Ano ang Kahulugan sang Presensia ni Cristo Sa Imo?
Ano ang Kahulugan sang Presensia ni Cristo sa Imo?
“Ano ang mangin tanda sang imo presensia kag sang katapusan sang sistema sang mga butang?”—MAT. 24:3.
1. Anong makapainteres nga pamangkot ang ginpautwas sang mga apostoles ni Jesus sa iya?
HALOS duha ka libo ka tuig na ang nagligad sang namangkot ang apat ka apostoles ni Jesus sa ila pribado nga pag-istoryahanay upod sa ila Agalon sa Bukid sang mga Olibo. Namangkot sila: “Ano ang mangin tanda sang imo presensia kag sang katapusan sang sistema sang mga butang?” (Mat. 24:3) Sa ila pamangkot, naggamit ang mga apostoles sing duha ka makapainteres gid nga mga ekspresyon, ang “imo presensia” kag ang “katapusan sang sistema sang mga butang.” Ano ang buot silingon sini nga mga ekspresyon?
2. Ano ang kahulugan sang tinaga nga syn·teʹlei·a, nga ginbadbad subong “katapusan” sa Hiligaynon nga Biblia?
2 Binagbinagon anay naton ang ikaduha nga ekspresyon. May duha ka Griegong tinaga (syn·teʹlei·a kag te’los) nga ginbadbad nga “katapusan” sa Hiligaynon nga Biblia. Sa Griego, ini nga mga tinaga may tuhay nga kahulugan. Ang tinaga nga syn·teʹlei·a, amo ang gingamit sa Mateo 24:3, nga nagapahangop sang “konklusion sang tion,” samtang ang tinaga nga te’los nagakahulugan sing “katapusan” mismo sang tion. Ang kinatuhayan sa sining duha ka tinaga mahimo malaragway sa isa ka pamulongpulong sa Kingdom Hall. Ang konklusion amo ang ulihi nga seksion sang pamulongpulong, sa diin ang humalambal nagahinguyang sing malip-ot nga tion sa pagpahanumdom sa tagpalamati kon ano ang iya ginbinagbinag kag nian isaysay niya kon paano ini maaplikar. Ang katapusan sang pamulongpulong amo ang tion nga manaug na sa entablado ang humalambal. Sing kaanggid, sa Biblia, ang termino nga syn·teʹlei·a nagapatuhoy sa hut-ong sang tion nga nagapadulong sa katapusan kag nagalakip sa katapusan mismo.
3. Ano ang pila ka butang nga mahanabo sa tion sang presensia ni Jesus?
3 Kamusta naman ang “presensia” nga ginpamangkot sang mga apostoles? Ang Griegong tinaga sang presensia amo ang pa·rou·siʹa. * Ang pa·rou·siʹa ukon presensia ni Cristo, nagsugod sang ginpalingkod si Jesus subong Hari sa langit sang 1914 kag magapadayon tubtob sa “dakung kapipit-an,” nga sa sini nga tion magakari sia sa paglaglag sa mga malauton. (Mat. 24:21) Madamong nanuhaytuhay nga butang ang matabo sa tion sang presensia ni Jesus, lakip ang “katapusan nga mga adlaw” sining malauton nga sistema sang mga butang, ang pagtipon sa mga pinili, kag ang pagbanhaw sa ila para sa langitnon nga kabuhi. (2 Tim. 3:1; 1 Cor. 15:23; 1 Tes. 4:15-17; 2 Tes. 2:1) Busa, masiling naton nga ang “katapusan,” buot silingon, “konklusion sang sistema sang mga butang” (syn·teʹlei·a), nagapatuhoy sa tion sang presensia (pa·rou·siʹa) ni Cristo.
