Pagpalapnag sing Maayong Balita sa Mataas nga Andes

KAMI nga 18 nagahigda sa salog nga duta. Bisan nagapangurumbot na, ginakurog kami gihapon sa katugnaw samtang ginapamatian namon ang nagabundak nga ulan sa sin nga atop. Mabudlay ang kahimtangan sa sining gamay kaayo nga pasilungan, amo nga sa banta namon kami pa lang ang una nga mga tawo nga nakatulog diri.

Ngaa nagkadto ang 18 ka tawo sa sini nga lugar? Nasentro ang sabat sa amon handum nga tumanon ang sugo ni Jesus nga ibantala ang maayong balita “tubtob sa ukbong sang duta.” (Binu. 1:8; Mat. 24:14) Nagkadto kami sa naligwin nga teritoryo sa Andes sang Bolivia agod magbantala.

Pakadto sa Andes

Pakadto pa lang, mabudlay na. Nabal-an namon nga wala sing pat-od nga iskedyul ang biyahe sang depasahero nga salakyan sa sinang nabaw-ing nga mga lugar. Sang may nag-abot nga bus, natalupangdan namon nga gamay gali ini, gani nagtindog na lang ang iban sa amon. Apang, nakalab-ot gid man kami sa amon kaladtuan.

Tulumuron namon nga bantalaan ang mga minuro sang mataas nga Andes sang Bolivia. Sang nakaabot na kami didto, ang amon grupo nga may dala nga mga suplay, nagpangalihid sa taklaron nga banas sa bukid.

 Daw kagamay lang sang mga minuro, apang malaka ang mga pamalay, amo nga naglawig sing pila ka oras ang amon pagduaw sa tagsa ka minuro. Bisan malayo na ang amon nalakat, daw may balay pa gid gihapon sa unhan. Sa masami nagatalang kami sa likoliko nga alagyan sa kaumhan.

“Ngaa Subong Lang Kamo?”

Natandog gid ang isa ka babayi sang mahibaluan niya nga tuman kalayo sang amon ginlakat amo nga ginpagamit niya ang iya kusina kag kahoy nga inuggatong agod maluto ang amon palanyagahon. Sang nahibaluan sang isa ka tawo ang ginatudlo sang Biblia tuhoy sa kahimtangan sang mga patay, namangkot sia, “Ngaa subong lang kamo?” Interesado gid sia amo nga sang magbiya na kami sa ila minuro, nag-upod sia sa amon agod makapamangkot sing dugang pa. Ang isa naman ka tawo nagpakita sing daku nga interes sa aton mga publikasyon bisan wala pa sia anay nakabati tuhoy sa mga Saksi ni Jehova. Daku gid ang iya pasalamat sa amon pagbisita amo nga ginhatag niya ang yabi sang pasilungan sa diin makapaligad kami sing gab-i.

Isa ka gab-i, tuman kadulom amo nga wala namon natalupangdan nga ang ginpatindugan gali namon sang amon tolda balay sang hantik nga mga subay. Natublag gid sila kag ginkutot kami. Tuman na kami kalapyo para magsaylo pa, kag maayo na lang kay wala madugay, nag-untat na sa pagpangutot ang mga subay.

Sang primero nagpalanakit ang amon mga likod kag mga gusok bangod sa pagtulog sa duta, apang sang gab-i na, daw wala na man lang. Pagkaaga, nalipatan na namon ang pagpalanakit sang lawas samtang ginatan-aw namon ang matahom nga mga nalupyakan  nga ginalabayan sang mga panganod kag ang putukputukan sang bukid nga nakulapan sing niebe. Ang mabatian lamang namon amo ang tunog sang nagadaganas nga sapa kag huni sang mga pispis.

Sa tapos makapaligo sa sapa, ginbinagbinag namon ang teksto sa Biblia, namahaw, kag nag-amat-amat taklad pakadto sa malayolayo nga mga minuro. Takus gid ang amon pagtaklad. Nasalapuan namon ang tigulang nga babayi nga naghibi sang mahibaluan niya nga ang ngalan sang Dios nga Jehova, yara sa Biblia. Natandog gid sia. Karon, matawag na niya ang Dios sa ngalan kon mangamuyo sia!

