Kinahanglan Naton ang Pagtuytoy sang Dios sa Tanan nga Butang

“Ini amo ang Dios, ang aton Dios sa gihapon kag sa gihapon. Sia mangin-aton tuytuy nga dayon.”​—SAL. 48:14.

1, 2. Ngaa pagtuytoy ni Jehova ang dapat naton sundon sa baylo nga magsalig kita sa aton kaalam, kag ano nga mga pamangkot ang nagautwas?

SA PAGBINAGBINAG sang mga butang nga walay pulos ukon makahalalit, mahapos kita madaya. (Hulu. 12:11) Kon may luyag gid kita himuon nga indi nagakaigo para sa isa ka Cristiano, masami nga nagapangita gid sing medyos ang aton tagipusuon nga mahaylo kita. (Jer. 17:5, 9) Gani, maalamon ang salmista sang mangamuyo sia kay Jehova: “Ipadala ang imo kapawa kag ang imo kamatooran. Patuytuya sila sa akon.” (Sal. 43:3) Nagsalig sia kay Jehova, indi sa iya limitado lamang nga kaalam, kag wala na sing maayo pa sa pagtuytoy ni Jehova. Kaangay sang salmista, makabenepisyo gid kita kon mangayo kita sing tuytoy sa Dios.

² Apang, ngaa dapat kita magsalig nga ang pagtuytoy ni Jehova amo ang labing maayo? San-o kita  dapat mangayo sa iya sing pagtuytoy? Ano nga mga kinaiya ang palambuon naton agod makabenepisyo kita sa iya pagtuytoy, kag paano niya kita ginatuytuyan karon? Binagbinagon sini nga artikulo ining importante nga mga pamangkot.

Ngaa Dapat Saligan ang Pagtuytoy ni Jehova?

3-5. Ano ang mga rason kon ngaa makasalig gid kita sa pagtuytoy ni Jehova?

³ Si Jehova ang aton langitnon nga Amay. (1 Cor. 8:6) Kilala gid niya ang tagsa sa aton kag mabasa niya ang aton tagipusuon. (1 Sam. 16:7; Hulu. 21:2) Nagsiling si Hari David sa Dios: “Nakilala mo ang akon paglingkod kag ang akon pagtindug; nahangpan mo kutub sa malayo ang akon hunahuna. Kay wala sing polong sa akon dila, kondi, yari karon, O GINOO, ikaw nakahibalo sini sing bug-os.” (Sal. 139:2, 4) Sanglit kilala gid kita ni Jehova, ngaa magduhaduha pa kita nga nahibaluan niya kon ano ang labing maayo para sa aton? Isa pa, si Jehova ang labing maalam sa tanan. Indi kaangay sang tawo, makita niya ang kabug-usan sang tanan nga butang, kag halin sa umpisa, nahibaluan niya kon ano ang mangin katapusan sang mga butang. (Isa. 46:9-11; Roma 11:33) Sia “Dios, nga amo lamang ang maalam.”​—Roma 16:27.

⁴ Dugang pa, ginahigugma kita ni Jehova kag kaayuhan naton ang ginaulikdan niya pirme. (Juan 3:16; 1 Juan 4:8) Subong mahigugmaon nga Dios, maalwan sia sa aton. Nagsulat si disipulo Santiago: “Ang tagsa ka maayong dulot kag tagsa ka himpit nga regalo gikan sa hitaas, kay nagagikan ini sa Amay sang langitnon nga mga kapawa.” (Sant. 1:17) Makabenepisyo gid kita sa kaalwan sang Dios kon sia ang magtuytoy sa aton.

⁵ Labing Gamhanan man si Jehova. Tuhoy sini, ang salmista nagsiling: “Ang bisan sin-o nga nagapuyo sa tago nga duog sang Labing Mataas makasapo sang iya dalayunan sa idalom sang landong sang Labing Gamhanan. Magasiling ako kay Jehova: ‘Ikaw ang akon dalangpan kag ang akon kuta, ang akon Dios, nga akon ginasaligan.’” (Sal. 91:1, 2, NW) Kon sundon naton ang pagtuytoy ni Jehova, nagadangop kita sa Dios nga indi gid mapaslawan. Bisan kon may mamatok sa aton, mabuligan kita ni Jehova. Indi niya kita pagpabay-an. (Sal. 71:4, 5; basaha ang Hulubaton 3:19-26.) Huo, nahibaluan ni Jehova kon ano ang labing maayo para sa aton. Amo sini ang luyag niya nga matigayon naton kag may gahom sia nga ihatag ini. Binuang gid kon sikwayon pa naton ang iya pagtuytoy! Apang, san-o naton kinahanglan ini nga pagtuytoy?

