Ginasakdag Mo Bala ang Pagkasoberano ni Jehova?
Ginasakdag Mo Bala ang Pagkasoberano ni Jehova?
“Isiling sa mga pungsud, ‘Ang GINOO nagahari.’”—SALMO 96:10.
1, 2. (a) Ano nga importante nga hitabo ang natabo sang mga Oktubre 29 C.E.? (b) Daw ano ka importante yadto nga hitabo kay Jesus?
ISA ka importante nga hitabo, nga wala pa gid anay matabo sa duta, ang natabo sang mga Oktubre 29 C.E. Ang manunulat sang Ebanghelyo nga si Juan nagsulat: “Nakita ko ang Espiritu nga nagakunsad subong sang salampati gikan sa langit, kag nagpabilin ini sa ibabaw [ni Jesus]. Wala ako akon nakakilala sa iya; apang ang nagpadala sa akon sa pagbautiso sa tubig nagsiling sa akon, ‘Sa iya nga makita mo ang Espiritu nga nagakunsad kag nagapabilin, ini amo sia ang nagabautiso sa Espiritu Santo.’” Isa ini sa pila ka hitabo nga lunsay ginsulat sang apat ka manunulat sang Ebanghelyo.—Mateo 3:16, 17; Marcos 1:9-11; Lucas 3:21, 22; Juan 1:32-34.
2 Ang pagbubo sing balaan nga espiritu kay Jesus nagpakilala sa iya subong Isa nga Hinaplas, ang termino nga nagakahulugan sing Mesias, ukon Cristo. (Juan 1:33) Nakilal-an gid man sa ulihi ang ginsaad nga “binhi”! Nagatindog sa atubangan ni Juan Bautista ang isa nga dugmukon ni Satanas sa tikod kag magadugmok sa ulo sang panguna nga kaaway ni Jehova kag sang Iya pagkasoberano. (Genesis 3:15) Halin sadto, nakahibalo gid si Jesus nga dapat sia manikasog nga tumanon ang katuyuan ni Jehova tuhoy sa Iya pagkasoberano kag Ginharian.
3. Paano ginhandaan ni Jesus ang iya katungdanan agod sakdagon ang pagkasoberano ni Jehova?
3 Agod mahandaan ang iya bag-o nga katungdanan, “si Jesus, nga puno sang Espiritu Santo, nagbalik gikan sa Jordan, kag gintuytuyan sang Espiritu sa kamingawan.” (Lucas 4:1; Marcos 1:12) Sa sulod sang 40 ka adlaw, ginpamalandungan didto ni Jesus ang hulusayon nga ginpautwas ni Satanas tuhoy sa pagkasoberano ni Jehova kag ang dalanon nga dapat Niya laktan agod sakdagon ini. Ini nga hulusayon nagadalahig sa tanan nga intelihente nga mga tinuga sa langit kag sa duta. Gani, dapat naton binagbinagon ang katutom ni Jesus kag ang dapat naton himuon agod ipakita nga luyag man naton sakdagon ang pagkasoberano ni Jehova.—Job 1:6-12; 2:2-6.
