Isa Gid ka Maayo nga Ideya

TATLO ka pamatan-on nga lalaki sa Sentral nga Aprika ang luyag magtambong sa pinakamalapit nga distrito nga kombension. Apang paano sila makalab-ot didto? Mga 90 kilometros ang kalayuon kag wala sila sing masakyan. Luwas pa sa sini, batuhon kag yab-ukon ang dalan. Tani manghulam sila sing tatlo ka bisikleta apang wala gid sila sing nakita nga puede gamiton.

Nahibal-an sang isa ka gulang sa ila kongregasyon ang ila problema kag gintanyag ang iya kaugalingon nga bisikleta. Bisan daan na pero puede pa nila magamit. Ginsugiran niya sila kon ano ang ila ginhimo sadto agod makatambong sa kombension. Ginpanugda sang gulang nga bulosbulos lang sila sa isa ka bisikleta. Simple lamang ini nga panugda apang nagakinahanglan gid sing maayo nga pagplano. Paano nila ayhan mahimo ini?

Kaagahon pa sila nagkitaay agod indi pa mainit, dayon ginpangkarga ang ila mga dala sa bisikleta. Mauna ang isa gamit sang bisikleta, samtang ang duha nagadagondagon nga nagasunod sa iya. Pagkatapos sang 500 metros, ipasandig niya sa kahoy ang bisikleta nga nakargahan sang ila dala kag bayaan ini. Siempre pa, ginapat-od niya nga malantawan sang iya upod ang bisikleta agod indi ini makawat. Kag magapadayon sia nga nagalakat.

Kon ang duha makaabot na sa ginbilinan sang bisikleta, ang isa naman ang magamit sang bisikleta samtang ang isa magapadayon sa paglakat sing dugang nga 500 metros tubtob iya naman turno. Gani paagi sa ila maayo nga pagplano kag determinasyon, nabuhinan ang ila lalakton, halin sa 90 km nangin mga 60 km na lang. Nangin mapuslanon gid ang ila panikasog. Nakaupod nila ang mga kauturan kag malipayon sila nga nagtambong sa kombension. (Deut. 31:12) Himuon mo man bala ang imo bug-os nga masarangan agod makatambong sa distrito nga kombension sa sini nga tuig?