Ang mga Cristiano Ginaayag Subong sang Trigo

ANTES sang iya kamatayon, si Jesus nagpaandam sa iya mga disipulo: “Yari karon! ginapangayo kamo ni Satanas agod ayagon niya kamo subong sang trigo.” (Luc. 22:31, NW) Ano ang iya buot silingon?

Sadtong yari pa si Jesus sa duta, ang pag-ani sang trigo nagakinahanglan sing daku nga tion kag panikasog. Una, ginatipon sang mga mangangani ang ila gingarab nga trigo. Nian, ginawaswas nila ang uhay sini sa isa ka matig-a nga butang ukon ginapaguyod nila sa mga sapat nga ginagamit sa pagpanguma ang inuglinas agod malinas ang mga trigo. Pagkatapos sini, ginakahig ini sang mga mangunguma paibabaw agod pahanginan ini. Ang mga uyas sang trigo magatupa sa linasan samtang ang mga upa ginapalid sang hangin. Ginaayag ini agod maglimpyo ang uyas.

Nahisanto sa ginsiling ni Jesus, si Satanas wala untat sa pagsalakay sa mga disipulo ni Jesus sang una, kag ginasalakay man niya kita karon. (Efe. 6:11) Matuod nga indi tanan nga kabudlayan nga ginaatubang naton direkta nga halin kay Satanas. (Man. 9:11) Apang, indi mahim-os si Satanas sa paggamit sang tanan nga paagi agod gub-on ang aton integridad. Halimbawa, mahimo sulayon niya kita nga mangin materyalistiko, makigbahin sa indi maayo nga mga kalingawan, ukon maggawi sing imoral. Mahimo man niya gamiton ang mga kaupdanan sa eskwelahan ukon sa trabaho kag ang indi Saksi nga mga paryente nga piliton kita nga magpanikasog agod matigayon ang tanan nga ginatanyag sang kalibutan sa patag sang edukasyon kag karera. Dugang pa, mahimo man gamiton ni Satanas ang direkta nga paghingabot agod gub-on ang aton integridad sa Dios. Siempre pa, madamo gid sia sing pamaagi agod ayagon kita.

Paano naton mabatuan ining gamhanan nga kaaway? Kon sa aton lang indi gid naton sia masarangan. Wala kita padaug kay Satanas; apang mas gamhanan si Jehova sangsa iya. Kon magsalig kita sing bug-os kay Jehova, mangamuyo para sa kaalam kag kaisog agod makabatas, kag magsandig sing bug-os sa iya panuytoy, mapalig-on niya kita nga pamatukan ang pagsalakay ni Satanas.—Sal. 25:4, 5.

Kon ginasulay kita, kinahanglan naton ang ikasarang nga “makilala ang maayo kag malain” sa amo indi kita mapatalang sang nga pahito ni Satanas. (Heb. 5:13, 14, NW) Makabulig gid si Jehova agod mapalambo naton ini nga ikasarang. Nian dapat kita mangin determinado nga sundon ang matarong nga dalanon, bisan ano pa ang matabo. Kon sundon naton ang panuytoy ni Jehova, sakdagon gid niya ang aton panindugan nga himuon ang matarong.—Efe. 6:10.

Mahimo tinguhaan ni Satanas nga ayagon kita subong sang trigo. Apang, paagi sa kusog ni Jehova, malig-on sa pagtuo nga makatindog kita batok sa iya. (1 Ped. 5:9) Huo, ang Pulong ni Jehova nagapasalig sa aton: “Pamatuki ang Yawa, kag magapalagyo sia sa inyo.”—Sant. 4:7, NW.