Ginatamod Mo Bala ang Iban Subong sang Pagtamod ni jehova?

“Wala [dapat] sing pagbinahinbahin sa lawas . . . Ang mga bahin sini [dapat] pareho nga may pag-ulikid sa isa kag isa.”—1 COR. 12:25.

1. Ano ang ginbatyag mo sang bag-o ka pa lang nangin bahin sang espirituwal nga paraiso?

SANG magbulag kita sa malaut nga kalibutan kag nakig-upod sa katawhan ni Jehova, mahimo nalipay gid kita sa mainit nga gugma kag pag-ulikid nga yara sa tunga nila. Tuhay gid ini kon ipaanggid sa di-matinahuron, madumot, kag makiawayon nga mga tawo nga ginakontrol ni Satanas! Nangin bahin na kita sang espirituwal nga paraiso nga puno sing paghidait kag kalig-unan.—Isa. 48:17, 18; 60:18; 65:25.

2. (a) Ano ang makaapektar sang aton pagtamod sa iban? (b) Ano ang kinahanglan naton himuon?

² Apang pagligad sang panahon, mahimo indi na balanse ang aton pagtamod sa aton mga kauturan bangod sang aton pagkadihimpit. Bangod sini, mahimo naton padakuon ang kasaypanan sang aton mga kauturan sa baylo nga talupangdon ang ila maayo nga mga kinaiya. Buot silingon, nalipatan na naton nga tamdon sila subong sang pagtamod ni Jehova. Kon nangin amo na sini ang aton pagtamod, tion na nga binagbinagon ini kag ipahisuno sa pagtamod ni Jehova.—Ex. 33:13.

Kon Paano Ginatamod ni Jehova ang Aton Kauturan

3. Sa ano ginapaanggid sang Biblia ang Cristiano nga kongregasyon?

³ Sa 1 Corinto 12:2-26, ginpaanggid ni apostol Pablo ang kongregasyon sang hinaplas nga mga  Cristiano sa isa ka lawas nga may “madamo nga bahin.” Subong nga ang mga bahin sang lawas nanuhaytuhay, ang mga katapo sang kongregasyon nanuhaytuhay man ang mga kinaiya kag mga ikasarang. Apang, ginabaton ni Jehova ini nga pagkananuhaytuhay. Ginahigugma kag ginapabaloran niya ang tagsa ka katapo sini. Ginalaygayan man kita ni Pablo nga ang tagsa ka katapo sang kongregasyon dapat “pareho nga may pag-ulikid sa isa kag isa.” Apang, mahimo nga mabudlay ini bangod indi palareho ang aton mga personalidad.

4. Ngaa mahimo kinahanglan naton bag-uhon ang aton pagtamod sa aton kauturan?

⁴ Ayhan mas madali naton matalupangdan ang mga kaluyahon sang aton kauturan. Kon ginahimo naton ini, daw kaangay ini nga nagatulok kita sa isa lang ka bahin sang laragway. Apang, ang pagtamod ni Jehova mas masangkad, ginalantaw niya ang kabug-usan sang laragway. Mahimo nga nagakonsentrar lamang kita sa mga kinaiya nga indi naton nauyunan, apang si Jehova nagalantaw sa kabug-usan sang tawo, lakip ang tanan nga maayo nga mga kinaiya sang indibiduwal. Kon labi nga ginapanikasugan naton nga mangin kaangay ni Jehova, labi pa gid nga nagaamot kita sa espiritu sang gugma kag paghiusa sa kongregasyon.—Efe. 4:1-3; 5:1, 2.

