Ang Dios Amo ang Nagapatubo Sini!
Ang Dios Amo ang Nagapatubo Sini!
“Ang importante indi ang nagatanom ukon ang nagabunyag, kundi ang Dios nga nagapatubo sini.”—1 COR. 3:7.
1. Sa ano nga hilikuton kita makabig nga “masigkamanugpangabudlay sang Dios”?
“MGA masigkamanugpangabudlay sang Dios.” Amo sina ang paglaragway ni apostol Pablo sa pinasahi nga hilikuton nga puede naton tanan himuon. (Basaha ang 1 Corinto 3:5-9.) Ang hilikuton nga ginpatuhuyan ni Pablo amo ang paghimo sing disipulo. Ginpaanggid niya ini sa pagsab-ug kag pagbunyag sa binhi. Agod magmadinalag-on kita sa sining importante nga hilikuton, kinahanglan naton ang bulig ni Jehova. Ginapahanumdom kita ni Pablo nga ‘ang Dios ang nagapatubo sini.’
2. Ngaa ang katunayan nga ‘ang Dios ang nagapatubo’ makabulig sa aton nga tamdon sing nagakaigo ang aton ministeryo?
2 Ang katunayan nga ang Dios amo ang nagapatubo makabulig sa aton nga tamdon sing nagakaigo ang aton ministeryo. Mahimo nga maukod kita sa aton pagbantala kag pagpanudlo, apang kon magbunga na ang aton mga panikasog, ang tanan nga pagdayaw dapat ipatungod kay Jehova. Ngaa? Bangod bisan ano ang aton himuon, indi gid naton mahangpan sing bug-os kon paano nagatubo ang kaangtanan sang isa ka tawo sa Dios. Gani, maathag nga indi naton ini kontrolado. Sibu ini nga ginlaragway ni Hari Solomon sang magsulat sia: “Wala ka makahibalo sang binuhatan sang Dios nga nagahimo sang tanan.”—Man. 11:5.
3. Sa ano magkaanggid ang pagsab-ug sing binhi kag ang paghimo sing mga disipulo?
3 Makapaluya bala ang aton hilikuton kay indi man naton mahangpan kon paano mangin disipulo ang isa ka tawo? Indi. Sa baylo, makakulunyag ini kag makawiwili. Si Hari Solomon nagsiling: “Sa kaagahon isab-ug ang imo binhi, kag sa kahaponon dili pagpunggi ang imo kamut; kay wala ka makahibalo kon diin ang magauswag, kon ini ukon ina, ukon kon sila nga duha mangin-alangay nga maayo.” (Man. 11:6) Matuod gid man nga kon nagasab-ug kita sing binhi, wala kita makahibalo kon diin ini mamuhi ukon kon bala mamuhi ini. Indi naton kontrolado ang madamo nga butang. Pareho man sini ang paghimo sing disipulo nga hilikuton. Ginpatalupangod ini ni Jesus sa iya duha ka ilustrasyon nga ginrekord para sa aton sa ikap-at nga kapitulo sang Ebanghelyo ni Marcos. Tan-awon naton kon ano ang aton matun-an sa sining duha ka ilustrasyon.
Nanuhaytuhay nga Sahi sang Duta
4, 5. Isaysay sing malip-ot ang ilustrasyon ni Jesus tuhoy sa manugsab-ug.
4 Sa Marcos 4:1-9, ginsaysay ni Jesus ang tuhoy sa isa ka manugsab-ug, nga nagsab-ug sing binhi nga nagtupa sa nanuhaytuhay nga duog: “Pamati kamo. Yari karon! Ang manugsab-ug naglakat sa pagsab-ug. Kag samtang nagasab-ug sia, ang iban nga binhi nagtupa sa higad sang dalan, kag nag-abot ang mga pispis kag gintuka ini. Kag ang iban nga binhi nagtupa sa batuhon nga duog diin wala gid sing madamo nga duta, kag nagtubo ini gilayon bangod indi madalom ang duta. Apang sang nagbutlak ang adlaw, nalayong ini, kag bangod wala sing gamot nalaya ini. Kag ang iban nga binhi nagtupa sa tunga sang tunukon nga mga tanom, kag nagdabong ang tunukon nga mga tanom kag naglumos sa sini, kag wala ini magpamunga. Apang ang iban nagtupa sa maayo nga duta, kag sang nagtubo ini kag nagdaku, nagpamunga ini sing katluan ka pilo, kag kan-uman kag isa ka gatos.”
