Wala sing Hinganiban Batok sa Imo ang Magamadinalag-on
Wala sing Hinganiban Batok sa Imo ang Magamadinalag-on
“Ang bisan ano nga hinganiban nga himuon batok sa imo indi magmadinalag-on.”—ISAIAS 54:17, NW.
1, 2. Paano ang naeksperiensiahan sang mga Saksi ni Jehova sa Albania nagapakita nga matuod ang Isaias 54:17?
SANG nagligad nga mga dekada, isa ka grupo sang wala kahadlok nga mga Cristiano ang nagapuyo sa isa ka gamay nga bulubukid nga pungsod sa bagatnan-sidlangan sang Europa. Nagtinguha gid ang isa ka ateistiko nga Komunista nga gobierno nga papason sila. Gintormento sila, ginpabakabaka trabaho sa sulod sang mga kampo nga bilangguan, kag ginpakalain sang media, apang wala sila mapapas. Sin-o sila? Amo ang mga Saksi ni Jehova sa Albania. Bisan pa nabudlayan gid sila sa paghiwat sang ila mga miting kag sa pagbantala, ang ila padayon nga pag-alagad sa Dios sa sulod sang mga dekada nagtib-ong kag naghatag sing kadungganan sa Cristianismo kag sing kadayawan sa ngalan ni Jehova. Sang nagligad nga tuig, sa dedikasyon sang ila bag-o nga mga pasilidad sang sanga, ang isa ka madugay na nga matutom nga Saksi nagsiling: “Bisan ano pa ang himuon ni Satanas, pirme sia nagakapierde kag pirme nagadaug si Jehova!”
2 Ini tanan isa ka buhi nga ebidensia nga matuod ang saad sang Dios sa iya katawhan nga nasulat sa Isaias 54:17, NW: “Ang bisan ano nga hinganiban nga himuon batok sa imo indi magmadinalag-on, kag ang bisan ano nga dila nga magpakamalaut sa imo pakamalauton mo.” Ginapamatud-an sang maragtas nga bisan ano pa ang himuon sang kalibutan ni Satanas, indi sini mapauntat ang dedikado nga mga alagad ni Jehova nga Dios sa pagsimba sa iya.
Indi Madinalag-on nga mga Panikasog ni Satanas
3, 4. (a) Ano ang mga hinganiban ni Satanas? (b) Sa ano nga paagi wala magmadinalag-on ang mga hinganiban sang Yawa?
3 Ang mga hinganiban nga ginagamit batok sa matuod nga mga sumilimba amo ang mga pagdumili, pag-atake sang akig nga mga grupo, mga pagbilanggo, kag ‘pagpahito sing kalainan paagi sa kasuguan.’ (Salmo 94:20, NW) Ang matuod, samtang ginatun-an sang mga Saksi ni Jehova ini nga artikulo, ang integridad sa Dios sang matuod nga mga Cristiano ‘ginatilawan’ sa pila ka pungsod.—Bugna 2:10.
4 Halimbawa, nagreport ang isa ka sanga talatapan sang mga Saksi ni Jehova nga sa sulod lamang sang isa ka tuig, 32 ka kaso ang natabo diin ang mga alagad sang Dios ginsakit samtang nagapakigbahin sila sa ministeryo. Dugang pa, 59 ang insidente nga ang mga Saksi—bata kag tigulang, lalaki kag babayi—gindakop sang mga pulis samtang nagabantala sila sa publiko. Ang iban sa ila ginkuhaan sing fingerprint, ginretratuhan, kag ginbilanggo subong mga kriminal. Ang iban pa gid ginpahog nga sakiton. Sa isa pa ka pungsod, kapin na sa 1,100 ang dokumentado nga mga kaso sang mga Saksi ni Jehova nga gin-aresto, ginmultahan, ukon ginsakit. Kapin sa 200 sini nga mga kaso ang natabo sang adlaw nga nagtipon sila agod saulugon ang kamatayon ni Jesus! Walay sapayan sini, ginbuligan sang espiritu ni Jehova ang iya katawhan nga makalampuwas sa sining mabudlay nga mga kahimtangan, sa sini nga mga kadutaan kag sa iban pa nga mga pungsod. (Zacarias 4:6) Ang nagabalingaso nga kaakig sang mga kaaway indi makapahipos sa mga nagadayaw kay Jehova. Huo, nagasalig gid kita nga wala sing makasablag sa katuyuan sang Dios.
