Magpasakop sa Awtoridad ni Jehova

“Amo ini ang kahulugan sang gugma sa Dios, nga tumanon naton ang iya mga sugo; apang ang iya mga sugo indi mabug-at.”​—1 JUAN 5:3.

1, 2. (a) Ngaa madamo sa karon ang wala nagapasakop sa awtoridad? (b) Nagapagusto gid man bala yadtong nagapangangkon nga wala nagapasakop? Ipaathag.

MADAMO sa karon ang wala nanamian sa tinaga nga “awtoridad” ukon sa ideya nga magpasakop sa iban. Ang mga tawo nga indi luyag magpasakop sa awtoridad nagasiling nga “pagusto ako kon ano ang himuon ko.” Apang, matuod bala nga makapagusto gid sila? Indi gid! Ang kalabanan sa ila nagasunod man sa talaksan sang kadamuan nga ‘nagapauyon sa sining sistema sang mga butang.’ (Roma 12:2) Indi gid sila makapagusto kay “sila mismo mga ulipon sang pagkamadinulunton,” suno sa ginsiling sang Cristianong si apostol Pedro. (2 Ped. 2:19) Nagakabuhi sila “suno sa sistema sang mga butang sini nga kalibutan, suno sa manugdumala sang awtoridad sang hangin,” si Satanas nga Yawa.​—Efe. 2:2.

² Ang isa ka awtor nagpabugal: “Wala sing labot ang akon mga ginikanan ukon ang pari ukon ang ministro ukon ang Biblia sa akon desisyon.” Matuod nga may pila nga nagaabuso sang ila awtoridad kag indi nagakadapat nga tumanon naton. Apang nagakahulugan bala nga indi na gid kita magpasakop sa awtoridad? Ang sabat makita sing maathag sa uluhan sang mga pamantalaan. Makapasubo nga ang kalabanan wala nagbaton sing panuytoy bisan pa sa tion nga kinahanglan gid nila ini.

Ang Aton Pagtamod sa Awtoridad

3. Paano ginpakita sang mga Cristiano sa unang siglo nga indi tanan nga kasuguan sang tawhanon nga awtoridad ginatuman nila?

³ Subong mga Cristiano, tuhay ang aton tindog sang sa kalibutan. Indi buot silingon nga ginatuman naton ang tanan nga ginasugo sa aton. Kon kaisa dapat gani naton pangindian ang ginasugo  sa aton bisan pa sang mga may awtoridad. Amo man sini ang ginhimo sang mga Cristiano sang unang siglo. Halimbawa, sang ginpauntat ang mga apostoles sa pagbantala, wala nila gintuman ang mataas nga mga saserdote kag ang mga may awtoridad nga katapo sang Sanhedrin. Wala nila ginbiyaan ang ila hilikuton agod lamang tumanon ang tawhanon nga awtoridad.​—Basaha ang Binuhatan 5:27-29.

4. Ano nga mga halimbawa gikan sa Hebreong Kasulatan ang nagapakita nga madamo sa mga katawhan sang Dios ang wala nagasunod sa ginahimo sang kalabanan?

⁴ Madamo nga alagad sang Dios antes ni Jesus ang naghimo man sini. Halimbawa, si Moises “nangindi nga tawgon nga anak sang anak nga babayi ni Paraon, nga ginpasulabi pa nga pintasan upod sa katawhan sang Dios,” bisan pa nga ang paghimo sini nagresulta sa “kaakig sang hari.” (Heb. 11:24, 25, 27) Ginpamatukan ni Jose ang pagsulay sang asawa ni Potifar, bisan nahibaluan niya nga may awtoridad ini sa pagbalos sa iya. (Gen. 39:7-9) “Gintuyo ni Daniel sa iya tagiposoon nga indi sia magpadagta sang manamit nga pagkaon sang hari,” bisan pa nga ang iya pamat-od indi mahapos para sa isa ka panguna nga opisyal sang korte sang Babilonia. (Dan. 1:8-14) Suno sa maragtas, ini nga mga halimbawa nagapakita nga nangin malig-on ang tindog sang katawhan sang Dios sa kon ano ang husto, bisan ano man ang mangin resulta. Wala nila ginatuman ang mga tawo agod pahamut-an lamang sila; amo man dapat kita.

