Hupti “ang Imo Una nga Gugma”
Hupti “ang Imo Una nga Gugma”
“Hupti sing malig-on ang yara sa imo.”—BUG. 3:11.
1, 2. Ano ang imo ginbatyag sang makumbinsi ka nga ang imo natun-an tuhoy kay Jehova amo ang kamatuoran?
MADUMDUMAN mo pa bala ang una nga tion nga natun-an mo ang matahom nga palaabuton nga ginatanyag ni Jehova sa matinumanon nga katawhan? Kon lain ang imo relihion sadto, dayon ginpakita sa imo sa Kasulatan ang mga katuyuan sang Dios ukon ginpaathag ang mga panudlo nga wala mo nahangpan sang una, ano ang ginbatyag mo? Mahimo narealisar mo nga nalimbungan ka sang imo relihion. Apang daku gid ang imo kalipay nga nasanagan ka na karon! Kon ginpadaku ka sang Cristianong mga ginikanan, madumduman mo pa bala kon ano ang imo ginbatyag sang nakumbinse ka nga ang imo gintun-an tuhoy kay Jehova amo ang kamatuoran kag namat-od ka nga sundon ini?—Roma 12:2.
2 Madamo sang imo mga kauturan sa kongregasyon ang magasugid sa imo nga malipayon gid sila, suod sila kay Jehova, kag nagapasalamat gid nga ginbuyok sila ni Jehova. (Juan 6:44) Ang ila kalipay nagpahulag sa ila nga makigbahin sa Cristianong hilikuton kag ipaambit sa iban ang ila ginabatyag nga kalipay. Amo man bala sini ang imo ginabatyag?
3. Ano ang kahimtangan sang kongregasyon sa Efeso sang ginpadalhan sila ni Jesus sing mensahe?
3 Sang ginpatuhuyan ni Jesus ang unang-siglo nga mga Cristiano sa kongregasyon sang Efeso, nagsiling sia nga ‘ginbayaan nila ang ila una nga gugma.’ Madamo sing maayo nga kinaiya ang mga taga-Efeso, apang nagtahaw ang ila gugma kay Jehova. Busa, si Jesus nagsiling sa ila: “Nahibaluan ko ang imo mga buhat, kag ang imo pagpangabudlay kag pagbatas, nga indi ka makaagwanta sa malain nga mga tawo, nga ginatilawan mo ang nagasiling nga mga apostoles sila, apang indi gali, kag nasapwan mo nga butigon sila. Nagapakita man ikaw sang pagbatas, kag nag-agwanta ka tungod sa akon ngalan kag wala ginlapyo. Apang, amo ini ang naindi-an ko sa imo, nga ginbayaan mo ang imo una nga gugma.”—4. Ngaa importante man karon ang mensahe ni Jesus sadto sa mga taga-Efeso?
4 Ang laygay ni Jesus sa mga taga-Efeso kag sa iban nga kongregasyon nga ginpatuhuyan niya sa tulun-an sang Bugna nagakaigo gid sa kahimtangan sang Cristianong mga hinaplas sugod sang 1914. (Bug. 1:10) Apang, posible gihapon bisan karon nga madula sang pila ka Cristiano ang “una [nila] nga gugma” kay Jehova kag sa kamatuoran. Ginahunahuna ini, usisaon naton kon paano ang paghinumdom kag pagpamalandong sa imo mismo mga eksperiensia, makabulig sa imo nga mahuptan, mapapagsik, kag mapabakod liwat ang imo gugma kag kakugi sadto sa Dios kag sa kamatuoran.
Ngaa Kumbinsido Ka nga ang Imo Natun-an Amo ang Kamatuoran?
5, 6. (a) Sa ano dapat kumbinsihon sang tagsa ka Cristiano ang ila kaugalingon? (b) Ngaa kumbinsido ka nga ang mga Saksi ni Jehova amo ang nagatudlo sang kamatuoran? (c) Ano ang makabulig sa isa agod mapabakod liwat ang iya una nga gugma?
