Si Jehova Nagapamati sa Aton mga Pagtuaw
Si Jehova Nagapamati sa Aton mga Pagtuaw
“Ang mga mata sang GINOO yara nayon sa mga matarung, kag ang iya mga idulungug bukas sa pagtuaw nila.”—SAL. 34:15.
1, 2. (a) Ano ang ginabatyag sang madamo karon nga tawo? (b) Ngaa wala kita matingala sa sini?
NAGABATYAG ka bala sing kasakit? Kon amo, wala ka nagaisahanon. Minilyon karon ang nagaatubang sing matag-adlaw nga mga pag-ipit sa sining malaut nga sistema sang mga butang. Apang ang iban daw indi na gid makabatas. Ang ila ginabatyag kaangay sang ginbatyag anay sang salmista nga si David, nga nagsulat: “Ginapunaw ako kag nahanog sing tama; nag-ugayong ako tungud sang kagumon sang akon tagiposoon. Ang akon tagiposoon nagakubakuba, wala na ako sing kusug; nahanungud sang kapawa sang akon mga mata—ini man wala na sa akon.”—Sal. 38:8, 10.
2 Kita nga mga Cristiano wala na natingala sa mga kasisit-an sa kabuhi. Nahangpan naton nga ang “pagpasakit” bahin sang tanda sang presensia ni Jesus. (Mar. 13:8; Mat. 24:3) Sa orihinal nga lenguahe sini, ang tinaga nga ginbadbad “pagpasakit” nagapatuhoy sa tuman nga kasakit nga ginabatyag sa tion sang pagpanganak. Daw ano gid ini ka sibu nga paglaragway sa tuman nga pag-antos sang mga tawo sa sining “makahalanguyos nga mga tion nga mabudlay [gid] atubangon.”—2 Tim. 3:1.
Nahangpan ni Jehova ang Aton mga Kasisit-an
3. Ano ang nahibaluan gid sang katawhan sang Dios?
3 Nahibaluan gid sang katawhan ni Jehova nga sila man apektado sining mga kasisit-an, kag mahimo nga magalala pa gid ini sa palaabuton. Wala labot sa kinaandan nga mga kabudlayan nga ginaatubang sang tanan nga tawo, kita nga mga alagad sang Dios may ginaatubang pa nga isa ka “kaaway, ang Yawa,” nga nagapanikasog gid nga gub-on ang aton pagtuo. (1 Ped. 5:8) Amo nga kon kaisa nagabatyag kita kaangay ni David: “Ang pasipala nagboong sang akon tagiposoon, kag puno ako sing kasakit. Nagpangita ako sang iban nga nagakalooy, apang wala gid; kag sang mga manuglipay, kag wala gid ako sing nakita”!—Sal. 69:20.
4. Ano ang nagalugpay sa aton kon nagabatyag kita sing mga kasisit-an?
4 Buot bala silingon ni David nga wala na gid sia sing paglaum? Indi. Talupangda ang dugang pa nga ginsiling niya sa sina nga salmo: “Ang GINOO nagapamati sa mga may kinawad-on, kag wala nagatamay sang iya mga binilanggo,” ukon sang iya katawhan nga ginbilanggo. (Sal. 69:33.) Nagabatyag kita kon kaisa nga daw nabilanggo kita sang aton mga kasisit-an. Ang iban daw wala nakahangop sang aton sitwasyon—kag mahimo nga indi gid nila ini mahangpan. Apang kaangay ni David, malugpayan kita sa ihibalo nga nahangpan gid sing bug-os ni Jehova ang aton mga kasisit-an.—Sal. 34:15.
5. Sa ano nagasalig si Hari Solomon?
5 Ini nga kamatuoran ginpadaku sang anak ni David nga si Solomon sa dedikasyon sang templo sa Jerusalem. (Basaha ang 2 Cronica 6:29-31.) Nakitluoy sia kay Jehova nga pamatian ang kada isa nga bunayag sing tagipusuon nga nagapalapit sa Iya nahanungod “sang iya kaugalingon nga kalalat-an kag sang iya kaugalingon nga kalisud.” Ano ang mangin reaksion sang Dios sa mga pangamuyo sining nasit-an nga mga indibiduwal? Ginpabutyag ni Solomon ang iya pagsalig nga indi lamang pamatian sang Dios ang ila mga pangamuyo kundi magahulag gid sia agod buligan sila. Ngaa? Bangod nahibaluan gid niya kon ano ang yara sa “tagiposoon sang mga anak sang mga tawo.”
