Ang Pag-asawahay kag Pagkaginikanan sa Sining Tion sang Katapusan

“Malip-ot na lang ang nabilin nga tion.”​—1 COR. 7:29.

1. (a) Ano nga mga pagbag-o karon ang nalakip sa mga butang nga “mabudlay atubangon”? (b) Ngaa ginakabalak-an naton ang nagabag-o nga mga prinsipio sa pamilya?

GINTAGNA sang Pulong sang Dios nga sa “tion sang katapusan” may mga inaway, linog, gutom, kag mga peste. (Dan. 8:17, 19; Luc. 21:10, 11) Nagpaandam man ang Biblia nga sa sining makahalanguyos nga tion magabag-o sing daku ang batasan sang mga tawo. Ang kagamo sa pamilya amo ang isa sa mga butang nga “mabudlay atubangon” sa sining “katapusan nga mga adlaw.” (2 Tim. 3:1-4) Ngaa ginakabalak-an naton ini nga mga pagbag-o? Bangod tuman ini ka lapnag kag mahimo gid nga makaimpluwensia ini sa aton pagtamod sa pag-asawahay kag pagkaginikanan. Paano?

2. Ano ang pagtamod sang kalabanan nga tawo sa pag-asawahay kag diborsio?

² Ang pagdiborsio karon lapnag kag mahapos lang himuon. Ang kadamuon sang nagadiborsio  sa madamo nga pungsod nagadugang. Apang, dapat naton dumdumon nga ang pagtamod ni Jehova nga Dios sa pag-asawahay kag diborsio tuhay sa pagtamod sang kalabanan nga tawo sa aton palibot. Kon amo, ano ang pagtamod ni Jehova?

3. Ano ang pagtamod ni Jehova kag ni Jesucristo sa pag-asawahay?

³ Ginapaabot ni Jehova nga Dios nga mag-unungay ang mag-asawa suno sa ila ginsumpaan sa kasal. Sang ginhiusa niya ang una nga lalaki kag babayi sa pag-asawahay, nagsiling si Jehova nga ang “lalaki . . . magahiusa sa iya asawa, kag mangin-isa sila ka unud.” Ginsulit ini ni Jesucristo kag nagsiling pa sia: “Gani, ang gintingob sang Dios indi pagbulagon sang tawo.” Nagsiling pa si Jesus: “Ang bisan sin-o nga magdiborsio sa iya asawa, luwas lamang kon nakighilawas ang iya asawa, kag magpangasawa sang iban nagapanghilahi.” (Gen. 2:24; Mat. 19:3-6, 9) Gani, ginatamod ni Jehova kag ni Jesus ang pag-asawahay subong isa ka tubtob-buhi nga pag-updanay kag mangin hilway lamang ang isa kon mapatay ang iya tiayon. (1 Cor. 7:39) Sanglit ang pag-asawahay isa ka sagrado nga kahimusan, ang pagdiborsio isa ka serioso nga butang. Ang Pulong sang Dios nagasiling nga ginadumtan ni Jehova ang pagdiborsio kon ang rason indi suno sa Kasulatan. *​—Basaha ang Malaquias 2:13-16; 3:6.

Responsable nga Bana kag Asawa

4. Ngaa naghinulsol ang pila ka pamatan-on nga Cristiano nga nagpadalidali sa pagminyo?

⁴ Ang di-diosnon nga kalibutan nga aton ginapuy-an nagasalimuang sa sekso. Kada adlaw, makita mo bisan diin lang ang nagapukaw-balatyagon nga mga talan-awon. Indi naton mapasapayanan ang epekto sini sa aton, ilabi na sa aton pinalangga nga mga pamatan-on sa kongregasyon. Ano ang himuon sang pamatan-on nga mga Cristiano sa sining di-maayo nga impluwensia, nga makapukaw sang kailigbon sa sekso bisan pa batok ini sa ila buot? Ang iban nagaminyo bisan tuman pa sila ka lamharon agod malikawan kuno ang paghimo sing seksuwal nga imoralidad. Apang, wala madugayi kag ginahinulsulan sang iban ang amo nga desisyon. Ngaa? Sa tion nga mag-ugdaw na ang kakunyag sa bag-o lang nga pagminyo, mahisayran nila nga indi gali sila bagay. Gani, ang mag-asawa nagaatubang sa mabug-at nga problema.

