Maglakat sa mga Dalanon ni Jehova

“Bulahan ang tagsatagsa nga nagakahadluk sa GINOO, nga nagalakat sa iya mga dalanon!”—SAL. 128:1.

1, 2. Ngaa makapat-od kita nga ang kalipay sarang maagom?

LUYAG sang tanan nga magmalipayon. Apang magaugyon ka gid nga ang paghandum sang kalipay ukon pagpangita sini tuhay sangsa pag-agom sini.

² Apang, ang kalipay sarang maagom. “Bulahan [ukon, “malipayon,” NW] ang tagsatagsa nga nagakahadluk sa GINOO, nga nagalakat sa iya mga dalanon,” siling sang Salmo 128:1. Mangin malipayon kita kon simbahon naton ang Dios kag maglakat sa iya mga dalanon paagi sa paghimo sang iya kabubut-on. Ano ang epekto sini sa aton paggawi kag sa aton pagkatawo?

Pamatud-i nga Masaligan Ka

3. Ngaa kinahanglanon ang pagkamasaligan sa aton dedikasyon sa Dios?

³ Ang mga nagakahadlok kay Jehova masaligan, kay si Jehova masaligan. Gintuman ni Jehova ang iya tanan nga saad sa dumaan nga Israel. (1 Hari 8:56) Ang aton dedikasyon sa Dios amo ang labing importante nga saad nga aton nahimo, kag ang regular nga pangamuyo makabulig sa aton agod matuman ini. Sarang kita makapangamuyo kaangay ni salmista David: “Ikaw, O Dios, nagpamati sang akon mga saad. . . . Magaamba ako sing pagdayaw sa imo ngalan sa gihapon, agud nga mahimo ko adlawadlaw ang akon mga saad.” (Sal. 61:5, 8; Man. 5:4-6) Agod mangin  abyan sang Dios, dapat masaligan kita.—Sal. 15:1, 4.

4. Paano gintamod ni Jepte kag sang iya anak nga babayi ang iya saad kay Jehova?

⁴ Sang panahon sang mga Hukom sa Israel, nagsaad si Jepte nga kon padaugon sia ni Jehova sa mga Amonhon, ihatag niya subong “halad-nga-sinonog” ang una nga magasugata sa iya pagbalik niya gikan sa patag-awayan. Ang iya una gali nga masugata amo ang iya anak nga babayi—ang iya bugtong nga bata. Upod ang pagtuo kay Jehova, gintuman ni Jepte kag sang iya dalaga nga anak ang iya saad. Bisan pa ginapakabahandi gid sa Israel ang pagminyo kag pag-anak, handa sa pagpabilin nga di-minyo ang anak nga babayi ni Jepte kag sa amo nakatigayon sia sing pribilehiyo nga mag-alagad sa santuaryo ni Jehova.—Huk. 11:28-40.

5. Sa ano nga paagi napamatud-an nga masaligan si Ana?

⁵ Ginpamatud-an man sang diosnon nga babayi nga si Ana nga masaligan sia. Nagpuyo sia upod sa iya Levinhon nga bana nga si Elkana, kag sa isa pa ka asawa ni Elkana nga si Penina sa kabakuluran sang Efraim. Si Penina madamo sing bata kag ginatamay niya ang baw-as nga si Ana ilabi na kon magkadto ang ila pamilya sa tabernakulo. Isa ka bes, nanaad si Ana nga kon makatigayon sia sing anak, ihatag niya ini kay Jehova. Wala magdugay nagbusong sia kag nagbun-ag sing isa ka bata nga lalaki kag ginhingalanan ini nga Samuel. Sang malutas na ang bata, ginhalad ni Ana si Samuel sa Dios sa Shilo kag ginhatag sia kay Jehova “sa tanan nga adlaw sang iya kabuhi.” (1 Sam. 1:11) Busa gintuman ni Ana ang iya saad bisan pa wala sia nakahibalo kon makatigayon pa sia sing dugang nga anak.—1 Sam. 2:20, 21.

