Mabaskog Bisan May Kaluyahon

MAHIMO ka madaug sang imo kaluyahon. Nagatapik ini subong sang linta. Mahimo nagabatyag ka nga daw indi mo na ini malandas ukon masarangan, ukon nagahunahuna ka nga mas maayo pa ang iban sangsa imo. Sa pihak nga bahin, mahimo may yara ka sing makapaluya nga balatian nga nagakuha sang imo kusog kag kalipay. Ano man ang kabangdanan, nagabatyag ka nga daw indi mo na gid ini malampuwasan. Mahimo ka magbatyag kaangay ni Job, nga nagsiling sa Dios: “O kabay pa kuntani nga tagoon mo ako sa Sheol, nga matago mo ako kuntani tubtub nga magtaliwan ang imo kasingkal, nga tangdoan mo ako kuntani sing pinat-ud nga tion, kag madumduman mo ako!”​—Job 14:13.

Paano ka makatigayon sing paglaum? Bisan pa mabudlay himuon, kinahanglan mo anay nga kalimtan ang imo mga problema sing makadali. Halimbawa, binagbinaga ang pamangkot ni Jehova sang gin-inspirar niya si Job: “Diin ka bala sang ako nagpasad sang mga sadsaran sang duta? Ipahayag, kon may paghangup ka. Sin-o bala ang nagpat-ud sang iya mga takus​—sa pagkamatuud nakahibalo ka! Ukon sin-o bala ang nag-untay sa ibabaw niya sang latid?” (Job 38:4, 5) Kon hunahunaon naton ang kahulugan sina nga mga pamangkot, mapahulag kita nga kilalahon ang indi matupungan nga kaalam kag gahom ni Jehova. Gani, may maayo sia nga rason kon ngaa ginatugutan niya nga magluntad ining sistema sang kalibutan karon.

Ang “Tunok sa Unod”

Isa man si apostol Pablo sa mga alagad ni Jehova nga naghangyo nga kuhaon ang iya “tunok sa unod,” nga padayon niya nga ginaantos. Tatlo ka beses niya nga ginpangabay ang Dios nga kuhaon ini nga problema. Ano man yadto, kaangay sang nagangutngot nga tunok, mahimo nga nagkuha ini sang kalipay ni Pablo sa  pag-alagad kay Jehova. Ginpaanggid ni Pablo ining tunok sa unod nga daw pirme nagatampa sa iya. Ginsabat siya ni Jehova: “Ang akon wala tupong nga kaayo bastante na para sa imo; kay ang akon gahom ginahimpit sa kaluyahon.” Wala ginkuha ni Jehova ang iya tunok sa unod. Dapat pakigbatuan ini ni Pablo, apang sia nagdugang: “Kay kon maluya ako, nian mabaskog ako.” (2 Cor. 12:7-10) Ano ang buot niya silingon?

Wala nadula sing milagruso ang problema ni Pablo. Apang, wala ini nagpugong sa paghimo niya sing talalupangdon nga mga hilikuton sa pag-alagad kay Jehova. Nagsalig si Pablo sa pagsakdag ni Jehova kag tayuyon nga nangabay sang iya bulig. (Fil. 4:6, 7) Tubtob sa hingapusan sang dutan-on nga pagkabuhi ni Pablo, nakasiling sia: “Nakapakig-away na ako sang maayo nga pagpakig-away, nadalagan ko na ang dalaganon tubtob sa katapusan, natuman ko na ang pagtuo.”​—2 Tim. 4:7.

Ginagamit ni Jehova ang di-himpit nga mga tawo agod himuon ang iya kabubut-on bisan pa sang ila mga kakulangan kag mga problema, kag nakahatag ini sing kadungganan sa iya. Ginahatagan niya sila sing panuytoy kag kaalam agod malandas ang mga kabudlayan kag mahuptan ang ila kalipay sa pag-alagad. Walay sapayan sang ila mga kaluyahon, mahimo gamiton sang Dios ang di-himpit nga mga tawo sa paghimo sing tumalagsahon nga buhat.

Kon ngaa wala ginkuha sang Dios ang iya tunok sa unod, si Pablo nagsiling: “Agod indi ako mabayaw sing tuman.” (2 Cor. 12:7) Ang “tunok” nagpahanumdom kay Pablo sang iya mga limitasyon kag nagbulig sa iya nga mahuptan ang pagkamapainubuson. Kaanggid ini sa gintudlo ni Jesus: “Ang bisan sin-o nga nagapakataas sang iya kaugalingon paubson, kag ang bisan sin-o nga nagapaubos sang iya kaugalingon pakataason.” (Mat. 23:12) Ang mga pagtilaw nagatudlo sa mga alagad sang Dios nga mangin mapainubuson kag nagapahanumdom ini sa ila nga kinahanglan nila ang bulig ni Jehova agod makapabilin nga matutom. Gani, kaangay sa apostol, ‘magpabugal sila may kaangtanan kay Jehova.’​—1 Cor. 1:31.

