Paglandas sa mga Kabudlayan sa Pagbantala sa mga Balay

“Nagtipon kami sang kaisog paagi sa aton Dios agod masugid sa inyo ang maayong balita sang Dios nga may daku nga pagpanikasog.”​—1 TES. 2:2.

1. Anong mga kabudlayan ang ginbatas ni Jeremias, kag paano niya ini nasarangan?

SI Jeremias may balatyagon nga pareho sa aton. Sang ginpahibalo sia ni Jehova nga mangin “manalagna [sia] sa mga pungsud,” nagsiling sia: “Ah, Ginoong DIOS! Yari karon, indi ako makahibalo maghambal, kay bata ako.” Walay sapayan sini, nagsalig sia kay Jehova kag ginbaton ang iya asaynment. (Jer. 1:4-10) Sa sulod sang kapin sa 40 ka tuig, gin-atubang ni Jeremias ang di-pagsapak, pagsikway, pagyaguta, kag pisikal nga kasingki. (Jer. 20:1, 2) May tion nga luyag na niya mangampo. Apang, nagpadayon sia sa pagbantala sing mensahe nga indi luyag pamatian sang kalabanan nga mga tawo. Sa bulig sang Dios, nahimo ni Jeremias ang mga butang nga indi niya masarangan.​—Basaha ang Jeremias 20:7-9.

2, 3. Sa ano nga paagi magkaanggid ang kahimtangan ni Jeremias sa mga alagad sang Dios subong?

² Nabatyagan man sang madamo nga alagad sang Dios ang ginbatyag ni Jeremias. Kon nagahunahuna sang pagbantala sa mga balay, ang pila sa aton sang una nagasiling, ‘Indi ko gid ini masarangan.’ Walay sapayan sini, sang marealisar naton nga kabubut-on ni Jehova ang pagpahibalo sing maayong balita, nalandas naton ang  aton pagpangalag-ag kag nangin masako sa pagbantala. Apang, kon kaisa madamo sa aton ang nagaatubang sing mga kahimtangan nga nagapabudlay sa aton agod makapadayon sa pagbantala. Matuod, mabudlay ang pagsugod sa pagbantala sa mga balay kag ang pagpadayon sini tubtob sa katapusan.​—Mat. 24:13.

³ Ano abi kon nagatuon ka sing Biblia upod sa mga Saksi ni Jehova kag madugaydugay na nga nagatambong sa mga miting sa kongregasyon, nagapangalag-ag ka bala sa pagbantala sa mga balay? Kamusta naman kon bawtismado ka nga Saksi? Nabudlayan ka pa bala sa pagbantala sa mga balay bisan nga mapagros ang imo lawas? Indi magkabalaka, madamo ang nagbatyag sing pareho sa imo. Apang, masarangan mo ini sa bulig ni Jehova.

Pagtipon sing Kaisog

4. Ngaa nakahambal sing maisugon si apostol Pablo tuhoy sa maayong balita?

⁴ Pat-od gid nga nahibaluan mo nga nangin madinalag-on ang pagbantala sa bug-os nga kalibutan, indi paagi sa gahom ukon kaalam sang tawo, kundi paagi sa espiritu sang Dios. (Zac. 4:6) Amo man sini sa pagbantala sang tagsa ka Cristiano. (2 Cor. 4:7) Binagbinaga si apostol Pablo. Sang ginsaysay niya ang tion nga sia kag ang iya kaupod nga misyonero ginsakit sang mga manugpamatok, nagsulat sia: “Sa tapos kami mag-antos anay kag ginmaltrato . . . sa Filipos, nagtipon kami sang kaisog paagi sa aton Dios agod masugid sa inyo ang maayong balita sang Dios nga may daku nga pagpanikasog.” (1 Tes. 2:2; Binu. 16:22-24) Daw indi naton mahanduraw nga may tion nga nabudlayan sa pagbantala ang makugi nga manugbantala kaangay ni Pablo. Apang kaangay naton, dapat magsandig si Pablo kay Jehova agod makahambal sing maisugon tuhoy sa maayong balita. (Basaha ang Efeso 6:18-20.) Paano naton mailog si Pablo?

