Magkalipay sa Inyo Pag-asawahay
Magkalipay sa Inyo Pag-asawahay
“Paagi sa kaalam ginapabakod ang panimalay, kag paagi sa paghantop ginapalig-on ini.”—HULU. 24:3, NW.
1. Paano ginpakita sang Dios ang iya kaalam sa pagtuga sa una nga tawo?
ANG aton Amay sa langit maalam kag nakahibalo kon ano ang maayo para sa aton. Halimbawa, nahibaluan sang Dios nga agod matuman ang Iya katuyuan, “indi maayo nga ang tawo magpadayon nga isahanon lamang” sa hardin sang Eden. Ang panguna nga bahin sina nga katuyuan amo nga magpanganak ang mag-asawa kag ‘tugbon ang duta.’—Gen. 1:28, NW; 2:18, NW.
2. Ano nga kahimusan ang ginhimo ni Jehova para sa kaayuhan sang katawhan?
2 “Himuan ko sia sing kabulig, subong katuwang niya,” siling ni Jehova. Nian ginpatulog sang Dios sing mahamuok ang una nga tawo, ginkuhaan Niya sing isa ka gusok ang iya himpit nga lawas kag ginhimo ini nga babayi. Sang gindala ni Jehova ining himpit nga babayi, nga si Eva, kay Adan, ang lalaki nagsiling: “Ini karon tul-an sang akon katul-anan kag unud sang akon unud; tawgon sia nga Babayi, bangud nga sa Lalaki ginkuha sia.” Matuod gid nga si Eva nangin katuwang ni Adan. Ang kada isa may pinasahi nga mga kinaiya, apang sila nga duha himpit kag ginhimo suno sa dagway sang Dios. Busa, si Jehova amo ang nagtukod sang una nga kahimusan sang pag-asawahay. Indi mabudlay para kay Adan kag Eva nga batunon ining kahimusan sang Dios tungod pareho sila nga makabenepisyo sa sini.—Gen. 1:27; 2:21-23.
3. Paano ginatamod sang madamo ang dulot nga pag-asawahay, busa ano nga mga pamangkot ang nagautwas?
3 Sing makapasubo, ang rebelyuso nga panimuot lapnag sa kalibutan karon. Ang problema nga resulta sini wala naghalin sa Dios. Madamo ang nagapakadiutay sa dulot sang Dios nga pag-asawahay, ginakabig nila ini nga kinaraan na kag ginatunaan sang kalugaw-an ukon kinagamo. Madamo nga mga mag-asawa ang nagadiborsio sa karon. Wala na ginapalangga sang iban ang ila mga kabataan kag ginagamit pa gani sila sang ila mga ginikanan subong kapital agod makabentaha sa ila away nga mag-asawa. Madamo nga mga ginikanan ang wala nagapaumod, bisan tani para na lang sa paghidait kag paghiusa. (2 Tim. 3:3) Paano, nian, mahuptan ang kalipay sa pag-asawahay sa sining makahalanguyos nga mga tion? Ngaa importante ang pagpaumod agod indi mabungkag ang pag-asawahay? Ano ang matun-an naton sa moderno nga mga halimbawa sang malipayon nga pag-asawahay?
Pagpasakop sa Panuytoy ni Jehova
4. (a) Ano nga panuytoy ang ginhatag ni Pablo tuhoy sa pagminyo? (b) Paano ginasunod sang matinumanon nga mga Cristiano ang panuytoy ni Pablo?