5 Sa panahon ni Jesus, masami nga ginasab-ug ang binhi. Ginabagtong ini ukon ginabutang sa suludlan sang manugsab-ug. Gani, sa sini nga ilustrasyon, wala ginhungod sang manugsab-ug nga isab-ug ang binhi sa nanuhaytuhay nga duta. Sa baylo, ang binhi nagtupa sa lainlain nga duog.
6. Ano ang paathag ni Jesus sa ilustrasyon tuhoy sa manugsab-ug?
6 Indi na kinahanglan nga palibugan pa naton ang kahulugan sini nga ilustrasyon. Ginpaathag ini ni Jesus sa Marcos 4:14-20: “Ang manugsab-ug nagasab-ug sang pulong. Nian, amo ini ang mga sa higad sang dalan diin nasab-ug ang pulong; apang sa gilayon nga mabatian nila ini nagaabot si Satanas kag nagakuha sang pulong nga ginsab-ug sa ila. Subong man, amo ini ang mga ginsab-ug sa batuhon nga mga duog: sa gilayon nga mabatian nila ang pulong, ginabaton nila ini nga may kalipay. Apang wala sila sing gamot sa ila kaugalingon, kundi nagapabilin sila sa malip-ot nga tion; nian sa gilayon nga mag-abot ang kapipit-an ukon paghingabot bangod sa pulong, nagakasandad sila. May iban pa nga ginsab-ug sa tunga sang tunukon nga mga tanom; amo ini ang mga nakabati sang pulong, apang ang mga kabalaka sining sistema sang mga butang kag ang madaya nga gahom sang manggad kag ang kaibog sa iban pa nga mga butang nagasulod sa ila tagipusuon kag nagalumos sang pulong, kag ini nangin di-mabungahon. Sa katapusan, ang mga ginsab-ug sa maayo nga duta amo ang mga nagapamati sa pulong kag nagabaton sini nga may kahamuot kag nagapamunga sing katluan ka pilo kag kan-uman kag isa ka gatos.”
7. Ano ang ginarepresentar sang binhi kag sang nanuhaytuhay nga sahi sang duta?
7 Talupangda nga wala magsiling si Jesus nga nanuhaytuhay nga sahi sang binhi ang ginsab-ug. Sa baylo, ginsambit niya ang isa lang ka sahi sang binhi nga nagtupa sa nanuhaytuhay nga sahi sang duta. Ang kada isa sini may nanuhaytuhay nga resulta. Ang una nga sahi sang duta matig-a kag nadasok; ang ikaduha batuhon; ang ikatlo ginlumsan sang tunukon nga mga tanom; kag ang ikap-at maayo nga duta nga nagapatubas sing maayo. (Luc. 8:8) Ano ang binhi? Amo ini ang mensahe sang Ginharian nga masapwan sa Pulong sang Dios. (Mat. 13:19) Ano naman ang nanuhaytuhay nga sahi sang duta? Amo ini ang mga tawo nga may nanuhaytuhay nga kahimtangan sang tagipusuon.—Basaha ang Lucas 8:12, 15.
8. (a) Sin-o ang ginarepresentar sang manugsab-ug? (b) Ngaa indi palareho ang reaksion sang mga tawo sa pagbantala sing Ginharian?
8 Sin-o ang manugsab-ug? Nagarepresentar sia sa mga masigkamanugpangabudlay sang Dios nga nagabantala sing maayong balita sang Ginharian. Kaangay nanday Pablo kag Apolos, nagatanom sila kag nagabunyag. Apang bisan magpangabudlay sila sing lakas, indi palareho ang resulta. Ngaa? Bangod indi palareho ang kahimtangan sang tagipusuon sang mga nakabati sang mensahe. Sa ilustrasyon, indi kontrolado sang manugsab-ug ang matabo sa iya ginsab-ug. Makapaumpaw gid ini, ilabi na para sa aton matutom nga mga kauturan nga nangin maukod sa pagbantala sa sulod sang mga tinuig, sing dinekada pa gani, apang daw wala sing naghulag sa ila mga ginbantalaan! * Ngaa makapaumpaw gid ini?