5. Paano nangin tuhay ang aton pagtamod sa awtoridad sangsa iya sang kalibutan ?

⁵ Ang aton malig-on nga tindog wala nagapakita nga mga batinggilan kita ukon kaangay sang mga nagarebelde sa panguluhan. Sa baylo, mas determinado kita nga tumanon ang awtoridad ni Jehova sangsa iya sang tawo. Kon magsumpakilay ang kasuguan sang tawo kag ang kasuguan sang Dios, wala na kita nabudlayan sa pagpili kon sin-o ang aton dapat sundon. Kaangay sang mga apostoles sang unang siglo, ginatuman naton ang Dios sa baylo sang mga tawo.

6. Ngaa maayo gid pirme nga tumanon ang mga kasuguan ni Jehova?

⁶ Ano ang makabulig sa aton nga magpasakop sa awtoridad sang Dios? Nagaugyon kita sa ginasiling sang Hulubaton 3:5, 6: “Salig sa GINOO sa bug-os mo nga tagiposoon, kag dili magsandig sa imo kaugalingon nga paghangup. Sa tanan mo nga dalanon kilalaha sia, kag magatuytuy sia sa imo mga banas.” Nagapati kita nga ang mga ginapatuman sang Dios sa aton para gid sa aton kaayuhan. (Basaha ang Deuteronomio 10:12, 13) Sa pagkamatuod, ginlaragway ni Jehova sa mga Israelinhon ang iya kaugalingon subong ang “nagatudlo sa imo sa kapuslanan, nga nagatuytuy sa imo sa dalanon nga laktan mo.” Nian sia nagdugang: “Kabay kuntani nga nagpamati ka sa akon mga sogo! Niyan ang imo paghidait nanginsubong kuntani sang suba, kag ang imo pagkamatarung nanginsubong sang mga balud sang dagat.” (Isa. 48:17, 18) Ginasaligan naton ining mga pinamulong. Kumbinsido kita nga para gid sa aton kaayuhan ang pagtuman sa mga kasuguan sang Dios.

7. Ano ang dapat naton nga himuon kon indi naton mahangpan sing bug-os ang sugo gikan sa Pulong sang Dios?

⁷ Nagapasakop kita sa awtoridad ni Jehova kag ginatuman sia bisan indi naton mahangpan sing bug-os ang rason sang ginapatuman niya gikan sa iya Pulong. Indi ini pagkapanatiko kundi pagsalig. Ginapakita sini ang tudok gid nga pagsalig nga nahibaluan ni Jehova kon ano ang pinakamaayo para sa aton. Kon ginatuman naton ang Dios, nagapakita nga ginahigugma naton sia, kay si apostol Juan nagsulat: “Amo ini ang kahulugan sang gugma sa Dios, nga tumanon naton ang iya mga sugo.” (1 Juan 5:3) May isa pa gid ka bahin sang aton pagtuman nga indi naton dapat pagpasapayanan.

Paghanas sang Aton Ikasarang sa Paghantop

8. Paano ang ‘nahanas naton nga ikasarang sa paghantop’ naangot sa pagpasakop naton sa awtoridad ni Jehova?

⁸ Ginasugiran kita sang Biblia nga dapat ang aton ‘ikasarang sa paghantop nahanas sa pagkilala sang maayo kag malain.’ (Heb. 5:14) Kon amo, ang aton tulumuron indi ang pagtuman lang sang kasuguan sang Dios nga wala ini ginabinagbinag. Sa baylo, luyag naton nga “makilala ang maayo kag malain” pasad sa mga talaksan ni Jehova. Luyag naton nga mapamatud-an ang kaalam sa mga dalanon ni Jehova, agod makasiling  kita subong sang gintuaw sang salmista: “Ang imo kasogoan yari sa sulud sang akon tagiposoon.”​—Sal. 40:8.