5 Ang tanan nga nagdedikar sang ila kaugalingon kay Jehova dapat anay ‘magpamatuod’ sa iya kaugalingon kon ano “ang maayo kag kalahamut-an kag himpit nga kabubut-on sang Dios.” (Roma 12:1, 2) Nagalakip ini sa pagtuon sang kamatuoran sa Biblia. Mahimo nga nanuhaytuhay ang nagkumbinse sa aton nga ang mga Saksi ni Jehova amo ang nagatudlo sang kamatuoran. Mahimo madumduman sang pila nga natandog sila sang mabasa nila ang ngalan sang Dios sa Biblia ukon sang nahangpan nila ang matuod nga kahimtangan sang patay. (Sal. 83:18; Man. 9:5, 10) Ang iban naman napahulag bangod sa gugma nga nakita nila sa tunga sang katawhan ni Jehova. (Juan 13:34, 35) Ang iban pa gid, nakumbinse sa mga rason kon ngaa indi kita dapat mangin bahin sang kalibutan. Nakahinakop sila nga ang matuod nga mga Cristiano indi dapat makigbahin sa mga kinagamo sa pulitika ukon sa mga inaway sang bisan ano nga pungsod.—Isa. 2:4; Juan 6:15; 17:14-16.
6 Para sa madamo, ang pagtuon sa mga butang Salmo 119:151, 152; 143:5.
nga ginsambit bag-o lang kag sa iban pa nga kamatuoran amo ang nagpadabdab sang ila unang gugma sa Dios. Panumduma kon ano naman ang nagkumbinsi sa imo. Tuhay ang imo kahimtangan kag kinaiya, busa ang imo mga rason sa paghigugma kay Jehova kag sa pagpati sa iya mga saad mahimo mangin tuhay man sa iban. Posible nga ang nagkumbinsi sadto sa imo nga kamatuoran pareho man gihapon karon. Wala nagabag-o ang kamatuoran. Busa kon pamalandungan mo kon ano ang nagkumbinse sadto sa imo mapabakod liwat ang imo una nga gugma sa kamatuoran.—Basaha angPabakura ang Imo Una nga Gugma
7. Ngaa dapat naton pabakuron ang aton una nga gugma sa kamatuoran, kag paano naton ini mahimo?
7 Mahimo nga daku ang pagbag-o sang imo kabuhi sugod sang nagdedikar ka kay Jehova. Importante ang imo gugma sa kamatuoran, apang sa pagligad sang tion, kinahanglanon mo ang mas mabakod nga gugma agod maatubang ang bag-o nga pagtilaw sa imo pagtuo. Apang ginsakdag ka niya. (1 Cor. 10:13) Amo nga indi mo gid malipatan ang mga tinion nga ginbuligan ka ni Jehova. Nagbulig ini nga magbakod ang imo una nga gugma, kag isa ini ka paagi nga mapamatud-an mo ang maayo kag kalahamut-an nga kabubut-on sang Dios.—Jos. 23:14; Sal. 34:8.
8. Paano nagpakilala si Jehova kay Moises, kag paano nakilala sing suod sang mga Israelinhon ang Dios?
8 Sa pag-ilustrar, binagbinaga ang kahimtangan sang mga Israelinhon sang ginsilingan sila ni Jehova nga luwason sila sa pagkaulipon sa Egipto. Nagpakilala ang Dios kay Moises nga nagasiling: “Mangin subong ako sa kon ano nga mangin subong ako.” (Ex. 3:7, 8, 13, 14, NW) Buot silingon, himuon ni Jehova ang bisan ano nga papel agod mahilway ang iya katawhan. Sa mga hitabo nga nagluntad, nakita sang mga Israelinhon ang nanuhaytuhay nga bahin sang personalidad ni Jehova—subong ang Labing Gamhanan, Hukom, Lider, Manluluwas, Hangaway, kag Manug-aman.—Ex. 12:12; 13:21; 14:24-31; 16:4; Neh. 9:9-15.
