Mga Butang nga Dapat Naton Palagyuhan

“Kamo nga mga kaliwat sang mga man-ug, sin-o ang nagsiling sa inyo nga makapalagyo kamo sa nagapakari nga kasingkal?”​—MAT. 3:7.

1. Ano ang pila ka halimbawa sang pagpalagyo nga narekord sa Biblia?

ANO ang nagasulod sa imo hunahuna kon mabatian mo ang tinaga nga “palagyo”? Madumduman sang iban ang pagpalagyo sang maambong kag bataon nga si Jose sang ginganyat sia sang asawa ni Potifar nga maghulid sa iya. (Gen. 39:7-12) Mahimo mapensaran sang iban ang pagpalagyo sang mga Cristiano sa Jerusalem sang 66 C.E., kay gintuman nila ang paandam ni Jesus nga: “Kon makita ninyo nga ginalibutan ang Jerusalem sang nagakampo nga kasuldadusan, nian . . . ang mga yara sa Judea magpalagyo sa mga bukid, kag ang mga yara sa sulod niya maggua.”​—Luc. 21:20, 21.

2, 3. (a) Ano ang luyag ipahangop sang pagsabdong ni Juan Bautista sa mga lider sang relihion? (b) Paano ginpabaskog ni Jesus ang paandam nga ginhatag ni Juan?

² Ang ginsambit nga mga halimbawa nagapatuhoy sa literal nga sahi sang pagpalagyo. Sa karon, ang matuod nga mga Cristiano nga makita sa halos tanan nga duta sa bug-os nga kalibutan, kinahanglan nga magpalagyo sa gilayon sa malaragwayon nga paagi. Gingamit ni Juan Bautista ang tinaga nga “palagyo” sa sini nga kahulugan. Nalakip sa mga nagkadto agod makita si Juan amo ang nagapakamatarong sa kaugalingon nga mga Judiyo nga lider sang relihion nga nagapati nga indi na nila kinahanglan maghinulsol. Gintamay nila ang ordinaryo nga mga tawo nga nagapabawtismo bilang simbulo sang paghinulsol. Maisugon nga ginbuyagyag ni Juan ang pagkasalimpapaw sang mga lider sang relihion: “Kamo nga mga kaliwat sang mga man-ug, sin-o ang nagsiling sa inyo nga makapalagyo kamo sa nagapakari nga kasingkal? Kon amo magpakita kamo sang bunga nga takus sa paghinulsol.”​—Mat. 3:7, 8.

³ Wala ginpatuhuyan ni Juan ang literal nga sahi sang pagpalagyo. Ginpaandaman niya ang mga lider sang relihion sa nagapakari nga paghukom, ang adlaw sang kasingkal; ginapahangop niya sa ila nga agod makapalagyo sila ukon maluwas sa sina nga adlaw, kinahanglan nila magpakita sang bunga nga nagapamatuod sang ila paghinulsol. Sang ulihi maisugon nga ginkondenar ni Jesus ang mga lider sang relihion bangod ang ila handum nga magpatay nagapakita nga sa pagkamatuod ang ila amay amo ang Yawa. (Juan 8:44) Ginpabaskog ni Jesus ang paandam ni Juan sang gintawag niya sila nga “kaliwat sang dalitan nga mga man-ug” kag ginpamangkot: “Paano kamo makapalagyo sa paghukom sang Gehenna?” (Mat. 23:33) Ano ang buot silingon ni Jesus sa tinaga nga “Gehenna”?

4. Ano ang buot silingon ni Jesus sang gingamit niya ang “Gehenna”?

⁴ Ang Gehenna isa ka lugar nga nalupyakan sa gua sang pader sang Jerusalem kag dira ginasunog ang mga sagbot kag patay nga mga sapat. Gingamit ni Jesus ang Gehenna bilang simbulo sang kamatayon nga wala sing paglaum. (Tan-awa ang pahina 27.) Sang namangkot siya tuhoy sa pagpalagyo gikan sa Gehenna, nagapakita yadto nga ang mga lider sang relihion bilang isa ka grupo takus gid sa dayon nga kalaglagan.​—Mat. 5:22, 29.

