Madumduman Mo Bala?

Nakabenepisyo ka bala sa pagbasa sa ulihi nga mga gua sang Ang Lalantawan? Tilawi kon masabat mo ang masunod nga mga pamangkot:

• San-o ginduaw sang mga mago si Jesus?

Ang isa ka edisyon sang Biblia nagsiling: “Wala ginduaw sang mga Mago si Jesus sa pasungan sang gab-i nga ginbun-ag sia subong sang ginhimo sang mga manugpahalab. Nagduaw sila pagligad sang pila pa ka bulan.” Sa sadto nga tion, dakudaku na nga ‘bata’ si Jesus kag yara na sila sa isa ka puluy-an. (Mat. 2:7-11) Kon matuod nga sang gab-i sang pagkabun-ag ni Jesus ginregaluhan sia sing bulawan kag iban pa nga malahalon nga mga regalo, ngaa duha lamang ka pispis ang ginhalad ni Maria sa templo pagligad sang 40 ka adlaw?​—1/1, pahina 31.

• Paano mangin mapuslanon ang pagkabuhi?

Mahimo mamangkot ang isa: ‘Mahimo ko bala mabag-o ang akon mga kahimtangan kag mapasimple ang akon pagkabuhi?’ Amo sini ang ginhimo ni Amy. Bugana sia sa materyal apang indi sia malipayon. Nakamarasmas sia nga bangod sa iya paghingamo sa karera sini nga kalibutan, halos nagtalang na sia gikan sa pagtuo. Gani, nagdesisyon sia nga unahon ang intereses sang Ginharian kag nagpayunir sing pila ka tuig. Nagsiling si Amy, “Nabatyagan ko na karon ang kaayawan nga wala ko anay naeksperiensiahan” sang ginhimud-usan ko ang mga butang sa kalibutan.​—1/15, pahina 19.

• Paano mabug-os ang kalipay sang pila ka iloy?

Madamo sa mga iloy karon ang nagatrabaho. Ini bangod luyag nila makabulig sa pamilya, kag ang iban agod madugangan ang ila kompiansa sa kaugalingon ukon makapagarbo. Ang iban naman nagatrabaho bangod nalipay sila sa ila obra. Sa puluy-an, may importante gid nga papel ang Cristiano nga mga iloy ilabi na kon ang ila bata lapsag pa. Ang iban nga mga iloy nagdesisyon nga buhinbuhinan ang ila tion sa pagtrabaho ukon mag-untat na gid lang agod matatapan sing maayo ang ila pamilya, kag bangod sini, nabug-os ang ila kalipay.​—2/1, pahina 28, 31.

• Ano nga “kaliwatan” ang ginapatuhuyan ni Jesus sa iya mga pulong sa Mateo 24:34?

Masami nga negatibo ang paglaragway ni Jesus sang tinaga nga “kaliwatan” kon nagaistorya sia ukon nagapatuhoy sa malauton nga mga tawo. Apang tuhay ang buot niya silingon sang nagapakig-istorya sia sa iya mga disipulo, nga sa indi madugay pagahaplasan sang balaan nga espiritu. Sila ang labi nga makahangop sang narekord sa Mateo 24:32, 33. Gani makahinakop kita nga ang ginapatuhuyan ni Jesus amo ang mga hinaplas niya nga mga sumulunod sang una nga siglo kag sa moderno nga tion karon.​—2/15, pahina 23-4.

• Suno sa rekord sa Galacia 3:24, paano nangin manunudlo ang Kasuguan?

Sa masami ang manunudlo isa ka salaligan nga nagaamlig kag nagapatuman sa luyag sang amay para sa bata. Sing kaanggid, gin-amligan man sang kasuguan ang mga Judiyo gikan sa malain nga mga impluwensia subong sang pagminyo sa mga pagano. Apang kaangay sa manunudlo sang bata, temporaryo lamang ang kasuguan kag tubtob lamang ini sa pag-abot ni Cristo.​—3/1, pahina 18-21.

• Suno sa Santiago 3:17, ano nga kinaiya ang dapat naton ipakita?

Agod mangin putli, kinahanglan naton sikwayon gilayon ang malaut nga mga butang. (Gen. 39:7-9) Kinahanglan man nga mangin mahidaiton kita, nga ginalikawan ang pagkamaakigon ukon mga paggawi nga nagaguba sang kalinong. Gani, ang tagsa-tagsa sa aton dapat mamangkot: ‘Kilala bala ako nga mahidaiton ukon makiawayon? Pirme bala ako may kontra? Madali bala ako masaklaw, ukon makasaklaw sa iban? Madali bala ako nga nagapatawad sa iban, ukon ginapilit ko gid ang akon gusto?’​—3/15, pahina 24-5.

• Ngaa amat-amat ang pag-ayo ni Jesus sa bulag nga tawo? (Marcos 8:22-26)

Ang Biblia wala nagahatag sing sibu nga paathag tuhoy sini. Apang posible nga sa sini nga tion, amat-amat lamang ang pag-ayo ni Jesus sa bulag agod makapasibu sia sa bag-o niya nga kahimtangan. Nagapakita ini sang gugma kag pag-ulikid ni Jesus sa bulag nga tawo.​—4/1, pahina 30.