5. Ano ang makabulig sa mga mag-asawa nga mangin matutom sa ila ginsumpaan sa kasal? (Tan-awa man ang nota sa ubos.)

⁵ Mabudlay gid kon ang tawo nga ginpakaslan mo, bisan pa Cristiano sia, tuhay gali sa imo ginapaabot. (1 Cor. 7:28) Apang, bisan ano pa kabudlay sang kahimtangan, nahibaluan sang matuod nga mga Cristiano nga ang pagbulagay nga wala sing basihan sa Kasulatan indi amo ang solusyon sa di-malipayon nga pag-upod. Gani, ang mga mag-asawa nga nagapanikasog gid nga mag-unungay suno sa ila ginsumpaan sa kasal dapat tahuron kag buligan sang Cristianong kongregasyon. *

6. Ano dapat ang pagtamod sang pamatan-on nga mga Cristiano sa pagminyo?

⁶ Lamharon ka pa bala kag di-minyo? Kon amo, ano ang pagtamod mo sa pagminyo? Malikawan mo ang daku nga kasakit kon maghulat ka tubtob handa ka na sa pisikal, mental kag espirituwal antes ka mangaluyag sa isa ka Cristiano. Matuod, wala ginasambit sa Biblia kon pila gid ang edad sang isa ka tawo antes sia magminyo. * Apang ginapakita sang Biblia nga dapat ka maghulat  tubtob nga lampas ka na sa tion nga ang seksuwal nga balatyagon tuman kabaskog. (1 Cor. 7:36) Ngaa? Bangod ang mabaskog nga seksuwal nga balatyagon makapatiko sa imo maayo nga pagtamod kag makahimo ka sing di-maalamon nga mga desisyon nga mahimo magresulta sa kasakit sa ulihi. Dumduma nga ang maalamon nga mga laygay ni Jehova tuhoy sa pag-asawahay nga yara sa Biblia para sa imo kaayuhan kag kalipay.​—Basaha ang Isaias 48:17, 18.

Responsable nga mga Ginikanan

7. Ano ang naeksperiensiahan sang pila ka pamatan-on nga mag-asawa, kag ngaa makaapektar ini sa ila pag-asawahay?

⁷ Ang iban nga mga pamatan-on nangin mga ginikanan na bangod temprano pa sila nagminyo. Wala pa gani sila magkilalahay sing maayo, may bata na sila nga alatipanon sa bug-os nga adlaw. Natural lamang nga ang halos tanan nga tion sang iloy yara na lang sa bata, amo nga mahimo mangimon ang bana. Isa pa, ang pagpulaw sa pag-atipan sa lapsag mahimo tunaan sang pag-away sang mag-asawa. Marealisar sang pamatan-on nga mag-asawa nga indi na sila makapagusto sa luyag nila himuon. Indi na sila makapamasyar sa iban nga mga lugar kag indi na nila mahimo ang mga butang nga ginahimo nila sang wala pa sila sing bata. Paano nila dapat tamdon ang pagbag-o sang ila kahimtangan?

8. Ano ang dapat nga pagtamod sa pagkaginikanan, kag ngaa?

⁸ Subong nga dapat tungdan sang mag-asawa ang mga salabton sa pag-asawahay, dapat man nila tamdon ang pagkaginikanan subong isa ka responsibilidad kag pribilehiyo nga gikan sa Dios. Kon may bata na ang Cristianong mag-asawa, magabag-o ang ila pagsinalayo. Dapat nila himuon ang ila bug-os nga masarangan agod pasibuon ang ila kabuhi sa sini nga pagbag-o. Sanglit si Jehova ang naghatag sa mga tawo sang ikasarang sa pagpanganak, dapat tamdon sang mga ginikanan ang bag-ong bun-ag nga lapsag subong “panublion gikan sa GINOO.” (Sal. 127:3) Dapat panikasugan sang Cristianong iloy kag amay nga tungdan ang ila responsibilidad subong “mga ginikanan nga nahiusa sa Ginuo.”​—Efe. 6:1.

9. (a) Ano ang nadalahig sa pagpadaku sa bata? (b) Ano ang himuon sang bana agod mabuligan ang iya asawa nga mahuptan ang mabakod nga kaangtanan sa Dios?

⁹ Ang pagpadaku sa bata nagadalahig sang tinuig nga pagsakripisyo. Nagakinahanglan ini sang daku gid nga tion kag kusog sang mga ginikanan. Dapat mahangpan sang Cristianong bana nga sa sulod sang pila ka tuig pagkatapos mabun-ag ang ila bata, mahimo gid nga matublag ang iya asawa sa mga miting sa kongregasyon. Mahimo nga kulang ang iya tion sa pagtuon sa Biblia kag pagpamalandong. Bangod sini, mahimo nga magluya ang iya kaangtanan sa Dios. Ang responsable nga bana nagabulig sa paglibang sa bata tubtob masarangan niya. Ginabinagbinag niya upod sa iya asawa ang mga punto nga mahimo nawasi sang iya asawa sa mga miting. Nagabulig man sia sa  paglibang sa bata agod makapakigbahin ang iya asawa sa pagbantala sing Ginharian.​—Basaha ang Filipos 2:3, 4.