Malawig nga Hut-ong sang Tion
4. Sa anong paagi mapaanggid ang presensia ni Cristo sa mga hitabo sa adlaw ni Noe?
4 Ang katunayan nga ang pa·rou·siʹa nagapatuhoy sa malawig nga hut-ong sang tion nagahisanto sa ginsiling ni Jesus tuhoy sa iya presensia. (Basaha ang Mateo 24:37-39.) Talupangda nga wala ginpaanggid ni Jesus ang iya presensia sa mas malip-ot nga hut-ong sang tion sang pag-anaw sang adlaw ni Noe. Sa baylo, ginpaanggid niya ang iya presensia sa mas malawig nga hut-ong sang tion tubtob sa Anaw. Nagalakip ini sa tion sang pagtukod ni Noe sang arka kag pagbantala tubtob sa pag-abot sang Anaw. Ini nga mga butang natabo sa sulod sang mga dekada. Sing kaanggid, ang presensia ni Cristo nagalakip sang mga hitabo tubtob sa dakung kapipit-an kag sa dakung kapipit-an mismo.—2 Tes. 1:6-9.
5. Paano ang rekord sa Bugna kapitulo 6 nagapakita nga ang presensia ni Jesus isa ka malawig nga hut-ong sang tion?
5 Ang iban nga mga tagna sa Biblia nagpaathag nga ang presensia ni Cristo nagapatuhoy sa malawig nga hut-ong sang tion kag indi lamang sa iya pagkari agod laglagon ang mga malauton. Sa Bugna, ginlaragway si Jesus nga nagasakay sa kabayo nga maputi kag nakoronahan. (Basaha ang Bugna 6:1-8.) Pagkatapos nakoronahan subong Hari sang 1914, ginlaragway si Jesus nga nagalakat nga “nagapangdaug kag sa pagtapos sang iya pagpangdaug.” Ginpakita dayon sang rekord nga ginasundan sia sang mga nagasakay sa mga kabayo nga may nanuhaytuhay nga duag. Matagnaon ini nga nagapatuhoy sa inaway, kakulang sing pagkaon, kag peste, ini tanan natabo sa sulod sang malawig nga hut-ong sang tion nga ginapatuhuyan subong “katapusan nga mga adlaw.” Makita naton nga nagakatuman ini nga mga tagna sa aton tion.
6. Paano kita mabuligan sang Bugna kapitulo 12 agod mahangpan ang presensia ni Cristo?
6 Naghatag man ang Bugna kapitulo 12 sing dugang pa nga detalye tuhoy sa pagtukod sang Ginharian sang Dios sa langit. Mabasa naton diri nga may inaway sa langit. Si Miguel, nga amo si Jesucristo sa iya langitnon nga katungdanan, kag ang iya mga anghel nakig-away sa Yawa kag sa iya mga demonyo. Bangod sini, si Satanas nga Yawa kag ang iya mga demonyo gintagbong sa duta. Sa sina nga tion, ginsugiran kita sang rekord nga ang Yawa may daku nga kaakig, “kay nahibaluan niya nga malip-ot na lamang ang iya tion.” (Basaha ang Bugna 12:7-12.) Maathag nga ang pagtukod sang Ginharian ni Cristo sa langit pagasundan sang isa ka hut-ong sang tion nga pagatandaan sang pagdugang sang mga “kailo” sa duta kag sa mga pumuluyo sini.
7. Ano ang ginpatuhuyan sang ikaduha nga salmo, kag ano nga kahigayunan ang ginsaysay diri?
7 Ang ikaduha nga salmo nagtagna man tuhoy sa paglingkod ni Jesus subong Hari sa langitnon nga Bukid Sion. (Basaha ang Salmo 2:5-9; 110:1, 2.) Apang, ini nga salmo nagapakita man nga may yara hut-ong sang tion nga ang mga manuggahom sa duta, upod sa ila mga sakop, hatagan sing kahigayunan nga magpasakop sa paggahom ni Cristo. Ginlaygayan sila nga “magpakaalam” kag “magpatudlo.” Huo, sa sina nga tion “bulahan ang tanan nga nagadangup sa [Dios]” paagi sa pag-alagad kay Jehova kag sa gintangdo nga Hari. Busa, ginhatagan sila sing kahigayunan nga magbag-o sa tion sang presensia ni Jesus sa iya harianon nga gahom.—Sal. 2:10-12.
Paghibalo sang Tanda
8, 9. Sin-o ang makahibalo kag makahangop sang tanda sang presensia ni Cristo?