Paghangkat sa Pagkasoberano ni Jehova
4. Paano hayag nga ginhangkat ni Satanas ang pagkasoberano ni Jehova?
4 Siempre pa, nakita ni Satanas ang tanan nga ginsambit nga mga hitabo. Gani, gilayon nga ginsugdan niya ang pag-atake sa panguna nga “binhi” sang “babayi” sang Dios. (Genesis 3:15, NW) Tatlo ka beses nga ginsulay ni Satanas si Jesus. Ginpanugyan niya nga sa baylo nga tumanon ni Jesus ang iya Amay, dapat niya himuon kon ano ang maayo para sa iya. Ang ikatlo nga pagsulay hayag nga naghangkat sa pagkasoberano ni Jehova. Sang ginpakita ni Satanas kay Jesus “ang tanan nga ginharian sa kalibutan kag ang ila himaya,” makahas sia nga nagsiling kay Jesus: “Tanan ini nga butang ihatag ko sa imo, kon magyaub ka kag magsimba sa akon.” Bangod nahibaluan ni Jesus nga kontrolado sang Yawa ang “tanan nga ginharian sa kalibutan,” ginpakita ni Jesus kon kay sin-o sia dampig sa hulusayon sang pagkasoberano paagi sa pagsabat: “Palayo ka, Satanas! kay nasulat na, ‘Magsimba ka sa Ginoo nga imo Dios kag sa iya lamang mag-alagad ka.’”—Mateo 4:8-10.
5. Ano nga mabudlay nga katungdanan ang dapat tumanon ni Jesus?
5 Maathag nga ginpakita ni Jesus nga ang pagsakdag sa pagkasoberano ni Jehova amo ang pinakaimportante sa iya kabuhi. Nakahibalo si Jesus nga agod mapamatud-an niya ang kinamatarong sang Dios subong soberano, dapat sia magmatutom tubtob sa kamatayon, nga gintagna subong pagdugmok sa tikod sang “binhi” sang babayi. (Mateo 16:21; 17:12) Dapat man sia magpanaksi sa kamatuoran nga ang Ginharian sang Dios amo ang ahensia nga gamiton ni Jehova sa paglutos sa rebelde nga si Satanas kag sa pagpasag-uli sang paghidait kag kahim-ong sa tanan nga tinuga. (Mateo 6:9, 10) Paano gintuman ni Jesus ining mabudlay nga katungdanan?
“Ang Ginharian sang Dios Malapit Na”
6. Paano ginpakilala ni Jesus nga ang Ginharian amo ang ahensia nga gamiton sang Dios ‘sa paglaglag sang mga binuhatan sang yawa’?
6 Bilang panugod, “nag-abut si Jesus sa Galilea, nga nagawali sang maayong balita sang Dios, kag nagasiling, ‘Ang tion natuman na, kag ang ginharian sang Dios malapit na.’” (Marcos 1:14, 15) Sa katunayan, nagsiling sia: “Kinahanglan ako magwali sang maayong balita sang ginharian sang Dios . . . ; kay sa sining katuyoan ginpadala ako.” (Lucas 4:18-21, 43) Naglakbay sia sa malayo nga mga duog, “nga nagawali kag nagadala sang maayong balita sang ginharian sang Dios.” (Lucas 8:1) Naghimo man sia sing madamo nga mga milagro. Ginpakaon niya ang mga kadam-an, ginpatawhay ang unos, gin-ayo ang mga masakiton, kag ginbanhaw ang mga patay. Paagi sa sining mga milagro, ginpakita ni Jesus nga ang Dios may ikasarang sa pagdula sa tanan nga halit kag pag-antos nga resulta sang pagrebelde sa Eden kag busa “malaglag niya ang mga binuhatan sang yawa.”—1 Juan 3:8.
7. Ano ang ginsugo ni Jesus sa iya mga sumulunod, kag ano ang resulta?
7 Agod mabantala sing lapnag ang maayong balita sang Ginharian, gintipon kag ginhanas ni Jesus ang isa ka grupo sang matutom nga mga sumulunod. Una, nagpili sia sing 12 ka apostoles kag “ginpadala niya sila sa pagwali sang ginharian sang Dios.” (Lucas 9:1, 2) Nian, ginsugo niya ang 70 pa sa pagwali sang mensahe: “Ang ginharian sang Dios malapit sa inyo.” (Lucas 10:1, 8, 9) Sang nagbalik sila kag nagreport kay Jesus tuhoy sa ila madinalag-on nga pagwali sang Ginharian, si Jesus nagsiling: “Nakita ko si Satanas nga naholog subong sang kilat gikan sa langit.”—Lucas 10:17, 18.