5. Suno sa kasaysayan, paano natuman ang mga paandam ni Jesus kag ni Juan?

⁵ Gindugangan sang Judiyo nga mga lider sang relihion ang ila mga sala sang ginhingabot nila si Jesus kag ang iya mga sumulunod. Sang ulihi, subong sang ginpaandam ni Jesus kag ni Juan, nag-abot ang adlaw sang kasingkal sang Dios. Sa sadto nga hitabo, ang “nagapakari nga kasingkal” natabo lamang sa Jerusalem kag Judea, gani mahimo gid nga makapalagyo sa literal nga paagi. Natabo ini sang ginguba sang Romanong mga hangaway ang Jerusalem kag ang templo sini sang 70 C.E. Wala pa gid naeksperiensiahan sang Jerusalem yadto nga “kapipit-an.” Madamo ang ginpamatay ukon ginbihag. Nagapatimaan ini sang mas daku pa gid nga kalaglagan nga nagahulat sa mga nagapangangkon nga Cristiano kag sa iban nga mga relihion.​—Mat. 24:21.

 Ang Dapat Palagyuhan nga Kasingkal sa Palaabuton

6. Ano ang nagluntad sa unang Cristianong kongregasyon?

⁶ Ang iban sa unang mga Cristiano nangin apostata kag may mga nagsunod sa ila. (Binu. 20:29, 30) Sang nagakabuhi pa ang mga apostoles ni Jesus, nangin subong sila sang “pugong” batok sa sinang apostasya, apang sang nagkalamatay sila, nagluntad ang madamong butig nga sekta sang Cristiano. Sa karon, ginatos ka relihion ang nagapangangkon nga sila mga Cristiano, apang nagasumpakilay ang ila mga panudlo. Gintagna sang Biblia ang pagluntad sang klero sang Cristiandad, ginlaragway sila bilang isa ka grupo subong “ang tawo sang pagkamalinapason” kag “ang anak sang kalaglagan. . . nga pagalaglagon ni Ginuong Jesus . . . kag pagadulaon paagi sa pagpadayag sang iya presensia.”​—2 Tes. 2:3, 6-8.

7. Ngaa ang ekspresyon nga “tawo sang pagkamalinapason” nagakaigo para sa klero sang Cristiandad?

⁷ Malinapason ang mga klero sang Cristiandad kay ginpatalang nila ang minilyon paagi sa pagpasanyog sang mga panudlo, kapiestahan kag pamatasan nga wala nahisanto sa Biblia. Kaangay sang mga lider sang relihion nga ginpamatbatan ni Jesus, ang modernong mga sumilimba nga bahin sang “anak sang kalaglagan” pagalaglagon nga wala na sing paglaum sang pagkabanhaw. (2 Tes. 1:6-9) Ano naman ang nagahulat sa mga ginpatalang sang mga klero sang Cristiandad kag sang iban nga porma sang butig nga relihion? Agod masabat naton ini nga pamangkot, binagbinagon naton ang mga hitabo antes sang mas maaga nga pagkapukan sang Jerusalem sadtong 607 B.C.E.

“Magpalagyo Gikan sa Tunga sang Babilonia”

8, 9. (a) Ano ang matagnaon nga mensahe ni Jeremias tuhoy sa mga Judiyo nga bihag sang Babilonia? (b) Sang masakop na sang mga Medianhon kag mga Persianhon ang Babilonia, ano nga sahi sang pagpalagyo ang ila mahimo?

⁸ Gintagna ni propeta Jeremias ang pagkapukan sang Jerusalem nga natabo sang 607 B.C.E. Nagsiling sia nga ang katawhan sang Dios bihagon apang pabalikon sa ila dutang natawhan pagkatapos sang “setenta ka tuig.” (Jer. 29:4, 10) May importante nga mensahe si Jeremias para sa mga Judiyo nga bihag sa Babilonia; dapat nga magpabilin sila nga wala nadagtaan sang butig nga relihion nga ginahimo sa Babilonia. Busa handa sila sa pagbalik sa Jerusalem kag sa pagpasag-uli sang putli nga pagsimba sa gintalana nga tion. Natabo ini wala madugay sang ginsakop sang mga Medianhon kag sang mga Persianhon ang Babilonia sang 539 B.C.E. Nagmando ang hari sang Persia nga si Ciro II nga pabalikon ang mga Judiyo sa Jerusalem kag patindugon liwat ang templo ni Jehova didto.​—Esd. 1:1-4.