4 Ang Cristianong apostol nga si Pablo naghatag sa mga balo sing panuytoy gikan sa Dios nga kon luyag nila magminyo liwat, dapat himuon “lamang [nila ini] sa Ginuo.” (1 Cor. 7:39) Indi ini bag-o para sa mga Cristiano nga napaidalom anay sa Judiyong Kasuguan. Maathag ang Kasuguan sang Dios sa Israel nga ‘dili magpangasawa’ gikan sa pagano nga mga pungsod sa palibot nila. Dugang pa, ginpaathag ni Jehova ang mga katalagman kon sikwayon nila ang Iya mga talaksan. “Kay patalikdon [sang di-Israelinhon] ang imo anak gikan sa pagsonod sa akon, agud nga mag-alagad sila sa iban nga mga dios; sa amo ang kasingkal sang GINOO magadabdab batok sa imo, kag laglagon ka niya sing madali.” (Deut. 7:3, 4) Ano ang ginapaabot ni Jehova nga himuon sang iya modernong-adlaw nga mga alagad tuhoy sa pagpili sing tiayon? Maathag gid nga ang isa ka alagad sang Dios dapat magpili sing tiayon “sa Ginuo,” buot silingon, isa ka dedikado kag bawtismado nga alagad ni Jehova. Ang pagsunod sa panuytoy ni Jehova sa pagpili sing tiayon isa gid ka maalamon nga buhat.
5. Paano ginatamod ni Jehova kag sang minyo nga mga Cristiano ang panumpa sa pag-asawahay?
5 Sagrado sa Dios ang panumpa sa pag-asawahay. Tuhoy sa una nga pag-asawahay, ang Anak sang Dios nga si Jesus nagsiling: “Ang gintingob sang Dios indi pagbulagon sang tawo.” (Mat. 19:6) Ginapahanumdom kita sang salmista sa pagkaserioso sang mga panumpa: “Idolot sa Dios ang halad sang pagdayaw, kag bayari ang imo mga saad sa Labing Mataas.” (Sal. 50:14) Huo, ang pag-asawahay mahimo mangin makalilipay, apang ang panumpa sa adlaw sang kasal serioso kag may upod nga salabton.—Deut. 23:21.
6. Ano ang matun-an naton gikan sa halimbawa ni Jefte?
6 Binagbinagon naton ang natabo kay Jefte nga nag-alagad subong hukom sa Israel sang ika-12 nga siglo B.C.E. Nanaad sia kay Jehova: “Kon itugyan mo sa akon kamut ang mga anak ni Amon, niyan ang bisan ano nga maggowa sa mga ganhaan sang akon balay sa pagsugata sa akon, kon magpauli ako sa paghidait gikan sa mga anak ni Amon, ini mangin-iya sang GINOO, kag idolot ko ining halad-nga-sinonog.” Sang nakita niya nga ang iya bugtong nga anak nga babayi amo ang nagsugata sa iya sang nagpauli sia sa Mizpa, ginbag-o bala ni Jefte ang iya panaad? Wala. Nagsiling sia: “Nakabungat ako sang akon baba sa GINOO, kag indi na ako makaisul.” (Huk. 11:30, 31, 35) Gintuman ni Jefte ang iya panaad kay Jehova bisan pa nagakahulugan ini nga wala na sia sing mangin kaliwat kag wala na sing magapanubli sang iya mga propiedad. Ang panumpa ni Jefte tuhay sa panumpa sa kasal. Apang, ang pagtuman niya sini, isa gid ka maayo nga halimbawa para sa Cristianong mga bana kag mga asawa nga dapat man nila tumanon ang ila mga panumpa.
Paano Magamadinalag-on ang Pag-asawahay?
7. Ano nga mga pagpasibu ang dapat himuon sang mga bag-o lang nakasal?
7 Madamo nga mag-asawa ang nagadumdom sang ila anay matam-is nga pagnobyahanay. Daw ano ang kalipay nila nga makilala ang ila palaabuton nga tiayon! Samtang pirme sila nagaupdanay, labi sila nga nagsuod. Apang, bisan nag-asawahay man sila bangod sang pagnobyahanay ukon pagpatigayon, kon mag-upod na sila subong mag-asawa, kinahanglan gihapon nila magpasibu. Nagsiling ang isa ka bana: “Sang bag-o lang kami nakasal, mabudlay gid batunon nga indi na kami soltero kag dalaga. Sa umpisa indi mahapos balansehon ang amon pagpakig-upod sa amon mga pamilya kag mga abyan.” Sa maaga nga bahin sang ila pag-asawahay, nahangpan sang isa ka bana nga minyo na karon sing 30 ka tuig nga agod mangin balanse, dapat niya pirme dumdumon nga may asawa na sia. Antes batunon ang isa ka imbitasyon ukon maghimo sing kasugtanan, nagakonsulta anay sia sa iya asawa kag nagadesisyon nga ginabinagbinag ang ila mga intereses. Sa sina nga kahimtangan, makabulig gid ang pagpauyon ukon pagpaumod.—Hulu. 13:10.