5. Ngaa indi nagakaigo para sa aton nga hukman ang iban?

⁵ Nahisayran gid ni Jesus nga may huyog ang di-himpit nga mga tawo nga maghukom. Naglaygay sia: “Untati ninyo ang paghukom agod indi kamo paghukman.” (Mat. 7:1) Talupangda nga wala nagsiling si Jesus nga: “Indi ka maghukom” kundi nagsiling sia: “Untati ninyo ang paghukom.” Nahibaluan niya nga kinabatasan na sang kalabanan sang iya tagpalamati nga maghukom sa iban. May amo man bala kita sina nga batasan? Kon huyog naton nga maghukom sa iban, dapat naton panikasugan nga magbag-o, agod indi man kita paghukman. Ang matuod, sin-o gid kita nga maghukom sa isa nga gintangdo ni Jehova ukon magsiling nga indi sia nagakadapat mangin bahin sang kongregasyon? Mahimo nga may kakulangan ang isa ka utod, apang kon padayon sia nga ginabaton ni Jehova, nagakaigo bala nga sikwayon naton sia? (Juan 6:44) Nagapati gid bala kita nga si Jehova ang nagapanguna sa iya organisasyon, nga kon kinahanglanon gid ang mga pagbag-o, magahulag sia sa iya gintalana nga tion?—Basaha ang Roma 14:1-4.

6. Paano ginatamod ni Jehova ang iya mga alagad?

⁶ Tumalagsahon gid ang ikasarang ni Jehova nga makita ang potensial sang tagsa ka indibiduwal nga mga Cristiano kon mangin himpit na sila sa bag-ong kalibutan. Nakahibalo man sia kon ano na nga pag-uswag ang nahimo nila sa pag-aplikar sang ila natun-an sa Biblia. Busa, indi na niya kinahanglan nga talupangdon ang tagsa ka kaluyahon. Mabasa naton sa Salmo 103:12: “Subong sa kalayo sang sidlangan sa katundan, amo kalayo ang iya pagpahilayo sa aton sang aton mga paglalis.” Daw ano gid ang aton pagpasalamat sa sini!—Sal. 130:3.

7. Ano ang matun-an naton sa pagtamod ni Jehova kay David?

⁷ Makita naton ang mga pamatuod sa Kasulatan nga may tumalagsahon nga ikasarang si Jehova sa pagtalupangod sang dalayawon nga mga kinaiya sang isa ka tawo. Ginkilala sang Dios si David subong  ang “akon alagad, nga nagbantay sang akon mga sogo, kag nagsonod sa akon sa bug-os niya nga tagiposoon, sa paghimo sang matarung lamang sa akon mga mata.” (1 Hari 14:8) Siempre pa, nahibaluan naton nga may mga sala man nga nahimo si David. Apang, si Jehova nagpamat-od nga magtulok sa maayo nga mga kinaiya ni David bangod nahibaluan niya nga matarong ang tagipusuon ni David.—1 Cron. 29:17.

Tamda ang Imo Kauturan Subong sang Pagtamod ni Jehova

8, 9. (a) Paano naton mailog si Jehova? (b) Paano ini ilaragway, kag ano ang leksion sini para sa aton?

⁸ Mabasa ni Jehova ang mga hunahuna kag motibo, apang kita indi. Bangod sini wala kita sing rason nga hukman ang iban. Wala kita makahibalo sang tanan nga motibo sang isa ka tawo. Dapat naton ilugon si Jehova nga wala nagakonsentrar sa tawhanon nga kaluyahon, kay umalagi lamang ini. Indi bala nga maayo gid nga tulumuron nga ilugon sia sa sini nga bahin? Ang paghimo naton sini makaamot sa paghidait sa sulod sang kongregasyon.—Efe. 4:23, 24.

⁹ Halimbawa, hunahunaa ang isa ka gubaon nga balay nga nagakalataltal ang mga tarog, buka ang mga bintana, kag nagatululukal ang kisame. Sa pagtamod sang kalabanan nga mga tawo, maayo pa nga ipaguba na lang ang balay kay nagapalaw-ay lang ini sa palibot. Apang mahimo nga may mag-abot nga isa ka tawo nga tuhay gid ang pagtan-aw sa balay. Wala lamang sia nagtan-aw sa mga guba. Nasapwan niya nga mabakod pa ang mga haligi kag pundasyon sini kag puede pa ini kay-uhon. Ginbakal niya ang balay, ginkay-o ang mga guba sini, kag ginpatahom. Sang ulihi, ang mga nagalabay nagakomento nga katahom gid sang balay. Mahimo bala naton ilugon ining tawo nga nagkay-o kag nagpatahom sang balay? Sa baylo nga talupangdon lamang ang hilmunon nga mga kaluyahon, mahimo bala naton mahantop ang ila maayo nga mga kinaiya kag ang ila ikasarang nga mag-uswag sa espirituwal? Kon himuon naton ini, matun-an naton nga higugmaon ang aton kauturan bangod sang ila maayo nga mga kinaiya, subong sang pagtamod ni Jehova sa ila.—Basaha ang Hebreo 6:10.