5. Ano ang isa ka paagi agod makatipon kita sing kaisog sa pagbantala?

⁵ Ang isa ka paagi agod makatipon kita sing kaisog sa pagbantala amo ang pangamuyo. Ang isa ka payunir nagsiling: “Ginapangamuyo ko nga may kompiansa ako sa paghambal, malab-ot ang tagipusuon sang mga tawo, kag mangin malipayon sa pagbantala. Kay man, indi ini aton hilikuton, kundi kay Jehova, gani dapat kita magpabulig sa iya.” (1 Tes. 5:17) Tanan kita dapat magpadayon sa pagpangamuyo para sa bulig sang balaan nga espiritu sang Dios agod makabantala sing maisugon.​—Luc. 11:9-13.

6, 7. (a) Ano nga palanan-awon ang nabaton ni Ezequiel, kag ano ang kahulugan sini? (b) Ano ang matun-an subong sang mga alagad sang Dios sa palanan-awon ni Ezequiel?

⁶ May ginsugid ang tulun-an sang Ezequiel nga makabulig sa aton agod makahambal sing maisugon. Sa isa ka palanan-awon, ginhatagan ni Jehova si Ezequiel sing isa ka linukot nga nasulatan sa sulod kag sa gua sini sing “mga panalabiton kag paglalaw kag pagkakailo” kag ginsilingan sia nga kaunon ini nga nagasiling: “Anak sang tawo, pakaona ang imo tiyan kag busga ang imo mga kasudlan sa sining linukut nga ginahatag ko sa imo.” Ano ang kahulugan sini nga palanan-awon? Kinahanglan mahangpan sing bug-os ni Ezequiel ang mensahe nga iya ipahayag. Mangin bahin ini sang iya pagkatawo, nga magaapektar sa iya nasulod nga mga balatyagon. Nagpadayon sa pagsaysay ang manalagna: “Ginkaon ko ini; kag nanginsubong ini sang dugus katam-is sa akon baba.” Makalilipay gid ang pagbantala sang mensahe sang Dios sa publiko​—kaangay sa pagkaon sing dugos—​para kay Ezequiel. Daku gid nga kadungganan para sa iya nga mangin tiglawas ni Jehova kag tumanon ang iya hatag-Dios nga asaynment, bisan pa nagapahangop ini sa pagsugid sang matigdas nga mensahe sa di-mabinatunon nga mga tawo.​—Basaha ang Ezequiel 2:8–3:4, 7-9.

⁷ Ini nga palanan-awon nagaunod sing hamili nga leksion sa mga alagad sang Dios subong. Matigdas man ang aton mensahe nga ginasugid sa mga tawo nga wala pirme nagaapresyar sa aton mga panikasog. Agod matamod naton pirme nga naghalin sa Dios ang Cristianong ministeryo, kinahanglan mangin mapagros kita sa espirituwal. Ang padali kag indi regular nga pagtuon indi bastante agod mahangpan naton sing bug-os ang Pulong sang Dios. Mapauswag mo bala ang kalidad ukon pagkatayuyon sang imo personal nga pagbasa kag pagtuon sing Biblia? Mahimo mo bala mapamalandungan pirme ang imo nabasahan?​—Sal. 1:2, 3.

 Pagsugod sing Paghambalanay sa Biblia

8. Ano nga pamaagi ang nakabulig sa pila ka manugbantala sing Ginharian sa pagsugod sing paghambalanay sa Biblia kon nagabantala sa mga balay?

⁸ Para sa madamo nga manugbantala, ang labing mabudlay nga bahin sa pagbantala sa mga balay amo ang pagsugod sang paghambalanay. Matuod, sa iban nga teritoryo mabudlay gid nga sugdan ang paghambalanay. Mas mahapos sa iban nga manugbantala ang pagpakighambal sa mga tawo sa balay kon sugdan nila ini paagi sa malip-ot kag nahandaan sing maayo nga presentasyon, kag nian maghatag sing tract sa tagbalay, subong sang makita sa kaupod nga kahon. Ang tig-ulo sang tract ukon ang maduagon nga laragway sini mahimo nga makapainteres sa tagbalay, kag mahimo nga tugutan niya kita nga isugid sing malip-ot ang aton tuyo kag mahimo nga mamangkot pa sila. Mahimo mo pa gid ini paagi sa pagpakita sa tagbalay sing tatlo ukon apat ka nanuhaytuhay nga tract, kag papilion sia kon sa diin ang iya nanamian. Siempre pa, indi lamang pagpahamtang sing tract ukon paghatag sini sa tagsa ka balay ang aton tuyo. Katuyuan man naton nga makasugod sing mga paghambalanay nga magaresulta sing mga pagtuon sa Biblia.