10, 11. (a) Paano ginapadaku ang kabataan sa “nagatuytoy nga panghunahuna ni Jehova”? (b) Ngaa madamo nga Cristianong ginikanan ang nagakadapat hatagan sing komendasyon?

¹⁰ Ang responsable nga mga ginikanan wala lamang nagaaman sa bata sing kalan-on, panapton, puluy-an, kag sing pag-atipan sa iya kapagros. Dapat matun-an sang mga anak bisan bata pa sila ang moral nga mga prinsipio nga dapat sundon, ilabi na sa sining makatalagam nga tion sang katapusan. Dapat padakuon ang kabataan “sa disiplina kag nagatuytoy nga panghunahuna ni Jehova.” (Efe. 6:4) Ining “nagatuytoy nga panghunahuna” nagadalahig sang pagpatudok sing panghunahuna ni Jehova sa hunahuna sang bata kutob sa iya pagkalapsag tubtob sa iya pagkatin-edyer.​—2 Tim. 3:14, 15.

¹¹ Sang ginsilingan ni Jesus ang iya mga sumulunod nga “maghimo sang mga disipulo sa mga tawo sang tanan nga pungsod,” buot man niya silingon nga dapat buligan sang mga ginikanan ang ila kabataan nga mangin mga disipulo. (Mat. 28:19, 20) Mabudlay ini bangod sang mabaskog nga impluwensia sang kalibutan karon sa mga pamatan-on. Gani, nagakadapat gid hatagan sing mahigugmaon nga komendasyon sang tanan sa kongregasyon ang mga ginikanan nga nagmadinalag-on sa pagpadaku sa ila kabataan nga mangin dedikado nga mga Cristiano. Nadaug nila ang impluwensia sang kalibutan paagi sa ila pagtuo kag katutom subong responsable nga mga ginikanan.​—1 Juan 5:4.

Di-minyo Ukon Wala sing Anak Tungod sa Dungganon nga Katuyuan

12. Ngaa namat-od ang pila ka Cristiano nga indi anay magminyo sa sulod sang pila ka tuig?

¹² Sanglit “malip-ot na lang ang nabilin nga tion” kag “ang danyag sini nga kalibutan nagabag-o,” ginapalig-on kita sang Pulong sang Dios nga binagbinagon ang mga bentaha sang pagkadiminyo. (1 Cor. 7:29-31) Gani, namat-od ang pila ka Cristiano nga magpabilin nga di-minyo sa bug-os nila nga kabuhi, indi gani namat-od sila nga indi anay magminyo sa sulod sang pila ka tuig. Dalayawon nga wala nila ginkalitan ang pagkadiminyo sa paghingamo sing makagod nga mga tulumuron. Madamo ang nagpabilin nga di-minyo agod alagaron si Jehova nga “wala sing tublag.” (Basaha ang 1 Corinto 7:32-35.) Ang iban nga di-minyo nga mga Cristiano nagapayunir ukon nagaalagad sa Bethel. Ang iban nagatinguha nga magpagamit pa sing labi sa organisasyon ni Jehova paagi sa pag-eskwela sa Ministerial Training School. Ang nag-alagad subong bug-os tion nga mga ministro sing malawiglawig samtang di-minyo kag sang ulihi namat-od nga magminyo masami nagabatyag nga mapuslanon gihapon sa ila pag-asawahay ang natun-an nila nga mga leksion sadtong di-minyo pa sila.

13. Ngaa ang pila ka Cristianong mag-asawa namat-od nga indi magbata?

¹³ Sa iban nga bahin sang kalibutan, madamo nga mag-asawa karon ang namat-od nga indi magbata. Ginahimo ini  sang iban bangod sang kapigaduhon; ang iban naman bangod luyag nila mangin madinalag-on sa ila karera. May mga mag-asawa man nga mga Cristiano nga namat-od nga indi magbata. Apang, masami nga ginahimo nila ini agod indi sila mabug-atan sa pag-alagad kay Jehova. Indi buot silingon nga indi normal ang kabuhi sining mga mag-asawa. Apang, handa sila nga unahon ang hilikuton sang Ginharian sangsa pila ka pagpakamaayo nga mahatag sang pag-asawahay. (1 Cor. 7:3-5) Ang iban sini nga mga mag-asawa nagaalagad kay Jehova kag sa ila mga kauturan sa sirkito kag distrito nga hilikuton ukon sa Bethel. Ang iban mga payunir ukon mga misyonero. Indi malimtan ni Jehova ang ila hilikuton kag ang gugma nga ginapakita nila para sa iya ngalan.​—Heb. 6:10.

