Ginahimuslan Mo Bala ang mga Kahigayunan nga Makapanaksi?

“MAY YARA bala bug-os nga kamatuoran?” Amo ini ang topiko sang paindis-indis sa salaysay sa bug-os nga pungsod sang Poland. Ang instruksion para sa salaysay nagasiling: “Indi naton kinahanglan ang bug-os nga kamatuoran. Wala sing may nagakinahanglan sini. Kag, wala gid man sing bug-os nga kamatuoran.” Namat-od si Agata, nga isa ka 15 anyos nga estudyante sa hayskul kag isa ka Saksi ni Jehova, nga himuslan ini nga kahigayunan agod makapanaksi sa iban tuhoy sa iya pagtuluuhan.

Sa paghanda para sa salaysay, nangamuyo anay si Agata nga tuytuyan sia ni Jehova kag nian gintipon niya ang mga impormasyon tuhoy sa topiko. May nakita sia sa Ang Lalantawan sang Hulyo 1, 1995. Ginkutlo niya ang pamangkot ni Poncio Pilato kay Jesus: “Ano ang kamatuoran?” (Juan 18:38) Yadto nga pamangkot, siling niya, nagapang-uligyat, nga daw subong bala nga nagasiling: ‘Kamatuoran? Ano ina? Wala gid sing kamatuoran!’ “Ang pamangkot ni Pilato,” sulat ni Agata, “nagpahanumdom sa akon tuhoy sa topiko sang paindis-indis kag instruksion para sa salaysay.”

Masunod, ginbinagbinag niya ang relativism—ang ideya nga ang matuod sa isa ka tawo mahimo nga indi matuod sa isa apang ang duha mahimo nga pareho nga “husto.” Nagpamangkot sia, “Sin-o sa aton ang mangahas nga magsakay sa eroplano kon wala kita nagapati nga ang mga kasuguan sa aerodynamics bug-os nga kamatuoran?” Nian ginpatuhuyan niya ang Biblia, nga nagasiling: “Ang pagsalig sa Pulong sang Dios malig-on nga napasad sa mapamatud-an nga mga katunayan.” Nagsiling sia nga kabay pa nga ang mga hanuot nga nagapangita sing kamatuoran mapailubon nga magapangita sini.

Ginpadyaan si Agata sing pinasahi nga diploma kag nakahigayon man sia nga makapasundayag sa atubangan sang bug-os nga klase. Pila sang iya mga kabutho ang nagbaton sang gintanyag niya nga pagtuon sa Biblia. Nagapasalamat gid si Agata nga gingamit niya ining kahigayunan agod makapanaksi sa madamo pa. Huo, ang pagkaalisto sa mga kahigayunan nga makapanaksi sa iban tuhoy sa imo pagtuo mahimo nga may maayo nga resulta. Ano nga kahigayunan ang imo mahimuslan?