Mangin Mapainumuron, Mangin Balanse

“Padayon nga ipahanumdom sa ila nga . . . mangin makatarunganon.”—TITO 3:1, 2.

1, 2. Ano ang ginasiling sang Kasulatan tuhoy sa pagkamapainumuron, kag ngaa nagakaigo ini?

ANG aton mahigugmaon nga langitnon nga Amay nga si Jehova, wala tupong sa kaalam. Sa iya kita nagapangayo sing panuytoy sa kabuhi bangod sia ang nagtuga sa aton. (Sal. 48:14) Ang disipulo ni Cristo nga si Santiago nagasugid sa aton nga “ang kaalam nga gikan sa hitaas una sa tanan putli, dayon mahidaiton, makatarunganon, handa sa pagtuman, puno sang kaluoy kag maayong mga bunga, wala sing ginapasulabi, indi salimpapaw.”—Sant. 3:17.

² “Ipakita sa tanan nga tawo ang inyo pagkamakatarunganon [“pagkamapainumuron,” Kingdom Interlinear],” laygay ni apostol Pablo. * (Fil. 4:5) Si Cristo Jesus Ginuo kag Ulo sang Cristianong kongregasyon. (Efe. 5:23) Daw ano gid ka importante nga mangin makatarunganon kita, mapinasakupon sa panuytoy ni Cristo kag mapainumuron sa aton mga isigkatawo!

3, 4. (a) Iilustrar ang mga benepisyo sang pagpaumod. (b) Ano ang aton pagabinagbinagon?

³ Makabenepisyo kita kon magpaumod kita sa balanse nga paagi. Bilang halimbawa: Sang nabuyagyag ang isa ka plano sang mga terorista sa Britanya, ang kalabanan nga pasahero nangin handa sa pagsunod sa mga regulasyon paagi sa indi pagdala sa eroplano sang mga butang nga sang una puede anay nila mabitbit. Kon nagamaneho kita, may mga tion nga kinahanglan kita maghatag sing lugar sa iban, ilabi na sa mga ginsang-an, agod malikawan ang mga aksidente kag indi makatuga sing trapik.

⁴ Apang, madamo sa aton ang nabudlayan sa pagpaumod. Agod mabuligan kita, binagbinagon naton ang tatlo ka aspekto sang pagpaumod—ang aton motibo, ang aton panimuot sa awtoridad, kag kon tubtob diin kita dapat magpaumod.

Ngaa Dapat Magpaumod?

5. Sa idalom sang Mosaikong Kasuguan, ano ang rason ngaa magpabilin ang isa ka ulipon sa iya agalon?

⁵ May isa ka halimbawa sang antes-Cristiano nga panahon nga nagapatalupangod sang nagakaigo nga motibo sa pagpaumod. Sa idalom sang Mosaikong Kasuguan, ang mga Hebreo nga nangin ulipon dapat hilwayon sa ikapito nga tuig sang ila pag-alagad ukon sa Jubileo nga tuig, depende sa kon ano ang mauna. Apang ang isa ka ulipon puede magdesisyon nga magpabilin nga ulipon. (Basaha ang Exodo 21:5, 6.) Ano ang rason ngaa himuon niya ini? Bangod sa gugma. Gugma ang magapahulag sa iya nga magpabilin sa idalom sang awtoridad sang iya mapatugsilingon nga agalon.

6. Ano ang kaangtanan sang gugma sa pagpaumod?

⁶ Sing kaanggid, ang aton gugma kay Jehova amo ang magapahulag sa aton nga idedikar ang aton kabuhi sa iya kag magkabuhi nahisuno sa aton dedikasyon. (Roma 14:7, 8) “Amo ini ang kahulugan sang gugma sa Dios, nga tumanon naton ang iya mga sugo; apang ang iya mga sugo indi mabug-at,” sulat ni apostol Juan. (1 Juan 5:3) Ini nga gugma wala nagapangita sang kaugalingon nga kaayuhan. (1 Cor. 13:4, 5) Ang aton gugma sa aton isigkatawo amo ang magapahulag sa aton nga mangin mapainumuron kag mapatugsilingon sa aton pagpakig-angot sa ila. Sa baylo nga mangin maiyaiyahon, ginauna naton ang kaayuhan sang iban.—Fil. 2:2, 3.

