Pagkasadya sa “Kadalag-an Upod ang Kordero”

SA IYA sulat sang 1971, ginhinumdom ni Carey W. Barber ang iya una nga 50 ka tuig nga pag-alagad sa matuod nga Dios: “Ang mga tinuig nga nagaalagad ako kay Jehova maayo gid. Ang pagpakig-upod sa iya mga katawhan; ang pangamlig batok sa mga malauton sang kalibutan ni Satanas; ang pagpaabot sa kadalag-an upod ang Kordero, si Jesucristo; kag ang pamatuod sang gugma ni Jehova naghatag sa akon sing kalinungan kag tudok nga kaayawan nga nagaamlig sa tagipusuon kag nagahatag sing pat-od nga paglaum sa katapusan nga kadalag-an.”

Pagligad sang anom ka tuig, si Utod Barber, nga isa ka hinaplas sa espiritu nga Cristiano, nag-alagad subong miembro sang Nagadumala nga Hubon sang mga Saksi ni Jehova. Sa sulod sang 30 ka tuig sa sini nga katungdanan, ginkalangkagan niya ang “kadalag-an upod ang Kordero.” Nabaton niya ini sang napatay sia nga matutom sang Domingo, Abril 8, 2007, sa edad nga 101.—1 Corinto 15:57.

Natawo si Utod Barber sa Inglaterra sang 1905, kag nabawtismuhan sa Winnipeg, Canada, sang 1921. Pagligad sang duha ka tuig, nagsaylo sila sang iya kapid nga si Norman sa Brooklyn, New York, agod magbulig sa bag-o nga proyekto. Sadto, masugod pa lang ang katawhan ni Jehova sa paghimo sing mga libro para sa pagpalapnag sing maayong balita sang Ginharian “sa bug-os nga kalibutan.” (Mateo 24:14) Ang isa sa mga asaynment anay ni Utod Barber amo ang pagpadalagan sa gamay nga imprintahan. Lakip sa mga gin-imprinta diri amo ang legal nga mga dokumento nga nagaunod sang sumaryo sang mga kaso nga ginpasaka sa Korte Suprema sang Estados Unidos. Sang ulihi, nagtrabaho si Utod Barber sa Service Department, nga nagatatap sang mga kongregasyon kag sang pagbantala nga hilikuton sa bug-os nga pungsod.

Bangod sini nga paghanas, kalipikado gid si Utod Barber sang gin-asayn sia subong nagalakbay nga ministro sang 1948, nga nagaduaw sa mga asambleya kag mga kongregasyon sa nakatundan nga bahin sang Estados Unidos. Nagsiling sia nga naluyagan niya nga maggua agod magbantala. Ini nga asaynment naghatag sing kahigayunan sa mga kauturan nga makapakig-upod kay Utod Barber. Ang iya maabtik nga hunahuna kag kakugi sa ministeryo nakabulig gid sang ulihi sang nag-eskwela sia sa ika-26 nga klase sang Watchtower Bible School of Gilead. Diri niya nakilala ang iya klasmeyt nga si Sydney Lee Brewer nga taga-Canada. Pagkatapos sang gradwasyon nagpakasal sila kag naglakbay dayon agod duawon ang mga kongregasyon sa Chicago, Illinois. Si Sydney nangin hamili nga kaupod kag masinakdagon sa iya bana sa sulod sang 20 ka tuig nga pagduaw nila sa mga kongregasyon.

Sa sulod sang mga tinuig nga pag-alagad subong manugtatap sa distrito ukon sirkito ukon sang 30 ka tuig nga pagpanghikot kag paglakbay subong miembro sang Nagadumala nga Hubon, indi gid malipatan sang mga nakakilala kay Utod Barber ang iya mga pamulongpulong kag mapagsik nga mga komento. May rason gid kita nga magkasadya sa iya kadalag-an “upod ang Kordero.”