Mga Kinaiya nga Dapat Naton Tinguhaan
Mga Kinaiya nga Dapat Naton Tinguhaan
“Tinguhai nga ipakita ang pagkamatarong, diosnon nga debosyon, pagtuo, gugma, pagbatas, [kag] kalulo.”—1 TIM. 6:11.
1. Iilustrar ang kahulugan sang tinaga nga “pagtinguha.”
ANO ang mahunahuna mo kon makabati ka sang tinaga nga “pagtinguha”? Mahimo nga hunahunaon mo ang panikasog nga nadalahig sa sini. Halimbawa, sang panahon ni Moises, ‘ginlagas’ sang Egiptohanon nga mga hangaway ang mga Israelinhon. Daku gid ang ila ‘pagtinguha’ nga maabtan ang mga Israelinhon apang, nagkalamatay sila sa Pula nga Dagat. (Ex. 14:23) Ukon mahimo madumduman mo nga sa dumaan nga Israel, yara sa katalagman ang kabuhi sang isa nga nakapatay sing di-hungod. Kinahanglan ang ‘pagtinguha’ agod makadangat sia gilayon sa isa sa anom ka siudad nga dalangpan kay “basi kon ang manugtimalus sang dugo maglagas sa nakapatay sing tawo samtang nagasingkal ang iya tagiposoon kag maabut sia . . .kag sakiton sia sing ikamatay.”—Deut. 19:6.
2. (a) Ano nga padya ang gintanyag sang Dios nga tinguhaan sang pila ka Cristiano? (b) Ano nga paglaum ang gintanyag ni Jehova para sa kalabanan nga mga Cristiano karon?
2 Tuhay sa sini nga mga halimbawa sa Biblia, binagbinaga ang positibo nga panimuot ni apostol Pablo: “Nagatinguha ako padulong sa lalambuton tungod sa padya nga langitnon nga pagtawag sang Dios paagi kay Cristo Jesus.” (Fil. 3:14) Ginapakita sang Biblia nga ang 144,000 ka hinaplas nga Cristiano, lakip na si Pablo, padyaan sing langitnon nga kabuhi. Mangin kaupod sila ni Jesucristo sa iya Milenyo nga Paggahom sa duta. Ining pangagda sang Dios nga dapat nila tinguhaan, isa gid ka dalayawon nga lalambuton! Apang, para sa kalabanan nga mga Cristiano karon, tuhay ang ila paglaum ukon lalambuton. Mahigugmaon nga ginatanyag sa ila ni Jehova ang kabuhi nga walay katapusan kag himpit nga panglawas sa paraiso sa duta nga nadula anay nanday Adan kag Eva.—Bug. 7:4, 9; 21:1-4.
3. Paano naton mapakita ang apresasyon sa wala tupong nga kaayo sang Dios?
3 Bisan pa tinguhaan sang makasasala nga katawhan nga himuon ang matarong, indi nila matigayon ang kabuhi nga walay katapusan kay di-himpit sila. (Isa. 64:6) Mangin posible lang ini kon magpakita sila sing pagtuo sa mahigugmaon nga aman sang Dios para sa kaluwasan paagi kay Jesucristo. Paano naton mapakita ang aton apresasyon sa wala tupong nga kaayo sang Dios? Ang isa ka paagi amo ang pagtuman sini nga sugo: “Tinguhai nga ipakita ang pagkamatarong, diosnon nga debosyon, pagtuo, gugma, pagbatas, [kag] kalulo.” (1 Tim. 6:11) Ang pagbinagbinag sini nga mga kinaiya makabulig sa tagsa sa aton nga tinguhaan pa gid ini “sing labi pa.”—1 Tes. 4:1.
