Ginkabig nga Takus sa Pagbaton sang Ginharian
Ginkabig nga Takus sa Pagbaton sang Ginharian
“Pamatuod ini sang matarong nga paghukom sang Dios, nga nagaresulta sa pagkabig sa inyo nga takus sa ginharian sang Dios.”—2 TES. 1:5, NW.
1, 2. Ano ang katuyuan sang Dios tuhoy sa paghukom, kag sin-o ang magahukom?
SANG mga 50 C.E., si apostol Pablo yara sa Atenas. Natublag gid sia sa lapnag nga idolatriya sa sina nga duog amo nga naghatag sia sing isa ka maayo gid nga panaksi. Ginhinakpan niya ang iya pamulongpulong paagi sa pagsugid sing isa ka butang nga mahimo nakapainteres gid sa iya paganong tagpalamati. Nagsiling sia: “Karon nagasiling [ang Dios] sa katawhan bisan diin nga sila tanan dapat maghinulsol. Bangod nagtalana sia sang isa ka adlaw nga tuyo niya hukman ang napuy-an nga duta sa pagkamatarong paagi sa isa ka tawo nga gintangdo niya, kag naghatag sia sang garantiya sa tanan nga tawo paagi sa pagbanhaw niya sa iya gikan sa mga patay.”—Binu. 17:30, 31, NW.
2 Daw ano gid ka serioso nga pamalandungan naton nga nagtalana ang Dios sing isa ka adlaw sang paghukom sa katawhan sa palaabuton! Ina nga paghukom ipadapat sang isa nga wala ginsambit ni Pablo sa iya pamulongpulong sa Atenas apang nahibaluan naton nga sia amo ang ginbanhaw nga si Jesucristo. Ang paghukom ni Jesus nagakahulugan sing kabuhi ukon kamatayon.
3. Ngaa nakigkatipan si Jehova kay Abraham, kag sin-o ang magatungod sang pinasahi nga papel sa katumanan sini?
3 Ina nga Adlaw sang Paghukom magalawig sing 1,000 ka tuig. Si Jesus subong Hari sang Ginharian sang Dios, amo ang gintugyanan ni Jehova sa paghukom, apang wala sia nagaisahanon. Nagpili si Jehova sing mga kaupod ni Jesus gikan sa katawhan agod magahari kag magahukom sa sulod sang isa ka libo ka tuig. (Ipaanggid ang Lucas 22:29, 30.) Halos 4,000 ka tuig na ang nagligad, nagpahamtang si Jehova sang sadsaran sinang Adlaw sang Paghukom sang nakigkatipan sia sa iya matutom nga alagad nga si Abraham. (Basaha ang Genesis 22:17, 18.) Nagpanghikot ina nga katipan sang 1943 B.C.E. Siempre pa, wala nahangpan sing bug-os ni Abraham kon ano ang kahulugan sini nga katipan sa katawhan. Apang, sa sini nga katipan, nahangpan naton nga may pinasahi nga papel ang binhi ni Abraham sa katumanan sang katuyuan sang Dios nga hukman ang katawhan.
4, 5. (a) Sin-o ang panguna nga bahin sang binhi ni Abraham, kag ano ang ginsiling niya tuhoy sa Ginharian? (b) San-o nabuksan ang paglaum nga mangin bahin sang Ginharian sang Dios?
4 Ang panguna nga bahin sang binhi ni Abraham amo si Jesus, nga ginhaplasan sang balaan nga espiritu kag nangin amo ang ginsaad nga Mesias, ukon Cristo sang 29 C.E. (Gal. 3:16) Naghinguyang si Jesus sing tatlo ka tuig kag tunga sa pagbantala sing maayong balita sang Ginharian sa Judiyo nga pungsod. Sang gindakop si Juan Bautista, ginpakita ni Jesus nga posible nga mangin katapo ang iban sa sining Ginharian sang nagsiling sia: “Kutob sang mga adlaw ni Juan Bautista tubtob karon, ang ginharian sang langit amo ang tulumuron nga ginapanikasugan sang mga tawo, kag ang mga nagapanikasog nagakuha sini.”—Mat. 11:12, NW.