Pagpakamalaut sa Butig nga mga Panumbungon
5. Ano ang butig nga mga panumbungon batok sa mga alagad ni Jehova sang nahauna nga siglo?
5 Gintagna ni Isaias nga pakamalauton sang katawhan sang Dios ang butig nga mga panumbungon batok sa ila. Sang nahauna nga siglo, pirme lang ginapakalain ang mga Cristiano. Ang isa ka halimbawa sini amo ang mga pulong nga masapwan sa Binuhatan 16:20, 21, NW: “Ginagamo gid sini nga mga tawo ang aton siudad, . . . kag nagabantala sila sang mga kinabatasan nga indi tugot sa kasuguan nga sundon ukon himuon naton, bangod mga Romano kita.” Sa isa pa gid ka higayon, ginsutsutan sang relihioso nga mga kaaway ang mga manuggahom sang siudad nga pamatukan ang mga sumulunod ni Cristo, nga nagasiling: “Yari man diri ang mga tawo nga nagagamo sa napuy-an nga duta, . . . Kag sila tanan nagapanghikot batok sa mga mando ni Cesar.” (Binuhatan 17:6, 7, NW) Gintawag si apostol Pablo nga “tawo nga makatalagam” kag lider sang isa ka sekta nga nagasugyot sing pagrebelde sa “bug-os napuy-an nga duta.”—Binuhatan 24:2-5, NW.
6, 7. Paano ginapakamalaut sang matuod nga mga Cristiano ang mga pag-atake sa ila?
6 Gani, wala man kita nagakakibot karon kon ang matuod nga mga Cristiano hungod nga ginapakalain, ginapasipalahan, kag ginabutangbutangan. Paano naton ginapakamalaut ini nga mga pag-atake?—Isaias 54:17.
7 Ang maayo nga paggawi sang mga Saksi ni Jehova masami nga nagahatag sing ebidensia nga indi matuod ining mga panumbungon kag pakalain sa ila. (1 Pedro 2:12) Kon ang mga Cristiano masinulundon sa kasuguan nga mga banwahanon kag maayo sing moralidad nga mga tawo nga nagaulikid sa ila mga isigkatawo, ang mga panumbungon batok sa ila ginapamatud-an nga indi matuod. Ang aton maayo nga paggawi ebidensia sa aton pagkamatarong. Bangod makita sang mga tawo ang aton padayon nga paghimo sing maayo nga mga buhat, masami nga ginapahulag sila sa paghimaya sa aton langitnon nga Amay kag sa pagbaton nga ang dalanon sang pagkabuhi sang iya mga alagad amo ang labing maayo.—Isaias 60:14; Mateo 5:14-16.
8. (a) Ano ang kinahanglan kon kaisa agod depensahan ang aton pasad sa Biblia nga panindugan? (b) Subong pag-ilog kay Jesus, paano naton ginapakamalaut ang mga panumbungon batok sa aton?
8 Dugang sa aton Cristiano nga paggawi, mahimo nga kinahanglan kon kaisa nga depensahan nga may kasidla ang aton pasad sa Biblia nga panindugan. Ang isa ka paagi amo ang pag-apelar sa gobierno kag sa mga hukmanan para sa proteksion. (Ester 8:3; Binuhatan 22:25-29; 25:10-12) Sang si Jesus yari sa duta, may mga higayon nga ginsuay niya sing dayag ang mga nagamulay sa iya, agod pamatud-an nga indi matuod ang ila mga panumbungon. (Mateo 12:34-37; 15:1-11) Subong pag-ilog kay Jesus, ginahimuslan naton ang kahigayunan nga paathagan ang iban tuhoy sa aton tudok nga mga panindugan. (1 Pedro 3:15) Kabay nga indi kita mag-untat sa pagsugid sang kamatuoran sang Pulong sang Dios bangod sa pagyaguta sang aton mga kaeskwela, mga katrabaho, ukon sang aton di-tumuluo nga mga paryente.—2 Pedro 3:3, 4.