6. Paano naton malandas ang kabalaka, kag ngaa?
6 Makapangamuyo man kita kay Jehova nahanungod ‘sa aton kaugalingon nga kalalat-an kag sa aton kaugalingon nga kalisud,’ buot silingon, tuhoy sa aton personal nga mga kasisit-an. Makalulugpay gid mahibaluan nga nahangpan niya ang aton mga kasisit-an kag nagaulikid gid sia sa aton. Ginpamatud-an ini ni apostol Pedro sang nagsiling sia: ‘Itugyan ninyo sa iya ang tanan ninyo nga kabalaka, bangod nagaulikid sia sa inyo.’ (1 Ped. 5:7) Nagakabalaka gid si Jehova sa nagakatabo sa aton. Ginpadaku ni Jesus ang mahigugmaon nga pag-ulikid ni Jehova sang nagsiling sia: “Indi bala nga ginabaligya ang duha ka maya sa bili nga isa ka sensilyo nga diutay sing balor? Apang wala sing isa sa ila nga mahulog sa duta nga indi mahibaluan sang inyo Amay. Bisan ang mga buhok mismo sa inyo ulo naisip na tanan. Busa indi kamo magkahadlok: mas importante pa kamo sangsa madamo nga maya.”—Mat. 10:29-31.
Magsandig sa Bulig ni Jehova
7. Ano nga pagsakdag ang masaligan naton?
7 Makasalig gid kita nga si Jehova handa kag makasarang magbulig sa aton kon nagaatubang kita sing mga kasisit-an. “Ang Dios aton dalangpan kag kusug, handa gid nga kabulig sa kalisud.” (Sal. 34:15-18; 46:1) Paano ginaaman sang Dios ina nga bulig? Binagbinaga ang ginasiling sang 1 Corinto 10:13: “Ang Dios matutom, kag indi sia magtugot nga sulayon kamo labaw sa inyo masarangan, kundi kon mag-abot ang pagsulay magahimo man sia sang lulutsan agod mabatas ninyo ini.” Mahimo maniobrahon ni Jehova ang mga butang agod madula ang aton kasisit-an, ukon mahimo niya kita hatagan sing kusog nga kinahanglan naton agod mabatas ini. Diin man sa sini ang iya himuon, makasalig kita nga buligan kita ni Jehova.
8. Paano naton matigayon ang bulig sang Dios?
8 Paano naton matigayon inang bulig? Talupangda kon ano ang ginlaygay sa aton: ‘Itugyan ninyo sa iya ang tanan ninyo nga kabalaka.’ Nagakahulugan ini nga malaragwayon naton nga itugyan kay Jehova ang salabton para sa tanan naton nga mga ginakabalak-an. Tinguhaan naton nga untatan ang pagkabalaka kag mapailubon nga magsalig sa iya nga atipanon ang aton mga kinahanglanon. (Mat. 6:25-32) Ini nga pagsalig nagakinahanglan sing pagkamapainubuson, nga wala nagasandig sa aton kaugalingon nga kusog kag kaalam. Paagi sa pagpaubos sang aton kaugalingon “sa idalom sang gamhanan nga kamot sang Dios,” ginakilala naton ang aton kubos nga posisyon. (Basaha ang 1 Pedro 5:6.) Sa amo, makabulig ini sa aton nga malandas ang bisan ano nga ginapahanugutan sang Dios. Mahimo nga luyag gid naton madula sa gilayon ang aton mga problema, apang nagasalig kita nga nahibaluan ni Jehova kon san-o ang husto nga tion nga buligan kita kag kon paano ini himuon para sa aton.—Sal. 54:7; Isa. 41:10.