“Tinguhai nga Ipakita ang Pagkamatarong”
4. Ngaa mapat-od naton nga importante ang pagtinguha sang “pagkamatarong,” kag ano nga mga tikang ang dapat himuon?
4 Sa iya duha ka sulat kay Timoteo, una nga ginhinambitan ni apostol Pablo ang “pagkamatarong” sa tanan nga mga kinaiya nga dapat tinguhaan. (1 Tim. 6:11; 2 Tim. 2:22) Dugang pa, ang Biblia sulitsulit man nga nagapalig-on sa aton nga tinguhaan ang pagkamatarong. (Hulu. 15:9; 21:21; Isa. 51:1) Ang una nga paagi nga mahimo ini amo “ang pagkuha sing ihibalo tuhoy sa lamang matuod nga Dios, kag tuhoy sa isa nga [iya] ginpadala, si Jesucristo.” (Juan 17:3) Ang pagtinguha sa pagkamatarong magapahulag man sa isa nga hinulsulan ang nagligad niya nga mga sala kag “magliso” agod himuon ang kabubut-on sang Dios.—Binu. 3:19.
5. Ano ang dapat naton himuon agod matigayon kag mahuptan ang matarong nga tindog sa Dios?
5 Minilyon ang nagtinguha gid sing pagkamatarong kag nagdedikar sang ila kabuhi kay Jehova paagi sa pagpabawtismo sa tubig. Kon ikaw isa na ka bawtismado nga Cristiano, ginapakita bala sang imo pagkabuhi nga padayon mo nga ginatinguhaan ang pagkamatarong? Ang isa ka bahin sini amo ang imo paghantop sa ginasiling sang Biblia tuhoy sa “maayo kag malain” kon nagahimo ka sing importante nga mga desisyon. (Basaha ang Hebreo 5:14.) Halimbawa, kon ikaw isa ka di-minyo nga Cristiano kag yara na sa husto nga pangidaron para magminyo, ginalikawan mo bala ang romantiko nga pagpakigsuod sa indi bawtismado nga Cristiano? Dapat lang, kon ginatinguhaan mo nga ipakita ang pagkamatarong.—1 Cor. 7:39.
6. Ano ang nalakip sa matuod nga pagtinguha sa pagkamatarong?
6 Ang pagkamatarong tuhay sa nagapakamatarong sa kaugalingon ukon “maglakas katarung.” (Man. 7:16) Nagpaandam si Jesus batok sa pakitakita nga sahi sang pagkamatarong para dayawon sang iban. (Mat. 6:1) Ang matuod nga pagtinguha sa pagkamatarong nagahalin sa tagipusuon, nga nagatadlong sang sayop nga mga panghunahuna, panimuot, motibo, kag handum. Kon padayon naton nga panikasugan ini, mahimo malikawan naton ang serioso nga mga sala. (Basaha ang Hulubaton ; ipaanggid ang 4:23Santiago 1:14, 15.) Dugang pa, pakamaayuhon kag buligan kita ni Jehova nga tinguhaan ang iban pa nga Cristianong mga kinaiya.
“Tinguhai nga Ipakita . . . ang Diosnon nga Debosyon”
7. Ano ang “diosnon nga debosyon”?
7 Ang debosyon nagalakip sang hanuot nga dedikasyon kag pagkamainunungon. Suno sa isa ka diksionaryo tuhoy sa Biblia, ang Griegong tinaga nga ginbadbad “diosnon nga debosyon” nagakahulugan sing “mapuslanon kag mahalungon nga pagtinguha nga huptan ang kahadlok sa Dios.” Napaslawan gid ang mga Israelinhon nga ipakita ina nga debosyon bangod sang ila mga paglapas sa tapos sila ginhilway sang Dios gikan sa Egipto.
8. (a) Ano nga pamangkot ang nag-utwas sang nagpakasala si Adan? (b) Paano ginpahayag ang sabat sa sining “sagrado nga likom”?
8 Linibo ka tuig na ang nagligad sugod sang nagpakasala ang himpit nga tawo nga si Adan, nag-utwas ini nga pamangkot, “Mahuptan ayhan sang mga tawo ang himpit nga diosnon nga debosyon?” Sa sulod sang mga siglo, wala gid sing makasasala nga tawo nga nagkabuhi nga may himpit nga diosnon nga debosyon. Apang, ginpahayag ni Jehova ang sabat sa sining “sagrado nga likom” sa iya nagakaigo nga tion. Ginsaylo niya ang kabuhi sang iya bugtong nga Anak gikan sa langit agod mabun-ag subong himpit nga tawo paagi kay Maria. Ginpakita ni Jesus ang hanuot nga dedikasyon kag ang daku nga pagkamainunungon sa Dios sa iya bug-os nga kabuhi tubtob sa iya makahuluya nga kamatayon. Ang iya mga pangamuyo nagapakita man sang iya daku nga pagtahod sa iya mahigugmaon nga Amay. (Mat. 11:25; Juan 12:27, 28) Gani, gin-inspirar ni Jehova si Pablo nga gamiton ang “diosnon nga debosyon” sa paglaragway sang huwaran nga pagkabuhi ni Jesus.—Basaha ang 1 Timoteo 3:16.