5 Sing makawiwili, antes sia nagsiling tuhoy sa mga “nagapanikasog” sa Ginharian sang langit, nagsiling si Jesus: “Sa pagkamatuod nagasiling ako sa inyo, Sa mga nabun-ag sa mga babayi wala sing ginpadala nga daku pa kay Juan Bautista; apang ang tawo nga kubos sa ginharian sang langit daku pa sa iya.” (Mat. 11:11, NW) Ngaa? Bangod ang paglaum nga mangin bahin sang Ginharian sang Dios wala pa nabuksan para sa mga matutom antes sang pagpasagahay sang balaan nga espiritu sang Pentecostes 33 C.E. Kag sa sina nga tion, patay na si Juan Bautista.—Binu. 2:1-4.
Ginpahayag nga Matarong ang Binhi ni Abraham
6, 7. (a) Sa anong paagi mangin “subong sang kabitoonan sang langit” ang binhi ni Abraham? (b) Anong pagpakamaayo ang natigayon ni Abraham, kag anong kaanggid nga pagpakamaayo ang matigayon sang iya binhi?
6 Ginhambalan si Abraham nga magadamo ang iya binhi kag mangin “subong sang kabitoonan sang langit” kag mangin subong sang balas sa baybayon sang dagat. (Gen. 13:16; 22:17) Nagapahangop ini nga sang tion ni Abraham imposible nga mahibaluan sang mga tawo kon daw ano kadamo ang iya binhi. Apang, ang eksakto nga kadamuon sang iya espirituwal nga binhi ginpahibalo sang ulihi. Luwas pa kay Jesus, nadugangan ini sing 144,000.—Bug. 7:4; 14:1.
7 Tuhoy sa pagtuo ni Abraham, ang Pulong sang Dios nagsiling: “Nagtoo [si Abraham] sa GINOO; kag gin-isip ini sa iya nga sa pagkamatarung.” (Gen. 15:5, 6) Matuod, wala sing tawo ang bug-os nga matarong. (Sant. 3:2) Apang, bangod sang dalayawon nga pagtuo ni Abraham, ginkabig sia ni Jehova nga matarong kag nagtawag pa gani sa iya nga abyan. (Isa. 41:8) Ang mga katapo sang espirituwal nga binhi ni Abraham upod kay Jesus ginpahayag man nga matarong, amo nga nakatigayon sila sing mas daku pa nga mga pagpakamaayo sangsa natigayon ni Abraham.
8. Anong mga pagpakamaayo ang nabuksan sa mga katapo sang binhi ni Abraham?
8 Ang hinaplas nga mga Cristiano ginpahayag nga matarong bangod sang ila pagtuo sa halad gawad ni Jesus. (Roma 3:24, 28) Para kay Jehova, nahilway sila sa sala kag mahimo haplasan sang balaan nga espiritu agod mangin espirituwal nga mga anak sang Dios, mga utod ni Jesucristo. (Juan 1:12, 13) Nangin bahin sila sang bag-o nga katipan kag naghuman sang isa ka bag-o nga pungsod, “ang Israel sang Dios.” (Gal. 6:16; Luc. 22:20, NW) Isa gid ini ka halangdon nga pribilehiyo! Bangod sining ginhimo sang Dios para sa ila, ang hinaplas nga mga Cristiano wala nagalaum nga mabuhi sing dayon sa duta. Ginsakripisyo nila ini nga paglaum tungod sa di-malaragway nga kalipay nga mangin kaupod nila si Jesus sa tion sang Adlaw sang Paghukom kag magagahom upod sa iya sa langit.—Basaha ang Roma 8:17.
