Handa Ka Bala nga Pangapinan ang Imo Pagtuo?

NAEKSPERIENSIAHAN mo na bala ang isa ka sitwasyon nga kinahanglan mo pangapinan ang imo pagtuo? Binagbinaga ang natabo sa 16 anyos nga utod nga babayi sa Paraguay, nga si Susana. Nagaeskwela sia sa hayskul. Sa ila klase may nagkomento nga ang mga Saksi ni Jehova kuno wala nagapati sa “Daan nga Katipan,” kay Jesucristo, ukon kay Maria. Kag siling nila ang mga Saksi panatiko kay mas pilion pa nila nga mapatay sangsa magpabulong. Kon ikaw si Susana, ano ang himuon mo?

Nangamuyo si Susana kay Jehova, dayon nagbayaw sang iya kamot. Apang bangod buhi na nila, ginhangyo niya ang iya maestra nga tugutan sia nga ipaathag sa klase kon ano ang iya ginapatihan subong isa sa mga Saksi ni Jehova. Nagpasugot ang iya manunudlo. Sa sulod sang duha ka semana, ginhandaan ni Susana ang iya presentasyon sa klase nga ginagamit ang brosyur nga Mga Saksi ni Jehova​—Sin-o Sila? Ano ang Ila Ginapatihan?

Sang nagpresentar na si Susana, ginpaathag niya kon ngaa gintawag kita nga mga Saksi ni Jehova. Subong man, ginsugid niya kon ano ang aton paglaum sa palaabuton kag kon ngaa wala kita nagapatughong sing dugo. Dayon ginhambalan niya ang iya mga klasmeyt nga puede sila makapamangkot. Kalabanan sang mga estudyante nagbayaw sang ila kamot. Nagdayaw gid ang manunudlo bangod ginagamit ni Susana ang Kasulatan sa pagsabat sang ila mga pamangkot.

Ang isa ka estudyante nagsiling, “Nakakadto na ko sa Kingdom Hall isa ka bes, kag wala gid ako may nakita nga imahen bisan isa.” Namangkot ang manunudlo kon ngaa. Ginbasa ni Susana ang Salmo 115:4-8 kag Exodo 20:4. Nakibot gid ang manunudlo kag nagsiling, “Ti, ngaa puno ang amon simbahan sang mga imahen kay ginapakamalaut man na gali sang Biblia?”

Naglawig sing 40 minutos ang ila pamangkot kag sabat nga paghinun-anon. Sang ginpamangkot ni Susana ang iya mga klasmeyt kon luyag nila magtan-aw sing video nga No Blood​—Medicine Meets the Challenge, nagpasugot sila tanan. Gani gin-iskedyul ini sang manunudlo sa sunod nga adlaw. Sa tapos nila ini matan-aw, ginpaathag ni Susana sa ila ang mga pamaagi sa pagpabulong nga wala nagagamit sing dugo nga ginabaton sang pila sa mga Saksi ni Jehova. Bangod sini, ang manunudlo nagsiling: “Wala gid ako makahibalo nga may madamo gali nga alternatibo sa pagpabulong; kag karon ko lang nahibaluan ang mga bentaha sang pagpabulong nga wala nagapatughong sing dugo. Para lamang bala ina sa mga Saksi ni Jehova?” Sang nabal-an niya nga indi lang ini para sa mga Saksi, sia nagsiling: “Sa sunod nga magkadto ang mga Saksi sa amon balay, makig-istorya na gid ako sa ila.”

 Ang ginhanda ni Susana nga 20 minutos nga paghinun-anon, nagdugay sing tatlo ka oras. Pagligad sang isa ka semana, nagpresentar man ang iban nga estudyante sang ila ginapatihan subong mga miembro sang simbahan. Antes matapos ang ila presentasyon, madamo sa mga estudyante ang namangkot apang wala sila makasabat. Ginpamangkot sila sang manunudlo, “Ngaa indi ninyo mapangapinan ang inyo pagtuo kaangay sang inyo klasmeyt nga isa sa mga Saksi ni Jehova?”

Nagsabat sila: “Ginatun-an gid nila ang Biblia. Apang kami wala.”

Ginbalikid sang manunudlo si Susana kag nagsiling: “Ginatun-an gid man ninyo ang Biblia kag nagapanikasog nga iaplikar ini. Dalayawon ka gid.”

Puede man tani nga naghipos na lang si Susana. Apang, gin-ilog niya ang wala mahingadli nga Israelinhon nga bata nga babayi nga ginbihag sang mga Sirianhon. Yara sia sa puluy-an sang heneral sang Siria nga si Naaman nga may balatian nga aro. Ginhambalan niya ang iya agalon nga babayi: “Kabay kuntani nga ang akon ginoo makaatubang sa manalagna nga yara sa Samaria! Ayohon niya sia sang iya aro.” Indi mapunggan sang bata nga babayi ang magpanaksi tuhoy sa matuod nga Dios. Ang resulta, nangin sumilimba ni Jehova si Naaman.​—2 Hari 5:3, 17.

Sing kaanggid, indi man mapunggan ni Susana ang iya kaugalingon nga magpanaksi tuhoy kay Jehova kag sa iya katawhan. Bangod ginpangapinan niya ang iya pagtuo sang may nagpamangkot sa iya, natuman niya ang sugo sa Kasulatan: “Pakabalaana si Cristo subong Ginuo sa inyo tagipusuon, nga handa pirme nga magpangapin sa atubangan sang tanan nga nagapangayo sa inyo sang pangatarungan tuhoy sa paglaum nga yara sa inyo, apang ginahimo ini nga may kalulo kag tudok nga pagtahod.” (1 Ped. 3:15) Handa ka man bala nga pangapinan ang imo pagtuo kon may kahigayunan?

[Piktyur sa pahina 17]

Ini nga mga materyal makabulig nga mapangapinan mo ang imo pagtuo