9. Paano naton mapasibu ang aton konsiensia sa mga talaksan ni Jehova, kag ngaa importante ini?

⁹ Kaangay sang salmista, agod maapresyar naton ang kasuguan sang Dios, dapat naton pamalandungan ang aton ginabasa sa Biblia. Halimbawa, kon may matun-an kita nga ginapatuman ni Jehova, mahimo kita makapamangkot: ‘Ngaa maalamon ining sugo ukon prinsipio? Ngaa maayo gid nga sundon ko ini? Ano ang malain nga nadangatan sang mga wala magsapak sa sini nga laygay sang Dios?’ Kon ginapasibu naton ang aton konsiensia sa mga dalanon ni Jehova, mahimo nga makadesisyon kita suno sa iya kabubut-on. ‘Padayon naton nga mahantop kon ano ang kabubut-on ni Jehova’ kag tumanon ini. (Efe. 5:17) Apang, indi ini pirme mahapos.

Ginatinguhaan ni Satanas nga Pakadiutayon ang Awtoridad sang Dios

10. Sa ano nga paagi ginatinguhaan ni Satanas nga pakadiutayon ang awtoridad sang Dios?

¹⁰ Madugay na nga ginatinguhaan ni Satanas nga pakadiutayon ang awtoridad sang Dios. Ang iya espiritu sang pagkaindependiente lapnag sa madamo nga paagi. Halimbawa, talupangda ang di-pagtahod sa kahimusan sang Dios tuhoy sa pag-asawahay. Ang iban nagapakamaayo nga magpuyopuyo lang, samtang ang iban naman nagapadihot agod makabulag sa ila mga tiayon. Mahimo sila mag-ugyon sa ginsiling sang isa ka bantog nga aktres: “Indi puede nga isa lang ang imo tiayon.” Sia nagdugang: “Wala ako sing may nahibaluan nga nangin mainunungon sa iya tiayon ukon maluyag nga mangin amo sini.” Nagahinumdom sang pagbulagay nila sang iya asawa, ang isa ka popular nga aktor nagsiling man: “Ambot kon kinaugali gid man naton nga magpabilin sa isa lang ka tiayon tubtob kita nagakabuhi.” Dapat pamangkuton naton ang aton kaugalingon, ‘Ginabaton ko bala ang awtoridad ni Jehova tuhoy sa pag-asawahay, ukon naimpluwensiahan bala sang kalibutan ang akon panghunahuna nga ang pag-asawahay indi permanente?’

11, 12. (a) Ngaa mahimo mabudlay para sa mga pamatan-on nga magpasakop sa awtoridad ni Jehova? (b) Isugid ang isa ka eksperiensia nga nagapakita nga kabuangan gid ang pagsikway sa mga kasuguan kag mga prinsipio ni Jehova.

¹¹ Isa ka bala ka pamatan-on sa organisasyon ni Jehova? Kon amo, luyag gid ni Satanas nga hunahunaon mo nga indi maayo para sa imo ang awtoridad ni Jehova. Mahimo maghinakop ka nga ang mga kasuguan sang Dios mabudlay tumanon bangod sang “mga kailigbon nga kinaandan sa pagkapamatan-on” kag pag-ipit sang imo mga katubotubo. (2 Tim. 2:22) Indi ini pagtuguti nga matabo. Tinguhai nga mapamatud-an nga maalamon gid ang pagsunod sa mga talaksan sang Dios. Halimbawa, ang Biblia nagasiling sa imo nga ‘malagyo sa pagpakighilawas.’ (1 Cor. 6:18) Sa sini, pamangkuta liwat ang imo kaugalingon: ‘Ngaa maalamon ini nga sugo? Ano nga mga benepisyo ang akon matigayon kon tumanon ko ini?’ Mahimo nga may kilala ka nga ginsikway ang laygay sang Dios kag nag-antos gid. Malipayon bala sila karon? Mas maayo bala ang ila kahimtangan karon kon ipaanggid sang nagapakig-angot pa sila sa organisasyon ni Jehova? Nasapwan bala nila ang kalipay nga wala matigayon sang iban nga alagad sang Dios?​—Basaha ang Isaias 65:14.