9. Ngaa importante ang maayo nga paghanda?

⁹ Ano man ang imo pamaagi, ang maayo nga paghanda makabulig sa imo nga mangin kalmado kag mapagsik sa pagbantala sa mga balay.  Nagsiling ang isa ka payunir: “Mas malipayon ako kon nakahanda ako sing maayo. Ginaganahan gid ako sa pagpakighambal sa mga tawo nga nagagamit sang akon nahanda nga presentasyon.” Nagsiling pa gid ang isa ka payunir, “Kon pamilyar ako sa mga publikasyon, ginaganahan ako sa pagtanyag sini.” Bisan pa may pila ka kaayuhan ang mahipos nga pagrepaso sang imo inughambal, madamo ang nakasapo nga mas maayo kon ensayuhon nila ang ila presentasyon sing matunog. Ang paghimo sini makabulig sa ila nga mahatag ang ila bug-os nga masarangan kay Jehova.​—Col. 3:23; 2 Tim. 2:15.

10. Ano ang himuon agod mangin praktikal kag mapuslanon ang mga miting para sa pag-alagad sa latagon?

¹⁰ Ang praktikal nga mga miting para sa pag-alagad sa latagon makaamot agod mangin epektibo kag makalilipay ang pagbantala sa mga balay. Kon may kaangtanan sa pagbantala ang inadlaw nga teksto, mahimo ini basahon kag hinun-anunan sing makadali. Apang, ang utod nga magadumala sa miting para sa pag-alagad sa latagon dapat maghatag sing bastante nga tion sa pagbinagbinag ukon sa pagpasundayag sing isa ka simple nga presentasyon nga bagay sa teritoryo, ukon sa pagbinagbinag sang iban pa praktikal nga impormasyon nga magamit sa pagbantala sa sina nga adlaw. Magasangkap pa gid ini sa mga manugbantala nga mangin epektibo sa ila pagpanaksi. Paagi sa abanse kag maayo nga paghanda, mahimo ini sang mga gulang kag sang iban pa nga magadumala sa sini nga mga miting, kag matapos gihapon nila ini sa gintalana nga tion.​—Roma 12:8.

Ang Kapuslanan sa Pagpamati

11, 12. Paano ang pagpamati kag pagpakita sing simpatiya makabulig sa aton agod mapalab-ot ang maayong balita sa mga tawo? Maghatag sing mga halimbawa.

¹¹ Luwas sa maayong paghanda, makabulig man ang tudok kag personal nga interes agod masugdan ang paghambalanay sa Biblia kag malab-ot ang tagipusuon sang mga tawo. Ang isa ka paagi agod mapakita ini amo ang pagpamati. Nagsiling ang isa ka nagalakbay nga manugtatap: “Ang pagkamapinasensiahon kag kahanda sa pagpamati sa mga tawo may daku nga epekto agod mamati sila sa maayong balita, kag isa gid ini ka dalayawon nga pagpabutyag sing personal nga interes sa ila.” Ang pagpamati sa mga tawo kag pagpakita sing simpatiya sa ila ginahambal mahimo magpahulag sa ila nga mamati pa gid, subong sang ginapakita sa masunod nga eksperiensia.

¹² Sa isa ka sulat nga nabalhag sa pamantalaan nga Le Progrès, sa Saint-Étienne, Pransia, ginsaysay sang isa ka babayi nga sang ginduaw sia sang duha ka tawo, bag-o gid lang napatay ang iya tatlo ka bulan nga bata. “Nakilala ko gilayon nga mga Saksi ni Jehova sila,” sulat niya. “Balibaran ko kuntani sila, apang nasiplatan ko ang brosyur nga ila ginatanyag. Tuhoy ini sa kon ngaa gintugutan sang Dios ang pag-antos. Amo nga ginpadayon ko sila sa tuyo nga balion ang ila mga pangatarungan. . . . Nagpabilin ang mga Saksi sing kapin sa isa ka oras. Nagpamati sila sa akon kag nagpakita sing simpatiya, kag sang manuglakat na sila, daw nagabutan ako sing tunok sa dughan amo nga nagpasugot ako nga duawon nila liwat.” (Roma 12:15) Sang ulihi, nagpasugot ini nga babayi nga magtuon sa Biblia. Ginapakita sini nga eksperiensia nga ang nadumduman sang babayi sa sinang una nga pagduaw, indi ang ginsiling sang mga utod kundi kon paano sila nagpamati.

