Ang Bag-o nga Tulun-an nga Edisyon sang Ang Lalantawan

INING magasin nga imo ginabasa amo ang una nga gua sang tulun-an nga edisyon sang Ang Lalantawan. Luyag namon ipaathag ang pila ka bahin sang bag-o nga pormat sini nga magasin.

Ang tulun-an nga edisyon balhagon para sa mga Saksi ni Jehova kag sa nagauswag nga mga estudyante sa Biblia. Maggua ini sing makaisa kada bulan kag magaunod sing apat ukon lima ka tulun-an nga artikulo. Ang iskedyul para sa pagbinagbinag sang tulun-an nga mga artikulo mabasa sa panghapin sini nga magasin. Indi kaangay sang publiko nga edisyon sang Ang Lalantawan, ang laragway sa panghapin sang tulun-an nga edisyon indi na pagbag-uhon sa kada gua sini, bangod indi ini pag-itanyag sa ministeryo.

Sa pahina 2 sini nga magasin, makita mo ang isa ka mapuslanon nga sumaryo tuhoy sa katuyuan sang kada tulun-an nga mga artikulo ukon serye subong man ang listahan sang segundaryo nga mga artikulo. Ang mga nagadumala sang Pagtinuon sa Ang Lalantawan mabuligan gid sini nga bahin samtang nagahanda sila para sa isa ka mapuslanon nga pagtinuon sa sini nga mga artikulo sa miting sa kongregasyon.

Matalupangdan mo nga mas malip-ot na ang mga artikulo karon. Busa, malawig nga tion ang mahinguyang sa pagbinagbinag sang yabi nga mga teksto sa tion sang Pagtinuon sa Ang Lalantawan. Ginapalig-on gid namon ikaw nga basahon ang tanan nga ginsambit nga teksto kada semana. Ang iban nga mga teksto ginhinambitan nga “basaha” kag dapat ipabasa kag binagbinagon sa tion sang Pagtinuon sa Ang Lalantawan. Ang iban nga teksto mahimo man basahon kon may tion pa. Sa iban nga artikulo, masapwan mo man ang mga teksto nga ginhinambitan nga “ipaanggid.” Bangod ining mga teksto indi direkta nga nagasakdag sa panguna nga mga punto sa parapo, mahimo nga indi na ini ipabasa sa tion sang pagtinuon. Apang, ini nga mga teksto nagaunod sing makawiwili nga nagasakdag nga mga impormasyon, ukon mahimo nga indi direkta nga nagasakdag sa mga punto nga ginabinagbinag. Ginapalig-on ka namon nga basahon ini samtang nagahanda ka sa Pagtinuon sa Ang Lalantawan. Mahimo mo ini balikwaton sa imo mga komento.

Ang tuigan nga report indi na maggua sa Ang Lalantawan. Sugod sa 2008, magagua ini sa suplemento sa Ang Aton Ministeryo sa Ginharian kag sa Tuigan nga Libro. Apang, subong sang nasambit na, ang tulun-an nga edisyon magaunod man sang segundaryo nga mga artikulo. Bisan pa nga madamo sini ang indi na binagbinagon sa miting sang kongregasyon, ginapalig-on ka nga basahon ini sing maayo. Nagaunod man ini sing espirituwal nga pagkaon gikan sa “matutom kag mainandamon nga ulipon.”—Mat. 24:45-47, NW.

Busa, ang tulun-an nga edisyon kag ang publiko nga edisyon sang Ang Lalantawan indi magkatuhay nga magasin. Ining duha natig-uluhan gihapon sing Ang Lalantawan Nagabantala Sang Ginharian ni Jehova. Ang pahina 2 sining duha ka edisyon may pareho nga parapo nga nagapaathag sang katuyuan sang Ang Lalantawan. Tingubon ining duha ka edisyon sa tuigan nga tomo sang Ang Lalantawan. Kag ang mga materyal gikan sa sining duha ka edisyon ilakip sa artikulo nga “Madumduman Mo Bala?,” nga masapwan sa tulun-an nga edisyon.

Sugod sang 1879, sa tion man sang inaway, sa tion man sang kapigaduhon, kag sa tion sang paghingabot, ang Lalantawan padayon gihapon nga nagabantala sang mga kamatuoran tuhoy sa Ginharian sang Dios. Nagapangamuyo kami nga paagi sa pagpakamaayo ni Jehova, ining bag-o nga pormat sang magasin magabantala gihapon tuhoy sa Ginharian sang Dios. Kag nagapangamuyo kami nga pakamaayuhon ka ni Jehova, samtang ginapanginpuslan mo ang bag-o nga tulun-an nga edisyon sang Ang Lalantawan.