6. Paano nakita ang pagkamasaligan ni Tiquico?

⁶ Ang unang siglo nga Cristiano nga si Tiquico isa ka masaligan nga tawo kag “matutom nga ministro.” (Col. 4:7) Naglakbay si Tiquico upod kay apostol Pablo halin sa Gresya pakadto sa Macedonia, pagkatapos sa Asia Minor, kag ayhan sa Jerusalem. (Binu. 20:2-4) Mahimo nga sia ang “utod” nga nagbulig kay Tito sa pagpanagtag sang dulot para sa nagakinahanglan nga mga masigkatumuluo sa Judea. (2 Cor. 8:18, 19; 12:18) Sa una nga pagkabilanggo ni Pablo sa Roma, gindala sang iya masaligan nga tiglawas nga si Tiquico ang iya mga sulat sa mga masigkatumuluo sa Efeso kag sa Colosas. (Efe. 6:21, 22; Col. 4:8, 9) Sa ikaduha nga pagkabilanggo ni Pablo sa Roma, ginpadala naman niya si Tiquico sa Efeso. (2 Tim. 4:12) Kon masaligan kita, makaagom man kita sing mga pagpakamaayo sa aton pag-alagad kay Jehova.

7, 8. Ngaa makasiling kita nga si David kag si Jonatan matuod nga mag-abyan?

⁷ Ginapaabot sang Dios nga mangin masaligan kita nga mga abyan. (Hulu. 17:17) Si David nangin abyan sang anak ni Hari Saul nga si Jonatan. Sang nabatian ni Jonatan nga napatay ni David si Goliat, “ang kalag ni Jonatan natingub sa kalag ni David, kag ginhigugma sia ni Jonatan subong sang iya kaugalingon nga kalag.” (1 Sam. 18:1, 3) Ginpaandaman pa gani ni Jonatan si David sang luyag sia patyon ni Saul. Sang nakapalagyo na si David, nakigkita si Jonatan sa iya kag nakigkatipan sa iya. Halos patyon pa gani ni Saul si Jonatan bangod sang pagpakigsugilanon niya tuhoy kay David, apang nagkit-anay liwat ining duha ka mag-abyan kag ginpalig-on ang ila pag-abyanay. (1 Sam. 20:24-41) Sa ila katapusan nga pagkitaay, ginpabakod ni Jonatan ang kamot ni David “sa Dios.”—1 Sam. 23:16-18.

⁸ Napatay si Jonatan sa inaway batok sa mga Filistinhon. (1 Sam. 31:6) Sa isa ka masubo nga ambahanon, si David nag-amba: “Nagakalisud ako tungud sa imo, utud ko nga Jonatan; manayanaya ka gid sa akon; ang imo gugma sa akon makatilingala, nagalabaw sa gugma sang mga babayi.” (2 Sam. 1:26) Ini  nga gugma isa ka pagpalanggaanay sang duha ka mag-abyan kag wala sing malisya. Si David kag si Jonatan matuod nga mag-abyan.

Magpabilin nga “Mapainubuson sa Hunahuna”

9. Paano ginpakita sang Hukom kapitulo 9 ang importansia sang pagkamapainubuson?

⁹ Agod mangin abyan sang Dios, dapat mangin “mapainubuson [kita] sa hunahuna.” (1 Ped. 3:8; Sal. 138:6) Ginapakita sang Hukom kapitulo 9 ang importansia sang pagkamapainubuson. Ang anak ni Gideon nga si Jotam nagsiling: “Ang mga kahoy nagkadto sa isa ka tion sa paghaplas sing hari sa ibabaw nila.” Ginsambit ang kahoy sang olibo, higuera, kag ubas nga balagon. Ini nga mga kahoy nagrepresentar sa mga tawo nga kalipikado apang wala nagaambisyon nga maggahom sa ila mga masigka-Israelinhon. Apang ang talongon nga ginagatong lamang, nga nagarepresentar sa paghari sang bugalon kag manugpatay nga si Abimelec, amo pa ang nagapanikasog nga gamhan ang iban. Bisan pa ‘nagprincipe sia sa Israel sing tatlo ka tuig,’ nakaagom sia sing hilaw nga kamatayon. (Huk. 9:8-15, 22, 50-54) Daw ano gid kaayo kon mangin ‘mapainubuson kita sa hunahuna’!

10. Ano ang natun-an mo sa kapaslawan ni Herodes nga ‘himayaon ang Dios’?

¹⁰ Sang unang siglo C.E., may hiligot-anon sa ulot sang bugalon nga si Hari Herodes Agripa sang Judea kag sang mga pumuluyo sang Tiro kag Sidon, nga luyag makighidait sa iya. Isa ka bes, sang nagpamulongpulong si Herodes, nagsinggit sila: “Tingog sang isa ka dios, kag indi iya sang tawo!” Wala ginsikway ni Herodes ini nga pagdayaw, nian ginbunal sia sang anghel ni Jehova kag “bangod wala niya ginhimaya ang Dios,” nag-agom sia sing makasiligni nga kamatayon. (Binu. 12:20-23) Kamusta naman kon isa kita ka maayo nga humalambal ukon epektibo nga manunudlo sang mga kamatuoran sang Biblia? Dapat naton ihatag ang kredito sa Dios sa tanan nga butang nga gintugot niya nga mahimo naton.—1 Cor. 4:6, 7; Sant. 4:6.