9. Ano nga sahi sang kabudlayan ang kinahanglan itugyan ni David kay Jehova?
9 Dumduma ang ginsiling ni David sa Salmo 55:22: “Itungtung sa GINOO ang imo lulan, kag sia magaalay-ay sa imo; indi sia magtugut nga malingkang ang matarung.” Sang ginsulat ni David ining mga pulong, nagabatyag sia sing daku nga kasisit-an. (Sal. 55:4) Ginhangop nga ini nga salmo ginsulat sang ang iya anak nga si Absalom nagbuko nga agawon sa iya ang pagkahari. Ang pinakamasaligan nga manuglaygay ni David nga si Ahitofel, nagbuylog sa paghimbon. Nabutang pa gani sa katalagman ang kabuhi ni David amo nga nagpalagyo sia gikan sa Jerusalem. (2 Sam. 15:12-14) Bisan sa idalom sining mabudlay gid nga mga kahimtangan, padayon nga nagsalig si David sa Dios, kag wala sia malugaw-an.
10. Ano ang himuon naton kon nagaatubang kita sing mga kasisit-an?
10 Kaangay ni David, importante gid nga magpangamuyo kita kay Jehova sa bisan ano nga kasisit-an nga mahimo maeksperiensiahan naton. Binagbinagon naton ang ginlaygay ni apostol Pablo sa aton. (Basaha ang Filipos 4:6, 7.) Ano ang matabo kon amo sini ka hanuot ang aton pangamuyo? “Ang paghidait sang Dios nga nagalabaw sa tanan nga panghunahuna magabantay sang [aton] tagipusuon kag sang [aton] ikasarang sa paghunahuna paagi kay Cristo Jesus.”
11. Paano “ang paghidait sang Dios” nagaamlig sa aton tagipusuon kag ikasarang sa panghunahuna?
11 Mabag-o bala sang pangamuyo ang imo kahimtangan? Posible. Apang, dapat naton dumdumon nga wala pirme ginasabat ni Jehova ang aton mga pangamuyo suno sa luyag naton. Walay sapayan sini, ginabuligan kita sang pangamuyo nga mahuptan ang pagkabalanse sa panghunahuna agod indi kita madaug sang aton mga kasisit-an. “Ang paghidait sang Dios” makapakalma sa aton kon nagabatyag kita sing tuman nga kalisod. Kaangay sang isa ka tropa sang mga soldado nga gindestino sa isa ka siudad agod amligan ini sa mga pagsalakay, “ang paghidait sang Dios” magaamlig man sa aton tagipusuon kag ikasarang sa panghunahuna. Buligan kita sini nga malandas ang aton mga pangduhaduha, kahadlok, kag negatibo nga mga panghunahuna, kag magapugong ini sa aton nga manghikot sing padasudaso kag sing di-maalamon.—Sal. 145:18.
12. Maghatag sing ilustrasyon kon paano matigayon sang isa ka tawo ang kalinong sa hunahuna.
12 Paano kita makatigayon sing kalinong sa hunahuna kon nagaatubang sing mga kasisit-an? Binagbinaga ang isa ka ilustrasyon nga mahimo kaanggid sang aton kahimtangan. Ayhan ang isa ka empleyado may isa ka mapiguson nga manedyer. Walay sapayan sini, ang empleyado may kahigayunan nga makapabutyag sang iya balatyagon sa tag-iya sang kompanya, nga isa ka maluluy-on kag makatarunganon nga tawo. Ginpasalig sang tag-iya ang empleyado nga nahangpan niya ang sitwasyon kag ginsugid nga sa indi madugay ang manedyer pahalinon na sa iya posisyon. Ano ang batyagon sang empleyado sa sini? Ang pagpati sa sini nga pasalig kag ang ihibalo sang mahanabo sa palaabuton magapabakod sang iya determinasyon nga magpadayon, bisan pa magaatubang sia anay sing pila pa ka mga kabudlayan. Sing kaanggid, nahibaluan naton nga nahangpan ni Jehova ang aton kahimtangan, kag ginapasalig niya kita nga sa indi madugay “ang manuggahom sini nga kalibutan tabugon.” (Juan 12:31) Daw ano gid ina ka makapalig-on nga butang!