8 Sang ginpamangkot sang mga Fariseo ang tion sang pag-abot sang Ginharian, ginsabat sila ni Jesus nga indi ini mag-abot nga “madali [nila] matalupangdan.” (Luc. 17:20, 21) Indi ini mahangpan sang mga di-matinuuhon. Paano abi nila ini mahangpan? Wala gani nila ginkilala si Jesus subong ila palaabuton nga Hari. Busa, sin-o ang makahibalo kag makahangop sang kahulugan sang presensia ni Cristo?
9 Nagsiling si Jesus nga ang iya mga disipulo makakita sang mga tanda nga kaangay kaathag sang “kirab sang kilat [nga] nagapasanag sa isa ka bahin sang langit tubtob sa isa pa ka bahin sini.” (Basaha ang Lucas 17:24-29.) Talalupangdon gid nga ang rekord sa Mateo 24:23-27 direkta nga naangot sa tanda sang presensia ni Cristo.
Ang Kaliwatan nga Makakita sang Tanda
10, 11. (a) Ano ang paathag sang una tuhoy sa “kaliwatan” nga ginsambit sa Mateo 24:34? (b) Sin-o gid ang ginapatihan sang mga disipulo ni Jesus nga nalakip sa sina nga “kaliwatan”?
10 Sang nagligad, ginpaathag sini nga magasin nga sang unang siglo, ang “kaliwatan” nga ginsambit sang Mateo 24:34 nagapatuhoy sa “katubotubo nga kaliwatan sang di-matinuuhon nga mga Judiyo.” * Ining paathag daw makatarunganon bangod ang tanan nga rekord nga ginpatuhuyan ni Jesus sa termino nga “kaliwatan” may di-maayo nga paglaragway, kag sa kalabanan nga kaso, naggamit si Jesus sing negatibo nga pagpatuhoy, subong sang “malaut,” sa paglaragway sini nga kaliwatan. (Mat. 12:39; 17:17; Mar. 8:38) Busa, ang ginapaathag sini nga magasin amo ang moderno nga katumanan, nga ginapatuhuyan ni Jesus subong ang malaut nga “kaliwatan” sang mga di-matinuuhon nga makakita sang mga hitabo nga amo ang tanda sang “konklusion sang sistema sang mga butang” (syn·teʹlei·a) kag sang katapusan mismo sina nga sistema (teʹlos).
11 Matuod nga sang nagsiling si Jesus tuhoy sa “kaliwatan,” ginapatuhuyan niya ang malauton nga mga tawo sang iya adlaw. Apang matuod man bala ini sa iya ginpamulong sa Mateo 24:34? Dumduma nga nagpalapit kay Jesus ang iya apat ka disipulo sing “sila lang.” (Mat. 24:3) Sanglit wala naggamit si Jesus sing negatibo nga paglaragway tuhoy sa sini nga “kaliwatan,” walay duhaduha nga nahangpan sang mga apostoles nga sila kag ang ila mga masigkadisipulo mangin bahin sang “kaliwatan” nga indi magtaliwan “tubtob mahanabo ini tanan nga butang.”
12. Ano ang ginapakita sang konteksto kon sin-o ang ginpatuhuyan ni Jesus sang naggamit sia sang tinaga nga “kaliwatan”?
12 Ano ang aton basihan sa paghinakop sa sini? Paagi sa maid-id nga pagbinagbinag sang konteksto. Nagsiling si Jesus sa Mateo 24:32, 33: “Tun-i ninyo karon ini nga punto gikan sa higuera subong ilustrasyon: Sa tion nga ang bag-o nga mga sanga sini mahumok kag nagapanalingsing, mahibaluan ninyo nga malapit na ang tingadlaw. Subong man, kon makita ninyo ini tanan nga butang, mahibaluan ninyo nga malapit na sia sa mga ganhaan.” (Ipaanggid ang Marcos 13:28-30; Lucas 21:30-32.) Nian, sa Mateo 24:34, mabasa naton: “Sa pagkamatuod nagasiling ako sa inyo nga ini nga kaliwatan indi gid magtaliwan tubtob mahanabo ini tanan nga butang.”
13, 14. Ngaa masiling naton nga ang “kaliwatan” nga ginapatuhuyan ni Jesus amo ang iya mga disipulo?