San-o Naton Kinahanglan ang Pagtuytoy?

6, 7. San-o naton kinahanglan ang pagtuytoy ni Jehova?

⁶ Sa pagkamatuod, kinahanglan naton ang pagtuytoy ni Jehova sa aton bug-os nga kabuhi, halin sa aton pagkabata tubtob sa aton pagtigulang. Nagsiling ang salmista: “Ini amo ang Dios, ang aton Dios sa gihapon kag sa gihapon. Sia mangin-aton tuytuy nga dayon.” (Sal. 48:14) Kaangay sang salmista, nagatinguha pirme ang mga Cristiano nga matigayon ang pagtuytoy sang Dios.

⁷ Sa pagkamatuod, may mga tion nga kinahanglan  gid naton ang bulig. Kon kaisa, nagaantos kita sing “kalisdanan,” ayhan ginahingabot kita, may malubha nga balatian, ukon hinali nga nadulaan sing obra. (Sal. 69:16, 17) Sa subong sini nga mga tion, makalulugpay nga sarang kita makadangop kay Jehova, upod ang pagsalig nga pabakuron niya kita agod makabatas kag tuytuyan niya kita nga makahimo sing maayo nga mga desisyon. (Basaha ang Salmo 102:17.) Apang, indi lamang sa sini nga mga tion nga kinahanglan naton ang iya bulig. Halimbawa, antes kita makighambal sa aton mga isigkatawo tuhoy sa maayong balita sang Ginharian, kinahanglan naton ang pagtuytoy ni Jehova agod mangin epektibo ang aton pagpanaksi. Kag sa kada tion nga may desisyon kita nga himuon​—ayhan tuhoy sa kalingawan, pagpamayo kag pagpamustura, pagpakig-upod, obra, edukasyon, ukon bisan ano pa—​mangin maalamon lamang kita kon sundon naton ang pagtuytoy ni Jehova. Ang matuod, kinahanglan nga tuytuyan kita sa tanan nga aspekto sang aton kabuhi.

Ang mga Katalagman Kon Sikwayon Naton ang Pagtuytoy sang Dios

8. Ano ang ginapahangop sang ginkaon ni Eva ang ginadumilian nga prutas?

⁸ Apang, dumduma nga dapat naton sundon ang pagtuytoy ni Jehova sing kinabubut-on. Wala nagapamilit ang Dios kon indi naton luyag. Ang una nga tawo nga nangindi sa pagtuytoy ni Jehova amo si Eva, kag ginapakita sang iya halimbawa kon daw ano ka makatalagam ining sayop nga desisyon. Hunahunaa man ang ginapahangop sang ginhimo ni Eva. Ginkaon ni Eva ang ginadumilian nga prutas bangod luyag niya ‘manginkaangay sang Dios, nga nakakilala sang maayo kag malaut.’ (Gen. 3:5) Sa paghimo sini, ginbutang niya ang iya kaugalingon sa lugar sang Dios, kag sia na ang nagdesisyon kon ano ang maayo kag malaut sa baylo nga sundon ang panuytoy ni Jehova. Sa amo, ginsikway niya ang pagkasoberano ni Jehova. Luyag ni Eva nga sia ang mangin agalon sang iya kaugalingon. Ang iya bana nga si Adan nagrebelde man.​—Roma 5:12.

9. Ano ang mangin kahulugan kon sikwayon naton ang pagtuytoy ni Jehova, kag ngaa indi gid ini maalamon?

⁹ Kon indi naton karon pagsundon ang pagtuytoy ni Jehova, magakahulugan ini nga kaangay sang ginhimo ni Eva, wala man naton ginakilala ang iya pagkasoberano. Binagbinaga, halimbawa, ang isa nga nakatuon sang bisyo sa pagtan-aw sing pornograpiya. Kon katapo sia sang Cristiano nga kongregasyon, nahibaluan niya ang panuytoy ni Jehova bahin sini. Ang di-matinlo nga mga butang indi dapat sambiton man lang, gani labi na nga indi dapat tan-awon ini nga may kakunyag. (Efe. 5:3) Sa pagsikway sa panuytoy ni Jehova, ginapanghiwala sini nga tawo ang pagkasoberano ni Jehova kag ginasikway niya ang Iya pagkaulo. (1 Cor. 11:3) Indi gid ini maalamon, kay siling ni Jeremias, “wala sa tawo nga nagalakat [ang] pagmando sang iya mga tikang.”​—Jer. 10:23.