10. Paano makabulig sa aton ang laygay sa Filipos 2:3, 4?

¹⁰ May pila ka laygay si apostol Pablo nga makabulig sa aton sa pagpakig-angot sa tanan nga kauturan sa kongregasyon. Ginpalig-on niya ang mga Cristiano: “Nga [indi maghimo] sang bisan ano bangod sa huyog nga makigbais ukon bangod sa sobra nga pagpaimportante sang kaugalingon, kundi may pagpaubos sang hunahuna nga nagakabig sa iban nga labaw sa inyo, nga ginatuon ang mata, indi lamang sa inyo personal nga kaayuhan, kundi sa personal nga kaayuhan man sang iban.” (Fil. 2:3, 4) Ang pagkamapainubuson makabulig sa aton nga tamdon sing nagakaigo ang iban. Ang pagpakita sing personal nga interes sa iban kag ang pagtalupangod sa ila maayo nga mga kinaiya makabulig man sa aton nga tamdon sila kaangay sa pagtamod ni Jehova.

11. Ano nga mga pagbag-o ang nagakatabo sa pila ka mga kongregasyon?

¹¹ Sining karon lang, may mga pagbag-o sa bug-os kalibutan nga nagresulta sa pagsaylo sang madamo nga tawo sa iban nga duog. Pila sa mga siudad karon ang ginapuy-an sang mga tawo gikan sa lainlain nga mga pungsod. Ang pila sining mga tawo nga nagsaylo sa aton lugar nangin interesado sa kamatuoran sa Biblia, kag nagbuylog sa aton sa pagsimba kay Jehova. “Gikan [sila] sa tanan nga pungsod kag tribo kag katawhan kag hambal.” (Bug. 7:9) Subong resulta, madamo sa aton mga kongregasyon ang ginatapuan sang nanuhaytuhay nga rasa.

12. Ano nga pagtamod sa isa kag isa ang kinahanglan naton huptan, kag ngaa mabudlay ini kon kaisa?

¹² Mahimo sa aton kongregasyon kinahanglan nga labi pa gid nga huptan naton ang nagakaigo nga pagtamod sa isa kag isa. Nagakinahanglan ini sa pagdumdom sang laygay ni apostol Pedro nga magpakita sing “di-salimpapaw nga utudnon nga pagpalangga” kag ‘maghigugmaanay sing hanuot gikan sa tagipusuon.’ (1 Ped. 1:22) Ang pagpalambo sing tunay nga gugma kag pagpalangga mahimo isa ka hangkat sa kongregasyon diin ulupdanay ang mga tawo gikan sa nanuhaytuhay nga pungsod. Mahimo nga tuhay gid ang kultura sang aton mga kauturan sa aton, kag subong man ang ila tinapusan, ikasarang sa pinansial kag gindak-an. Nabudlayan ka bala sa pagpakig-angot sa mga kauturan nga tuhay sing kultura? Mahimo nga  amo man sina ang ginabatyag nila tuhoy sa imo. Walay sapayan sini, ginatudluan kita tanan nga: ‘Higugmaon ang bug-os nga paghiliutod.’—1 Ped. 2:17.

13. Ano nga mga pagpasibu sa aton panghunahuna ang kinahanglan naton himuon?

¹³ Mahimo nga kinahanglan kita magpasibu sang aton panghunahuna agod mapasangkad naton ang aton gugma sa tanan nga kauturan. (Basaha ang 2 Corinto 6:12, 13.) Nakahambal na bala kita sa aton kaugalingon kaangay sini, “Wala ako sing pinilian, apang . . . ” kag dayon ginadumdom ang pila ka negatibo nga mga kinaiya sang isa ka kultura? Ina nga mga panghunahuna mahimo nagapadayag nga kinahanglan naton nga dulaon ang pagkamaynadampigan sa aton balatyagon. Mahimo naton pamangkuton ang aton kaugalingon, ‘Ginatinguhaan ko gid bala nga makilala ang mga tawo nga tuhay sing kultura?’ Ini nga pag-usisa sa kaugalingon mahimo nga makabulig sa aton nga mag-uswag sa pagbaton kag sa pag-apresyar sa aton mga kauturan gikan sa nanuhaytuhay nga pungsod.