Natago nga mga Kaluyahon

Ang iban may mga kaluyahon nga indi nila matalupangdan ukon mahimo ginapanghiwala nila. Halimbawa, ang isa, sobra ang pagsalig sa iya kaugalingon. (1 Cor. 10:12) Nangin kinaandan man nga kaluyahon sang di-himpit nga mga tawo ang handum nga mangin prominente.

Si Joab isa ka maisog, determinado, kag maalam nga heneral sang hangaway ni Hari David. Apang sang ulihi, nakahimo sia sing mabug-at nga sala bangod nangin makahas sia kag matinaastaason. Mapintas niya nga ginpatay ang duha ka heneral sang hangaway. Una, ginpatay niya si Abner agod makatimalos. Sang ulihi, bangod ginbuslan sia ni Amasa bilang heneral sa hangaway, nangita si Joab sing kahigayunan agod patyon si Amasa sa paglaum nga mabawi niya ang iya posisyon subong heneral. Subong kinaandan nga pagtamyaw, gin-uyatan ni Joab sang iya tuo nga kamot ang bungot ni Amasa nga iya pakaisa para kuno abi halukan sia. Apang ginbuno sia ni Joab sang espada sa iya wala nga kamot. (2 Sam. 17:25; 20:8-10) Makita naton nga wala gid ginkontrol ni Joab ang iya malaut nga huyog kag makagod nga ambisyon. Nangin mapintas sia kag wala nagpakita sing paghinulsol. Gani, sang malapit na lang mapatay si Hari David, ginsilingan niya si Solomon nga pat-uron gid nga mabayaran ni Joab ang kalainan nga iya ginhimo.​—1 Hari 2:5, 6, 29-35.

Indi kita dapat magpadaug sa aton malaut nga mga handum; mahimo naton makontrol ang aton mga kaluyahon. Paano? Una, dapat naton ini hibaluon kag batunon. Nian, panikasugan naton nga malandas ini nga mga kaluyahon. Mahimo kita makapangabay sang bulig ni Jehova paagi sa regular nga pagpangamuyo kag maukod nga pagtuon sa iya Pulong, nga nagapangita sing mga paagi agod mabatuan ini nga mga huyog. (Heb. 4:12) Mahimo padayon kita nga nagapanikasog agod malandas ang aton mga kaluyahon, apang indi kita maluyahan sing buot. Samtang mga di-himpit pa kita, padayon gihapon ang aton pagpakigbato. Ginbaton ini ni Pablo kay siya nagsulat: “Kay ang luyag ko, wala ko ini ginahimo; apang ang ginadumtan ko amo ang akon ginahimo.” Apang sa nahibaluan naton, wala gid nagpadaug si Pablo sa iya mga kaluyahon, subong nga daw indi niya ini makontrol. Sa baylo, padayon niya nga ginpakigbatuan ang iya mga kaluyahon nga nagasalig sa bulig sang Dios paagi kay Jesucristo. (Roma 7:15-25) Nagsiling  man si Pablo: “Ginasakit ko ang akon lawas kag ginahimo ini nga ulipon, agod sa tapos ako makabantala sa iban, ako mismo sa bisan ano man nga paagi indi pagsikwayon.”​—1 Cor. 9:27.

May huyog kita nga ipanghiwala ang aton mga kaluyahon. Malandas naton ini paagi sa pag-ilog sang pagtamod ni Jehova sa mga butang, subong sang ginlaygay ni Pablo sa mga Cristiano: “Kangil-ari ang malaut, magpanguyapot sing malig-on sa maayo.” (Roma 12:9) Sa pagpakigbato naton sa aton mga kaluyahon, kinahanglan naton ang pagkabunayag, determinasyon kag pagdisiplina sa kaugalingon. Ginpangabay ni David si Jehova: “Tilawi ang akon tagiposoon kag ang akon hunahuna.” (Sal. 26:2) Nahibaluan niya nga ginausisa gid sang Dios kon ano ang aton matuod nga mga huyog kag ginabuligan niya kita kon kinahanglanon. Kon sundon naton ang panuytoy ni Jehova paagi sa iya Pulong kag balaan nga espiritu, malandas naton ang aton mga kaluyahon.

Mahimo nga nabudlayan ang iban sa paglandas sang pila ka problema nga sila lang. Ang mga gulang sa kongregasyon pat-od nga makahatag sing mahigugmaon nga bulig kag pagpalig-on. (Isa. 32:1, 2) Apang mas maayo kon mangin realistiko kita sa aton mga ginapaabot. May mga problema nga indi masolusyunan sa sining sistema sang mga butang. Walay sapayan sini, madamo sa gihapon ang nakalandas kag nagbatyag sing kaayawan sa ila pagkabuhi.