Jerusalem—“Mabug-at nga Bato”
9. Ano nga Jerusalem ang ginasimbulo sang “mabug-at nga bato” nga ginasambit sa Zacarias 12:3, kag sin-o ang nagatiglawas sa sini sa duta?
9 Ginasugid sang tagna ni Zacarias kon ngaa ginapamatukan sang mga pungsod ang matuod nga mga Cristiano. Talupangda ang ginasiling sang Zacarias 12:3: “Sa sadtong adlaw himoon ko ang Jerusalem nga mabug-at nga bato sa tanan nga mga katawohan.” Ano nga Jerusalem ang ginapatuhuyan sini nga tagna? Ang tagna ni Zacarias tuhoy sa Jerusalem naaplikar sa “langitnon nga Jerusalem,” ang langitnon nga Ginharian nga para sa sini gintawag ang hinaplas nga mga Cristiano. (Hebreo 12:22, NW) Yari pa sa duta ang diutay na lang nga nagkalabilin sini nga mga manunubli sang Mesianiko nga Ginharian. Upod sa ila mga kaupod, ang “iban nga mga karnero,” ginapalig-on nila ang mga tawo nga batunon ang Ginharian sang Dios samtang may tion pa. (Juan 10:16, NW; Bugna 11:15) Ano ang nangin reaksion sang mga pungsod sa sini nga pangagda? Kag ano nga sahi sang pagsakdag ang ginahatag ni Jehova sa iya matuod nga mga sumilimba karon? Hibaluon naton ini samtang ginausisa naton sing dugang pa ang kahulugan sang Zacarias kapitulo 12. Nian, makasalig kita nga ‘wala sing hinganiban ang magamadinalag-on’ batok sa mga hinaplas sang Dios kag sa ila dedikado nga mga kaupod.
10. (a) Ngaa ginaatake ang katawhan sang Dios? (b) Ano ang natabo sa mga nagtinguha sa pagkuha sang “mabug-at nga bato” gikan sa dalanon?
10 Ginapakita sang Zacarias 12:3 nga ‘napilasan sing tama’ ang mga pungsod. Paano ini natabo? Ginapabantala sang Dios ang maayong balita sang Ginharian. Ginaukuran ini sang mga Saksi ni Jehova. Apang, ang pagbantala sa Ginharian subong amo lamang ang paglaum sang katawhan nangin isa ka “mabug-at nga bato” para sa mga pungsod. Nagatinguha sila nga kuhaon ini sa dalanon paagi sa pag-upang sa mga manugbantala sang Ginharian. Bangod sini, ‘napilasan sing tama’ ang nagapasilabot nga mga pungsod. Bisan gani ang ila reputasyon naapektuhan kay nahuy-an sila kag nalutos. Indi nila mapahipos ang matuod nga mga sumilimba nga nagapakabahandi sang ila pribilehiyo nga ibantala ang “wala katapusan nga maayong balita” sang Mesianiko nga Ginharian sang Dios sa wala pa ang katapusan sang sistema sang mga butang karon. (Bugna 14:6, NW) Sang makita ang kasingki nga ginahimo sa mga alagad ni Jehova, ang isa ka guardia sang bilangguan sa isa ka pungsod sa Aprika nagsiling: ‘Ginauyangan lang ninyo ang inyo panikasog sa paghingabot sa sini nga mga tawo. Indi gid sila magkompromiso. Nagadamo pa sila.’
11. Paano ginatuman sang Dios ang iya saad nga nasulat sa Zacarias 12:4?
11 Basaha ang Zacarias 12:4, NW. Nagsaad si Jehova nga sa malaragwayon nga paagi, bulagon niya kag “pasalahon” ang mga nagapakig-away batok sa iya maisog nga mga mensahero sang Ginharian. Ginatuman niya ang iya ginsiling. Halimbawa, sa isa ka pungsod diin ginadumilian ang matuod nga pagsimba, wala mapunggan sang mga kaaway ang pagsulod sang espirituwal nga pagkaon para sa katawhan sang Dios. Nagsiling pa gani ang isa ka pamantalaan nga nagagamit ang mga Saksi ni Jehova sing mga pahabok agod mapasulod sa pungsod ang ila mga balasahon! Natuman ang saad sang Dios sa iya matutom nga mga alagad: “Muklaton ko ang akon mga mata, kag bulagon ko ang tagsa ka kabayo sang mga katawhan.” Nagasalangisag ang nagabalingaso sa kaakig nga mga kaaway sang Ginharian. Apang, nagasalig kita nga subong isa ka grupo atipanon kag luwason ni Jehova ang iya katawhan.—2 Hari 6:15-19.