8, 9. (a) Ngaa importante ang maayo nga komunikasyon? (b) Sa ano nga bahin makabulig ang pagkamapasibusibuon, kag ngaa?
8 Kon kaisa, magkatuhay ang kultura nga gindak-an sang mag-asawa. Sa sini nga kahimtangan, kinahanglan nila ang bunayag nga komunikasyon. Lainlain ang mga estilo sang komunikasyon. Ang pagpanilag kon paano nagapakighambal ang imo tiayon sa iya mga paryente makabulig sa imo nga mahangpan sing labi pa ang imo tiayon. Kon kaisa, mahibaluan mo ang ginahunahuna sang isa, indi sa iya ginahambal kundi kon paano niya ini ginahambal. Kag madamo ka pa sing matun-an sa wala mapabutyag nga mga tinaga. (Hulu. 16:24; Col. 4:6) Ang paghantop importante gid agod mangin malipayon, suno sa ginasiling sini nga hulubaton: “Paagi sa kaalam ginapabakod ang panimalay, kag paagi sa paghantop ginapalig-on ini.”—Hulu. 24:3, NW.
9 Sa pagpili sing kawilihan kag kalingawan, nasapwan sang madamo nga importante ang pagkamapasibusibuon. Antes kamo mag-asawahay, mahimo nga ang imo tiayon naghinguyang sing tion sa isport ukon sa iban pa nga paglingawlingaw. Kinahanglan bala ang pila ka pagpasibu karon? (1 Tim. 4:8) Mahimo man ini ipamangkot tuhoy sa tion nga ginahinguyang sa mga paryente. Sa pagkamatuod, ang mag-asawa dapat gid nga maghinguyang sing tion nga magkaupod sa espirituwal kag sa iban pa nga mga hilikuton.—Mat. 6:33.
10. Paano ang pagpaumod makaamot sa maayong relasyon sang mga ginikanan kag minyo na nga mga kabataan?
10 Kon magminyo ang lalaki, bayaan niya ang iya amay kag ang iya iloy, kag amo man sini ang himuon sang babayi kon magminyo sia. (Basaha ang Genesis 2:24.) Apang, ang sugo sang Dios nga tahuron ang amay kag iloy naaplikar gihapon bisan minyo na ang isa. Gani bisan nakasal na ang duha, mahimo sila gihapon maghinguyang sing tion sa ila mga ginikanan kag mga ugangan. Ang isa ka bana nga minyo na sing 25 ka tuig, nagsiling: “Sa primero, mabudlay balansehon ang mga luyag kag kinahanglanon sang imo tiayon kag subong man sang imo mga ginikanan, mga utod, kag mga tapik. Nakabulig sa akon ang Genesis 2:24 sa pagdesisyon sing labing maayo. Bisan pa ang isa dapat mag-unong kag mag-abaga sing salabton sa iya mga paryente, ginpakita sa akon sini nga teksto nga ang katutom sa akon tiayon amo ang mas importante.” Busa, dapat batunon sang mapainumuron nga Cristianong mga ginikanan nga ang ila minyo nga mga anak, bahin na karon sang isa ka pamilya kag ang bana amo ang panguna nga responsable sa pagtuytoy sa sina nga pamilya.
11, 12. Ngaa ang pangpamilya nga pagtuon kag pangamuyo importante para sa mga mag-asawa?