10. Ngaa dapat kita mangin responsable sa paggamit sang aton kahilwayan sa pagdesisyon?

¹⁰ Mahimo indi mag-ugyon ang iban sa ginsiling ni Jeremias, kay nagapangatarungan sila nga sanglit ang Dios ang naghatag sa aton sing kahilwayan sa pagdesisyon, indi niya kita dapat pagsabdungon bangod gingamit naton ini. Apang, indi pagkalimti nga ang kahilwayan sa pagdesisyon indi lamang isa ka regalo kundi isa man ka responsibilidad. Manabat kita sa Dios kon ano ang ihambal kag himuon naton. (Roma 14:10) Nagsiling si Jesus: “Gikan sa kabuganaan sang tagipusuon nagahambal ang baba.” Nagsiling man sia: “Gikan sa tagipusuon nagagikan ang malaut nga pangatarungan, pagpatay, panghilahi, pagpakighilawas, pagpangawat, di-matuod nga pagpanaksi, pagpasipala.” (Mat. 12:34; 15:19) Busa, ginapakita sang aton ginahambal kag ginahimo kon ano ang yara sa aton tagipusuon. Ginapakita sini kon ano gid kita. Amo kon ngaa maalam ang isa ka Cristiano kon nagatinguha sia nga matigayon ang panuytoy ni Jehova sa bisan ano nga ginahimo niya. Nian, masapwan sia ni Jehova nga ‘matadlong sa iya tagiposoon’ kag ‘magahimo sia sing maayo’ sa iya.​—Sal. 125:4.

11. Ano ang matun-an naton sa kasaysayan sang Israel?

 ¹¹ Dumduma ang kasaysayan sang Israel. Sang maghimo sing husto nga mga desisyon ang mga Israelinhon paagi sa pagtuman sa mga sugo ni Jehova, gin-amligan sila ni Jehova. (Jos. 24:15, 21, 31) Apang, masunson nga wala nila gingamit sing husto ang ila kahilwayan sa pagdesisyon. Sang adlaw ni Jeremias, nagsiling si Jehova tuhoy sa ila: “Wala sila magpamati ukon maglingig sang ila igdulungog, kundi naglakat sila suno sa katig-a sang ila malaut nga tagipusuon, amo kon ngaa paatras sila kag indi paabante.” (Jer. 7:24-26, NW) Makapasubo gid! Kabay nga indi gid matabo sa aton nga bangod sang katig-a sang aton tagipusuon ukon pagpatuyang sa kaugalingon, sikwayon naton ang pagtuytoy ni Jehova kag mangin ‘paatras kag indi paabante’ ang aton paglakat!

Ano ang Kinahanglanon sa Pagsunod sa Laygay sang Dios?

12, 13. (a) Bangod sa ano nga kinaiya nga luyag naton sundon ang pagtuytoy ni Jehova? (b) Ngaa kinahanglan ang pagtuo?

¹² Bangod ginahigugma naton si Jehova, luyag naton sundon ang iya panuytoy. (1 Juan 5:3) Apang, may ginsambit pa si Pablo nga kinahanglan man naton sang magsiling sia: “Nagalakat kita paagi sa pagtuo, indi paagi sa panulok.” (2 Cor. 5:6, 7) Ngaa importante ang pagtuo? Ginatuytuyan kita ni Jehova sa “mga banas sang pagkamatarung,” apang ini nga mga banas wala nagapadulong sa manggad ukon posisyon sa kalibutan karon. (Sal. 23:3) Bangod sini, ang aton mata sang pagtuo dapat nasentro sa walay tupong nga espirituwal nga mga padya nga matigayon naton kon mag-alagad kita kay Jehova. (Basaha ang 2 Corinto 4:17, 18.) Makabulig man ang pagtuo agod mangin kontento kita sa kinahanglanon lamang nga materyal nga mga butang.​—1 Tim. 6:8.