9, 10. Ano nga kahimtangan ang makabulig sa isa nga makilala ang Dios, kag ngaa maayo nga pamalandungan ini nga mga eksperiensia?
9 Apang bisan pa tuhay ang imo kahimtangan sa mga Israelinhon sadto, may mga eksperiensia ka nga nagpakumbinsi sa imo nga nagaulikid gid ang Dios. Bangod sini naglig-on ang imo pagtuo. Mahimo nga nangin Manug-aman, Manuglugpay, ukon Manunudlo si Jehova sa pila ka paagi. (Basaha ang Isaias 30:20b, 21.) Ukon mahimo narealisar mo ang maathag nga sabat sa imo pangamuyo. Mahimo may problema ka sang una kag ginbuligan ka sang isa ka utod. Ukon paagi sa personal nga pagtuon nakita mo ang mga teksto nga makabulig gid sa imo.
10 Kon isugid mo ini nga mga eksperiensia sa iban, mahimo nga daw wala man lang ini sing epekto sa ila. Kay man ang imo ginsugid sa ila daw kinaandan man lang. Apang para sa imo tuman gid ini ka importante. Huo, nangin amo si Jehova sa kon ano ang kinahanglan mo. Hunahunaa ang mga tinuig nga yara ka sa kamatuoran. Madumduman mo bala ang mga tion nga nabatyagan mo mismo ang pag-atipan ni Jehova? Kon pamalandungan mo ini, madumduman mo liwat ang gugma nga imo ginbatyag sa iya bangod sa pag-atipan niya sa imo. Pakabahandia ini nga mga eksperiensia. Pamalandungi ini. Pamatuod ini nga hamili ka gid kay Jehova kag wala sing may makakuha sini sa imo.
Usisaa ang Imo Kaugalingon
11, 12. Kon nagtahaw ang gugma sang isa ka Cristiano sa kamatuoran, ano ang posible nga kabangdanan, kag ano ang laygay ni Jesus?
11 Kon nagtahaw ang imo gugma sa Dios kag sa kamatuoran, indi buot silingon nga nagbag-o si Jehova. Wala gid sia nagabag-o. (Mal. 3:6; Sant. 1:17) Interesado sia sa imo tubtob karon. Busa, ngaa nagbag-o ang imo kaangtanan kay Jehova? Indi ayhan bangod sang daku nga pag-ipit amo nga daw nabuntol ka sang kahuol? Mahimo nga sang nagligad mas hanuot ang imo pangamuyo, pirme ka nagatuon kag nagapamalandong. Mas makugi ka bala sadto sa ministeryo kag regular sa mga miting sa kongregasyon?—2 Cor. 13:5.
12 Mahimo nga wala mo matalupangdan nga Luc. 21:34-36.
amat-amat ini nga nagbag-o, apang kon natalupangdan mo gid man, ano ang mga kabangdanan sini? Ang imo bala mga obligasyon subong sang pag-aman sa mga kinahanglanon sang imo pamilya, pag-atipan sang imo panglawas, ukon ang kaanggid sini, amo ang mga rason kon ngaa daw wala ka na nagabatyag sing pagkahilingagawon sa nagahilapit nga adlaw ni Jehova? Si Jesus nagsiling sa iya mga apostoles: “Apang mag-andam kamo nga ang inyo tagipusuon indi gid mabug-atan sang sobra nga pagkaon kag sobra nga pag-inom kag mga kabalaka sa kabuhi, kag ina nga adlaw magaabot sa inyo sing hinali subong sang siod. Kay magaabot ini sa tanan nga nagapuyo sa ibabaw sang bug-os nga duta. Gani, magpadayon kamo nga nagamata nga nagaampo sa tanan nga tion agod magmadinalag-on kamo sa pagpalagyo sa sini tanan nga butang nga gintalana nga mahanabo, kag sa pagtindog sa atubangan sang Anak sang tawo.”—13. Sa ano ginpaanggid ni Santiago ang Pulong sang Dios?