11 Ang maayo nga rutina sang pangpamilya nga pagtuon importante gid. Napamatud-an ini sang madamo nga Cristianong pamilya. Mahimo indi mahapos mag-umpisa sina nga pagtuon ukon magpadayon sini. Ang isa ka ulo sang pamilya nagsiling: “Kon mabag-o lang namon ang nagligad, pat-uron gid tani namon nga mahuptan ang isa ka maayo nga rutina sang pangpamilya nga pagtuon sa umpisa pa lang sang amon pag-asawahay.” Nagdugang sia: “Daw ano gid nga kaayawan ang akon nabatyagan kon makita ko nga nalipay gid ang akon asawa sa makawiwili nga kamatuoran sa Biblia nga amon natun-an.”
12 Makabulig man ang pagpangamuyo nga magkaupod. (Roma 12:12) Kon ang bana kag asawa nahiusa sa pagsimba kay Jehova, ang ila suod nga kaangtanan sa Dios makapabakod sa higot sang ila pag-asawahay. (Sant. 4:8) Ang isa ka Cristianong bana nagpaathag: “Ang pagpangayo gilayon sing pasaylo kag pagsambit sina nga mga sayop kon nagapangamuyo nga magkaupod isa ka paagi nga mapakita ang tunay nga kasubo bisan sa diutay lang nga di-paghangpanay.”—Efe. 6:18.
Mangin Mapainumuron sa Inyo Pag-asawahay
13. Ano nga laygay ang ginhatag ni Pablo tuhoy sa paghirupay sang mag-asawa?
13 Dapat likawan sang Cristianong mga mag-asawa ang mga buhat nga nagapakanubo sa pag-asawahay, subong sang ginahimo sang mga tawo karon nga nagasalimuang sa sekso. Tuhoy sa sini, naglaygay si Pablo: “Ihatag sang bana sa iya asawa ang natungod sa iya; apang himuon man ini sang asawa sa iya bana. Ang asawa wala sing awtoridad sa iya kaugalingon nga lawas, kundi ang iya bana; subong man, ang bana wala sing awtoridad sa iya kaugalingon nga lawas, kundi ang iya asawa.” Dayon naghatag si Pablo sining maathag nga panuytoy: “Indi ini pag-idingot sa isa kag isa, luwas kon pareho nga ginkasugtan sa sulod sang gintalana nga tion.” Ngaa? “Agod makahugod kamo sang tion sa pangamuyo kag magtingob liwat, agod indi kamo padayon nga sulayon ni Satanas bangod wala kamo sing pagpugong sa kaugalingon.” (1 Cor. 7:3-5) Ginapakita ni Pablo nga dapat hatagan sing prioridad sang mga Cristiano ang pangamuyo. Apang gin-athag man niya nga ang tagsa ka minyo nga Cristiano dapat mangin mahunahunaon sa pisikal kag emosyonal nga mga kinahanglanon sang iya tiayon.
14. Paano naaplikar ang Makasulatanhon nga mga prinsipio sa paghirupay sang magtiayon?
14 Ang bana kag asawa dapat mangin tampad sa isa kag isa kag dapat mahangpan nila nga kon indi sila magpatugsiling sa paghirupay, mahimo ini magdul-ong sa mga problema. (Basaha ang Filipos 2:3, 4; ipaanggid sa Mateo 7:12.) Napamatud-an ini sa pila ka mag-asawa nga indi pareho sing relihion. Bisan pa may mga di-paghangpanay, mapauswag sang isa nga Cristiano ang kahimtangan paagi sa maayo nga paggawi, kalulo, kag kooperasyon. (Basaha ang 1 Pedro 3:1, 2.) Ang gugma kay Jehova kag sa tiayon upod ang mapainumuron nga panimuot, makabulig sa sining bahin sang pag-asawahay.
15. Ano ang papel sang pagtahod sa isa ka malipayon nga pag-asawahay?
15 Sa pihak naman nga bahin, ang malulo nga bana nagatahod sa iya asawa. Halimbawa, ginabinagbinag niya ang balatyagon sang iya asawa bisan sa magagmay nga mga butang. Ang isa ka bana nga 47 anyos na nga minyo nagsiling: “Nagatuon ako gihapon bahin sa sini.” Ginlaygayan ang Cristianong mga asawa nga tahuron sing tudok ang ila mga bana. (Efe. 5:33) Ang pagmulay sa bana kag pagpanugidsugid sa iban sang iya mga kaluyahon, wala gid nagapakita sing pagtahod. Ginapahanumdom kita sang Hulubaton 14:1: “Ang tagsa ka babayi nga maalam nagapatindug sang iya balay, apang ang buangbuang nagaguba sini sa iya kaugalingon nga mga kamut.”