8. Ano ang maathag nga ginpakita ni Jesus sa bug-os niya nga pagkabuhi?
8 Si Jesus mapisan kag naghimulos sang tanan nga kahigayunan agod makapanaksi tuhoy sa Ginharian. Wala untat sia nga nagpangabudlay adlaw kag gab-i. Indi masulhay ang iya kabuhi. “Ang talonon nga mga ido may mga lungib, kag ang mga pispis sa langit may mga haponan; apang ang Anak sang tawo wala gid sing olonlan sang iya olo,” siling niya. (Lucas 9:58; Marcos 6:31; Juan 4:31-34) Wala madugay antes sia mapatay, maisog sia nga nagpamulong sa atubangan ni Poncio Pilato: “Tungud sini nagkari ako sa kalibutan, agud nga magsaksi ako sa kamatooran.” (Juan 18:37) Sa bug-os niya nga pagkabuhi, ginpakita ni Jesus nga nagkari sia, indi lamang agod mangin daku nga manunudlo ukon manughimo sing milagro ukon masinakripisyuhon nga Manunubos, kundi agod sakdagon ang kabubut-on sang Soberano nga si Jehova kag magpanaksi sa ikasarang sang Dios sa paghimo sang iya kabubut-on paagi sa Ginharian.—Juan 14:6.
“Natuman Na!”
9. Sa ano nga paagi gindugmok ni Satanas ang tikod sang “binhi” sang babayi sang Dios?
9 Wala malipay ang Kaaway, nga si Satanas nga Yawa, sa tanan nga ginhimo ni Jesus may kaangtanan sa Ginharian. Paagi sa dutan-on nga bahin sang iya “binhi,” nga amo ang pulitika kag ang relihion, sulitsulit nga ginpanikasugan ni Satanas nga pahipuson ang “binhi” sang babayi. Halin sang matawo si Jesus tubtob sang mapatay sia sa duta, puntariya ni Satanas kag sang iya mga demonyo si Jesus. Nian, sang tigpamulak sang 33 C.E., nag-abot ang tion nga ang Anak sang tawo dugmukon sang Kaaway sa tikod. (Mateo 20:18, 19; Lucas 18:31-33) Maathag nga ginapakita sang rekord sang mga Ebanghelyo kon paano gingamit ni Satanas ang mga tawo, halin kay Judas Iscariote tubtob sa puno nga mga saserdote, mga escriba, mga Fariseo, kag mga Romano, agod paantuson kag patyon si Jesus sa usok sang pag-antos.—Binuhatan 2:22, 23.
10. Ano nga pinakaimportante nga butang ang natuman ni Jesus sang mapatay sia sa usok sang pag-antos?
10 Ano ang madumduman mo sa pag-antos ni Jesus sing inanay kag masakit nga kamatayon sa usok sang pag-antos? Ayhan madumduman mo ang halad gawad nga kinabubut-on nga ginhimo ni Jesus tungod sa makasasala nga katawhan. (Mateo 20:28; Juan 15:13) Mahimo magadayaw ka sa daku nga gugma nga ginpakita ni Jehova sa pag-aman sini nga halad. (Juan 3:16) Ayhan mapahulag ka kaangay sang isa ka opisyal sang Romano nga hangaway nga nagsiling: “Matuud gid nga ini Anak sang Dios!” (Mateo 27:54) Ini tanan nagakaigo nga mga reaksion. Sa pihak nga bahin, dumduma ang katapusan nga pinamulong ni Jesus sa usok sang pag-antos: “Natuman na!” (Juan 19:30, NW) Ano ang natuman na? Bisan pa madamo sing nahimo si Jesus paagi sa iya kabuhi kag kamatayon, indi bala nga ang pinakaimportante nga rason kon ngaa nagkari si Jesus amo agod husayon ang hulusayon tuhoy sa pagkasoberano ni Jehova? Kag wala bala gintagna nga subong “binhi,” magaantos sia sing daku nga pagtilaw gikan kay Satanas agod matinluan ang ngalan ni Jehova sang tanan nga pasipala? (Isaias 53:3-7) Mabug-at ini nga mga responsibilidad, apang natuman ini tanan ni Jesus. Daw ano gid nga hinimuan!