Mangin Maisog kag Mabakod

11, 12. Paano ginpakita sang eksperiensia ni Enoc nga ginahatagan ni Jehova sing kaisog kag kabakod ang iya mga alagad?

¹¹ Kon mapainubuson kita nga maglakat sa mga dalanon ni Jehova, hatagan niya kita sing kaisog kag kabakod. (Deut. 31:6-8, 23) Si Enoc, ang ikapito nga lalaki sa linya sang kaliwatan halin kay Adan, maisugon nga naglakat upod sa Dios paagi sa paghimud-os sa matadlong nga dalanon sa tunga sang malaut nga mga tawo sang iya panahon. (Gen. 5:21-24) Ginpabakod ni Jehova si Enoc sa pagpaalinton sing matigdas nga mensahe sa sining mga tawo bangod sang ila di-diosnon nga mga ginapanghambal kag ginapanghimo. (Basaha ang Judas 14, 15.) May kaisog ka man bala sa pagbantala sang mga paghukom sang Dios?

¹² Ginhukman ni Jehova ang mga di-diosnon paagi sa tugob-globo nga Anaw sang panahon ni Noe. Apang, makapalig-on gihapon ang tagna ni Enoc sa aton, kay sa indi madugay ang di-diosnon nga mga tawo sa aton panahon pagalaglagon sang balaan nga mga linaksa sang Dios. (Bug. 16:14-16; 19:11-16) Bilang sabat sa aton mga pangamuyo, hatagan kita ni Jehova sing kaisog sa pagbantala sang iya mensahe, may kaangtanan man ini sa iya mga paghukom ukon sa mga pagpakamaayo sang Ginharian.

13. Paano naton mapat-od nga hatagan kita sang Dios sing kaisog kag kabakod nga kinahanglan naton agod malandas ang makapulung-aw nga mga problema?

¹³ Nagakinahanglan kita sing hatag-Dios nga kaisog kag kabakod agod malandas ang makapulung-aw nga mga problema. Sang nagpangasawa si Esau sing duha ka Hethanon nga babayi, “nanginkapaitan sila sa espiritu ni Isaac kag ni Rebeca” nga iya mga ginikanan. Nagyamo pa gani si Rebeca: “Ginatak-an ako sang akon kabuhi bangud sang mga babayi nga Hethanon. Kon [ang aton anak nga] si Jacob magpangasawa sa babayi nga Hethanon subong sini sa ila, isa sang mga babayi sang duta, ano bala ang kaayohan sang akon kabuhi sa akon?” (Gen. 26:34, 35; 27:46) Naghulag si Isaac kag ginpalakat si Jacob agod mangita sing asawa nga sumilimba ni Jehova. Bisan pa indi na mabag-o ni Isaac kag ni Rebeca ang ginhimo ni Esau, ginhatagan sila sang Dios sing kaalam, kaisog, kag kabakod agod makapabilin nga matutom sa Iya. Kon mangayo kita sing bulig kay Jehova paagi sa pangamuyo, buligan man niya kita.—Sal. 118:5.

14. Paano nagpakita sing kaisog ang isa ka Israelinhon nga bata nga babayi?

¹⁴ Mga pila ka siglo sang ulihi, ang isa ka Israelinhon nga bata nga babayi nga ginbihag sang isa ka guban nga nagapang-ati. Nangin suluguon sia  sa balay sang isa ka aruon, nga pangulo sang hangaway sang Siria nga si Naaman. Bangod nabatian niya ang mga milagro nga ginhimo sang Dios paagi kay manalagna Eliseo, maisugon nga ginsugiran sang bata ang asawa ni Naaman: ‘Kon ang akon agalon makadto sa Israel, ayuhon sang manalagna ni Jehova ang iya aro.’ Nagkadto si Naaman sa Israel, kag milagruso sia nga gin-ayo. (2 Hari 5:1-3) Maayo gid ini nga halimbawa para sa mga pamatan-on karon nga nagasandig kay Jehova para sa kaisog agod makapanaksi sa ila mga manunudlo, kaeskwela, kag sa iban pa!