Nagsiling ang isa ka tigulang nga lalaki nga gindumdom gid sia sang Dios, kag hinali sia nga nag-amba nga ginpadala kami sang mga anghel. Ang isa naman ka tawo, masakiton kaayo amo nga indi sia makahalin sa iya balay. Nagsiling sia sa amon nga wala gid sing isa sa ila minuro ang nagbisita sa iya. Nakibot gid sia nga naghalin pa kami sa La Paz. Ang isa pa ka tawo nagdayaw gid nga ang mga Saksi ni Jehova nagaduaw sa puluy-an sang mga tawo, samtang ang iban nga mga relihion nagapanawag lang sa ila paagi sa lingganay.

Wala sing koryente ang mga balay sa sina nga lugar, amo nga temprano pa nagatulog ang mga tawo kag aga pa sila nagabugtaw. Gani, agod masapwan ang mga tawo sa ila puluy-an, dapat alas seis pa lang sa aga magaumpisa na kami sa pagbantala. Kay kon adlaw na, nagatrabaho na sa latagon ang mga tawo. Sang adlawon na, ang iban nga nagatrabaho na, nagauntat agod mamati sa amon mensahe gikan sa Biblia, kag ginpapahuway man nila ang ila mga toro sa pag-arado. Madamo nga tawo ang nasapwan namon sa ila puluy-an nga ginpapungko kami sa panit sang karnero kag gintipon ang ila pamilya agod mamati. Ginhatagan kami sang mga mangunguma sang dalagku nga mga sako sang mais bilang pasalamat sa literatura sa Biblia nga ginbilin namon sa ila.

“Wala Gid Ninyo Ako Ginkalimtan”

Ang matuod, agod mag-uswag ang mga tawo sa ihibalo sa Biblia, indi lamang sila dapat duawon sing makaisa. Madamo ang nakitluoy sa amon nga magbalik agod tudluan sila sing dugang pa. Bangod sini, makapila kami magbalik sa sini nga bahin sang Bolivia.

Sang ulihi namon nga pagkadto, nalipay gid ang isa ka tigulang nga babayi nga nagbalik kami, kag nagsiling sia: “Daw mga kabataan ko na kamo. Wala gid ninyo ako ginkalimtan.” Nagpasalamat ang isa ka tawo bangod sang amon hilikuton kag gin-agda kami nga magdayon sa ila puluy-an sa amon masunod nga pagbalik. Ayhan ang pinakadaku nga padya sang amon panikasog amo ang mahibaluan nga ang isa ka babayi nga nasapwan namon sang nagligad namon nga pagbisita nagsaylo na sa siudad kag nagabantala na karon sing maayong balita.

Sa katapusan nga adlaw sang amon una nga pagkadto didto, naubusan kami sing gaas para sa gamay nga kalan kag halos naubos na ang dala namon nga pagkaon. Gani, nagpangahoy kami kag ginluto ang katapusan namon nga pagkaon, kag naglakat na lang kami pabalik. Mga pila ka kilometro ang amon kalayuon sa banwa diin makasakay kami sa bus. Kag nakaabot gid man kami apang madulom na.

Pagpauli

May problema sa amon pagpauli bangod naaberiya ang bus. Sang ulihi, nagsakay na lang kami sa likod sang trak diin nagaginutok ang mga tawo. Naghatag ini sa amon sing kahigayunan nga mabantalaan ang mga pasahero nga nangusisa kon ngaa nagkadto kami didto. Bisan pa mahuluy-on ang mga tawo, maabiabihon kag mainabyanon sila.

Pagkatapos sang siam ka oras nga pagsakay sa likod sang trak, nakapauli gid man kami—basa kag nagakurogkurog sa katugnaw. Apang, madinalag-on ang amon paglakbay. Samtang nagabiyahe, nakahimo kami sing kahimusan nga maghiwat sing pagtuon sa Biblia sa isa ka babayi nga nagapuyo sa siudad.

Isa gid ka dalayawon nga pribilehiyo nga ipahayag ang maayong balita sa mga tawo sa sinang nabaw-ing nga lugar. Nakabantala kami sa apat ka minuro kag sa madamo pa nga magagmay nga minuro. Ginadumdom gid namon ang mga tinaga: “Daw ano katahum sa mga bukid ang mga tiil sang nagadala sang maayong mga balita, nga nagabantala sang paghidait, nga nagadala sang maayong mga balita sang kaayohan, nga nagabantala sang kaluwasan.”—Isa. 52:7; Roma 10:15.

[Piktyur sa pahina 17]

Handa na sa pagpaambit sing maayong balita