9. Anong makapaumpaw nga kamatuoran ang ginpatalupangod ni apostol Pablo kag ni Jesus?
9 Ang katutom sang manugsab-ug wala ginatakus sa resulta sang iya mga binuhatan. Ginpatuhuyan ini ni apostol Pablo sang magsiling sia: “Ang kada tawo magabaton sang iya padya suno sa iya pagpangabudlay.” (1 Cor. 3:8) Gani, ang basihan sang padya amo pagpangabudlay, indi ang resulta sina nga pagpangabudlay. Ginpatalupangod man ni Jesus ini nga punto sang isa ka tion nga nagbalik ang iya mga disipulo gikan sa pagbantala. Malipayon gid sila kay sang gingamit nila ang ngalan ni Jesus, napasakop sa ila ang mga demonyo. Walay sapayan sini, ginsilingan sila ni Jesus: “Indi kamo magkalipay sa sini, nga napasakop sa inyo ang mga espiritu, kundi magkalipay kamo bangod ang inyo ngalan nasulat sa langit.” (Luc. 10:17-20) Bisan pa diutay lamang ang mangin disipulo nga resulta sang pagpangabudlay sang manugsab-ug, wala ini nagakahulugan nga matamad sia ukon indi pareho katutom sa iban. Sa masami, ang resulta nasandig sa kahimtangan sang tagipusuon sang nagapamati. Apang, ang Dios gihapon ang nagapatubo sini.
Ang Salabton sang mga Nagapamati sa Pulong
10. Ano ang magapat-od kon bala ang isa nga nagapamati sa pulong mangin kaangay sa maayo nga duta ukon indi?
10 Kamusta ang mga nakabati sa pulong? Napat-od na bala nga daan kon ano ang ila mangin reaksion? Wala. Depende sa ila kon bala mangin kaangay sila sa maayo nga duta ukon indi. Ang matuod, ang kahimtangan sang tagipusuon sang tawo mahimo mangin mas maayo ukon magalain pa gid. (Roma 6:17) Sa iya ilustrasyon, si Jesus nagsiling nga “sa gilayon nga mabatian” sang pila ang pulong, si Satanas nag-abot kag ginkuha ini. Apang indi ini dapat matabo. Sa Santiago 4:7, ginapalig-on ang mga Cristiano nga ‘pamatukan ang Yawa,’ kag magapalagyo ini sa ila. Ginsaysay ni Jesus nga sang primero ang iban nagkalipay sang nabaton nila ang Pulong, apang nasandad sila bangod “wala sila sing gamot sa ila kaugalingon.” Ang mga alagad sang Dios ginapalig-on nga ‘manggamot kag matukod sa sadsaran’ agod nga mahangpan nila “ang kasangkaron kag kalabaon kag kataason kag kadalumon, kag agod makilala ang gugma ni Cristo nga nagalabaw gid sa ihibalo.”—Efe. 3:17-19; Col. 2:6, 7.
11. Ano ang dapat himuon sang isa agod indi malumos sang mga kabalaka kag manggad ang pulong?
11 Ang iban nga nakabati sa pulong ginlaragway nga nagtugot sa ‘mga kabalaka sining sistema sang mga butang kag sa madaya nga gahom sang manggad’ nga magsulod kag maglumos sa pulong. (1 Tim. 6:9, 10) Paano nila ini malikawan? Si apostol Pablo nagsabat: “Ang inyo paagi sang pagkabuhi mangin wala sing gugma sa kuarta, samtang kontento kamo sa mga butang karon. Kay sia nagsiling: ‘Indi ko gid kamo pagbayaan ukon pagpatumbayaan.’”—Heb. 13:5.
12. Ngaa indi palareho ang kadamuon sang bunga sang mga nagtupa sa maayo nga duta?
12 Sa katapusan, si Jesus nagsiling nga ang mga nagtupa sa maayo nga duta “nagapamunga sing katluan ka pilo kag kan-uman kag isa ka gatos.” Busa, ang iban nagpamati sa pulong. Apang, bisan pa nga maayo ang kahimtangan sang ila tagipusuon kag nagapamunga, ang ila mahimo para sa pagbantala sing maayong balita lainlain kag depende sa ila mga sirkunstansia. Halimbawa, bangod sa katigulangon ukon balatian, mahimo limitado lang ang masarangan sang iban sa pagbantala. (Ipaanggid ang Marcos 12:43, 44.) Sa liwat, diutay lamang ang mahimo ukon wala gid gani sing kontrol sa sini ang manugsab-ug, apang nagakalipay sia kon makita niya nga ginapatubo ini ni Jehova.—Basaha ang Salmo 126:5, 6.