¹³ Ginpakita ni Jesus nga ang matuod nga pagsimba nagadalahig sang pagsakripisyo sang kaugalingon, nga nagakinahanglan sing pagtuo. (Luc. 9:23, 24) Ang iban sang matutom nga mga Cristiano nakahimo sing daku nga mga sakripisyo. Nagbatas sila sing kaimulon, pagpamigos, pag-ihig-ihig, kag sing mabudlay nga paghingabot. (2 Cor. 11:23-27; Bug. 3:8-10) Nabatas nila ini nga may kalipay bangod mabakod ang ila pagtuo. (Sant. 1:2, 3) Kon mabakod ang aton pagtuo, kompiansa gid kita nga ang pagsunod sa pagtuytoy ni Jehova amo pirme ang labing maayo. Para ini pirme sa aton dayon nga kaayuhan. Wala gid kita nagaduhaduha nga kon magbatas kita nga may katutom sa Dios, ang padya sini labaw gid sa bisan anong umalagi lamang nga pag-antos.​—Heb. 11:6.

14. Ngaa kinahanglan nga magpaubos si Hagar?

¹⁴ Binagbinaga man kon daw ano ka importante ang pagkamapainubuson sa pagsunod sa pagtuytoy ni Jehova. Makita ini sa halimbawa ni Hagar, ang suluguon ni Sara. Sang indi makabata si Sara, ginhatag niya si Hagar kay Abraham, kag nagbusong si Hagar. Nian, nangin arogante si Hagar sa iya baog nga agalon. Subong resulta, ‘ginpakahuy-an’ ni Sara si Hagar amo kon ngaa nalagyo sia. Ginkadtuan sang anghel ni Jehova si Hagar kag ginsingganan: “Magbalik ka sa imo agalon nga babayi, kag magpaubos ka sa idalom sang iya kamot.” (Gen. 16:2, 6, 8, 9, NW) Mahimo nga tuhay nga panuytoy ang luyag sundon ni Hagar sadto. Apang, agod masunod niya ang ginsiling sang anghel, indi sia dapat mangin arogante. Gani, mapainubuson nga ginsunod niya ang ginsiling sang anghel, amo kon ngaa ang iya anak nga si Ismael natawo nga maayo ang kahimtangan sa poder sang iya amay.

15. Ilaragway ang pila ka kahimtangan nga agod masunod naton ang pagtuytoy ni Jehova dapat kita magpaubos.

¹⁵ Agod masunod naton ang pagtuytoy ni Jehova, mahimo nga dapat man kita magpaubos. Mahimo dapat batunon sang iban ang pagtamod nga ang kalingawan  nga naluyagan nila indi kalahamut-an kay Jehova. Mahimo nga nasaklaw sang isa ka Cristiano ang isa ka utod kag dapat sia mangayo sing pasaylo. Ukon ayhan nagsala sia kag dapat niya batunon ini. Ano kon nakahimo ang isa sing mabug-at nga sala? Dapat sia magpaubos kag magtu-ad sa mga gulang. Mahimo nga ma-disfellowship sia. Agod batunon sia liwat sang kongregasyon, dapat sia maghinulsol sing mapainubuson kag magbag-o. Sa sini kag sa kaanggid nga mga kahimtangan, makalulugpay ang ginasiling sang Hulubaton 29:23: “Ang bugal sang tawo magapanubo sa iya, apang ang mapainubuson sing espiritu makaagum sing dungug.”

Paano Kita Ginatuytuyan ni Jehova?

16, 17. Paano kita makabenepisyo gid sa Biblia nga makuhaan sing panuytoy sang Dios?

¹⁶ Ang pinakamaayo nga makuhaan sing panuytoy sang Dios amo ang iya Pulong, ang Biblia. (Basaha ang 2 Timoteo 3:16, 17.) Agod makabenepisyo gid kita sa sini nga Pulong, indi maalamon kon hulaton pa naton nga mag-utwas ang mabudlay nga kahimtangan antes kita mangita sing makabulig nga mga pulong sa Biblia. Sa baylo, ugalion naton nga basahon ang Biblia adlaw-adlaw. (Sal. 1:1-3) Nian, mangin pamilyar kita sa Pulong sang Dios. Ang panghunahuna sang Dios mangin panghunahuna man naton, kag nakahanda kita bisan mag-utwas ang wala ginapaabot nga mga problema.

