1-4.

Ang katapusan nga rason amo nga dapat naton dumdumon nga nahibaluan ni Jehova ang mga nagakatabo kag interesado sia sa sini. Ang ginhatag nga pagpakamaayo ni Isaac naangot sa saad sang Dios kay Abraham. (Genesis 12:2, 3) Kon indi gid man luyag sang Dios nga ihatag ang pagpakamaayo kay Jacob, nagpasilabot kuntani sia. Sa baylo, ginkompirmar ini ni Jehova kay Jacob, kay nagsiling sia: “Paagi sa imo  . . . mga kaliwatan pakamaayohon ang tanan nga panimalay sang duta.”—Genesis 28:10-15.