11. Ano ang himuon ni Jesus agod matuman sing bug-os ang tagna sa Eden?
11 Bangod sang iya katutom, si Jesus ginbanhaw, indi subong isa ka tawo, kundi subong “espiritu nga manughatag sing kabuhi.” (1 Corinto 15:45; 1 Pedro 3:18) Ang saad ni Jehova sa iya ginhimaya nga Anak amo: “Lingkod ka sa akon too, tubtub nga mahimo ko ang imo mga kaaway nga imo palatungan.” (Salmo 110:1) Ang “mga kaaway” nagalakip sa panguna nga malinapason nga si Satanas kag sa tanan nga nagahuman sang iya “binhi.” Subong Hari sang Mesianikong Ginharian ni Jehova, pangunahan ni Jesucristo ang paglaglag sa tanan nga mga rebelde sa langit kag sa duta. (Bugna 12:7-9; 19:11-16; 20:1-3, 10) Nian ang tagna sa Genesis 3:15 bug-os nga matuman kag subong man ang pangamuyo nga gintudlo ni Jesus sa iya mga sumulunod: “Magkari ang imo ginharian. Paghimoon ang imo kabubut-on, sa duta subong man sa langit.”—Mateo 6:10; Filipos 2:8-11.
Isa ka Huwaran nga Dapat Naton Sundon
12, 13. (a) Ano ang resulta sang pagbantala sing maayong balita sang Ginharian karon? (b) Ano ang dapat naton ipamangkot sa aton kaugalingon kon luyag naton nga sundon ang mga tikang ni Cristo?
12 Suno gid sa gintagna ni Jesus, ang maayong balita sang Ginharian ginabantala karon sa madamo nga kadutaan. (Mateo 24:14) Subong resulta, minilyon ang nagdedikar sang ila kabuhi sa Dios. Nakunyag sila sa mga pagpakamaayo nga ihatag sang Ginharian. Nalangkag sila nga magkabuhi sing dayon nga may paghidait kag kalig-unan sa isa ka paraiso nga duta, kag malipayon nga ginabantala nila sa iban ang tuhoy sa ila paglaum. (Salmo 37:11; 2 Pedro 3:13) Isa ka bala sining mga manugbantala sang Ginharian? Kon amo, dapat ka hatagan sing komendasyon. Apang, may isa pa ka butang nga dapat binagbinagon sang tagsatagsa sa aton.
13 Si apostol Pedro nagsulat: “Si Cristo mismo nag-antos tungod sa inyo, nga nagabilin sa inyo sang huwaran agod sundon ninyo sing maayo ang iya mga tikang.” (1 Pedro 2:21, NW) Talupangda nga indi ang kakugi ni Jesus sa pagbantala ukon ang iya kalantip sa pagtudlo ang ginsambit diri ni Pedro, kundi ang iya pag-antos. Subong isa nga nakasaksi, nakahibalo gid si Pedro kon tubtob diin si Jesus handa nga mag-antos agod magpasakop sa pagkasoberano ni Jehova kag agod pamatud-an nga butigon si Satanas. Kon amo, sa ano nga mga paagi naton masundan ang mga tikang ni Jesus? Dapat naton pamangkuton ang aton kaugalingon: ‘Tubtob diin ako handa nga mag-antos agod sakdagon kag tahuron ang pagkasoberano ni Jehova? Ginapakita ko bala sa akon kabuhi kag kakugi sa ministeryo nga ginasakdag ko ang pagkasoberano ni Jehova subong pinakaimportante nga butang para sa akon?’—Colosas 3:17.