7. Ano ang papel sang pagpasibu sa aton ministeryo?

⁷ Dapat halungan naton nga indi masandad ang iban sa aton ginahambal ukon ginabuhat. (Efe. 4:29) Sa pagkamatuod, ang gugma amo ang  magapahulag sa aton nga likawan ang paghimo sang bisan ano nga butang nga mahimo mag-upang sa mga tawo nga may nanuhaytuhay nga gindak-an kag kultura nga mangin alagad ni Jehova. Sa masami, agod mahimo ini, kinahanglan kita magpasibu. Halimbawa, ang mga misyonera nga naanad anay sa paggamit sing mga make-up kag stocking wala na nag-insister nga gamiton ini sa mga lugar nga basi masal-an sila nga imoral nga mga babayi kag makapasandad sila sa iban.—1 Cor. 10:31-33.

8. Paano ang gugma sa Dios makabulig sa aton nga maggawi subong “kubos”?

⁸ Ang aton gugma kay Jehova amo ang nagabulig sa aton nga dulaon ang bugal. Pagkatapos magbinaisay ang iya mga disipulo kon sin-o sa ila ang labing daku, gindala ni Jesus ang isa ka bata sa ila atubangan. Ginpaathag niya: “Ang bisan sin-o nga nagabaton sini nga bata sa akon ngalan nagabaton man sa akon, kag ang bisan sin-o nga nagabaton sa akon nagabaton man sa iya nga nagpadala sa akon. Kay sia nga nagagawi nga kubos sa tunga ninyo amo ang labing daku.” (Luc. 9:48; Mar. 9:36) Mahimo para sa tagsatagsa sa aton indi gid mahapos nga maggawi nga isa ka “kubos.” Bangod sang aton napanubli nga pagkadihimpit kag huyog nga mangin bugalon, mahimo kita maghandum nga mangin prominente. Apang, ang pagkamapainubuson amo ang magabulig sa aton nga magpaumod.—Roma 12:10.

9. Sa pagpaumod, ano ang dapat naton tahuron?

⁹ Nadalahig sa pagpaumod ang pagpasakop naton sa hatag-Dios nga mga awtoridad. Ginatahod sang tanan nga matuod nga Cristiano ang importante nga prinsipio sang pagkaulo. Ginpaathag ini sing maayo ni apostol Pablo sa mga taga-Corinto: “Luyag ko nga mahibaluan ninyo nga ang ulo sang tagsa ka lalaki amo ang Cristo; ang ulo naman sang babayi amo ang lalaki; ang ulo naman sang Cristo amo ang Dios.”—1 Cor. 11:3.

10. Ano ang ginapakita sang aton pagpasakop sa awtoridad ni Jehova?

¹⁰ Ang pagpasakop naton sa awtoridad sang Dios nagapakita nga may salig kita sa iya subong ang aton mahigugmaon nga Amay. Nahibaluan niya ang tanan nga nagakatabo kag padyaan niya kita sing nagakaigo. Ini nga ihibalo makabulig sa aton nga magpaumod ilabi na kon wala kita ginatahod ukon ginasing-alan kita sang iban. Nagsulat si Pablo: “Kon mahimo, tubtob sa masarangan ninyo, magpakighidait sa tanan nga tawo.” Ginpadaku pa ni Pablo ining laygay paagi sa sini nga sugo: “Indi kamo magtimalos, mga hinigugma, kundi pabay-i ini sa kasingkal sang Dios; kay nasulat na: ‘Akon ang pagtimalos; ako ang magabalos, siling ni Jehova.’”—Roma 12:18, 19.