9. Paano naton ginatinguhaan nga ipakita ang diosnon nga debosyon?
9 Bangod makasasala kita, indi naton mapadayag ang himpit nga diosnon nga debosyon. Apang, puede naton ini tinguhaan nga mapakita paagi sa pagsunod sa huwaran ni Cristo. (1 Ped. 2:21) Sa amo, indi kita mangin kaangay sang mga salimpapaw nga “may dagway sang diosnon nga debosyon apang nagapanghiwala sang gahom sini.” (2 Tim. 3:5) Apang, indi buot silingon nga ang matuod nga diosnon nga debosyon wala sing kaangtanan sa aton panagway. Importante gid ini. Halimbawa, nagapili man kita sing trahe para sa kasal ukon nagahunahuna kita kon ano ang aton suksukon kon magpamalaklon, dapat ang aton panagway nagahisanto pirme sa aton ginasiling nga kita “nagasimba sa Dios.” (1 Tim. 2:9, 10) Kinahanglan nga binagbinagon naton ang matarong nga talaksan sang Dios sa aton kabuhi adlaw-adlaw kon aton ginatinguhaan nga ipakita ang diosnon nga debosyon.
“Tinguhai nga Ipakita . . . ang Pagtuo”
10. Paano naton mapabakod ang aton pagtuo?
10 Basaha ang Roma 10:17. Agod mapalambo kag mahuptan ang mabakod nga pagtuo, dapat padayon nga pamalandungan sang isa ka Cristiano ang hamili nga mga kamatuoran sa Pulong sang Dios. Nag-aman “ang matutom kag mainandamon nga ulipon” sing mga publikasyon kaangay sang Ang Pinakabantog nga Tawo nga Nagkabuhi, Magtuon Gikan sa Daku nga Manunudlo, kag “Kari Ka Mangin Sumulunod Ko.” Gindesinyo ini nga mga libro agod buligan kita nga makilala pa sing dugang si Cristo kag mailog ang iya huwaran. (Mat. 24:45-47) Nagaaman man ang ulipon nga klase sing mga miting, mga asambleya, kag mga kombension nga nagapadaku sang “pulong tuhoy kay Cristo.” Panginpuslan mo bala sing dugang ini nga mga butang samtang ginahatagan mo sang “labaw pa sa kinaandan nga igtalupangod” ang mga aman ni Jehova?—Heb. 2:1.
11. Paano ang pangamuyo kag pagkamatinumanon makabulig sa pagtinguha naton sa pagtuo?
11 Ang isa pa ka paagi agod matigayon ang mabakod nga pagtuo amo ang pangamuyo. Nangabay sadto ang mga sumulunod ni Jesus: “Hatagi kami sang dugang nga pagtuo.” Sing kaanggid, mahimo man kita magpakitluoy sa Dios agod matigayon ini. (Luc. 17:5) Dapat naton ipangamuyo ang bulig sang balaan nga espiritu sang Dios kay ang pagtuo isa sa mga “bunga sang espiritu.” (Gal. 5:22) Dugang pa, ang pagtuman sa mga sugo sang Dios nagapabakod man sang aton pagtuo. Halimbawa, mahimo kita makigbahin sing dugang pa sa pagbantala nga hilikuton. Pat-od gid nga makahatag ini sa aton sing daku nga kalipay. Kag samtang aton ginahunahuna ang mga pagpakamaayo sang ‘pagpangita anay sang ginharian kag pagkamatarong [sang Dios],’ magauswag ang aton pagtuo.—Mat. 6:33.
“Tinguhai nga Ipakita . . . ang Gugma”
12, 13. (a) Ano ang bag-o nga sugo ni Jesus? (b) Sa anong importante nga mga paagi tinguhaan naton nga mapakita ang tulad-Cristo nga gugma?
