May Yara Ka Bala Espirituwal nga Manunudlo?

SANG 16 anyos pa lamang si Uzias, nangin hari na sia sa nabagatnan nga ginharian sang Juda. Naggahom sia sing kapin sa 50 ka tuig, kutob sang 829 tubtob 778 B.C.E. Halin sa iya pagkalamharon, padayon nga ginhimo ni Uzias “kon ano ang matarong sa panulok ni Jehova.” Ano ang nag-impluwensia sa iya nga himuon ini? Ang rekord sang maragtas nagsiling: “Padayon nga naghugod [si Uzias] sa pagpangita sa Dios sa mga adlaw ni Zacarias, ang manunudlo sa pagkahadlok sa matuod nga Dios, kag, sang mga adlaw nga ginapangita niya si Jehova, ginpahamungaya sia sang matuod nga Dios.”—2 Cronica 26:1, 4, 5, NW.

Luwas sa sini nga rekord, wala na sing ginasugid ang Biblia tuhoy kay Zacarias, nga manuglaygay sang hari. Apang, subong “manunudlo nga nagatudlo sing pagkahadlok sa Dios,” nangin maayo gid nga impluwensia si Zacarias sa lamharon nga manuggahom sa paghimo sing matarong. Ang The Expositor’s Bible nagasiling nga mahimo gid nga si Zacarias “isa ka tawo nga batid sa Kasulatan, madamo sing espirituwal nga ihibalo, kag maayo sia magpaalinton sini sa iban.” Tuhoy kay Zacarias, ang isa ka iskolar sa Biblia naghinakop: “Kabisado niya ang mga tagna kag . . . isa sia ka intelihente, debotado, matarong nga tawo; kag, mahimo gid nga may daku sia nga impluwensia kay Uzias.”

Nakabaton si Uzias sing bugana nga pagpakamaayo bangod sang iya katutom, kag “nagbakud sia sing lakas” kay “gintabangan sia sang Dios.” Huo, naagom niya ang kadalag-an sa iya paghari bangod matutom sia sa Dios “sa mga adlaw ni Zacarias.” (2 Cronica 26:6-8) Apang, sang nangin madinalag-on na si Uzias, ginsikway niya ang mga panudlo ni Zacarias, nga iya manunudlo. “Nagmatinaastaason ang tagipusuon [ni Uzias], nga naghimo sia sing kaduluntan. Kay naglapas sia sa GINOO nga iya Dios.” Bangod sang iya matinamayon nga buhat, gin-aro sia—isa ka makangilil-ad nga balatian. Bangod sini, indi na sia makaalagad subong hari.—2 Cronica 26:16-21.

May nagabulig bala sa imo sa “pagpangita sa Dios”? Mahimo gid, lamharon ka man ukon hamtong na, lalaki man ukon babayi. Pakabahandia sia, kay ang iya mga laygay makabulig sa imo agod padayon mo nga mahimo ang kalahamut-an sa panulok ni Jehova. Pamatii ining hamtong nga Cristiano, kag binagbinaga gid ang iya ginalaygay sa imo. Kabay nga indi mo pagsikwayon ang maalamon nga mga pulong gikan sa imo “manunudlo nga nagatudlo [sa imo] sa pagkahadlok sa Dios.”—Hulubaton 1:5; 12:15; 19:20.