11. Paano naton mapakita nga nagapasakop kita sa pagkaulo ni Cristo?

¹¹ Dapat man kita magpasakop sa hatag-Dios nga awtoridad sa Cristianong kongregasyon. Ginalaragway sang Bugna kapitulo 1 nga ginauyatan ni Jesucristo ang mga “bituon” sang kongregasyon sa iya natuo nga kamot. (Bug. 1:16, 20) Sa kabilugan, ining mga “bituon” nagarepresentar sa mga hubon sang mga gulang, ukon mga manugtatap sa mga kongregasyon. Ining gintangdo nga mga manugtatap nagapasakop sa pagpanguna ni Cristo kag ginailog nila ang iya maluluy-on nga pagpakig-angot sa iban. Ang tanan nga katapo sang kongregasyon nagapasakop sa kahimusan nga ginhimo ni Jesus  nga ang “matutom kag mainandamon nga ulipon” amo ang magaaman sing espirituwal nga pagkaon sa nagakaigo nga tion. (Mat. 24:45-47) Sa karon, ang aton kahanda sa pagtuon kag pag-aplikar sa sining mga aman nagapakita nga nagapasakop kita sa pagkaulo ni Cristo, kag nagaamot sa paghidait kag paghiusa.—Roma 14:13, 19.

Pagpasakop—Tubtob Diin?

12. Ngaa may limitasyon ang pagpasakop?

¹² Apang, ang pagpasakop wala nagakahulugan nga ikompromiso naton ang aton pagtuo ukon ang aton diosnon nga mga prinsipio. Ano ang ginhimo sang una nga mga Cristiano sang ginmanduan sila sang relihioso nga mga lider nga mag-untat sa pagpanudlo sa ngalan ni Jesus? Si Pedro kag ang iban pa nga mga apostoles maisog nga nagsiling: “Dapat namon tumanon ang Dios subong manuggahom sa baylo sang mga tawo.” (Binu. 4:18-20; 5:28, 29) Busa kon pauntaton kita sang mga panguluhan sa pagbantala sang maayong balita, wala kita nagauntat. Apang, mahimo naton ipasibu ang aton mga pamaagi agod maatubang sing mataktikanhon ining sitwasyon. Kon ginadumilian ang pamalaybalay nga ministeryo, mahimo kita mangita sing iban nga mga pamaagi nga makapakig-angot sa mga tagbalay kag sa amo padayon naton nga matuman ang sugo nga ginhatag sang Dios sa aton. Subong man, kon dumilian sang “superyor nga mga awtoridad” ang aton mga miting, mahalungon kita nga nagatipon sa magagmay nga mga grupo.—Roma 13:1; Heb. 10:24, 25.

13. Ano ang ginsiling ni Jesus tuhoy sa pagpasakop sa awtoridad?

¹³ Sa iya Sermon sa Bukid, ginpatalupangod ni Jesus ang kinahanglanon nga magpasakop sa awtoridad: “Kon luyag sang isa ka tawo nga isumbong ka sa hukmanan kag kuhaon ang imo nasulod nga panapton, ihatag man sa iya ang imo kunop; kag kon ang isa nga may awtoridad magpilit sa imo sa pag-alagad sing isa ka kilometro, updi sia sa duha ka kilometro.” (Mat. 5:40, 41) * Ang pagpatugsiling sa iban kag ang handum nga buligan sila magapahulag man sa aton nga maghimo sing kapin pa sangsa ginapatuman sa aton.—1 Cor. 13:5; Tito 3:1, 2.

14. Ngaa indi gid kita dapat magpauyon sa apostasya?

¹⁴ Dugang pa, indi naton dapat pagtugutan ang pagpasakop ukon pagpauyon nga magdul-ong sa aton nga magkompromiso sa mga apostata. Ang aton maathag kag malig-on nga panindugan sa sini nga bahin kinahanglan agod matipigan naton ang kaputli sang kamatuoran kag paghiusa sang kongregasyon. Tuhoy sa sining “di-matuod nga mga kauturan,” si Pablo nagsulat: “Wala gid kami magpauyon sa ila paagi sa pagpasakop, wala, bisan sing isa ka oras lang, agod ang kamatuoran sang maayong balita magpabilin sa inyo.” (Gal. 2:4, 5) Kon may mag-utwas man gid nga apostasya, ang matutom nga mga Cristiano nagapabilin nga malig-on sa kon ano ang husto.