9, 10. (a) San-o nagsugod ang paghaplas sang balaan nga espiritu sa mga Cristiano, kag ano ang ila paglaum? (b) Ano nga bulig ang natigayon sang hinaplas nga mga Cristiano?
9 Sang Pentecostes 33 C.E., ginhatagan sing kahigayunan ang isa ka grupo sang matutom nga mga tawo nga mangin kaupod ni Jesus nga magagahom sa Adlaw sang Paghukom. Mga 120 ka disipulo ni Jesus ang nabawtismuhan sang balaan nga espiritu kag nangin una nga hinaplas nga mga Cristiano. Apang, para sa ila, panugod lamang ini. Sugod sadto, dapat nila ipakita ang ila pagkamainunungon kay Jehova walay sapayan sang tanan nga pagtilaw ni Satanas sa ila. Dapat sila mangin matutom tubtob sa kamatayon agod matigayon nila ang korona sang langitnon nga kabuhi.—Bug. 2:10.
10 Sa sini nga katuyuan, naghatag si Jehova sa hinaplas nga mga Cristiano sang ila ginakinahanglan nga mga laygay kag pagpalig-on paagi sa iya Pulong kag paagi sa Cristianong kongregasyon. Halimbawa, nagsulat si apostol Pablo sa hinaplas nga mga Cristiano sa Tesalonica: “Subong sang ginahimo sang isa ka amay sa iya mga anak, padayon kami nga nagalaygay sa kada isa sa inyo, kag nagalipay kag nagapanugyan sa inyo, agod padayon kamo nga maglakat nga takus sa Dios nga nagatawag sa inyo sa iya ginharian kag himaya.”—1 Tes. 2:11, 12, NW.
11. Ano nga rekord ang gin-aman ni Jehova para sa mga katapo sang “Israel sang Dios”?
11 Pagligad sing pila ka dekada pagkatapos nga napili ang una nga mga katapo sang hinaplas nga mga Cristiano, nahantop ni Jehova nga nagakaigo nga maghimo sing permanente nga rekord tuhoy sa dutan-on nga ministeryo kag mga pagpakig-angot ni Jesus kag tuhoy sa Iya mga laygay sa hinaplas nga mga Cristiano sang unang siglo. Busa gindugang ni Jehova ang Cristianong Griegong Kasulatan sa nagaluntad na nga Hebreong Kasulatan. Sang primero, ginsulat ang Hebreong Kasulatan para sa undanon nga pungsod sang Israel sa tion nga may pinasahi pa sila nga kaangtanan sa Dios. Ginsulat naman ang Cristianong Griegong Kasulatan para gid sa “Israel sang Dios,” yadtong hinaplas nga mga kauturan ni Cristo kag espirituwal nga mga anak sang Dios. Siempre pa, wala ini nagapahangop nga indi makapanginpulos ang mga di-Israelinhon sa pagtuon sa Hebreong Kasulatan. Sing kaanggid, ang mga Cristiano nga wala ginhaplasan sang balaan nga espiritu makatigayon man sing di-matupungan nga mga pagpakamaayo paagi sa pagtuon kag pagsunod sa mga laygay nga masapwan sa Cristianong Griegong Kasulatan.—Basaha ang 2 Timoteo 3:15-17.
12. Ano ang ginpahanumdom ni Pablo sa hinaplas nga mga Cristiano?
12 Ginpahayag nga matarong kag ginhaplasan sang balaan nga espiritu ang mga Cristiano sang unang siglo agod matigayon nila ang langitnon nga palanublion. Ini nga paghaplas wala nagabayaw sa ila agod nga maghari sila sa ila masigkahinaplas nga mga Cristiano samtang diri pa sa duta. Maathag nga ang pila sa mga Cristiano sang una nalipat sa sini kag nagtinguha nga mangin prominente sa tunga sang ila mga kauturan sa sulod sang kongregasyon. Amo ini ang rason kon ngaa namangkot si Pablo: “Busog na bala kamo? Manggaranon na bala kamo? Nagsugod na bala kamo sa paggahom subong mga hari nga wala kami? Kag sa pagkamatuod luyag ko nga nagsugod na kamo sa paggahom subong mga hari, agod maggahom man kami subong mga hari kaupod ninyo.” (1 Cor. 4:8, NW) Busa, ginpahanumduman ni Pablo ang mga hinaplas sang iya panahon: “Indi nga mga agalon kami sang inyo pagtuo, kundi mga masigkamanugpangabudlay kami para sa inyo kalipay.”—2 Cor. 1:24, NW.