12 Basaha ang 1 Timoteo 5:1, 2. Naghatag si Pablo sing praktikal nga laygay kon paano mapakita sang mga Cristiano ang gugma sa isa kag isa. Ang aton diosnon nga debosyon nagalakip sa pagtuman sa bag-ong sugo ni Jesus nga “maghigugmaanay” subong nga sia naghigugma man sa aton. (Juan 13:34) Ginpatalupangod ini ni apostol Juan: “Ang bisan sin-o nga may palangabuhian sining kalibutan kag nakita niya ang iya utod nga nagakinahanglan apang ginasira niya ang ganhaan sang iya mapinalanggaon nga kaawa sa iya utod, paano naton masiling nga may gugma sia sa Dios?” (1 Juan 3:17) May mga kahimtangan bala nga mapakita mo ang gugma sa praktikal nga paagi?
13 Ang isa pa ka paagi agod tinguhaan naton nga mapakita ang gugma amo ang pagpatawad sa aton mga utod kag indi paghupot sing aligutgot batok sa ila. (Basaha ang 1 Juan 4:20.) Sa baylo, ginatuman naton ini nga laygay: “Padayon nga batasa ninyo ang isa kag isa kag patawaron sing kinabubut-on ang isa kag isa kon may reklamo ang isa batok sa isa. Subong nga si Jehova nagpatawad sing kinabubut-on sa inyo, amo man ang himuon ninyo.” (Col. 3:13) May yara bala sa kongregasyon nga nakasala sa imo? Patawaron mo bala sia?
“Tinguhai nga Ipakita . . . ang Pagbatas”
14. Ano ang aton matun-an gikan sa kongregasyon sang Filadelfia?
14 Tuhay ang pagpanikasog sa tulumuron nga madali lab-uton sangsa tulumuron nga mabudlay tigayunon ukon malayo sangsa aton ginapaabot. Gani, kinahanglan ang pagbatas kon aton tinguhaan nga matigayon ang kabuhi nga walay katapusan. Ginsilingan ni Ginuong Jesus ang kongregasyon sang Filadelfia: “Bangod gintuman mo ang pulong nahanungod sa akon pagbatas, amligan ko man ikaw sa oras sang pagtilaw.” (Bug. 3:10; ftn.) Maathag nga gintudlo ni Jesus nga kinahanglan ang pagbatas. Makabulig ini sa aton nga magpadayon bisan pa may mga pagtilaw kag mga pagsulay. Ang mga kauturan sa unang siglo nga kongregasyon sang Filadelfia nagpakita sing talalupangdon nga pagbatas bisan pa may mga pagtilaw sa ila pagtuo. Gani, nagpasalig si Jesus nga buligan niya sila sa magaabot pa nga daku nga pagtilaw.—Luc. 16:10.
15. Ano ang gintudlo ni Jesus tuhoy sa pagbatas?
15 Nahibaluan ni Jesus nga ang iya mga sumulunod pagadumtan sang kalibutan kag sang ila di-tumuluo nga mga himata, gani duha ka beses niya sila nga ginpalig-on: “Sia nga nagabatas tubtob sa katapusan amo ang maluwas.” (Mat. 10:22; 24:13) Ginpasalig man sila ni Jesus nga sa sina nga tion, makatigayon sila sing kinahanglanon nga kusog agod makabatas. Sa isa ka ilustrasyon, ginpaanggid niya ang batuhon nga duta sa mga indibiduwal nga “nagabaton sang pulong [sang Dios] nga may kalipay” apang nagabiya sila sa tion sang mga pagtilaw. Sa pihak nga bahin, ang iya matutom nga mga sumulunod ginpaanggid niya sa maayo nga duta nga “nagahupot” sa pulong sang Dios kag “nagapamunga nga may pagbatas.”—Luc. 8:13, 15.
16. Anong mahigugmaon nga aman ang nakabulig sa minilyon nga magbatas?
16 Natalupangdan mo bala kon paano kita makabatas? Dapat naton ‘huptan’ nga buhi ang pulong sang Dios sa aton tagipusuon kag hunahuna. Posible kag mahapos ini himuon bangod gin-amanan kita sing sibu kag madali basahon nga badbad sang Biblia, ang New World Translation of the Holy Scriptures nga matigayon sa madamo nga lenguahe. Kon aton pamalandungan ang isa ka bahin sang Pulong sang Dios adlaw-adlaw, matigayon naton ang kabakod agod makapadayon sa pagpamunga “nga may pagbatas.”—Sal. 1:1, 2.