Ang mga Manugtatap Kinahanglan Mangin Mapainumuron

15. Paano mapakita sang Cristianong mga manugtatap nga mapainumuron sila kon nagasapol?

¹⁵ Ang isa sa mga kalipikasyon sang mga manugtatap amo ang kahanda sa pagpaumod. Si Pablo nagsulat: “Ang manugtatap dapat makatarunganon [“mapainumuron,” footnote sang Reference Bible]. (1 Tim. 3:2, 3) Importante gid ini ilabi na kon nagasapol ining gintangdo nga mga lalaki agod maghinun-anon sang mga butang may kaangtanan sa kongregasyon. Antes makadangat sa desisyon, ang kada isa hilway sa pagpabutyag sang ila mga opinyon, bisan pa indi man gid kinahanglan nga magkomento ang kada gulang. Sa tion sang ila paghinun-anon, mahimo magbag-o ang opinyon sang isa ka gulang kon masambit sang iban ang Makasulatanhon nga mga prinsipio nga naaplikar sa ila ginabinagbinag. Sa baylo nga sikwayon ang opinyon sang iban kag ipilit ang kaugalingon nga pagtamod, ang isa ka hamtong nga gulang nagapaumod. Sa umpisa, mahimo magsumpakilay ang ila mga pagtamod, apang ang mapinangamuyuon nga pagbinagbinag nagapahiusa sa maugdang kag mapainumuron nga mga gulang.—1 Cor. 1:10; Basaha ang Efeso 4:1-3.

16. Ano nga panimuot ang dapat ipakita sang isa ka Cristianong manugtatap?

¹⁶ Dapat sakdagon sang isa ka Cristiano nga gulang ang teokratikong kahimusan sa tanan niya nga ginahimo. Dapat makita inang panimuot pati na sa iya pagduaw sa panong subong manugbantay, kay makabulig ini sa iya nga mangin  mapatugsilingon kag malulo sa iban. “Bantayi ninyo ang panong sang Dios nga yara sa inyo pag-atipan,” sulat ni Pedro, “indi nga napilitan, kundi sing kinabubut-on; indi tungod sa gugma sa di-bunayag nga pagganar, kundi sing malangkagon.”—1 Ped. 5:2.

17. Paano mapakita sang tanan nga katapo sang kongregasyon ang mapainumuron nga panimuot sa ila pagpakig-angot sa iban?

¹⁷ Ginapabaloran gid sang mga may edad nga katapo sang kongregasyon ang bulig sang mga lamharon kag ginapakig-angutan nila sila nga may dignidad. Bilang balos, ginatahod sang mga lamharon ang mga may edad nga madugay na nga nagaalagad kay Jehova. (1 Tim. 5:1, 2) Ang Cristianong mga gulang nagapangita sing kalipikado nga mga lalaki nga matugyanan nila sing pila ka salabton, kag ginahanas sila nga magbulig sa pagtatap sa panong sang Dios. (2 Tim. 2:1, 2) Ginapabaloran sang tagsa ka Cristiano ang gintuytuyan sang Dios nga laygay ni Pablo: “Mangin matinumanon sa mga nagapanguna sa inyo kag mangin mapinasakupon, kay ginabantayan nila ang inyo kalag subong nga sila ang manabat; agod himuon nila ini nga may kalipay kag wala nagapanghayhay, kay makahalit ini sa inyo.”—Heb. 13:17.

Pagpaumod sa Pamilya

18. Ngaa ang mapainumuron nga panimuot kinahanglan sa sulod sang pamilya?

¹⁸ Ang mga katapo sang pamilya kinahanglan man mangin mapainumuron. (Basaha ang Colosas 3:18-21.) Ginabalay sang Biblia ang espesipiko nga papel sang nanuhaytuhay nga katapo sang Cristianong pamilya. Ang amay amo ang ulo sang iya asawa kag ang panguna nga may salabton sa pagtudlo sa kabataan. Dapat kilalahon sang asawa ang awtoridad sang iya bana, kag dapat panikasugan sang mga kabataan nga mangin matinumanon, kay nagapahamuot gid ini sa Ginuo. Ang tagsa ka katapo sang pamilya makaamot sa paghiusa kag paghidait sang panimalay paagi sa pagpaumod sa nagakaigo kag balanse nga paagi. Ang Biblia may pila ka halimbawa nga makabulig sa pagpaathag sini nga punto.

