Dapat Ka Bala Magkabuhi Para Lang sa Karon?

“WALA ko gid ginapaligban ang palaabuton. Total, magaabot man ini gihapon.” Ini nga pinamulong sang kilala nga sientipiko nga si Albert Einstein masunson nga ginabalikwat. Kaangay man sini ang opinyon sang madamo nga tawo. “Wala sing rason nga paligban ko ang akon palaabuton,” mahimo isiling nila. Ukon mahimo may nabatian ka na nga nagsiling: “Padayuna kon ano ang imo ginahimo.” “Magkabuhi ka para lang sa karon.” “Kalimti ang buas.”

Sa pagkamatuod, indi na bag-o ini nga panimuot. “Magkaon ka kag mag-inom kag magpangalipay. Ang iban nga butang indi na importante.” Amo ini anay ang halambalanon sang mga Epicureanhon. Kaanggid man sini ang ginsiling sang iban nga mga katubotubo ni apostol Pablo. “Magkaon kita kag mag-inum, kay buwas mapatay kita,” siling nila. (1 Corinto 15:32) Para sa ila, ang aton kabuhi malip-ot lamang, gani dapat kuno naton ini himuslan.

Para sa minilyon ka pumuluyo sa duta, ang bug-os nga paghimulos sa sini nga kabuhi wala nagakahulugan sing paglipaylipay lamang. Bangod sang ila mabudlay nga mga kahimtangan, madamo sa karon ang wala untat kag mapait nga nagabakabaka para mabuhi. Ngaa abi paligban nila ang palaabuton, kay sa masami, daw tuman ini kadulom kag wala gid sing paglaum nga magmaayo?

Pagplano Para sa Palaabuton?

Bisan ang mga tawo nga maarang-arang sing kahimtangan daw wala sing nakita nga rason sa pagplano para sa palaabuton. “Ngaa abi magpakabudlay ka pa sa pagplano?” mahimo ipamangkot nila. Ang iban mahimo magsiling nga ang mga tawo nga nagaplano masami nga nagakapaslawan kag nagakabang-awan lamang. Bisan ang patriarka nga si Job sang una nga panahon nalugaw-an gid sang nakita niya ang iya mga plano nga “nagakalaglag,” kag nagguba sang magahatag kuntani sing makalilipay nga palaabuton para sa ila pamilya.—Job 17:11; Manugwali 9:11.

Ginpaanggid sang isa ka taga-Scotland nga mamalaybay nga si Robert Burns ang aton mabudlay nga kahimtangan sa natabo sa isa ka gamay nga ilaga sa uma. Di-hungod nga naarado ni Burns ang balay sang ilaga. Nagtaripad sing dalagan ang ilaga agod luwason ang iya kabuhi. ‘Huo,’ siling sang mamalaybay, ‘masunson nga indi naton kontrolado ang mga hitabo amo nga bisan ang naplano sing maayo nga mga butang masami nga nagakapaslawan.’

 Gani walay pulos bala ang magplano para sa palaabuton? Sa katunayan, ang kakulang sing nagakaigo nga pagplano may yara makahalalit nga mga resulta, ilabi na kon mag-abot ang mabaskog nga bagyo ukon ang iban pa nga kinaugali nga mga kalamidad. Matuod, wala sing mahimo nga nakapugong sa Bagyo Katrina. Apang indi ayhan nabuhinan ang halit sini sa siudad kag sa mga pumuluyo sini kon may yara mas maayo nga paghanda kag pagplano?

Ano sa banta mo? Makatarunganon bala nga magkabuhi para lang sa karon kag indi na paghunahunaon ang palaabuton? Binagbinaga ang ginasiling sang masunod nga artikulo tuhoy sini.

[Mga piktyur sa pahina 3]

“Magkaon ka kag mag-inom kag magpangalipay. Ang iban nga butang indi na importante”

[Piktyur sa pahina 4]

Nabuhinan bala kuntani ang halit sang Bagyo Katrina kon may yara maayo nga paghanda kag pagplano?

[Credit Line]

U.S. Coast Guard Digital