12. (a) Paano si Jesus nagpasiga sing kalayo sang yari sia sa duta? (b) Paano ginpasiga sang hinaplas nga mga nagkalabilin ang mga butang sa malaragwayon nga paagi, kag ano ang resulta?
12 Basaha ang Zacarias 12:5, 6, NW. “Ang mga pinuno sang Juda” nagapatuhoy sa mga nagadumala sa katawhan sang Dios. Ginpuno sila ni Jehova sing nagadabdab nga kakugi para sa mga hilikuton sang iya Ginharian sa duta. Sang isa ka higayon, nagsiling si Jesus sa iya mga disipulo: “Nagkari ako sa pagpasiga sing kalayo sa duta.” (Lucas 12:49, NW) Nagpasiga matuod si Jesus sing isa ka malaragwayon nga kalayo. Ang mensahe tuhoy sa Ginharian sang Dios amo ang labing importante nga topiko sang makugi nga pagbantala ni Jesus. Ginbangdan ini sang mainit nga pagbinaisay sa bug-os nga pungsod sang mga Judiyo. (Mateo 4:17, 25; 10:5-7, 17-20) Sing kaanggid man, “subong sang kulon nga puno sing kalayo sa tunga sang kakahuyan kag subong sang nagadabdab nga sulo sa bag-o makutol nga mga uyas gikan sa isa ka idas,” ginapadabdab sang suod nga mga sumulunod ni Cristo sa aton adlaw ang mga butang sa malaragwayon nga paagi. Maisugon nga ginbuyagyag sang libro nga The Finished Mystery * sang 1917 ang pagkasalimpapaw sang Cristiandad. Naakig gid sa sini ang mga klerigo. Kasan-o lang, ang Kingdom News Numero 37, “Malapit Na ang Kalaglagan Sang Butig nga Relihion!” nagpahulag sa madamo nga tawo nga magdesisyon dampig ukon batok sa Ginharian sang Dios.
Ginluwas ang “mga Tolda Sang Juda”
13. Ano ang ginapakita sang ekspresyon nga “mga tolda sang Juda” kag ngaa una nga luwason ni Jehova ang iya mga alagad nga yara sa sulod sini?
13 Basaha ang Zacarias 12:7, 8, NW. Kinaandan anay sa pungsod sang dumaan nga Israel ang mga tolda, kay ginagamit ini kon kaisa sang mga manugbantay sang karnero kag sang mga mangunguma. Amo ini sila ang una gid nga maapektuhan kag magakinahanglan sing proteksion kon salakayon sang kaaway nga pungsod ang siudad sang Jerusalem. Ang ekspresyon nga “mga tolda sang Juda” nagapakita nga ang hinaplas nga mga nagkalabilin sa aton tion karon wala sa sulod sang napaderan nga mga siudad kundi daw subong nga yara sila sa gua sa latagon. Wala kahadlok nga ginadepensahan nila sa sini nga duog ang mga hilikuton sang Mesianiko nga Ginharian. Una nga luwason ni Jehova sang mga kasuldadusan ang iya mga alagad nga yara sa “mga tolda sang Juda” bangod sila ang direkta nga ginapuntariya ni Satanas.
14. Paano ginadepensahan ni Jehova ang iya mga alagad nga yara sa “mga tolda” kag paano niya ginabuligan sila nga indi masandad?
14 Ginapamatud-an gid sang rekord sang maragtas nga ginadepensahan ni Jehova ining hinaplas nga mga embahador sang Ginharian nga yara sa “mga tolda” sa latagon. * Ginabuligan niya sila nga indi “masandad” kay ginahimo niya sila nga mabakod kag maisog kaangay ni David, ang hangaway nga hari.