Ginapasalig sang Pagsakdag ni Jehova

Ano man nga problema ang ginaatubang naton sa sining mabudlay nga mga tion, makasalig kita sang pagtuytoy kag pagsakdag ni Jehova. Ginapalig-on kita sang Biblia: “Magpaubos kamo sa idalom sang gamhanan nga kamot sang Dios, agod bayawon niya kamo sa gintalana nga tion; samtang ginatugyan ninyo sa iya ang tanan ninyo nga kabalaka, bangod nagaulikid sia sa inyo.”​—1 Ped. 5:6, 7.

Si Kathy, nagapangalagad sa Bethel sa sulod na sang pila ka tuig. Sang nahibaluan niya nga ang iya bana may balatian nga Alzheimer, nagbatyag sia nga daw indi niya ini masarangan. Nangin importante sa iya ang pagpangamuyo kay Jehova kada adlaw nga hatagan sia sing kaalam kag kalig-on. Samtang nagalala ang kahimtangan sang iya bana, ang mahigugmaon nga mga kauturan nga lalaki nanikasog nga tun-an kon paano malandas ini nga balatian kag ang mga utod nga babayi  mainulikdon nga naghatag sa iya sing emosyonal nga pagpalig-on. Ining mga Cristiano nangin bahin sang makapalig-on nga pagsakdag ni Jehova nga nagbulig kay Kathy nga maatipan ang iya bana tubtob napatay, mga 11 ka tuig sang ulihi. Sia nagsiling: “Nagahibi ako kag hanuot gid nga nagapasalamat kay Jehova sa iya pagsakdag nga nakabulig sa akon agod makapadayon. Narealisar ko nga bisan pa nagaluya ako sa tuman nga kakapoy, tayuyon ako nga nagapanghikot sa malawig nga tion.”

Bulig Agod Malandas ang Natago nga mga Kaluyahon

Kon nagabatyag ang isa nga indi takus, mahimo maghunahuna sia nga indi pagpamatian ni Jehova ang iya pangabay kon nagaatubang sia sang kabudlayan. Mas maayo gid nga dumdumon naton ang ginsiling ni David sang ginhinulsulan niya ang pagpakighilawas kay Batseba: “Ang boong kag mahinulsulon nga tagiposoon, O Dios, dili mo pagtamayon.” (Sal. 51:17) Bangod sang iya sinsero nga paghinulsol, nahibaluan ni David nga mahimo sia makapalapit sa Dios kag mabaton ang Iya kaluoy. Ginpabanaag ni Jesus ang pagkamainulikdon ni Jehova. Ginpatuhuyan sang manunulat sang Ebanghelyo nga si Mateo ang pinamulong ni Isaias kay Jesus: “Indi niya pagbalion ang tabun-ak nga nahapay, kag indi niya pagpalungon ang lino nga pabilo nga nagaaso na lang.” (Mat. 12:20; Isa. 42:3) Sang yari si Jesus sa duta, nangin maluluy-on sia sa mga kubos kag ginapigos. Wala niya ginpalong ang kalayo sang kabuhi sang isa nga daw kaangay sang pabilo sang kingki nga nagapiraw na. Sa baylo, mahigugmaon niya nga gin-atipan ang mga nagaantos agod ibalik sa ila ang kalayo sang kabuhi. Nagapati ka bala nga wala gid nagbag-o si Jesus kag nahangpan niya gihapon ang imo mga kaluyahon? Talupangda ang ginsiling sa Hebreo 4:15 nga Isa sia nga ‘nahanuklog sa aton mga kaluyahon.’

Sang nagsulat si Pablo tuhoy sa iya “tunok sa unod,” nahangpan niya nga ang gahom ni Cristo “kaangay sang isa ka tolda.” (2 Cor. 12:7-9) Nabatyagan niya ang pangamlig sang Dios paagi kay Cristo, kaangay sang isa ka tawo nga ginaamligan sang tolda kon malain ang tiempo. Kaangay ni Pablo, indi kita dapat mangampo sa aton mga kaluyahon kag mga problema. Agod mangin malig-on kita sa espirituwal, panginpuslan naton ang tanan nga gin-aman ni Jehova paagi sa iya dutan-on nga kongregasyon. Himuon naton ang aton bug-os nga masarangan kag magsalig kay Jehova nga tuytuyan niya ang aton mga tikang. Kon maeksperiensiahan naton ang bulig sang gahom sang Dios agod malandas ang aton mga kaluyahon, mahimo kita makasiling kaangay ni Pablo: “Kon maluya ako, nian mabaskog ako.”​—2 Cor. 12:10.

[Piktyur sa pahina 3]

Tayuyon nga nangamuyo si Pablo kay Jehova agod buligan sia nga matuman ang iya ministeryo

[Piktyur sa pahina 5]

Gintugyan ni Hari David kay Joab ang mga hangaway

[Piktyur sa pahina 5]

Ginpatay ni Joab ang iya kasumpong nga si Amasa

[Piktyur sa pahina 6]

Mahigugmaon nga nagahatag sing Makasulatanhon nga panuytoy ang mga gulang agod malandas naton ang aton mga problema