¹² Binagbinaga ang komento kasan-o lang sang Cristiano nga si Sharon: “Bangod ginsikway ko ang kasuguan ni Jehova, natapikan ako sang makamamatay nga AIDS. Ginahinumdom ko pirme  ang makalilipay nga mga tinuig sang nagaalagad pa ako kay Jehova.” Narealisar niya nga kabuangan gid ang paglapas sa mga kasuguan ni Jehova kag tani ginpabilihan niya ini. Ang mga kasuguan ni Jehova nagaamlig sa aton. Pagkaligad sang pito ka semana nga ginsiling niya ini, napatay si Sharon. Ang masubo nga eksperiensia ni Sharon nagapakita nga wala sing maayo nga matanyag si Satanas sa mga nangin bahin sining malaut nga sistema. Subong “amay sang kabutigan,” wala niya ginatuman ang iya mga saad, subong sang natabo sa iya saad kay Eva. (Juan 8:44) Sa pagkamatuod, maayo gid nga magpasakop sa awtoridad ni Jehova sa tanan nga tion.

Mag-andam sa Independiente nga Panimuot

13. Sa ano nga kahimtangan dapat kita mag-andam sa independiente nga panimuot?

¹³ Kon nagapasakop sa awtoridad ni Jehova, dapat mag-andam kita sa independiente nga panimuot. Ang matinaastaason nga panimuot mahimo magpabatyag sa aton nga indi na naton kinahanglan ang panuytoy ni bisan sin-o. Halimbawa, mahimo pamatukan naton ang laygay sang mga nagapanguna sa katawhan sang Dios. Kahimusan sang Dios nga ang matutom kag mainandamon nga ulipon nga klase ang magaaman sing espirituwal nga pagkaon sa nagakaigo nga tion. (Mat. 24:45-47) Dapat batunon naton sing mapainubuson nga amo ini ang paagi ni Jehova sa pag-atipan sa iya katawhan karon. Ilugon naton ang matutom nga mga apostoles. Sang ang pila ka disipulo nasandad, si Jesus namangkot sa iya mga apostoles: “Indi man ninyo luyag nga magbiya, indi bala?” Si Pedro nagsabat: “Ginuo, kay sin-o kami makadto? Ikaw ang may mga pinamulong sang kabuhi nga walay katapusan.”​—Juan 6:66-68.

14, 15. Ngaa kinahanglan naton nga tumanon ang mga laygay sang Biblia?

¹⁴ Ang pagpasakop sa awtoridad ni Jehova nagalakip sa pagtuman sang laygay sang Biblia. Halimbawa, ang matutom kag mainandamon nga ulipon nga klase nagalaygay sa aton nga “magpabilin nga nagamata kag nagahupot sang aton kaligdong.” (1 Tes. 5:6) Ini nga laygay nagakaigo gid sa sining katapusan nga mga adlaw kay madamo ang “mahigugmaon sa kaugalingon, mahigugmaon sa kuarta.” (2 Tim. 3:1, 2) Maapektuhan bala kita sining nagalapnag nga mga panimuot? Huo. Mahimo kita mangin materyalistiko ukon magluya sa espirituwal kon unahon naton ang sekular nga mga tulumuron. (Luc. 12:16-21) Busa, maalamon gid nga batunon ang laygay sang Biblia kag likawan ang makagod nga estilo sang pagkabuhi nga lapnag sa kalibutan ni Satanas!​—1 Juan 2:16.

¹⁵ Ang espirituwal nga pagkaon gikan sa matutom kag mainandamon nga ulipon nga klase ginapaalinton sa mga kongregasyon paagi sa gintangdo nga mga gulang. Ang Biblia nagalaygay: “Mangin matinumanon sa mga nagapanguna sa inyo kag mangin mapinasakupon, kay ginabantayan nila ang inyo kalag subong nga sila ang manabat; agod himuon nila ini nga may kalipay kag wala nagapanghayhay, kay makahalit ini sa inyo.” (Heb. 13:17) Buot bala silingon nga ang mga gulang indi na makasala? Indi gid! Mas nahibaluan sang Dios ang ila kakulangan sangsa bisan sin-o nga tawo. Apang ginapaabot niya gihapon nga magpasakop kita sa ila. Ang pagkooperar sa mga gulang bisan indi sila himpit, nagapakita nga nagapasakop kita sa awtoridad ni Jehova.