13. Dugang pa sa pangamuyo, ano ang dapat naton himuon?
13 Busa, bastante na bala nga basta itugyan naton kay Jehova ang aton mga problema? Indi. May dapat pa kita himuon. Dapat kita manghikot nahisuno sa aton mga pangamuyo. Sang si Hari Saul nagpadala sing tawo sa balay ni David agod patyon sia, si David nangamuyo: “Luwasa ako sa akon mga kaaway, O Dios ko, ipahamtang ako sing mataas sa mga nagatindug batok sa akon, luwasa ako sa mga manughikot sang kalautan, kag luwasa ako sa mga tawo nga makidugoon.” (Sal. 59:1, 2) Dugang pa sa pangamuyo, namati man si David sa iya asawa kag nagpanikasog nga makapalagyo. (1 Sam. 19:11, 12) Sing kaanggid, sarang man kita makapangayo sing praktikal nga kaalam agod mabuligan kita nga malandas kag ayhan mapahaganhagan ang aton mabudlay nga mga kahimtangan.—Sant. 1:5.
Kon Paano Kita Makatigayon sing Kusog nga Makabatas
14. Ano ang makabulig sa aton nga makabatas kon nagaatubang kita sing mga kasisit-an?
14 Ang aton mga kasisit-an mahimo indi gilayon madula. Mahimo pa gani ini magpadayon sa madugaydugay nga tion. Kon amo sini ang aton kahimtangan, ano ang makabulig sa aton nga makabatas? Una, dumdumon naton nga kon magpadayon kita sa pag-alagad kay Jehova walay sapayan sing mga kabudlayan, mapamatud-an naton nga ginahigugma gid naton sia. (Binu. 14:22) Indi pagkalimti ang panumbungon ni Satanas nahanungod kay Job: “Nahadluk bala si Job sa Dios sa wala sing pulus? Wala mo bala sia pagkudali palibut kag sa iya balay kag sa tanan nga iya, sa tagsa ka luyo? Ginpakamaayo mo ang kinabudlayan sang iya mga kamut, kag ang iya pagkabutang nagdugang sa duta. Apang untaya karon ang imo kamut, kag tanduga ang tanan nga iya, kag sikwayon ka niya sa imo nawung.” (Job 1:9-11) Bangod ginhuptan ni Job ang iya integridad, napamatud-an niya nga butig gid inang panumbungon. Paagi sa pagbatas sa idalom sang mabudlay nga mga kahimtangan, mapamatud-an man naton nga butigon si Satanas. Dugang pa, ang aton pagbatas nagapabakod man sang aton paglaum kag pagsalig.—Sant. 1:4.
15. Ano nga mga halimbawa ang makapabakod sa aton?
15 Ikaduha, dumduma nga “ang amo man nga mga pagpaantos ginahimo sa inyo bug-os nga paghiliutod sa kalibutan.” (1 Ped. 5:9) Huo, “wala sing pagsulay nga nagaabot sa inyo luwas sa kon ano ang kinaandan sa mga tawo.” (1 Cor. 10:13) Busa, makatigayon ka sing kusog kag kabakod paagi sa pagpamalandong sa mga halimbawa sang iban sa baylo nga magkonsentrar sa imo kaugalingon nga mga kabudlayan. (1 Tes. 1:5-7; Heb. 12:1) Pamalandungi ang mga halimbawa sang pila nga nagbatas sing matutom walay sapayan sing mabudlay gid nga mga kahimtangan. Nakapanalawsaw ka na bala sing nabalhag nga mga eksperiensia nga kaanggid sa ginaatubang mo? Mapalig-on ka gid sining mga eksperiensia.
16. Paano kita ginapabakod sang Dios kon nagaatubang kita sing nanuhaytuhay nga mga pagtilaw?
16 Ikatlo, dumduma nga si Jehova amo “ang Amay nga may mapinalanggaon nga kaluoy kag ang Dios nga may bug-os nga paglugpay, nga nagalugpay sa aton sa tanan naton nga kapipit-an, agod malugpayan naton ang yara sa bisan ano nga sahi sang kapipit-an paagi sa lugpay nga ginlugpay man sang Dios sa aton.” (2 Cor. 1:3, 4) Daw kaangay ini nga ang Dios yara sa tupad naton nga nagapalig-on kag nagapabakod sa aton, indi lamang sa kapipit-an nga ginaatubang naton karon kundi “sa tanan naton nga kapipit-an.” Sa amo, mabuligan kita sini nga palig-unon man ang iban “sa bisan ano nga sahi sang kapipit-an.” Naeksperiensiahan mismo ni Pablo ang pagkamaminatud-on sining mga pulong.—2 Cor. 4:8, 9; 11:23-27.