14, 15. (a) Maghatag sing halimbawa sang mga nagpasibu sang ila pagtamod sa iban? (b) Paano naton sila mailog?

¹⁴ Ang Biblia nagahatag sa aton sing maayo nga halimbawa sang mga nagpasibu sang ila pagtamod, isa na diri si apostol Pedro. Subong isa ka Judiyo, mahimo nga ginalikawan gid ni Pedro nga magsulod sa puluy-an sang isa ka Gentil. Handurawa lang kon daw ano ang ginbatyag niya sang ginpangabay siya nga duawon ang puluy-an sang wala matuli nga Gentil nga si Cornelio! Nagpasibu si Pedro bangod nahantop niya nga katuyuan sang Dios nga ang tanan nga tawo mangin bahin sang Cristianong kongregasyon. (Binu. 10:9-35) Si Saulo, nga nangin si apostol Pablo sang ulihi, nagpasibu man paagi sa pagdula sang iya may pinasulabi nga panimuot. Gin-ako niya nga daku gid anay ang dumot niya sa mga Cristiano amo nga “padayon [niya] nga ginhingabot sing tuman gid ang kongregasyon sang Dios kag ginhapay ini.” Apang, sang gintadlong ni Ginuong Jesus si Pablo, naghimo sia sing dalagku nga mga pagbag-o kag nagbaton pa gani sing panuytoy gikan sa iya anay mga ginhingabot.—Gal. 1:13-20.

¹⁵ Walay duhaduha nga makahimo kita sing mga pagbag-o sa aton mga panimuot sa bulig sang espiritu ni Jehova. Kon nagabatyag kita sang pagpasulabi bisan daw ano ka gamay, dapat naton panikasugan nga gabuton ini kag “tipigan ang pag-isa sa espiritu sa nagapahiusa nga higot sang paghidait.” (Efe. 4:3-6) Ginapalig-on kita sang Biblia nga ‘panaptan ang aton kaugalingon sang gugma, kay amo ini ang himpit nga higot sang paghiusa.’—Col. 3:14.

Pag-ilog kay Jehova sa Aton Ministeryo

16. Ano ang katuyuan sang Dios para sa mga tawo?

¹⁶ “Wala sing ginapasulabi ang Dios,” sulat ni apostol Pablo. (Roma 2:11) Katuyuan ni Jehova nga ang mga tawo sa tanan nga pungsod magsimba  sa iya. (Basaha ang 1 Timoteo 2:3, 4.) Agod matuman ina nga katuyuan, naghimo sia sing kahimusan para sa “wala katapusan nga maayong balita” nga ibantala “sa tagsa ka pungsod kag tribo kag hambal kag katawhan.” (Bug. 14:6) Si Jesus nagsiling: “Ang uma amo ang kalibutan.” (Mat. 13:38) Ano ang kabilihanan sini sa imo kag sa imo pamilya?

17. Paano naton mabuligan ang tanan nga sahi sang tawo?

¹⁷ Indi tanan makakadto sa iban nga pungsod agod magbantala sang mensahe sang Ginharian. Apang, mahimo nga makabantala kita sa mga tawo gikan sa iban nga pungsod nga nagapuyo sa aton teritoryo. Handa bala kita sa pagbantala sa tanan nga sahi sang tawo, indi lamang sa sadtong pirme naton ginabantalaan? Ngaa indi mo himuon nga tulumuron nga bantalaan ang iban nga wala pa makabaton sing maid-id nga pagpanaksi?—Roma 15:20, 21.