Pagkompleto sa Gintagna nga Kadamuon
13. Ano ang natabo sa pagpili sa mga hinaplas sugod sang 33 C.E.?
13 Indi tanan nga katapo sang 144,000 nga hinaplas nga mga Cristiano ginpili sang unang siglo. Ang pagpili sa ila nagpadayon sa tion sang mga apostoles kag sang ulihi amat-amat nga naghinay sa sulod sang madamo nga siglo. Apang, nagpadayon gihapon ini pagligad sang mga siglo tubtob sa moderno nga tion. (Mat. 28:20) Sang ulihi, sang naghari na si Jesus sang 1914, nangin madasig ang pagpili sa ila.
14, 15. Ano ang nagakatabo sa aton tion tuhoy sa pagpili sa mga hinaplas?
14 Una, gintinluan ni Jesus ang langit gikan sa tanan nga nagapamatok sa paggahom sang Dios. (Basaha ang Bugna 12:10, 12.) Nian ginhatagan niya sing atension ang pagtipon sa nabilin pa nga mangin bahin sang Ginharian nga panguluhan agod nga makompleto ang 144,000. Sang tungatunga sang katuigan 1930, halos natapos na ini nga hilikuton kag madamo sa mga nagbaton sang pagbantala ang wala nagahandum nga magkadto sa langit. Wala sila ginpanaksihan sang espiritu nga sila mga anak sang Dios. (Ipaanggid ang Roma 8:16.) Sa baylo, ginkilala nila ang ila kaugalingon nga katapo sang “iban nga mga karnero,” nga may paglaum nga mabuhi sing dayon sa paraiso nga duta. (Juan 10:16, NW) Busa, pagligad sang 1935, ginhatagan na sing igtalupangod ang pagtipon sa “dakung kadam-an,” nga nakita ni apostol Juan sa palanan-awon nga makalampuwas sa “dakung kapipit-an.”—Bug. 7:9, 10, 14, NW.
15 Apang, pagligad sang mga tinuig sugod sang katuigan 1930, may pila ka indibiduwal nga nakatigayon sing langitnon nga paglaum. Ngaa? Sa pila ka kaso, gintal-usan nila ang pila ka indibiduwal nga napili sang una apang nangin di-matutom. (Ipaanggid ang Bugna 3:16.) Ginsambit pa gani ni Pablo ang pila niya ka kilala nga nagbiya sa kamatuoran sadto. (Fil. 3:17-19) Sin-o ang ginapili ni Jehova agod nga mangin tal-us nila? Siempre pa, sia amo ang magapili. Apang, daw makatarunganon nga indi sia magpili sa mga bag-uhan, kundi sa mga indibiduwal nga napamatud-an na nga mainunungon, kaangay sang mga disipulo nga ginsugilanon ni Jesus sang ginsugdan niya ang pagsaulog sang Memoryal. *—Luc. 22:28.