13. Paano naton mapahisuno ang aton presentasyon tuhoy sa maayong balita sa mga tawo nga aton masugilanon?

¹³ Ang pagpamati kag pagpakita sing simpatiya sa mga tawo magabulig sa aton nga mahibaluan kon ngaa kinahanglan nila ang Ginharian. Magahatag pa gid ini sa aton sing mas maayo nga kahigayunan sa pagpaambit sing maayong balita. Mahimo matalupangdan mo nga ang epektibo nga mga ebanghelisador, maayo nga mga manugpamati. (Hulu. 20:5) Ginapakita nila ang tunay nga interes sa mga tawo nga ila masugilanon sa ministeryo. Wala lamang nila ginalista ang mga ngalan kag adres sang mga tawo kundi pati man ang ila mga interes kag ginakabalak-an. Kon magpabutyag ang tagbalay sang iya ginakabalak-an, nagapanalawsaw sila kag nagabalik gilayon agod ipaambit ang ila napanalawsawan. Kaangay ni apostol Pablo, ginapahisuno nila ang ila presentasyon tuhoy sa mensahe sang Ginharian sa mga tawo nga ila masugilanon. (Basaha ang 1 Corinto 9:19-23.) Ining tunay nga interes magaganyat sa mga tawo nga pamatian ang maayong balita kag  mapakita sa ila ang “mapinalanggaon nga kaawa sang aton Dios.”​—Luc. 1:78.

Hupti ang Positibo nga Panimuot

14. Samtang ginatuman naton ang aton ministeryo, paano naton mapakita ang mga kinaiya ni Jehova?

¹⁴ Ginapabaloran kita ni Jehova paagi sa paghatag sa aton sing hilway nga pagbuot. Bisan sia ang Labing Gamhanan nga Dios, wala niya ginapilit ang bisan sin-o nga mag-alagad sa iya, kundi ginaganyat niya ang mga tawo pasad sa gugma, kag ginapakamaayo ang mga nagaapresyar sa iya dalayawon nga mga aman. (Roma 2:4) Subong iya mga tiglawas, dapat nga mapakita naton nga maluluy-on ang aton Dios sa kada tion nga nagapresentar kita sang maayong balita. (2 Cor. 5:20, 21; 6:3-6) Gani, kinahanglan nga huptan naton ang positibo nga panimuot sa mga tawo sa aton teritoryo. Ano ang makabulig sa aton agod mahimo ini?

15. (a) Ano ang ginsiling ni Jesus sa iya mga apostoles kon isikway sang mga tawo ang ila mensahe? (b) Ano ang makabulig agod masentro naton ang aton igtalupangod sa pagpangita sing mga takus?

¹⁵ Ginsilingan ni Jesus ang iya mga sumulunod nga indi magkabalaka kon isikway sang iban ang ila mensahe. Sa baylo, isentro nila ang ila igtalupangod sa pagpangita sing mga takus. (Basaha ang Mateo 10:11-15.) Agod mahimo ini, dapat nga magpahamtang kita sing simple kag madali malab-ot nga mga tulumuron. Ang isa ka utod nagpaanggid sa iya kaugalingon sa tawo nga nagapangita sing duog nga may mga bulawan. Ang iya halambalanon amo, “May makita gid ako nga bulawan pila ka adlaw.” Ang isa pa ka utod may tulumuron nga “makasugilanon sing interesado nga tawo kada semana kag balikan ini pagligad sang pila lang ka adlaw agod tatapon ang interes.” Ang pila naman ka manugbantala nagatinguha nga makapaambit sing bisan isa lang ka teksto sa kada tagbalay. Anong realistiko nga tulumuron ang puede mo mapahamtang?