18. Ano nga pag-ulikid ang ginpakita ni Jesus para sa mga tawo?

¹⁸ Nagbatyag gid si Jesus nga kinahanglan buligan ang tanan. Indi lamang isa ka duog ang iya ginbantalaan. Ginapakita sang isa ka rekord sa Biblia nga “naglibot [sia] sa tanan nga siudad kag minuro.” Kag “sang makita niya ang kadam-an naluoy sia sa ila” kag nagpabutyag nga luyag niya sila buligan.—Mat. 9:35-37.

19, 20. Ano ang pila ka paagi nga mailog naton ang pag-ulikid nga ginpakita ni Jehova kag ni Jesus sa tanan nga sahi sang tawo?

¹⁹ Paano mo mapadayag ang kaangay nga panimuot? Ang iban nagpanikasog nga makabantala sa mga bahin sang ila teritoryo nga indi masami matuptupan. Nagalakip ini sa mga duog sang negosyo, mga plasa, ukon mga terminal. Ang iban nagtuon sing bag-o nga lenguahe agod mabantalaan ang pila ka etniko nga grupo nga nagapuyo sa ila duog ukon sa mga grupo nga indi masami mabantalaan. Ang pagtuon bisan pagtamyaw lang sa ila lenguahe mahimo magapakita nga interesado ka sa ila kaayuhan. Kon indi kita makatuon sing tuhay nga lenguahe, mahimo bala naton mapalig-on ang mga nagatinguha sa paghimo sini? Siempre pa, likawan naton nga paluyahon ang ila buot ukon duhaduhaan ang ila motibo sa pagpanikasog nga mabantalaan ang mga tawo gikan sa iban nga pungsod. Bilidhon ang tanan nga kabuhi sa panulok sang Dios, kag luyag gid naton sia nga ilugon.—Col. 3:10, 11.

²⁰ Kon may pagtamod kita kaangay sa Dios, bantalaan naton ang tanan, bisan ano man ang ila kahimtangan. Ang iban mahimo nagapuyo lang sa kalye, nagasaramihay, ukon nagakabuhi sing imoral. Kon indi maayo ang pagtratar sang pila ka indibiduwal sa aton dapat indi naton dalahigon ang ila nasyonalidad ukon ang ila etniko nga grupo nga subong bala tanan sila may palareho nga kinaiya. Bisan pa indi maayo ang pagtratar kay Pablo sang isa ka grupo, wala ina nagpauntat sa iya nga bantalaan ang mga tawo gikan sa sina nga grupo. (Binu. 14:5-7, 19-22) Nagapati sia nga may pila sa ila nga magabaton.

21. Paano makabulig sa imo ang pag-ilog sa pagtamod ni Jehova sa iban?

²¹ Maathag gid nga ang pagtamod ni Jehova, amo ang husto nga pagtamod, kag kinahanglan naton tigayunon ini nga pagtamod sa aton pagpakig-angot sa mga kauturan sa aton lugar ukon sa mga kauturan gikan sa iban nga pungsod, kag sa mga tawo nga aton ginabantalaan. Kon labi nga ginapabanaag naton ang pagtamod ni Jehova, labi pa gid ang aton impluwensia sa paghidait kag kalig-unan. Kag mangin labi kita nga yara sa kahimtangan nga buligan ang iban nga higugmaon si Jehova, ang Dios nga ‘wala nagapasulabi’ sa baylo nagapakita sing mahigugmaon nga pag-ulikid sa tanan, “kay sila tanan binuhatan sang iya mga kamut.”—Job 34:19.

Masabat Mo Bala?

• Ano nga pagtamod sa kauturan ang tinguhaan naton nga likawan?

• Paano naton tamdon ang aton kauturan subong sa pagtamod ni Jehova?

• Ano nga mga leksion ang natun-an mo tuhoy sa aton pagtamod sa aton kauturan nga naggikan sa iban nga mga pungsod?

• Paano naton mailog ang pagtamod ni Jehova kon nagabantala kita?

[Mga Pamangkot sa Pagtinuon]

[Piktyur sa pahina 26]

Paano mo labi nga makilala ang mga tawo nga may tuhay nga kultura?

[Piktyur sa pahina 28]

Sa ano nga mga paagi mabantala mo ang maayong balita sa mas madamo nga tawo?