16. Tuhoy sa mga hinaplas, ano ang aton ginapasalamatan, kag sa ano kita makalaum?
16 Apang, nagapakita nga indi tanan nga ginpili sugod sang katuigan 1930 nga may langitnon nga paglaum, mga tal-us sa mga nangin di-matutom. Ginapat-od gid ni Jehova nga may kaupod kita nga hinaplas nga mga Cristiano sa sining katapusan nga adlaw sang sistema sang mga butang tubtob sa kalaglagan sang “Babilonia nga Daku.” * (Bug. 17:5, NW) Kag makalaum gid kita nga ang tanan nga katapo sang 144,000 makompleto sa gintalana nga tion ni Jehova kag sila tanan magagahom sa langitnon nga Ginharian. Makalaum man kita sa matagnaon nga Pulong nga ang nagadamo nga dakung kadam-an makapabilin gid nga matutom subong isa ka grupo. Sa indi madugay ‘magagua sila gikan sa dakung kapipit-an,’ nga mahanabo sa kalibutan ni Satanas kag mangin malipayon sa pagsulod sa bag-ong kalibutan sang Dios.
Halos Kompleto Na ang Langitnon nga Panguluhan Sang Dios!
17. Suno sa 1 Tesalonica 4:15-17 kag Bugna 6:9-11, ano ang natabo sa hinaplas nga mga Cristiano nga napatay sing matutom?
17 Sugod sang 33 C.E., linibo ka hinaplas nga mga Cristiano ang nagpakita sang malig-on nga pagtuo kag nagbatas tubtob sa kamatayon. Ginkabig sila nga takus sa pagbaton sang Ginharian kag, maathag nga sa pagsugod sang adlaw sang presensia ni Cristo, natigayon nila ang ila langitnon nga padya.—Basaha ang 1 Tesalonica 4:15-17; Bugna 6:9-11.
18. (a) Ano ang mahimo gid saligan sang nagkalabilin nga mga hinaplas? (b) Ano ang pagtamod sang iban nga mga karnero sa ila hinaplas nga mga kauturan?
18 Ang nabilin nga mga hinaplas nagasalig gid nga kon magpabilin sila nga matutom, mabaton man nila ang ila padya. Minilyon sa iban nga mga karnero, nga sang nagpamalandong sa pagtuo sang ila hinaplas nga mga kauturan, nag-ugyon sa ginsiling ni apostol Pablo sa hinaplas sa Tesalonica: “Ginapabugal namon kamo sa mga kongregasyon sang Dios bangod sang inyo pagbatas kag pagtuo sa tunga sang tanan nga paghingabot sa inyo kag sang mga kapipit-an nga inyo ginabatas. Pamatuod ini sang matarong nga paghukom sang Dios, nga nagaresulta sa pagkabig sa inyo nga takus sa ginharian sang Dios, nga tungod sini nagaantos gid kamo.” (2 Tes. 1:3-5, NW) Sa kamatayon sang katapusan nga katapo sang hinaplas, kon san-o man ini matabo, makompleto na ang langitnon nga panguluhan sang Dios. Mangin kalipay gid ini sa langit kag sa duta!
[Mga footnote]
^ par. 15 Tan-awa ang Marso 1, 1992 nga Ang Lalantawan, pahina 20, parapo 17.
^ par. 16 Tan-awa ang “Mga Pamangkot Gikan sa mga Bumalasa” sa Mayo 1, 2007, nga Ang Lalantawan.
Mapaathag Mo Bala?
• Ano ang ginpahayag ni Jehova kay Abraham may kahilabtanan sa Adlaw sang Paghukom?
• Ngaa ginpahayag si Abraham nga matarong?
• Bangod ginpahayag nga matarong, ano ang natigayon sang mga katapo sang binhi ni Abraham?
• Ano ang mahimo gid saligan sang tanan nga Cristiano?
[Mga Pamangkot sa Pagtinuon]
[Piktyur sa pahina 20]
Ginpalig-on ni Jesus ang iya mga sumulunod nga tinguhaan ang Ginharian
[Piktyur sa pahina 21]
Sang Pentecostes 33 C.E., ginsugdan ni Jehova ang pagpili sang segundaryo nga katapo sang binhi ni Abraham
[Mga piktyur sa pahina 23]
Nagapasalamat ang iban nga mga karnero nga kaupod nila ang hinaplas nga mga Cristiano sa tion sang katapusan nga mga adlaw
