Madumduman Mo Bala?

Nakabenepisyo ka bala sa pagbasa sa ulihi nga mga gua sang Ang Lalantawan? Tilawi kon masabat mo ang masunod nga mga pamangkot:

• Ngaa mapuslanon gihapon ang “Daan nga Testamento”?

Ang awtor sang Biblia, indi mapintas nga dios, kundi isa ka mahigugmaon nga Dios, si Jehova. Masunson nga nagkutlo si Jesus kag ang iya mga sumulunod gikan sa Hebreo nga Kasulatan. Nagaunod ini sing praktikal nga panuytoy sa aton pagkabuhi karon kag nagahatag ini sing matahom nga paglaum para sa palaabuton.—9/1, pahina 4-7.

• Ano ang napamatud-an sa pagligad sang tion halin sang nakasala si Adan kag si Eva?

Sa pagligad sang linibo ka tuig, napamatud-an nga si Satanas butigon, kay si Adan kag si Eva lakip na ang minilyon nila ka kabataan napatay. Napamatud-an man nga indi mas maayo ang kahimtangan sang tawo sang ginsikway nila ang paggahom sang Dios kag wala sila sing kinamatarong ukon ikasarang nga tuytuyan ang ila mga tikang.—9/15, pahina 6-7.

• Ngaa wala si Jacob ginpakamalaut sang magpakunokuno sia nga si Esau?

May kinamatarong si Jacob sa pagpakamaayo sang iya amay kay ginbakal na niya ang pagkapanganay kay Esau. Sang natukiban ni Isaac nga ang iya ginpakamaayo amo si Jacob, wala niya ini ginbawi. Kag indi manigar nga si Jacob ang luyag sang Dios nga magbaton sing pagpakamaayo kay wala ang Dios magpasilabot.—10/1, pahina 31.

• Paano ang aton konsiensia isa ka ebidensia batok sa ebolusyon?

Bisan ano pa ang pungsod ukon kultura sang mga tawo, handa sila pagbulig sa iban bisan pa mabutang sa katalagman ang ila kabuhi. Indi subong sini ang tawo kon kaangay sia sang mga sapat nga nagapadag-asanay lamang agod mabuhi.—10/15, pahina 20.

• Ngaa masiling naton nga mapainubuson ang Dios, kag paano niya ginpakita ini nga kinaiya?

Ang Dios amo ang Soberano kag Manunuga, gani wala sia sing limitasyon kaangay naton. Apang, nahisanto sa 2 Samuel 22:36, masiling naton nga ang Dios mapainubuson bangod ginaulikdan niya kag ginakaluy-an ang kubos nga mga tawo nga nagatinguha nga pahamut-an sia. Daw subong nga gikan sa langit, nagaduko sia agod pakig-angutan sing mainayuhon ang mga tawo nga may kahadlok sa iya.—11/1, pahina 4-5.

• Paano ang dumaan nga buka nga tibod nagasakdag sa rekord sang Biblia?

Nakasapo ang mga arkeologo sing buka nga mga tibod sa Samaria nga may pito ka ngalan sang mga kaliwatan nga narekord sa Josue 17:1-6. Ginpamatud-an sang mga pidaso gikan sa Arad nga matuod ang impormasyon tuhoy sa mga pamilya sang saserdote lakip na ang ngalan sang Dios. Ang mga buka nga tibod gikan sa Laquis nagasugid tuhoy sa pulitikal nga kahimtangan kag kinagamo sa Juda antes ini ginsalakay sang mga Babilonianhon.—11/15, pahina 12-14.

Ngaa makahinakop kita nga si Lucas ang nagsulat sang tulun-an sang Binuhatan?

Ang Ebanghelyo ni Lucas kag ang Mga Binuhatan sang mga Apostoles ginsulat para kay Teofilo, gani makahinakop kita nga si Lucas amo ang nagsulat sining duha ka tulun-an. Ang gingamit nga mga pronombre nga “kami,” “aton,” kag “amon” nagapakita nga presente si Lucas sa pila ka mga hitabo. (Binuhatan 16:8-15)—11/15, pahina 18.

• Paano dapat tamdon sang isa ka Cristiano ang pagpangayam kag pagpangisda?

Sang panahon ni Noe, gintugutan sang Dios ang mga tawo nga patyon kag kaunon ang mga sapat, apang ginsugo sila nga patuluon ang dugo sini. Ginapadaku sini nga sugo nga dapat tahuron ang kabuhi sang sapat kay naghalin ini sa Dios. Indi dapat makigbahin ang mga Cristiano sa isport nga nagadalahig sa pagpatay sa mga sapat kag indi man dapat hampang-hampangan sang mga Cristiano ang pagpangayam, pagpanakop, ukon pagpatay sa mga sapat. Kinahanglan gid nga tumanon naton ang mga kasuguan ni Cesar kag tahuron ang konsiensia sang iban. (Roma 14:13)—12/1, pahina 31.