Kon Paano Ginaorganisar ang Nagadumala nga Hubon

ANG Nagadumala nga Hubon sang mga Saksi ni Jehova ginahuman sang dedikado, hinaplas nga mga lalaki nga alagad sang Dios. Sila mga tiglawas sang matutom kag mainandamon nga ulipon nga klase nga nagaaman sing espirituwal nga pagkaon kag nagahatag sing direksion sa pagbantala sing Ginharian nga hilikuton sa bug-os nga duta.—Mat. 24:14, 45-47.

Sa masami, nagamiting ang Nagadumala nga Hubon sa adlaw nga Mierkoles kada semana. Sa amo, matigayon nila ang paghiusa samtang nagabuligay sila. (Sal. 133:1) Ang mga katapo sang Nagadumala nga Hubon nagaalagad man sa nagkalainlain nga mga komite. Agod matatap ang intereses sang Ginharian, ang tagsa ka komite may ginadumalahan nga hilikuton subong ginapakita sang masunod.

▪ COORDINATORS’ COMMITTEE: Ang mga katapo sini nga komite amo ang coordinator ukon manugpahituhog sang tagsa ka komite sang Nagadumala nga Hubon, kag isa ka sekretaryo nga katapo man sang Nagadumala nga Hubon. Ginapat-od sang Coordinators’ Committee nga ang tanan nga komite organisado kag nagapanghikot sing maayo. Ginaatipan man sini ang dalagku nga sahi sang mga emerhensia, mga paghingabot, mga kalamidad kag iban pa nga hilingagawon nga mga butang nga nagaapektar sa mga Saksi ni Jehova sa bug-os nga kalibutan.

▪ PERSONNEL COMMITTEE: Ang mga utod nga lalaki sa sini nga komite nagahimo sing mga kahimusan agod amanan sing personal kag espirituwal nga mga kinahanglanon ang mga miembro sang pamilya Bethel sa bug-os nga duta. Sila man ang nagapili kag nagapatawag sa bag-o nga mga miembro sang pamilya Bethel kag nagasabat sa mga pamangkot tuhoy sa ila hilikuton diri.

▪ PUBLISHING COMMITTEE: Ginadumalahan sini nga komite ang pag-imprinta, pagbalhag, kag pagpadala sang pasad sa Biblia nga mga literatura sa bug-os nga kalibutan. Ginatatap man sini ang mga imprintahan kag mga propiedad nga ginapanag-iyahan kag ginagamit sang nagkalainlain nga mga korporasyon sang mga Saksi ni Jehova. Ginapat-od sini nga komite nga ang tanan nga mga donasyon ginagamit sing nagakaigo para sa aton bug-os kalibutan nga hilikuton.

▪ SERVICE COMMITTEE: Ang mga katapo sini nga komite amo ang nagatatap sa pagbantala nga hilikuton kag sa mga butang may kaangtanan sa mga kongregasyon, mga payunir, mga gulang kag mga nagalakbay nga manugtatap. Sila man ang nagaaman sa aton sing Ang Aton Ministeryo sa Ginharian kag nagaagda sa magaeskwela sa Gilead School kag Ministerial Training School kag nagaasayn kon diin sila magaalagad sa tapos sila makagradwar.

▪ TEACHING COMMITTEE: Ini nga komite amo ang nagaaman sang mga instruksion kag mga bahin para sa mga asambleya, mga kombension kag mga miting sa kongregasyon. Ginahanda man nila ang espirituwal nga mga programa para sa mga katapo sang pamilya Bethel kag nagadumala sang nagkalainlain nga mga eskwelahan, subong sang Gilead School kag Pioneer Service School. Ini nga komite nagahanda man sang mga programa sa audio kag video.

▪ WRITING COMMITTEE: Responsibilidad sini nga komite ang pag-aman sang espirituwal nga pagkaon agod mabalhag kag mapanagtag sa mga kauturan kag sa publiko. Sila man ang nagasabat sang mga pamangkot tuhoy sa Biblia kag nagahimo sang iskrip sa drama kag balayan sa pamulongpulong. Ginadumalahan man sini ang pagbadbad nga ginahimo sa bug-os nga kalibutan.

Ginpaanggid ni apostol Pablo ang kongregasyon sang mga hinaplas sa lawas sang tawo kag ginpadaku ang importante nga mga papel sang tagsa ka miembro sini. Siling niya dapat ang kada isa magbinuligay, maghigugmaanay kag magkooperar agod mahimo ang hilikuton nga ginhatag sang Dios sa ila. (Roma 12:4, 5; 1 Cor. 12:12-31) Ang Ulo sang kongregasyon nga si Jesucristo, amo ang nagaaman sing kinahanglanon sang tagsa ka katapo sini para sa maayo nga kooperasyon, koordinasyon kag paghanas sa espirituwal sang kada isa. (Efe. 4:15, 16; Col. 2:19) Sa sini nga paagi, gin-organisar ang Nagadumala nga Hubon agod manguna samtang ginatuytuyan sila sang balaan nga espiritu ni Jehova.