13 Subong sang aton matalupangdan sa Mateo 24:33, nagsiling si Jesus nga ang iya mga disipulo, nga sa indi madugay haplasan sang balaan nga espiritu, amo ang magahinakop kon makita nila nga “mahanabo ini tanan nga butang.” Busa ang ginapatuhuyan ni Jesus amo ang iya mga disipulo sang nagsiling sia: “Ini nga kaliwatan indi gid magtaliwan tubtob mahanabo ini tanan nga butang.”
14 Indi kaangay sa mga di-matinuuhon, wala lamang nakita sang mga disipulo ni Jesus ang tanda kundi nahangpan man nila ang kahulugan sini. ‘Matun-an’ nila ang mga bahin sina nga tanda kag “mahibaluan” ang matuod sini nga kahulugan. Mahantop nila sing bug-os nga “malapit na sia sa mga ganhaan.” Bisan pa nakita sang mga di-matinuuhon nga mga Judiyo kag sang matutom nga hinaplas nga mga Cristiano ang pila sa katumanan sang mga ginpamulong ni Jesus sang unang siglo, ang hinaplas nga mga sumulunod lamang sadto ang nakatuon sa sini nga mga hitabo, kag sila lamang ang nakahangop sa kahulugan sang ila nakita.
15. (a) Sin-o ang ginahuman sang modernong adlaw nga “kaliwatan” nga ginpatuhuyan ni Jesus? (b) Ngaa indi naton masuma ang eksakto nga kalawigon sang “kaliwatan”? (Tan-awa ang kahon sa pahina 25.)
15 Ang mga wala sing espirituwal nga paghangop karon nagapati nga wala sing ‘talalupangdon’ tuhoy sa tanda sang presensia ni Jesus. Nagapangatarungan sila nga wala man sing nagbag-o sa kahimtangan halin sang una. (2 Ped. 3:4) Sa pihak nga bahin, ang matutom nga hinaplas nga mga kauturan ni Cristo, ang modernong tulad-Juan nga grupo, nakahibalo sa sini nga tanda nga kaangay sang kirab sang kilat kag nakahangop sang kahulugan sini. Subong isa ka grupo, ining mga hinaplas amo ang nagahuman sa modernong adlaw nga “kaliwatan” nga indi magtaliwan “tubtob mahanabo ini tanan nga butang.” * Nagapahangop ini nga ang pila sa hinaplas nga mga kauturan ni Cristo buhi pa sa duta sa tion nga magsugod na ang gintagna nga dakung kapipit-an.
“Magpadayon Kamo sa Pagbantay”
16. Ano ang dapat himuon sang tanan nga mga disipulo ni Cristo?
16 Apang dapat kita maghulag pasad sa sini nga tanda. Bangod si Jesus nagsiling: “Ang ginasiling ko sa inyo ginasiling ko sa tanan, Magpadayon kamo sa pagbantay.” (Mar. 13:37) Importante gid ini para sa aton tanan karon, hinaplas man kita ukon bahin sang dakung kadam-an. Siam ka dekada na ang nagligad sugod sang ginpalingkod si Jesus subong Hari sa langit sang 1914. Bisan pa nga daw mabudlay, dapat naton pamatud-an nga handa kita kag padayon nga nagabantay. Ang paghangop tuhoy sa di-makita nga paggahom ni Cristo sa iya Ginharian makabulig sa aton nga mahimo ini. Nagapahanumdom man ini sa aton sa katunayan nga sa indi madugay magakari sia sa paglaglag sa iya mga kaaway “sa oras nga wala [naton] ginahunahuna.”—Luc. 12:40.
17. Ano ang epekto sa aton sini nga paghangop, kag ano ang aton determinado nga himuon?
17 Kon mahangpan naton ang kahulugan sang presensia ni Cristo, labi pa gid kita nga magabatyag sing pagkahilingawon. Nahibaluan naton nga si Jesus nagagahom na subong di-makita nga Hari sa langit sugod sang 1914. Sa indi madugay magakari sia sa paglaglag sa malauton kag madamo sia sing bag-uhon sa bug-os nga duta. Kabay nga mangin determinado pa gid kita kag mangin aktibo sa pagpakigbahin sa hilikuton nga gintagna ni Jesus sang nagsiling sia: “Ining maayong balita sang ginharian ibantala sa bug-os napuy-an nga duta subong panaksi sa tanan nga pungsod; kag nian magaabot ang katapusan [teʹlos].”—Mat. 24:14.