15. Ngaa ‘laglagon ni Jehova ang tanan nga pungsod,’ kag ano anay ang matabo antes sini?
15 Basaha ang Zacarias 12:9, NW. Ngaa ‘laglagon ni Jehova ang tanan nga pungsod’? Bangod padayon nga ginapamatukan nila ang Mesianiko nga Ginharian. Bangod ginagamo nila kag ginahingabot ang katawhan sang Dios, ginapakamalaut sila. Sa indi madugay, himuon sang mga sakop ni Satanas sa duta ang katapusan nga pagsalakay sa matuod nga mga sumilimba sang Dios, nga magadul-ong sa isa ka bug-os kalibutan nga kahimtangan nga ginatawag sa Biblia nga Har–Magedon. (Bugna 16:13-16, NW) Subong reaksion sa sini nga pagsalakay, depensahan sang Supremo nga Hukom ang iya mga alagad kag pakabalaanon ang iya ngalan sa tunga sang mga pungsod.—Ezequiel 38:14-18, 22, 23.
16, 17. (a) Ano ang “palanublion sang mga alagad ni Jehova”? (b) Pamatuod sang ano ang aton pagbatas sa mga pagsalakay ni Satanas?
16 Wala sing hinganiban si Satanas nga makapaluya sa pagtuo ukon makapaugdaw sa kakugi sang katawhan sang Dios sa bug-os nga kalibutan. Ang kalinong nga aton ginabatyag bangod nahibaluan naton nga ginasakdag kita sang makaluwas nga gahom ni Jehova amo ang “palanublion sang mga alagad ni Jehova.” (Isaias 54:17, NW) Wala sing bisan sin-o nga makadingot sa aton sang aton ginabatyag nga kalinong kag sang aton mapagros nga kahimtangan sa espirituwal. (Salmo 118:6) Indi pagluatan ni Satanas ang pagpamatok kag paghingabot sa aton. Ang aton matutom nga pagbatas walay sapayan sang pagpakahuya sa aton isa ka pamatuod nga ang espiritu sang Dios yara sa aton. (1 Pedro 4:14) Ang maayong balita tuhoy sa natukod na nga Ginharian ni Jehova ginabantala sa bug-os nga kalibutan. Subong sang isa ka butang nga makapalipong kon ihaboy sa isa ka tawo, madamo nga simbuliko nga “panglabyog nga mga bato” sang pagpamatok ang ginahaboy sa katawhan sang Dios. Apang, paagi sa kusog ni Jehova, ginalandas sang iya mga alagad ini nga mga bato, amo nga wala ini sing epekto sa ila. (Zacarias 9:15, NW) Ang hinaplas nga mga nagkalabilin kag ang ila matutom nga mga kaupod indi mapauntat!
17 Ginapaabot naton nga luwason kita sing bug-os gikan sa mga pagsalakay sang Yawa. Nagahatag gid sa aton sing lugpay ang garantiya nga ‘ang bisan ano nga hinganiban nga himuon batok sa aton indi magmadinalag-on, kag ang bisan ano nga dila nga magpakamalaut sa aton pakamalauton naton’!
[Mga Footnote]
^ par. 12 Ginbalhag anay sang mga Saksi ni Jehova.
^ par. 14 Para sa dugang pa nga mga detalye, tan-awa ang libro nga Jehovah’s Witnesses—Proclaimers of God’s Kingdom, pahina 675-6, nga ginabalhag sang mga Saksi ni Jehova.
Paano Mo Sabton?
• Ano ang nagapakita nga wala magmadinalag-on ang mga hinganiban ni Satanas?
• Paano ang langitnon nga Jerusalem nangin “mabug-at nga bato”?
• Paano ginaluwas ni Jehova ang iya mga alagad nga yara sa “mga tolda sang Juda”?
• Samtang nagahilapit kita sa Armagedon, sa ano ka makasalig?
[Mga Pamangkot sa Pagtinuon]
[Piktyur sa pahina 21]
Ang mga alagad ni Jehova sa Albania nagpabilin nga matutom walay sapayan sang mga pagsalakay ni Satanas
[Piktyur sa pahina 23]
Ginpamatud-an ni Jesus nga indi matuod ang mga panumbungon batok sa iya
[Piktyur sa pahina 24]
Wala sing hinganiban batok sa mga nagabantala sing maayong balita ang magamadinalag-on