‘Kapipit-an sa Unod’

14, 15. Ano nga “kapipit-an sa ila unod” ang mahimo maeksperiensiahan sang Cristianong mga ginikanan?

¹⁴ Ginsilingan ni apostol Pablo ang minyo nga mga Cristiano nga “may kapipit-an [sila] sa ila unod.” (1 Cor. 7:28) Mahimo nagalakip ini sang pagbalatian sang mag-asawa, sang ila kabataan, ukon sang ila tigulang na nga mga ginikanan. Nagalakip man ini sang kabudlayan kag kasakit bangod sa pagpadaku sa ila kabataan. Subong sang nasambit na sa umpisa sini nga artikulo, gintagna sang Biblia nga “sa katapusan nga mga adlaw magaabot ang makahalanguyos nga mga tion nga mabudlay atubangon.” Lakip sa mga butang nga mabudlay atubangon amo ang mga kabataan nga “di-matinumanon sa mga ginikanan.”​—2 Tim. 3:1-3.

¹⁵ Ang pagpadaku sa mga kabataan isa gid ka hangkat sa Cristianong mga ginikanan. Mahimo kita maapektuhan sang indi maayo nga mga resulta sang “makahalanguyos nga tion” karon. Gani, ang Cristianong mga ginikanan padayon nga nagapakig-away batok sa makamamatay nga impluwensia sang “sistema sang mga butang sini nga kalibutan” sa ila kabataan. (Efe. 2:2, 3) Kag ang pagpakig-away indi pirme madinalag-on! Kon ang anak sang Cristianong pamilya mag-untat sa pag-alagad kay Jehova, isa gid ini ka “kapipit-an” sa mga ginikanan nga nagtinguha sa pagpadaku sa iya sa kamatuoran.​—Hulu. 17:25.

“May Dakung Kapipit-an”

16. Ano nga “kapipit-an” ang gintagna ni Jesus?

¹⁶ Apang, ang bisan ano nga “kapipit-an” nga dala sang pag-asawahay kag pagpanganak malabawan pa sang isa ka mas daku gid nga kapipit-an. Sa tagna ni Jesus tuhoy sa iya presensia kag sa katapusan sang sistema sang mga butang, nagsiling sia: “May dakung kapipit-an, nga ang subong sini wala pa mahanabo kutob sa ginsuguran sang kalibutan tubtob karon, wala, kag indi na gid mahanabo liwat.” (Mat. 24:3, 21) Nagsiling si Jesus nga ang dakung kadam-an makalampuwas sa sining “dakung kapipit-an.” Apang, indi pagluatan sang sistema ni Satanas ang mahidaiton nga mga Saksi ni Jehova tubtob sa ila katapusan nga pagsalakay. Mangin mabudlay gid ini nga tion para sa aton tanan, bata man ukon may edad na.

17. (a) Ngaa makalaum kita sa palaabuton nga may pagsalig? (b) Ano ang makaimpluwensia sa aton pagtamod sa pag-asawahay kag pagkaginikanan?

¹⁷ Apang, indi naton dapat kahadlukan ang palaabuton. Makalaum ang mga ginikanan nga amligan sila ni Jehova upod ang ila magagmay nga kabataan kon matutom sila. (Basaha ang Isaias 26:20, 21; Sof. 2:2, 3; 1 Cor. 7: 14) Samtang wala pa ini, bangod nahibaluan naton nga nagakabuhi kita sa makahalanguyos nga mga tion, kabay nga mangin responsable kita sa aton pagtamod sa pag-asawahay kag pagkaginikanan sa sining tion sang katapusan. (2 Ped. 3:10-13) Nian, di-minyo man kita ukon minyo, may kabataan ukon wala, makapadungog kita kag makadayaw kay Jehova kag sa Cristianong kongregasyon.

[Mga footnote]

Bilang Repaso

• Ngaa indi dapat magpadalidali sa pagminyo ang pamatan-on nga mga Cristiano?

• Ano ang nadalahig sa pagpadaku sa bata?

• Ngaa madamo nga Cristiano ang nagpabilin nga di-minyo, kag kon minyo man, ngaa wala sila nagbata?

• Ano nga “kapipit-an” ang mahimo maeksperiensiahan sang Cristianong mga ginikanan?

[Mga Pamangkot sa Pagtinuon]

[Piktyur sa pahina 17]

Ngaa maalamon nga indi anay magminyo ang pamatan-on nga mga Cristiano tubtob nga hamtong na sila?

[Piktyur sa pahina 18]

Daku ang mabulig sang bana agod makapakigbahin ang iya asawa sa espirituwal nga mga hilikuton

[Piktyur sa pahina 19]

Ngaa ang iban nga Cristianong mag-asawa namat-od nga indi magbata?