Ang Manugsab-ug nga Nagatulog
13, 14. (a) Isaysay sing malip-ot ang ilustrasyon ni Jesus tuhoy sa tawo nga nagsab-ug sing binhi. (b) Sin-o ang ginarepresentar sang manugsab-ug kag ano ang binhi?
13 Sa Marcos 4:26-29, mabasa naton ang isa pa ka ilustrasyon tuhoy sa manugsab-ug: “Sa sining paagi ang ginharian sang Dios kaangay sa isa ka tawo nga nagasab-ug sang binhi sa duta, kag nagatulog sia sa gab-i kag nagabangon sa adlaw, kag ang binhi nagatubo kag nagataas, nga wala niya mahibalui kon paano. Ang duta nagapatubas sing amat-amat sa iya kaugalingon, una ang dahon, madason ang uhay, sa katapusan ang matinggas nga uyas sa uhay. Apang kon ang bunga alanyon na, nagagarab sia, bangod nag-abot na ang tig-alani.”
14 Sin-o ining manugsab-ug? Ang iban sa Cristiandad nagapati nga nagapatuhoy ini kay Jesus mismo. Apang, masiling bala naton nga natulugan si Jesus kag wala makahibalo kon paano nagatubo ang binhi? Pat-od gid nga nahibaluan ni Jesus kon paano nagatubo ang binhi! Gani, ini nga manugsab-ug, kaangay sa isa nga ginsambit kaina, nagarepresentar sa tagsa ka manugbantala sang Ginharian, nga nagasab-ug sing binhi sang Ginharian paagi sa ila makugi nga pagbantala. Ang binhi nga ila ginasab-ug amo ang pulong nga ila ginabantala. *
15, 16. Ano nga kamatuoran tuhoy sa literal kag espirituwal nga pagtubo ang ginpadaku ni Jesus sa iya ilustrasyon tuhoy sa manugsab-ug?
15 Si Jesus nagsiling nga ang manugsab-ug ‘nagatulog sa gab-i kag nagabangon sa adlaw.’ Wala ini nagakahulugan nga pabaya ang manugsab-ug. Ginalaragway lamang sini ang normal nga ginahimo sang kalabanan nga tawo. Ginapakita sini nga bersikulo ang proseso sang pagtrabaho kon adlaw kag pagtulog kon gab-i sa sulod sang isa ka hut-ong sang tion. Ginpaathag ni Jesus ang natabo sa sina tion. “Ang binhi nagatubo kag nagataas,” siling niya. Nian, si Jesus nagdugang: “Nga wala niya mahibalui kon paano.” Ang talalupangdon amo ang katunayan nga ang pagtubo natabo sa “iya kaugalingon.” *
16 Ano nga punto ang luyag itudlo ni Jesus? Talupangda nga ginpadaku niya ang pagtubo kag ang amat-amat nga proseso sini. “Ang duta nagapatubas sing amat-amat sa iya kaugalingon, una ang dahon, madason ang uhay, sa katapusan ang matinggas nga uyas sa uhay.” (Mar. 4:28) Ini nga pagtubo natabo sing amat-amat. Indi ini mapilit ukon mapadasig. Kaangay man sini ang espirituwal nga pagtubo. Amat-amat ini nga nagakatabo samtang ginatugutan ni Jehova nga magtubo ang kamatuoran sa tagipusuon sang tawo nga husto nga nahuyog.—Binu. 13:48; Heb. 6:1.
17. Sin-o ang magakasadya kon magpamunga na ang binhi sang kamatuoran?
17 Paano nagapakigbahin sa pagpangani ang manugsab-ug “kon ang bunga alanyon na”? Kon patubuon ni Jehova ang kamatuoran tuhoy sa Ginharian sa tagipusuon sang bag-o nga mga disipulo, nagauswag sila kag napahulag sang ila gugma sa Dios nga idedikar ang ila kabuhi sa iya. Ginasimbuluhan nila ang ila dedikasyon paagi sa pagpabawtismo sa tubig. Ang mga kauturan nga lalaki nga nagauswag padulong sa pagkahamtong amat-amat nga ginahatagan sing dugang nga responsibilidad sa kongregasyon. Ang mga bunga sang Ginharian ginaani sang manugsab-ug kag sang iban pa nga manugbantala nga indi direkta nga nakigbahin sa pagsab-ug sang binhi nga nagpatubas sina mismo nga disipulo. (Basaha ang Juan 4:36-38.) Sa pagkamatuod, ‘ang manugsab-ug kag ang mangangani magakasadya sing tingob.’