13 Ginapalig-on sang gin-inspirar nga manunulat sang Biblia nga si Santiago ang mga masigkatumuluo nga analisahon sing tampad ang ila kaugalingon pasad sa Pulong sang Dios. Si Santiago nagsulat: “Mangin mga manugtuman sing pulong, kag indi mga manugpamati lamang, nga nagadaya sang inyo kaugalingon paagi sa butig nga pangatarungan. Kay kon ang bisan sin-o manugpamati sing pulong, kag indi manugtuman, kaangay sia sang isa ka tawo nga nagatan-aw sang iya kinaugali nga nawong sa espiho. Kay ginatan-aw niya ang iya kaugalingon, kag nagahalin sia kag sa gilayon nagakalipat kon ano sia nga sahi sang tawo. Apang sia nga nagatulok sing maayo sa himpit nga kasuguan nga nagadala sang kahilwayan kag nagapabilin sa sini, ini nga tawo, bangod sia nangin indi malipaton nga manugpamati, kundi manugtuman sing hilikuton, mangin malipayon sa paghimo niya sini.”—Sant. 1:22-25.
14, 15. (a) Paano makabulig sa imo ang Biblia agod mag-uswag ka sa espirituwal? (b) Ano nga mga pamangkot ang sarang mo pamalandungan?
14 Mahimo mang-espiho ang isa agod mapat-od nga presentable sia tan-awon. Halimbawa, kon makita sang tawo nga nagkiwi ang iya kurbata, dapat niya ini tadlungon. Kon makita sang babayi nga nagainukay ang iya buhok, dapat niya ini husayon. Sing kaanggid, ginabuligan kita sang Kasulatan nga usisaon ang aton kaugalingon. Kon ipaanggid naton ang aton kaugalingon sa kon ano ang ginasiling sang Biblia nga dapat mangin amo kita, nian ginagamit naton ini subong espiho. Apang ngaa abi nga matan-aw pa kita sa espiho kon indi man lang naton pagtadlungon ang depekto nga aton makita? Maalamon gid kon manghikot kita suno sa aton nakita sa “himpit nga kasuguan” sang Dios, nga mangin “manugtuman” sini. Busa, yadtong nakahantop nga nagtahaw ang ila una nga gugma kay Jehova kag sa kamatuoran dapat magbinagbinag sining mga pamangkot: ‘Ano nga mga pag-ipit ang akon ginaatubang, kag ano ang akon reaksion sa sini? Ano ang akon reaksion sang una? Nagbag-o bala ini?’ Kon nasapwan mo nga may kakulangan ka, indi ini pagpasapayani. Kon kinahanglan mo nga magpasibu, tadlunga ini dayon.—Heb. 12:12, 13.
15 Ang pagpamalandong sa sini makabulig man sa imo nga makapahamtang sing mga tulumuron agod mag-uswag sa espirituwal. Si 1 Tim. 4:15.
apostol Pablo naghatag sang inspirado nga laygay sa iya masigkamanugpangabudlay nga si Timoteo kon paano mapauswag ang ministeryo sini. Ginpalig-on ni Pablo ang pamatan-on: “Pamalandungi ini nga mga butang; mag-ukod sa sini, agod ang imo pag-uswag madayag sa tanan nga tawo.” Dapat man nga magpamalandong kita, pasad sa Pulong sang Dios, kon ano nga mga pag-uswag ang sarang naton mahimo.—16. Kon ginagamit mo ang Kasulatan sa pag-usisa sa imo kaugalingon, ano nga katalagman ang dapat mo bantayan?