15. Anong maisugon nga buhat ang ginhimo sang tulugyanan sa panimalay ni Ahab nga si Abdias?

¹⁵ Ang hatag-Dios nga kaisog nagabulig sa aton nga magbatas. Binagbinaga ang tulugyanan sa panimalay ni Hari Ahab nga si Abdias, nga kadungan ni manalagna Elias. Sang nagmando si Reyna Jezebel nga patyon ang mga manalagna sang Dios, ginpangtago ni Abdias ang 100 sa ila sing “tagkalim-an sa lungib.” (1 Hari 18:13; 19:18) Maisugon mo man bala nga buligan ang imo ginahingabot nga mga masigkatumuluo subong sang ginhimo ni Abdias sa mga manalagna ni Jehova?

16, 17. Ano ang reaksion nanday Aristarco kag Gayo sa paghingabot?

¹⁶ Kon ginahingabot kita, makasalig kita nga indi kita pagbiyaan ni Jehova. (Roma 8:35-39) Sa isa ka teatro sang Efeso, naatubang sang mga kaupdanan ni Pablo nga sanday Aristarco kag Gayo ang guban sang linibo ka tawo. Ang platero nga si Demetrio amo ang nag-umpisa sing kinagubot. Sia kag ang iya kaupdanan nga mga platero nagahimo sing magagmay nga pilak nga simbahan sang diosa nga si Artemis. Daw mapierde ang ila maayo nga negosyo bangod ginabantala ni Pablo sa mga pumuluyo sa siudad nga untatan na ang pagsimba sa idolo. Ginganoy sang guban sanday Aristarco kag Gayo sa teatro kag nagsinggitan: “Daku si Artemis sang mga taga-Efeso!” Napatay na kuntani sanday Aristarco kag Gayo kon wala napatinong sang manugrekord sang siudad ang kadam-an.—Binu. 19:23-41.

¹⁷ Kon makaeksperiensia ka sing kaangay sini nga kabudlayan, mapadayon ka pa bala sa pagbantala? Wala sing ebidensia nga nangampo sanday Aristarco kag Gayo. Bangod taga-Tesalonica si Aristarco, nahibaluan gid niya nga hingabuton sila kon magbantala sila sing maayong balita kay nagkinagubot man didto sang una sang nagbantala si Pablo. (Binu. 17:5; 20:4) Bangod gintuman nanday Aristarco kag Gayo si Jehova, ginhatagan sila sang Dios sing kabakod kag kaisog agod mabatas ang mga paghingabot.

Ituon ang Mata sa Kaayuhan sang Iban

18. Paano gintuon nanday Prisca kag Aquila ang ila mata sa kaayuhan sang iban?

¹⁸ Ginahingabot man kita ukon wala, dapat mabalaka kita sa aton mga masigka-Cristiano. Gintuon nanday Prisca kag Aquila ang ila mata sa kaayuhan sang iban. (Basaha ang Filipos 2:4.) Mahimo nga gin-amanan sining huwaran nga mag-asawa si Pablo sing madayunan sa Efeso, sa duog diin natabo ang ginsambit kaina nga kinagubot nga gin-umpisahan sang platero nga si Demetrio. Ayhan bangod sini ginrisgo nanday Aquila kag Prisca ang ila kabuhi para kay Pablo. (Roma 16:3, 4; 2 Cor. 1:8) Sa karon, bangod sa kabalaka naton sa aton ginahingabot nga mga kauturan, dapat kita “mangin mainandamon subong sang mga man-ug.” (Mat. 10:16-18) Ginahimo naton ang aton hilikuton sing mahalungon kag wala naton sila ginaluiban paagi sa pagsugid sang ila mga ngalan ukon sang iban pa nga impormasyon sa mga manughingabot.