Ang Importansia sang Pagpaubos

16. Paano naton mapakita ang pagtahod kay Jesus subong Ulo sang Cristianong kongregasyon?

¹⁶ Dapat naton dumdumon nga si Jesus amo ang matuod nga Ulo sang kongregasyon. (Col. 1:18) Amo ini ang isa ka rason kon ngaa dapat magpasakop kita sing mapainubuson sa panuytoy  sang gintangdo nga mga gulang, kag hatagan sila sing ‘daku gid nga pagtahod.’ (1 Tes. 5:12, 13) Siempre pa, mapakita man sang mga gulang nga nagapasakop sila kon mahalungon nila nga ginapaalinton ang mensahe sang Dios sa kongregasyon, indi ang ila kaugalingon nga mga opinyon. ‘Wala sila nagasobra sa mga butang nga nasulat na’ agod pauswagon ang ila personal nga ideya.​—1 Cor. 4:6.

17. Ngaa makatalagam ang pagtinguha sa kaugalingon nga kadayawan?

¹⁷ Ang tanan nga katapo sang kongregasyon dapat mag-andam sa katalagman gikan sa pagtinguha sang kaugalingon nga kadayawan. (Hulu. 25:27) Amo sini ang nangin tugalbong sa isa ka disipulo nga ginpakig-angutan ni apostol Juan. Sia nagsulat: “Si Diotrefes, nga luyag magpulupangulo sa ila, wala nagatahod kag wala nagapamati sa amon. Amo nga kon magkari ako, dumdumon ko ang iya mga buhat nga padayon niya nga ginahimo, nga nagawakal sang malain nga mga pulong tuhoy sa amon.” (3 Juan 9, 10) May leksion kita nga makuha sa sini. Mas maayo gid nga gabuton naton ang bisan ano nga ambisyon nga masapwan naton sa aton kaugalingon. Ang Biblia nagasiling sa aton: “Ang bugal nagauna sa kalaglagan, kag ang palabilabihon nga espiritu nagauna sa pagkapukan.” Dapat batuan sang mga nagapasakop sa awtoridad sang Dios ang siod sang pagkamatinaastaason, kay nagadul-ong ini sa kahuy-anan.​—Hulu. 11:2; 16:18.

18. Ano ang makabulig sa aton nga magpasakop sa awtoridad ni Jehova?

¹⁸ Huo, himua nga tulumuron nga pakigbatuan ang independiente nga panimuot sang kalibutan kag magpasakop sa awtoridad ni Jehova. Sa pulupanag-on, pamalandungi sing maayo ang imo tumalagsahon nga pribilehiyo sa pag-alagad kay Jehova. Nagapakita lang nga ginbuyok ka sang Dios paagi sa iya balaan nga espiritu bangod nangin bahin ka sang iya katawhan. (Juan 6:44) Indi gid pagpasapayani ang imo tindog sa atubangan sang Dios. Panikasugi nga ipakita sa tanan nga bahin sang imo kabuhi nga ginasikway mo ang independiente nga panimuot kag nagapasakop ka sa awtoridad ni Jehova.

Madumduman Mo Bala?

• Ano ang nalakip sa pagpasakop sa awtoridad ni Jehova?

• Paano naangot ang paghanas naton sang aton ikasarang sa paghantop sa pagpasakop sa awtoridad ni Jehova?

• Sa ano nga mga paagi ginatinguhaan ni Satanas nga pakadiutayon ang awtoridad sang Dios?

• Ngaa importante ang pagkamapainubuson sa pagpasakop sa awtoridad ni Jehova?

[Mga Pamangkot sa Pagtinuon]

[Piktyur sa pahina 18]

“Dapat naton tumanon ang Dios subong manuggahom sa baylo sang mga tawo”

[Piktyur sa pahina 20]

Maalamon gid nga sundon ang mga talaksan sang Dios sa tanan nga tion