[Mga footnote]
^ par. 3 Ang kahulugan sang pa·rou·siʹa makita sa kinatuhayan sang nagsiling si apostol Pablo sa 2 Corinto 10:10, 11 kag Filipos 2:12 nga “akon presensia” kag “sa tion nga wala ako.” Para sa detalyado nga pagbinagbinag tan-awa ang Insight on the Scriptures, Tomo 2, pahina 676-9.
^ par. 10 Tan-awa ang Lalantawan, Nobiembre 1, 1995, pahina 11-15, 19, 30, 31.
^ par. 15 Ang hut-ong sang tion nga ginakabuhian sini nga “kaliwatan” daw kaanggid sa tion nga ginatuptupan sang unang palanan-awon sa tulun-an sang Bugna. (Bug. 1:10–3:22) Ining tanda tuhoy sa adlaw sang Ginuo nagsugod sang 1914 tubtob mapatay kag mabanhaw ang katapusan nga katapo sang matutom nga mga hinaplas.—Tan-awa ang Bugna—Malapit Na ang Mahimayaon nga Talipuspusan Sini! pahina 24, parapo 4.
Ano ang Imo Sabat?
• Paano naton mahibaluan nga ang presensia ni Jesus isa ka malawig nga hut-ong sang tion?
• Sin-o ang makahibalo kag makahangop sa kahulugan sang presensia ni Jesus?
• Sin-o ang nagahuman sang modernong adlaw nga kaliwatan nga ginsambit sa Mateo 24:34?
• Ngaa indi naton masuma ang eksakto nga kalawigon sang “kaliwatan”?
[Mga Pamangkot sa Pagtinuon]
[Kahon sa pahina 25]
Masuma Bala Naton ang Eksakto nga Kalawigon sang “Kaliwatan”?
Ang tinaga nga “kaliwatan” masami nga nagapatuhoy sa mga tawo nga may nanuhaytuhay nga edad nga nagakabuhi sa isa ka partikular nga hut-ong sang tion ukon hitabo. Halimbawa, ginsugiran kita sang Exodo 1:6: “Niyan napatay si Jose, kag ang tanan niya nga lalaking utud, kag yadtong bug-os nga kaliwatan.” Indi magkaedad si Jose kag ang iya mga utod nga lalaki, apang pareho sila sing inagihan sa pareho nga hut-ong sang tion. “Yadtong bug-os nga kaliwatan” nagalakip sa pila sang mga utod ni Jose nga una nga nabun-ag sa iya. Ang pila sa ila buhi pa sang napatay si Jose. (Gen. 50:24) Ang iban sa sina nga “kaliwatan,” kaangay ni Benjamin, natawo sing ulihi sa iya kag buhi pa sang napatay sia.
Busa kon ginagamit ang tinaga nga “kaliwatan” sa pagpatuhoy sa mga tawo nga nagakabuhi sa isa ka partikular nga tion, ang eksakto nga kalawigon sina nga tion indi mahibaluan, apang may katapusan ini kag indi gid ini tuman kadugay. Busa, paagi sa paggamit sang termino nga “ini nga kaliwatan,” subong sang narekord sa Mateo 24:34, wala ginhatagan ni Jesus sing pormula ang iya mga disipulo agod nga masuma nila kon san-o matapos ang “katapusan nga mga adlaw.” Sa baylo, ginpadaku ni Jesus nga indi nila mahibaluan ang “amo nga adlaw kag oras.”—2 Tim. 3:1; Mat. 24:36.
[Piktyur sa pahina 22, 23]
Sang ginkoronahan si Jesus subong Hari sang 1914, ginlaragway sia subong “nagapangdaug”
[Piktyur sa pahina 24]
“Ini nga kaliwatan indi gid magtaliwan tubtob mahanabo ini tanan nga butang”
