Mga Pamangkot Gikan sa mga Bumalasa

Paano tamdon sang isa ka Cristiano ang pagpangayam kag pagpangisda?

Wala ginadumili sang Biblia ang pagpangayam kag pagpangisda. (Deuteronomio 14:4, 5, 9, 20; Mateo 17:27; Juan 21:6) Apang, kinahanglan nga binagbinagon sang mga Cristiano nga nagapangayam kag nagapangisda ang pila ka prinsipio sa Kasulatan.

Gintugutan sang Dios si Noe kag ang iya mga kaanakan nga magpatay kag magkaon sing sapat, sa kondisyon nga patuluon nila ang dugo sini antes ini kaunon. (Genesis 9:3, 4) Ginpadaku sini nga sugo nga ang kabuhi sang sapat dapat tahuron kay naghalin ini sa Dios. Busa, ang mga Cristiano wala nagapatay sing mga sapat para lamang sa isport ukon sa kalingawan. Wala man sila nagapakigbahin sa patarasak nga pagpatay sa mga sapat.—Hulubaton 12:10.

Dapat man naton binagbinagon ang aton panimuot. Ang mga apostoles nga mga mangingisda mahimo nga nalipay gid kon madamo ang ila panguhaon. Apang, wala sing pamatuod nga nagpahambog sila sang ila kinaadman sa pagpangayam ukon pagpangisda. Wala man sing pamatuod nga nagpaindis-indis sila sa iban, agod ipakita ang ila pagkaisganan ukon agod mabatyagan ang kakunyag sa paglagas, sa pagpakig-away, kag sa pagpatay sing sapat.—Salmo 11:5; Galacia 5:26.

Busa, mahimo naton pamangkuton ang aton kaugalingon: ‘Ginatahod ko bala ang pagtamod ni Jehova tuhoy sa kabuhi? Pirme ko bala ginahunahuna kag ginahambal ang tuhoy sa pagpangayam ukon pagpangisda? Ginapakita bala sang akon pagsinalayo ang akon daku nga kalangkag sa pagpangayam ukon ang akon kakugi subong isa ka ministro sang Dios? Bangod sang akon pagpangayam ukon pagpangisda, nangin suod bala ako sa mga di-tumuluo ukon napatumbayaan ko bala ang akon pamilya?’—Lucas 6:45.

Ang pila nga nagapangayam ukon nagapangisda para kaunon mahimo mangatarungan nga wala sing malain kon patumbayaan anay nila ang Cristianong mga hilikuton sa tion nga bugana kag tugot sa layi ang magpangayam kag magpangisda. Apang, wala kita nagapakita sing pagtuo kag pagsalig sa Dios kon ginauna naton ang iban nga butang. (Mateo 6:33) Dugang pa, ginatuman sang mga Cristiano ang tanan nga kasuguan ni “Cesar” tuhoy sa pagpangayam kag pagpangisda, bisan pa ginapatuman ini ukon wala sang mga awtoridad.—Mateo 22:21; Roma 13:1.

Agod mailog ang pagtamod ni Jehova sa pagpangayam kag pagpangisda, mahimo nga dapat ipasibu sang iban ang ila panghunahuna sa Iya mga talaksan. (Efeso 4:22-24) Apang, kinahanglan naton tahuron ang desisyon sang iban base sa ila konsiensia. Nagakaigo gid sa sini ang laygay ni apostol Pablo: “Indi na kita maghinukmanay, kondi magtapat kita nga indi gid magbutang sing kasandaran ukon kasablagan sa dalanon sang iya utod.” (Roma 14:13) Ang pagpakita sining masinakripisyuhon nga gugma kag pagtahod nagaresulta sa paghidait sa kongregasyon kag nagapahalipay sa aton Magbubuhat, ang Ginahalinan sang tanan nga kabuhi.—1 Corinto 8:13. *

[Footnote]