⁹ Ginpanginpuslan sang linibo ka mga Judiyo ining kahigayunan kag nagpauli. (Esd. 2:64-67) Paagi sini, gintuman nila ang matagnaon nga sugo ni Jeremias sa literal nga kahulugan kay nagpalagyo sila pakadto sa isa ka lugar. (Basaha ang Jeremias 51:6, 45, 50.) Indi tanan nga mga Judiyo ang makalakbay sing malawig pabalik sa Jerusalem kag Juda bangod sang ila mga kahimtangan. Mahimo matigayon sang mga nagpabilin sa Babilonia, kaangay sang tigulang na nga si propeta Daniel, ang pagpakamaayo ni Jehova kon bug-os tagipusuon nila nga suportahan ang putli nga pagsimba sa Jerusalem  kag magpabilin sila nga nahamulag sa butig nga pagsimba sang Babilonia.

10. Responsable sa anong “makangilil-ad nga mga butang” ang “Babilonia nga Daku”?

¹⁰ Sa karon, binilyon ang nagapakigbahin sa nagkalainlain nga porma sang butig nga relihion nga naghalin pa sa dumaan nga Babilonia. (Gen. 11:6-9) Sa kabug-usan, gintawag ining mga relihion nga “Babilonia nga Daku, ang iloy sang makihilawason nga mga babayi kag sang makangilil-ad nga mga butang sang duta.” (Bug. 17:5) Madugay na nga ginasuportahan sang butig nga relihion ang gumalahom sang pulitika sa sini nga kalibutan. Ang pila sa “makangilil-ad nga mga butang” nga responsable ang butig nga relihion amo ang mga inaway nga nagresulta sa ginatos ka milyon nga “ginpatay sa duta.” (Bug. 18:24) Ang isa pa sa “makangilil-ad nga mga butang” amo ang mga buhat sang pedopilya kag iban pa nga porma sang seksuwal nga imoralidad nga ginhimo sang mga klero kag gintolerar man ini sang mga may awtoridad sa simbahan. Walay duhaduha nga sa dili madugay dulaon ni Jehova nga Dios ang butig nga relihion diri sa duta.​—Bug. 18:8.

11. Samtang wala pa malaglag ang Babilonia nga Daku, ano ang obligasyon sang matuod nga mga Cristiano?

¹¹ Obligado ang matuod nga Cristiano nga nakahibalo sining mga butang nga paandaman ang katapo sang Babilonia nga Daku. Ginahimo ini nga pagpaandam paagi sa pagpanagtag sang Biblia kag pasad sa Biblia nga mga literatura nga ginbalhag sang “matutom kag mainandamon nga ulipon,” nga gintangdo ni Jesus sa pag-aman sang espirituwal nga “pagkaon sa nagakaigo nga tion.” (Mat. 24:45) Kon may magpakita sing interes sa mensahe sang Biblia, may mga kahimusan nga ginahimo agod mabuligan sila paagi sa pagtuon sini. Kabay nga makita nila nga kinahanglan na sila nga “magpalagyo gikan sa Babilonia” samtang indi pa ulihi ang tanan.​—Bug. 18:4.

Magpalagyo sa Idolatriya

12. Ano ang pagtamod sang Dios sa pagsimba sa mga imahen kag diosdios?

¹² Ang isa pa sa makangilil-ad nga buhat nga kinaandan sa Babilonia nga Daku amo ang pagsimba sa mga imahen kag mga diosdios. Ginatawag ini sang Dios nga “makangilil-ad nga mga butang” kag “kangil-aran nga mga diosdios.” (Deut. 29:17, NW) Ang tanan nga luyag pahamut-an ang Dios dapat maglikaw sa idolatriya, nahisanto sa ginsiling sang Dios nga: “Ako si Jehova. Ina amo ang akon ngalan; kag indi ko pag-ihatag sa iban ang akon himaya, ukon ang akon kadayawan sa mga larawan nga tinigban.”​—Isa. 42:8, NW.

13. Anong malalangon nga mga porma sang idolatriya ang dapat naton palagyuhan?

¹³ Ginabuyagyag man sang Biblia ang malalangon nga mga porma sang idolatriya. Halimbawa, gintawag sini ang pagkamahamkunon nga “idolatriya.” (Col. 3:5) Ang pagkamahamkunon nagakahulugan sang paghandum sa ginadumilian, subong sang ginapanag-iyahan sang iban nga tawo. (Ex. 20:17) Ang anghel nga nangin Satanas kag Demonyo mahamkunon nga naghandum nga simbahon sia kag mangin kaangay sang Labing Mataas. (Luc. 4:5-7) Nagdul-ong ini sa iya nga magrebelde batok kay Jehova kag nagganyat kay Eva nga handumon ang butang nga ginadumilian sang Dios. Nakahimo man sing idolatriya si Adan bangod gintugutan niya ang iya makagud nga handum nga makaupod ang iya asawa sa baylo nga tumanon ang iya mahigugmaon nga langitnon nga Amay. Sa kabaliskaran, ang tanan nga luyag makapalagyo ukon maluwas sa adlaw sang kasingkal sang Dios dapat maghatag sa iya sing eksklusibo nga debosyon kag batuan ang ano man nga sahi sang pagkamahamkunon.