¹⁷ Dugang pa, importante nga pamalandungan naton ang aton ginabasa sa Kasulatan kag magpangamuyo may kaangtanan sa sini. Sa pagpamalandong sa mga bersikulo sang Biblia, ginabinagbinag naton kon paano ini maaplikar sa espesipiko nga mga kahimtangan. (1 Tim. 4:15) Kon may mabug-at kita nga problema, nagapangamuyo kita kay Jehova nga buligan kita nga makita ang pagtuytoy nga kinahanglan naton. Buligan kita sang espiritu ni Jehova nga madumduman ang makabulig nga mga prinsipio nga nabasahan naton sa Biblia ukon sa mga publikasyon nga ginbase sa Biblia.​—Basaha ang Salmo 25:4, 5.

18. Sa ano nga mga paagi ginagamit ni Jehova ang Cristiano nga paghiliutod sa pagtuytoy sa aton?

¹⁸ Ang aton Cristiano nga paghiliutod isa pa ka mapuslanon nga bulig sa aton pagtinguha nga matigayon ang pagtuytoy ni Jehova. Ang importante nga bahin sini nga paghiliutod amo ang “matutom kag mainandamon nga ulipon” nga ginatiglawas sang Nagadumala nga Hubon, nga amo ang nagaaman sing dalayon nga espirituwal nga pagkaon paagi sa naimprinta nga mga balasahon kag mga programa para sa mga miting kag mga asambleya. (Mat. 24:45-47; ipaanggid ang Binuhatan 15:6, 22-31.) Dugang pa, sa sulod sang Cristianong paghiliutod may yara hamtong nga mga indibiduwal, ilabi na ang mga gulang, nga kalipikado sa paghatag sing personal nga bulig kag Makasulatanhon nga laygay. (Isa. 32:1) Ang mga pamatan-on sa Cristiano nga mga panimalay may dugang pa nga mapuslanon nga bulig. Gintulinan sang Dios ang ila tumuluo nga mga ginikanan nga amo ang magpaalinton sa ila sang iya panuytoy, kag ginapalig-on ang mga pamatan-on nga mangayo sing panuytoy sa ila mga ginikanan.​—Efe. 6:1-3.

19. Ano nga mga pagpakamaayo ang ginatigayon naton bangod padayon nga nagatinguha kita nga matigayon ang pagtuytoy ni Jehova?

¹⁹ Huo, ginatuytuyan kita ni Jehova sa nanuhaytuhay nga mga paagi, kag dapat naton himuslan ini. Tuhoy sa panahon nga matutom ang Israel, nagsiling si Hari David: “Ang amon mga ginikanan nagsalig sa imo; nagsalig sila, kag ikaw nagluwas sa ila. Nagtuaw sila sa imo, kag ginluwas; nagsalig sila sa imo, kag wala mahuy-i.” (Sal. 22:3-5) Kon sundon naton nga may pagsalig ang pagtuytoy ni Jehova, indi man kita mahuy-an. Indi kita mapaslawan sa aton ginalauman. Kon ‘itugyan naton sa GINOO ang aton dalanon,’ sa baylo nga magsandig sa aton kaalam, ang resulta amo ang bugana nga mga pagpakamaayo bisan sa karon. (Sal. 37:5) Kag kon matutom kita nga magpadayon sa sini nga dalanon, makatigayon kita sing walay katapusan nga mga pagpakamaayo. Nagsulat si Hari David: “Ang GINOO nagahigugma sang katarungan; wala nagabiya sa iya mga balaan. Ginatipigan sila sing dayon . . . Ang mga matarung magapanubli sang duta, kag magapuyo dira sa gihapon.”​—Sal. 37:28, 29.

Mapaathag Mo Bala?

• Ngaa ginasaligan naton ang pagtuytoy ni Jehova?

• Ano ang ginapahangop kon sikwayon naton ang pagtuytoy ni Jehova?

• Ano ang pila ka kahimtangan nga kinahanglan magpaubos ang isa ka Cristiano?

• Paano kita karon ginatuytuyan ni Jehova?

[Mga Pamangkot sa Pagtinuon]

[Mga piktyur sa pahina 8]

Nagapangayo ka bala sing panuytoy ni Jehova sa tanan nga aspekto sang imo kabuhi?

[Piktyur sa pahina 9]

Ginsikway ni Eva ang pagkasoberano ni Jehova

[Piktyur sa pahina 10]

Ano nga kinaiya ang kinahanglan ni Hagar kon sundon niya ang ginsiling sa iya sang anghel?