“Tinguhai nga Ipakita . . . ang Kalulo” kag Paghidait
17. (a) Ngaa importante gid ang pagpakita sing “kalulo?” (b) Paano ginpakita ni Jesus ang kalulo?
17 Wala kita nalipay kon mulayon ukon pasibangdan kita sang sala nga wala naton ginhimo ukon ginhambal. Sa masami maakig kita kag magsiling nga “Wala ko ina ginhimo!” Apang kon matabo gid man ini, mas maayo nga ipakita naton ang “kalulo” bisan mabudlay ini himuon. (Basaha ang Hulubaton 15:1.) Si Jesus nagpakita sing himpit nga halimbawa sa sini. “Sang gintamay sia, wala sia magbalos sang pagtamay. Sang nag-antos sia, wala sia magpamahog, kundi padayon niya nga gintugyan ang iya kaugalingon sa isa nga nagahukom sing matarong.” (1 Ped. 2:23) Mahimo indi gid naton mailog sing bug-os ang halimbawa ni Jesus, apang mapauswag pa bala naton ang pagpakita sing kalulo sa iban?
18. (a) Ano ang maayo nga resulta kon mangin malulo kita? (b) Ano pa ang isa ka kinaiya nga ginapalig-on sa aton nga tinguhaan?
18 Bilang pag-ilog kay Jesus, dapat ‘handa kita pirme nga pangapinan’ ang aton ginapatihan kag “ginahimo ini nga may kalulo kag tudok nga pagtahod.” (1 Ped. 3:15) Ang kalulo makabulig sa aton nga indi dayon maakig kon indi kita maghangpanay sang mga tawo nga aton ginapanaksihan ukon sang aton mga masigkatumuluo. (2 Tim. 2:24, 25) Kag kon malulo kita, matigayon man naton ang paghidait. Amo kon ngaa sa iya ikaduha nga sulat kay Timoteo ginlakip na ni Pablo ang “paghidait” sa mga kinaiya nga dapat tinguhaan nga ipakita.(2 Tim 2:22; ipaanggid ang 1 Timoteo 6:11.) Ang Kasulatan nagapalig-on sa aton nga tinguhaan pa gid ang “paghidait”.—Sal. 34:14; Heb. 12:14.
19. Sa tapos mabinagbinag ang pito ka Cristianong mga kinaiya, ano ang tinguhaan mo nga ipakita, kag ngaa?
19 Nabinagbinag na naton ang pito ka Cristianong kinaiya nga dapat tinguhaan—pagkamatarong, diosnon nga debosyon, pagtuo, gugma, pagbatas, kalulo, kag paghidait. Isa gid ka pagpakamaayo sa tagsa ka kongregasyon kon tinguhaan sang mga kauturan nga ipakita ining hamili nga mga kinaiya! Paagi sa sini, ginatugutan naton si Jehova nga buligan kita nga mapalambo ang maayo nga mga kinaiya para sa iya kadayawan.
Mga Punto Para Pamalandungan
• Ano ang nalakip sa pagtinguha sang pagkamatarong kag diosnon nga debosyon?
• Paano naton tinguhaan nga mapakita ang pagtuo kag pagbatas?
• Paano ang gugma nagaapektar sa aton pagpakig-angot sa isa kag isa?
• Ngaa kinahanglan naton tinguhaan nga ipakita ang kalulo kag paghidait?
[Mga Pamangkot sa Pagtinuon]
[Piktyur sa pahina 12]
Nagpaandam si Jesus batok sa pakitakita nga pagkamatarong para dayawon sang iban
[Piktyur sa pahina 13]
Mahimo naton tinguhaan nga ipakita ang pagtuo paagi sa pagpamalandong sa mga kamatuoran sa Pulong sang Dios
[Piktyur sa pahina 15]
Mahimo naton tinguhaan nga ipakita ang gugma kag pagkalulo