16 May masapwan ka nga pila ka kaluyahon kon usisaon mo ang imo kaugalingon. Mahimo nga makapaluya ini, apang indi mo dapat pagtugutan ini nga matabo. Ginausisa mo ang imo kaugalingon kay luyag mo mahibaluan kon ano pa ang dapat mo nga pauswagon. Siempre, luyag ni Satanas nga magbatyag ang isa ka Cristiano nga wala sia sing pulos bangod sang iya pagkadi-himpit. Ang matuod, si Satanas nagapangangkon nga wala ginapabaloran sang Dios ang mga panikasog sang iya katawhan nga alagaron sia. (Job 15:15, 16; 22:3) Ginapamatud-an ni Jesus nga sayop ini nga panumbungon; ang kada isa sa aton bilidhon gid sa Dios. (Basaha ang Mateo 10:29-31.) Bangod nahibaluan mo ang imo kaluyahon, dapat magpaubos ka kag paagi sa bulig ni Jehova tinguhaan mo gid nga tadlungon ini. (2 Cor. 12:7-10) Kon bangod sa balatian kag katigulangon nalimitehan ang imo pag-alagad, indi pagtuguti nga magtahaw ang imo gugma kag mag-untat sa pag-alagad.
Mangin Mapinasalamaton Gid
17, 18. Ano nga mga benepisyo ang matigayon mo kon pabakuron mo ang imo una nga gugma?
17 Daku gid nga mga benepisyo ang matigayon kon padayon mo nga pabakuron ang pundasyon sang imo una nga gugma. Sarang mo mapadalom ang imo ihibalo sa Dios kag ang imo apresasyon sa iya mahigugmaon nga panuytoy. (Basaha ang Hulubaton 2:1-9; 3:5, 6.) “Sa pagbantay [sang mga paghukom ni Jehova] may dakung balus,” siling sang salmista. “Ang kasogoan sang GINOO himpit, nga nagapahauli sang kalag.” Dugang pa, “bulahan ang mga himpit sa dalanon, nga nagakalat sa kasogoan sang GINOO!”—Sal. 19:7, 11; 119:1.
18 Magaugyon ka gid nga madamo sing maayong mga butang nga dapat pasalamatan. Nahangpan mo ang kabangdanan sa mga nagakatabo sa kalibutan. Nakabenepisyo ka sa espirituwal nga mga aman nga ginahatag sang Dios sa iya katawhan karon. Wala sing duhaduha nga nalipay ka man kay ginbuyok ka ni Jehova sa iya bug-os kalibutan nga kongregasyon kag ginhatagan sing pribilehiyo nga mangin isa sang iya mga Saksi. Isipa ang mga pagpakamaayo sa imo! Pat-od gid nga malawig ini kon listahon mo. Ang paghimo sini pirme magabulig gid sa imo nga sundon ang laygay: “Padayon nga hupti sing malig-on ang yara sa imo.”—Bug. 3:11.
19. Magluwas sa pagpamalandong tuhoy sa imo kaangtanan sa Dios, ano pa ang kinahanglanon agod mahuptan mo ang kapagros sa espirituwal?
19 Ang pagpamalandong kon paano nagbakod ang imo pagtuo sa pagligad sang tion isa lamang sang mga tikang agod mahuptan mo ang butang nga yara sa imo. Pirme ginapakita sini nga balasahon ang iban pa nga kinahanglanon agod mahuptan ang espirituwal nga kapagros. Lakip sa sini amo ang pangamuyo, pagtambong kag pagpakigbahin sa Cristianong mga miting, kag makugi nga pagbantala. Ini nga mga butang makabulig sa imo agod padayon mo nga mabag-o, mapapagsik, kag mapabakod ang imo una nga gugma.—Efe. 5:10; 1 Ped. 3:15; Jud. 20, 21.
Paano Mo Sabton?
• Paano ka napalig-on karon sa mga rason kon ngaa ginhigugma mo sang una si Jehova?
• Ano ang mapamatud-an mo kon pamalandungan mo ang imo mga eksperiensia sa sulod sang mga tinuig?
• Ngaa dapat mo usisaon ang imo gugma kay Jehova?
[Mga Pamangkot sa Pagtinuon]
[Piktyur sa pahina 23]
Ano nga kamatuoran ang nagganyat kag nagkumbinsi sa imo?
[Piktyur sa pahina 25]
May nakita ka bala nga mga butang sa imo kaugalingon nga dapat mo tadlungon?