Mga Leksion Para sa Aton Karon
18, 19. (a) Paano ka napalig-on sa sining pagrepaso sa mga ilustrasyon ni Jesus? (b) Ano ang binagbinagon sa masunod nga artikulo?
18 Ano ang aton natun-an sa aton pagrepaso sa duha ka ilustrasyon nga narekord sa Marcos kapitulo 4? Natun-an naton nga may hilikuton kita nga dapat himuon—ang pagsab-ug. Indi gid naton pagtugutan ang bisan ano nga problema ukon kabudlayan nga mag-upang sa aton paghimo sini nga hilikuton. (Man. 11:4) Ginaapresyar man naton ang aton hamili nga pribilehiyo subong mga masigkamanugpangabudlay sang Dios. Si Jehova ang nagapatubo agod mangin disipulo ang mga tawo. Ginapakamaayo niya ang panikasog naton kag ang panikasog sang mga nagabaton sa mensahe. Ginapakita sini nga indi naton mapilit ang bisan sin-o nga mangin disipulo. Gani, indi kita dapat maluyahan sing buot ukon malugaw-an kon mahinay ang pag-uswag ukon wala gid nagauswag ang mga nakabati sa aton mensahe. Makapaumpaw gid mahibaluan nga ang aton kadalag-an ginatakus paagi sa aton katutom kay Jehova kag sa aton katutom sa ginhatag niya nga pribilehiyo nga ibantala ang “maayong balita sang ginharian . . . subong panaksi sa tanan nga pungsod.”—Mat. 24:14.
19 Ano pa gid ang gintudlo ni Jesus tuhoy sa pag-uswag sang bag-o nga mga disipulo kag sa hilikuton sang Ginharian? Ang sabat sa sina nga pamangkot makita sa iban pa nga ilustrasyon nga narekord sa Ebanghelyo. Binagbinagon naton ang pila sini nga mga ilustrasyon sa masunod nga artikulo.
[Mga footnote]
^ par. 8 Binagbinaga ang halimbawa ni Utod Georg Fjölnir Lindal sa Iceland, nga ginsaysay sa 2005 Tuigan nga Libro Sang mga Saksi ni Jehova, pahina 211-212, kag ang mga eksperiensia sang matutom nga kauturan nga tinuig nga nagpadayon sa pag-alagad sa Ireland bisan pa nga wala ini nagbunga dayon, nga mabasa sa 1988 Tuigan nga Libro Sang mga Saksi ni Jehova, pahina 82-99.
^ par. 14 Ginpaathag anay sini nga magasin nga ang binhi nagarepresentar sa mga kinaiya sang tawo nga dapat mag-uswag tubtob maghamtong, kag samtang nagatubo ginaimpluwensiahan ini sang mga butang sa palibot. Apang talalupangdon nga sa ilustrasyon ni Jesus, ang binhi wala nagbaylo kag nangin di-maayo nga binhi ukon bunga. Nagatubo lamang ini tubtob maggulang.—Tan-awa ang Lalantawan, Disiembre 15, 1980, pahina 17-19.
^ par. 15 Ang lamang nga paggamit liwat sini nga ekspresyon makita sa Binuhatan 12:10, sang ang gawang nga salsalon ginsambit nga nagabukas “sing kinaugalingon.”
Madumduman Mo Bala?
• Ano ang pila ka pagkaanggid sang pagsab-ug sing binhi kag sang pagbantala sing mensahe sang Ginharian?
• Paano ginatakus ni Jehova ang katutom sang isa ka manugbantala sing Ginharian?
• Ano nga pagkaanggid sang literal kag espirituwal nga pagtubo ang ginpadaku ni Jesus?
• Paano ‘ang manugsab-ug kag ang mangangani magakasadya sing tingob’?
[Mga Pamangkot sa Pagtinuon]
[Piktyur sa pahina 13]
Ngaa ginpaanggid ni Jesus ang manugbantala sing Ginharian sa manugsab-ug sing binhi?
[Piktyur sa pahina 15]
Ang mga ginarepresentar sang maayo nga duta bug-os tagipusuon nga nagapakigbahin sa pagbantala sing Ginharian suno sa ila kahimtangan
[Piktyur sa pahina 16]
Ang Dios amo ang nagapatubo sini