14, 15. (a) Ano ang ginsabat ni Jesus sa di-maalamon nga mga panugda kag mga tanyag, kag ngaa? (b) Ano nga hulusayon ang dapat naton pirme dumdumon? (Ilakip ang mga komento sa kahon nga “Magdampig kay Jehova.”)
14 Kada adlaw, nagaatubang kita sing dalagku kag magagmay nga mga problema kag nagahimo sing dalagku kag magagmay nga mga desisyon. Paano naton mahibaluan ang dapat naton himuon? Halimbawa, kon ginasulay sa paghimo sing butang nga magaguba sang aton reputasyon subong Cristiano, ano ang himuon naton? Sang ginsilingan ni Pedro si Jesus nga maluoy sia sa iya kaugalingon, ano ang ginsabat ni Jesus? “Halin ka sa atubangan ko, Satanas!” siling ni Jesus. “Wala ka nagapanghunahuna sang mga butang nga iya sang Dios, kondi sang iya sang mga tawo.” (Mateo 16:21-23) Ukon kon tanyagan kita sing kahigayunan nga magtin-ad ukon magsaka ang posisyon sa trabaho apang maapektuhan ang aton Cristianong mga hilikuton kag kaangtanan sa Dios, magasabat bala kita kaangay sa ginsabat ni Jesus? Sang mahantop ni Jesus nga ang mga nakakita sang iya mga milagro ‘magakari kag piliton nga himuon sia nga hari,’ si Jesus maabtik nga naglikaw sa ila.—Juan 6:15.
15 Ngaa malig-on gid ang ginsabat kag ginhimo ni Jesus sa sini kag sa iban pa nga mga okasyon? Bangod nahantop niya nga indi lamang ang iya kaugalingon nga kaluwasan kag kaayuhan ang nadalahig. Luyag niya himuon ang kabubut-on sang iya Amay kag sakdagon ang pagkasoberano ni Jehova bisan ano pa ang matabo. (Mateo 26:50-54) Maathag gid kay Jesus ini nga hulusayon. Gani, kon indi maathag sa aton ang hulusayon tuhoy sa pagkasoberano ni Jehova, yara pirme ang katalagman nga magkompromiso kita ukon mapaslawan sa paghimo kon ano ang husto. Ngaa? Bangod mahapos kita masulay sang mga padihot ni Satanas, kay sampaton sia sa paghimo sang malain nga butang nga makagalanyat, kaangay sang ginhimo niya sang ginsulay niya si Eva.—2 Corinto 11:14; 1 Timoteo 2:14.
16. Ano ang aton panguna nga tulumuron sa pagbulig sa iban?
16 Sa aton ministeryo, nagapanikasog kita nga masugilanon kag mapakita sa mga tawo ang mga sabat sang Biblia tuhoy sa ila mga kabalaka. Isa ini ka epektibo nga paagi agod pukawon ang ila interes sa pagtuon sa Biblia. Apang, indi lamang ang pagbulig sa mga tawo nga mahibaluan ang ginasiling sang Biblia ukon ang mga pagpakamaayo nga dalhon sang Ginharian sang Dios ang aton panguna nga tulumuron. Dapat naton sila buligan nga mahangpan ang hulusayon tuhoy sa pagkasoberano ni Jehova. Handa bala sila nga mangin matuod nga mga Cristiano kag pas-anon ang “usok sang pag-antos” kag mag-antos tungod sa Ginharian? (Marcos 8:34, NW) Handa bala sila magbuylog sa grupo sang mga tawo nga nagasakdag sa pagkasoberano ni Jehova kag busa pamatud-an nga butigon kag mapasipalahon si Satanas? (Hulubaton 27:11) Pribilehiyo naton nga buligan ang aton kaugalingon kag ang iban nga sakdagon ang pagkasoberano ni Jehova.—1 Timoteo 4:16.