19. Ano nga kaayo ang ginhimo ni Dorcas para sa iban?

¹⁹ May nanuhaytuhay nga paagi nga matuon naton ang aton mata sa kaayuhan sang iban. Ang iban nga mga Cristiano may mga kinahanglanon, kag  basi makabulig kita sa ila. (Efe. 4:28; Sant. 2:14-17) Sa unang siglo nga kongregasyon sa Joppa, may isa didto ka maalwan nga babayi nga Dorcas ang ngalan. (Basaha ang Binuhatan 9:36-42.) Si Dorcas ‘madamo sing ginhimo nga maayong mga buhat kag ginhatag nga mga dulot tungod sa kaluoy’ nga mahimo naglakip sa paghimo sing mga panapton para sa imol nga mga balo nga babayi. Busa, nasubuan gid ang mga balo nga babayi sang napatay sia sang 36 C.E. Gingamit sang Dios si apostol Pedro sa pagbanhaw kay Dorcas, kag mahimo gid nga gingamit niya ang nabilin nga bahin sang iya kabuhi sa duta sa malipayon nga pagbantala sang maayong balita kag sa paghimo sing kaayo sa iban. Daw ano gid ka makalilipay nga makaupod naton karon ang masinakripisyuhon nga Cristianong mga babayi nga kaangay ni Dorcas!

20, 21. (a) Ano ang kaangtanan sang pagpalig-on sa pag-una sa kaayuhan sang iban? (b) Ano ang sarang mo mahimo agod mangin makapalig-on ka?

²⁰ Ginapangita naton ang kaayuhan sang iban paagi sa pagpalig-on sa ila. (Roma 1:11, 12) Ang kaupod ni Pablo nga si Silas isa ka tuburan sang pagpalig-on. Sang madesisyunan ang isyu tuhoy sa pagtuli sang mga 49 C.E., nagpadala sing mga tiglawas ang nagadumala nga hubon sa Jerusalem agod magdala sing sulat sa mga Cristiano sa nanuhaytuhay nga duog. Sanday Silas, Judas, Bernabe, kag Pablo amo ang nagdala sini sa Antioquia. “Ginpalig-on [nanday Silas kag Judas] ang mga kauturan [didto] paagi sa madamo nga pamulongpulong kag ginpabakod sila.”—Binu. 15:32.

²¹ Sang ulihi, ginbilanggo sanday Pablo kag Silas sa Filipos, apang bangod sa linog napanaksihan nila ang manugbilanggo kag ang iya panimalay, kag nangin tumuluo sila tanan. Antes sila nagbiya sa siudad, ginpalig-on nanday Silas kag Pablo ang mga kauturan. (Binu. 16:12, 40) Kaangay ni Pablo kag ni Silas, palig-una man ang iban paagi sa imo mga komento, pamulongpulong, kag makugi nga pag-alagad sa latagon. Kag kon “may pulong [ka] nga makapalig-on,” dapat ‘isiling mo ini.’—Binu. 13:15.

Magpadayon sa Paglakat sa mga Dalanon ni Jehova

22, 23. Paano kita makabenepisyo sa mga kasaysayan sa Biblia?

²² Mapinasalamaton gid kita sa matuodtuod nga mga kasaysayan nga narekord sa Pulong ni Jehova, “ang Dios sang bug-os nga pagpalig-on”! (2 Cor. 1:3, Byington) Agod makabenepisyo kita sa sining mga eksperiensia, dapat iaplikar naton ang mga leksion sang Biblia sa aton kabuhi kag magpatuytoy sa balaan nga espiritu sang Dios.—Gal. 5:22-25.

²³ Ang pagpamalandong sa mga kasaysayan sa Biblia magabulig sa aton sa pagpakita sing diosnon nga mga kinaiya. Palig-unon sini ang aton kaangtanan kay Jehova, nga nagahatag sa aton sing “kaalam kag ihibalo kag kalipay.” (Man. 2:26) Subong resulta, mapahalipay naton ang tagipusuon sang aton mahigugmaon nga Dios. (Hulu. 27:11) Kabay nga mangin determinado kita nga himuon ini paagi sa padayon nga paglakat sa mga dalanon ni Jehova.

Ano ang Imo Sabat?

• Paano mo mapamatud-an nga masaligan ka?

• Ngaa dapat kita mangin “mapainubuson sa hunahuna”?

• Paano ang kasaysayan sa Biblia makabulig sa aton nga mangin maisugon?

• Sa ano nga mga paagi matuon naton ang aton mata sa kaayuhan sang iban?

[Mga Pamangkot sa Pagtinuon]

[Piktyur sa pahina 8]

Gintuman sang masaligan nga si Jepte kag sang iya anak nga babayi ang iya saad, bisan pa mabudlay ini

[Piktyur sa pahina 10]

Mga pamatan-on, ano ang inyo natun-an sa Israelinhon nga bata nga babayi?

[Piktyur sa pahina 11]

Paano gin-aman ni Dorcas ang mga kinahanglanon sang iya masigka-Cristiano?