 “Magpalagyo sa Pagpakighilawas”

14-16. (a) Ngaa nangin maayo nga halimbawa si Jose? (b) Ano ang dapat naton himuon kon nagabatyag kita sing mahigko nga handum sa sekso? (c) Paano kita mangin madinalag-on sa aton pagpalagyo gikan sa pagpakighilawas?

¹⁴ Basaha ang 1 Corinto 6:18. Sang ginsulay sang asawa ni Potifar si Jose, literal sia nga nagpalagyo. Nangin maayo gid sia nga halimbawa para sa mga minyo kag di-minyo nga mga Cristiano! Maathag nga nadihon ang konsiensia ni Jose sa mga hitabo sang una nga nagapakita kon paano gintamod sang Dios ang imoralidad. Kon luyag naton tumanon ang sugo nga “magpalagyo sa pagpakighilawas,” dapat naton likawan ang mga butang nga mahimo makapukaw sa aton seksuwal nga mga handum sa iban magluwas sa aton tiayon. Ginsilingan kita: “Patya ninyo ang mga bahin sang inyo lawas . . . may kaangtanan sa pagpakighilawas, kahigkuan, kailigbon sa sekso, makahalalit nga handum, kag pagkamahamkunon, nga isa ka idolatriya. Bangod sini nga mga butang ang kasingkal sang Dios magaabot.”​—Col. 3:5, 6.

¹⁵ Talupangda nga “ang kasingkal sang Dios magaabot.” Madamo sa kalibutan ang nagapalambo sing di-nagakaigo nga mga huyog sa sekso kag ginapaayunan lamang nila ini. Gani, kita nga mga Cristiano dapat nga mangamuyo sa Dios nga buligan kita sang iya balaan nga espiritu agud mabatuan naton ang seksuwal nga mga kailigbon. Dugang pa, ang pagtuon sa Biblia, pagtambong sa Cristianong mga miting, kag pagpakigbahin sa pagbantala sang maayong balita sa aton mga kaingod makabulig sa aton nga ‘magpadayon sa paglakat suno sa espiritu.’ Busa “indi gid [kita] magahimo sang undanon nga kailigbon.”​—Gal. 5:16.

¹⁶ Pat-od gid nga kon nagalantaw kita sing pornograpiya, wala kita “[nagalakat] suno sa espiritu.” Ang tagsa ka Cristiano dapat man magbantay batok sa pagbasa, pagtan-aw, ukon sa pagpamati sa mga materyal nga makapukaw sa sekso. Sing kaanggid, dapat likawan sang “balaan nga katawhan” sang Dios ang mga lahog ukon ang mga istoryahanay tuhoy sa sini. (Efe. 5:3, 4) Sa sining paagi ginapakita naton sa aton mahigugmaon nga Amay nga luyag gid naton makapalagyo sa nagahilapit nga kasingkal kag makapuyo sa matarong nga bag-ong kalibutan.

Magpalagyo sa “Gugma sa Kuarta”

17, 18. Ngaa dapat magpalagyo kita sa “gugma sa kuarta”?

¹⁷ Sa una niya nga sulat kay Timoteo, ginpatalupangod ni Pablo ang pila ka mga prinsipio nga dapat magpahulag sa mga ulipon nga Cristiano, nga ang iban sa ila mahimo naglaum nga makabenepisyo sila sa materyal bangod Cristiano ang ila mga amo. Ang iban mahimo nagtinguha nga gamiton ang mga kauturan para sa ila makagod nga benepisyo. Nagpaandam si Pablo batok sa mga “nagahunahuna . . . nga ang diosnon nga debosyon isa ka paagi nga makaganar [sa materyal].” Mahimo nga ang gamot sang problema amo ang “gugma sa kuarta,” nga may malain nga epekto kay bisan sin-o, manggaranon man ukon imol.​—1 Tim. 6:1, 2, 5, 9, 10.