Agod ang Dios “Mangintanan sa Tanan”
17, 18. Ano nga makalilipay nga tion ang paabuton naton kon ginasakdag naton ang pagkasoberano ni Jehova?
17 Samtang ginahimo naton karon ang aton bug-os nga masarangan agod ipakita sa aton paggawi kag sa aton ministeryo nga ginasakdag naton ang pagkasoberano ni Jehova, mapaabot naton ang tion nga ‘itugyan ni Jesucristo ang ginharian sa iya Dios kag Amay.’ San-o ini? Si apostol Pablo nagapaathag: “Sa tapus nga nalaglag niya ang tanan nga pagdumala kag ang tanan nga pagbulut-an kag ang gahum. Kay kinahanglan sia maghari tubtub nga mabutang niya ang iya tanan nga kaaway sa idalum sang iya mga tiil. . . . Niyan ang Anak man magapasakup sa iya nga nagpasakup sang tanan nga butang sa iya, agud nga ang Dios mangintanan sa tanan.”—1 Corinto 15:24, 25, 28.
18 Daw ano gid ka makalilipay nga tion kon ang Dios “mangintanan sa tanan”! Tumanon na sang Ginharian ang katuyuan sini. Ang tanan nga nagapamatok sa pagkasoberano ni Jehova laglagon. Ang paghidait kag kahim-ong ipasag-uli sa bug-os nga uniberso. Nahisanto sa ginsiling sang salmista, ang tanan nga tinuga magaamba: “Ipahanungud sa GINOO ang himaya nga naigo sa iya ngalan; . . . Isiling sa mga pungsud, ‘Ang GINOO nagahari!’”—Salmo 96:8, 10.
Masabat Mo Bala?
• Paano ginpakita ni Jesus nga ang hulusayon tuhoy sa pagkasoberano sang Dios amo ang pinakaimportante para sa iya?
• Ano ang pinakaimportante nga natuman ni Jesus paagi sa iya ministeryo kag kamatayon?
• Paano naton masunod ang huwaran ni Jesus agod ipakita nga ginasakdag naton ang pagkasoberano ni Jehova?
[Mga Pamangkot sa Pagtinuon]
[Kahon/Mga piktyur sa pahina 29]
MAGDAMPIG KAY JEHOVA
Subong sang nahibaluan sang madamo nga mga kauturan sa Korea kag sa iban pa nga mga lugar, makabulig gid sa mga Cristiano nga nagaatubang sing daku nga pagtilaw kon dumdumon nila ang rason kon ngaa nagakatabo ini sa ila.
“Nakabatas kami,” siling sang isa ka Saksi ni Jehova nga nabilanggo sa anay Sobyet nga rehimen, “bangod nahangpan namon sing maathag ang hulusayon nga ginpautwas sa hardin sang Eden may kaangtanan sa kinamatarong sang Dios sa paggahom. . . . Nahibaluan namon nga may kahigayunan kami nga ipakita ang amon pagdampig sa paggahom ni Jehova. . . . Nagpabakod kag nagbulig ini sa amon nga mahuptan ang amon integridad.”
Isa pa ka Saksi ang nagpaathag kon ano ang nagbulig sa iya kag sa iban pa nga mga Saksi sa isa ka kampo sang pagpangabudlay. “Gin-alay-ayan kami ni Jehova,” siling niya. “Walay sapayan sang mabudlay nga mga kahimtangan, pirme kami alisto nga pabakuron ang amon kaangtanan kay Jehova. Pirme namon ginapalig-on kag ginapahanumdom ang isa kag isa nga dampig kami kay Jehova sa hulusayon tuhoy sa bug-os uniberso nga pagkasoberano.”
[Piktyur sa pahina 26]
Paano ginsakdag ni Jesus ang pagkasoberano ni Jehova sang ginsulay sia ni Satanas?
[Piktyur sa pahina 28]
Ano ang natuman sang mapatay si Jesus?