Indi Magpasulay sa Yawa
16. Paano maaplikar sang mag-asawa ang Efeso 4:26, 27 sa ila pag-asawahay?
16 “Kon mangakig kamo, indi kamo magpakasala; indi pagpatunuri sang adlaw nga akig kamo, kag indi paghatagi sing duog ang Yawa.” (Efe. 4:26, 27) Kon iaplikar, ini nga laygay makabulig sa aton nga malubad ukon malikawan ang di-paghangpanay sa pag-asawahay. “Wala ako kadumdom nga may di-paghangpanay kami sang akon bana nga wala nasolbar bisan pa nga inoras ang amon ihinguyang sa paglubad sini,” hinumdom sang isa ka utod nga babayi. Sa umpisa pa lang sang ila pag-asawahay, ginkaisahan nila nga indi pagpaligaron ang isa ka adlaw nga indi malubad ang di-paghangpanay. “Nagdesisyon kami nga bisan ano man ang problema, istoryahan namon gilayon agod pagkasunod nga adlaw wala na.” Gani, ‘wala nila ginhatagan sing duog ang Yawa.’
17. Bisan pa daw indi magsahuay ang mag-asawa, ano ang mahimo makabulig?
17 Ano abi kon indi kamo magsahuay sang imo tiayon? Mahimo natalupangdan mo nga ang inyo kaangtanan daw indi mahigugmaon kaangay sang iban. Walay sapayan, makabulig sa imo kon dumdumon mo ang pagtamod sang Manunuga sa pag-asawahay. Sa idalom sang panuytoy sang Dios, ginlaygayan ni Pablo ang mga Cristiano: “Ang pag-asawahay mangin dungganon sa tanan, kag ang hiligdaan sang pag-asawahay mangin wala sing dagta, kay hukman sang Dios ang mga makihilawason kag mga makihilahion.” (Heb. 13:4) Kag indi man naton pagpasapayanan ini nga mga pulong: “Ang lubid nga tatlo ka dupli indi mabugto sing madali.” (Man. 4:12) Kon ang bana kag asawa nagapabalor gid sa pagpakabalaan sa ngalan ni Jehova, dapat nila huptan ang maayo nga kaangtanan sa isa kag isa kag subong man ang ila kaangtanan sa Dios. Dapat sila manghikot agod mangin madinalag-on ang ila pag-asawahay, kay nakahibalo sila nga magahimaya ini kay Jehova, ang Tagtukod sang Pag-asawahay.—1 Ped. 3:11.
18. Ano ang sigurado nga mapaabot mo sa pag-asawahay?
18 Posible gid para sa mga Cristiano nga mangin malipayon sa pag-asawahay. Agod maagom ini, kinahanglan ang pagpanikasog kag ang pagpasundayag sing Cristianong mga kinaiya, nga ang isa sini amo ang pagpaumod. Sa karon, sa mga kongregasyon sang mga Saksi ni Jehova sa bug-os nga kalibutan, madamo nga mag-asawa ang nagapamatuod nga posible ini.
Ano ang Imo Sabat?
• Ngaa indi imposible ang malipayon nga pag-asawahay?
• Ano ang makabulig agod mangin madinalag-on ang pag-asawahay?
• Ano nga mga kinaiya ang dapat palambuon sang mga magtiayon?
[Mga Pamangkot sa Pagtinuon]
[Piktyur sa pahina 9]
Antes batunon ang isa ka imbitasyon ukon maghimo sing kasugtanan, maalamon nga magkomunikar anay ang magtiayon
[Piktyur sa pahina 10]
Tinguhai nga mahusay ang di-paghangpanay sina mismo nga adlaw, “indi paghatagi sing duog ang Yawa”