17. Paano ang Biblia makabulig sa aton nga maatubang ang mga kasisit-an sa kabuhi?
17 Ikap-at, yara ang Pulong sang Dios, ang Biblia, nga “mapuslanon . . . sa pagpanudlo, sa pagsabdong, sa pagtadlong sa mga butang, sa pagdisiplina sa pagkamatarong, agod ang tawo sang Dios may ikasarang gid, kag nasangkapan sing bug-os para sa tagsa ka maayong buhat.” (2 Tim. 3:16, 17) Ang Pulong sang Dios wala lamang nagahimo sa aton nga “may ikasarang” kag “nasangkapan . . . sa tagsa ka maayong buhat.” Nagabulig man ini sa aton nga malandas ang mga kasisit-an sa kabuhi. Ginahimo kita sini nga “may ikasarang gid” kag “nasangkapan sing bug-os.” Sa orihinal nga lenguahe, ang tinaga nga ginbadbad “nasangkapan sing bug-os” literal nga nagakahulugan sing “kompleto sing kasangkapan.” Sa dumaan nga mga tion, ini nga tinaga mahimo nagapatuhoy sa sakayan nga kompleto na sing mga kasangkapan para sa pagpanakayon ukon sa isa ka makina nga makapanghikot na suno sa ginapaabot sa sini. Sing kaanggid, ginaamanan kita ni Jehova paagi sa iya Pulong, sang tanan naton nga kinahanglanon agod malandas ang bisan ano nga kabudlayan nga maatubang naton. Sa amo makasiling kita, “Kon ginapahanugutan ini sang Dios, masarangan ko ini paagi sa iya bulig.”
Kaluwasan Gikan sa Tanan Naton nga Kasisit-an
18. Sa ano kita dapat magkonsentrar agod makabatas sing matutom?
18 Ikalima, magkonsentrar pirme sa dalayawon nga katunayan nga sa indi madugay dulaon na ni Jehova ang tanan nga kasisit-an. (Sal. 34:19; 37:9-11; 2 Ped. 2:9) Labaw sa tanan, ang pagluwas sang Dios sa aton wala lamang nagakahulugan sing kaluwasan gikan sa ginaatubang naton karon nga mga kasisit-an kundi may kahigayunan man kita nga maagom ang kabuhi nga walay katapusan, sa langit man upod kay Jesus ukon sa paraiso nga duta.
19. Ngaa posible ang pagbatas sing matutom?
19 Samtang wala pa ina, padayon kita nga magaatubang sing mga kasisit-an sa sining malaut nga kalibutan. Hanuot gid naton nga handum nga madula ining mga kasisit-an! (Sal. 55:6-8) Dumdumon naton nga ang aton matutom nga pagbatas nagapamatuod nga butigon ang Yawa. Kabay nga magtigayon kita sing kusog gikan sa aton mga pangamuyo kag sa aton Cristianong paghiliutod, nga ginadumdom nga ang aton mga kauturan ginatilawan man kaangay naton. Magpadayon nga may ikasarang gid kag nasangkapan sing bug-os paagi sa paggamit sing maayo sang Pulong sang Dios. Indi pagtuguti nga magluya ang imo pagsalig sa “Dios nga may bug-os nga paglugpay.” Dumduma nga “ang mga mata sang GINOO yara nayon sa mga matarung, kag ang iya mga idulungug bukas sa pagtuaw nila.”—Sal. 34:15.
Masabat Mo Bala?
• Ano ang ginbatyag ni David sa mga kasisit-an nga iya gin-atubang?
• Ano nga pagsalig ang ginpabutyag ni Hari Solomon?
• Ano ang makabulig sa aton nga malandas ang bisan ano nga ginapahanugutan ni Jehova?
[Mga Pamangkot sa Pagtinuon]
[Piktyur sa pahina 13]
Nagsalig si Solomon nga buligan ni Jehova ang Iya nasit-an nga katawhan
[Piktyur sa pahina 15]
Gintugyan ni David ang iya lulan kay Jehova sa pangamuyo kag nanghikot sia suno sa iya pangamuyo