19, 20. (a) Ipaanggid ang halimbawa ni Eli kag ni Jehova sa pagpauyon. (b) Ano nga mga leksion ang matun-an sang mga ginikanan sa sini nga mga halimbawa?

¹⁹ Sang bata pa si Samuel, si Eli amo ang mataas nga saserdote sa Israel. Apang, ang mga anak ni Eli nga sanday Ofni kag Finehas, “mga lalaki nga huroshuros” nga wala “makakilala sa GINOO.” Nabatian ni Eli ang malain nga mga report tuhoy sa ila, lakip ang ila ginahimo nga pagpakighilawas sa mga babayi nga nagaalagad sa mga ganhaan sang layanglayang nga tilipunan. Ano ang ginhimo ni Eli? Ginsilingan niya sila nga kon nakasala sila batok kay Jehova, wala na sing makapangamuyo para sa ila. Apang wala niya sila gintadlong kag gindisiplina. Busa, padayon nga naghimo sing sala ang mga anak ni Eli. Sang ulihi, makatarunganon nga nagdesisyon  si Jehova nga pamatbatan sila sing silot nga kamatayon. Sang nakalab-ot kay Eli ang balita sang ila kamatayon, napatay man sia. Daw ano gid ka makahalanusbo nga resulta! Ang di-nagakaigo nga pagpasugot ukon pagpauyon ni Eli sa ila malaut nga mga buhat, nga daw subong bala ginatugutan niya sila nga magpadayon, maathag nga indi gid husto.—1 Sam. 2:12-17, 22-25, 34, 35; 4:17, 18.

²⁰ Binagbinagon naman naton ang pagpakig-angot sang Dios sa iya mga anak nga anghel. Nakita ni manalagna Micaya sa isa ka dalayawon nga palanan-awon ang isa ka pagpakigsapol ni Jehova sa Iya mga anghel. Namangkot si Jehova kon sin-o sa mga anghel ang makalimbong kay Hari Ahab sang Israel agod pukanon ining malaut nga hari. Namati si Jehova sa mga panugda sang nanuhaytuhay nga mga espiritu nga anak. Nian isa ka anghel ang nagsiling nga sia ang magahimo sini. Ginpamangkot sia ni Jehova kon paano. Sang naluyagan ni Jehova ang panugda sang anghel, ginsugo sia ni Jehova nga himuon ini. (1 Hari 22:19-23) May makuha bala diri nga leksion ang mga katapo sang pamilya tuhoy sa pagpaumod ukon pagpauyon? Maayo gid kon hatagan sing igtalupangod sang isa ka Cristiano nga bana kag amay ang mga ideya kag mga panugda sang iya asawa kag mga anak. Sa pihak nga bahin, dapat man kilalahon sang asawa kag mga anak nga kon napabutyag na nila ang ila opinyon ukon luyag, dapat na sila magpaumod kag tahuron ang desisyon sang isa nga may Makasulatanhon nga awtoridad sa pagdesisyon.

21. Ano ang pagabinagbinagon sa masunod nga artikulo?

²¹ Daku gid ang aton pasalamat kay Jehova bangod sa iya mahigugmaon kag maalamon nga mga pahanumdom nga mangin mapainumuron! (Sal. 119:99) Binagbinagon sa masunod nga artikulo kon paano ang pagpaumod sa balanse nga paagi makaamot sa pagsapo sing kalipay sa pag-asawahay.

[Mga footnote]

Ano ang Imo Sabat?

• Ano ang maayo nga mga bunga sang pagpaumod?

• Paano mapakita sang mga manugtatap ang mapainumuron nga panimuot?

• Ngaa importante ang mapainumuron nga panimuot sa sulod sang pamilya?

[Mga Pamangkot sa Pagtinuon]

[Piktyur sa pahina 4]

Ginailog sang mga gulang ang maluluy-on nga pagpakig-angot ni Cristo sa iban

[Piktyur sa pahina 6]

Kon nagasapol ang mga gulang, ang mapinangamuyuon nga pagbinagbinag kag mapainumuron nga panimuot nagasakdag sa paghiusa