¹⁸ May madumduman ka bala nga mga halimbawa sang karakter sa Biblia nga naguba ang ila relasyon sa Dios bangod sa ila “gugma sa kuarta” ukon gugma sa mga indi kinahanglanon nga mga butang nga mabakal sang kuarta? (Jos. 7:11, 21; 2 Har. 5:20, 25-27) Ginhingyo ni Pablo si Timoteo: “Ikaw, O tawo sang Dios, palagyo ka sa sini nga mga butang. Kag tinguhai nga ipakita ang pagkamatarong, diosnon nga debosyon, pagtuo, gugma, pagbatas, kalulo.” (1 Tim. 6:11) Ang tanan nga luyag makalampuwas sa nagapakari nga adlaw sang kasingkal kinahanglan gid nga magsunod sa sini nga paandam.

“Palagyo Ka Gikan sa mga Kailigbon nga Kinaandan sa Pagkapamatan-on”

19. Ano ang kinahanglanon sang tanan nga pamatan-on?

¹⁹ Basaha ang Hulubaton 22:15. Madali mapatalang ang isa ka pamatan-on bangod sang kabuangan sa iya tagipusuon. Mapamatukan ini paagi sa disiplina nga napasad sa Biblia. Madamo nga mga pamatan-on ang nangita kag nagsunod sa mga prinsipio nga nasulat sa Biblia bisan pa nga indi mga  Saksi ang ila mga ginikanan. Nakabenepisyo man ang iban sa maalamon nga laygay sang mga hamtong sa espirituwal nga mga kauturan sa kongregasyon. Bisan sin-o man ang naghatag sing laygay nga napasad sa Biblia, ang pagtuman sa sini makahatag sa imo sing kalipay sa karon kag sa palaabuton.​—Heb. 12:8-11.

20. Paano makapangayo sing bulig ang mga pamatan-on agod makapalagyo sila gikan sa malain nga mga handum?

²⁰ Basaha ang 2 Timoteo 2:20-22. Madamo sa mga pamatan-on nga nakulangan sing mapuslanon nga paghanas ang nangin biktima sang mga kabuangan kaangay sang pagkamapaindis-indison, pagka-maibugon, pagpakighilawas, paghigugma sa kuarta, kag sa pag-una sa kalingawan. Ginapakita sini ang “kailigbon nga kinaandan sa pagkapamatan-on” nga ginapalig-on sang Biblia nga palagyuhan naton. Ang pagpalagyo sa sini nagakinahanglan nga ang Cristianong pamatan-on dapat magbantay gikan sa makahalalit nga mga impluwensia, sa diin man ini maghalin. Ang makabulig gid sa aton amo ang laygay sang Dios nga panikasugan ang diosnon nga mga kinaiya “upod sa mga nagapanawag sa Ginuo gikan sa matinlo nga tagipusuon.”

21. Ano ang matahom nga saad ang ginhatag ni Jesus para sa iya tulad karnero nga mga sumulunod?

²¹ Bata man kita ukon tigulang, ang pagpangindi nga mamati sa mga tawo nga luyag magpatalang sa aton nagapakita nga luyag naton malakip upod sa mga tulad karnero nga mga sumulunod ni Jesus nga “magapalagyo sa . . . tingog sang mga dumuluong.” (Juan 10:5) Apang, ang pagpalagyo sa adlaw sang kasingkal sang Dios nagakinahanglan sang mas labi pa sangsa pagpalagyo sa makahalalit nga mga butang. Dapat man naton tinguhaan ang positibo nga mga kinaiya. Ang masunod nga artikulo magabinagbinag sang pito sining mga kinaiya. May maayo kita nga rason agod usisaon pa gid ini, kay may matahom nga saad si Jesus: “Hatagan ko [ang akon mga karnero] sing kabuhi nga walay katapusan, kag indi gid sila malaglag, kag wala sing magaagaw sa ila sa akon kamot.”​—Juan 10:28.

Ano ang Imo Sabat?

• Ano nga paandam ang ginhatag ni Jesus sa mga lider sang relihion?

• Ano nga makatalagam nga sitwasyon ang ginaatubang sang minilyon karon?

• Anong malalangon nga mga porma sang idolatriya ang dapat naton palagyuhan?

[Mga Pamangkot sa Pagtinuon]

[Mga piktyur sa pahina 8, 9]

Ano ang nagasulod sa imo hunahuna kon mabatian mo ang tinaga nga “palagyo”?