16. Ngaa dapat kita magpadayon sa pagbantala?

¹⁶ Ang kadalag-an sa pagbantala sa mga balay wala lamang nasandig sa reaksion sang mga tawo sa teritoryo. Matuod, ang pagbantala may importante nga papel sa kaluwasan sang bunayag nga mga tawo, apang may isa pa ini ka katuyuan. Ang pagbantala nagahatag sa aton sing kahigayunan nga mapasundayag ang aton gugma kay Jehova. (1 Juan 5:3) Bangod sini malikawan naton ang kasal-anan sa dugo. (Binu. 20:26, 27) Ginapaandaman sini ang di-diosnon nga mga tawo ‘nga nag-abot na ang oras sang paghukom sang Dios.’ (Bug. 14:6, 7) Apang labaw sa tanan, paagi sa pagbantala sing maayong balita, madayaw ang ngalan ni Jehova sa bug-os nga duta. (Sal. 113:3) Busa, mamati man ukon indi ang mga tawo, dapat naton ibantala ang mensahe tuhoy sa Ginharian. Sa pagkamatuod, nahamuot si Jehova sa aton bug-os nga panikasog sa pagbantala sing maayong balita.​—Roma 10:13-15.

17. Ano ang mapilitan nga kilalahon sang mga tawo sa indi madugay?

¹⁷ Bisan madamo subong ang wala nagasapak sa aton pagbantala, sa indi madugay magabag-o ang ila pagtamod sa sini. (Mat. 24:37-39) Ginpasalig ni Jehova si Ezequiel nga kon ipadapat na ang paghukom nga iya ginapahibalo, ang rebelyuso nga panimalay sang Israel “magakilala . . . nga may manalagna sa tunga nila.” (Ezeq. 2:5) Sing kaanggid, kon ipadapat na sang Dios ang iya paghukom sa sining sistema sang mga butang, mapilitan ang mga tawo sa pagkilala nga ang ginbantala sang mga Saksi ni Jehova sa publiko nga mga duog kag sa mga balay naghalin gid sa lamang matuod nga Dios, si Jehova, kag ang mga Saksi amo ang iya mga tiglawas. Daku gid nga pribilehiyo nga dal-on naton ang iya ngalan kag ibantala ang iya mensahe sa sining katapusan nga mga tion! Paagi sa iya bulig, kabay nga padayon naton nga malandas ang mga kabudlayan sa pagbantala sa mga balay.

Ano ang Imo Sabat?

• Paano kita makatipon sing kaisog sa pagbantala?

• Sa pagbantala sa mga balay, ano ang makabulig sa aton nga makasugod sing paghambalanay tuhoy sa Biblia?

• Paano naton mapakita ang tunay nga interes sa iban?

• Ano ang makabulig sa aton agod mahuptan ang positibo nga panimuot sa mga tawo sa aton teritoryo?

[Mga Pamangkot sa Pagtinuon]

[Kahon/​Piktyur sa pahina 9]

Mga Pamaagi Agod Masugdan ang mga Paghambalanay sa Biblia

Agod makasugod:

▪ Sa tapos matamyaw ang tagbalay, mahimo mo sia hatagan sing tract kag magsiling, “Ang akon tuyo sa pagduaw sa imo subong amo ang pagpaambit sining makapalig-on nga impormasyon tuhoy sa sining importante nga topiko.”

▪ Ukon mahimo mo itanyag ang tract kag magsiling, “Nagaduaw ako sing makadali subong bangod luyag ko gid mahibaluan kon ano ang imo opinyon sa sini nga topiko.”

Kon batunon ang tract:

▪ Magpautwas gilayon sing makapahunahuna nga pamangkot pasad sa tig-ulo sang tract.

▪ Mamati sing maayo, kag tinguhai nga mahangpan ang mga pagtamod sang tagbalay. Pasalamati kag ilakip sa inyo paghambalanay ang iya mga komento.

Agod mapadayon ang paghambalanay:

▪ Basaha kag binagbinaga ang isa ukon kapin pa nga teksto, nga nagapahisuno sang imo presentasyon sa interes kag ginakabalak-an sang tawo.

▪ Kon interesado, magtanyag sing literatura kag ipasundayag ang pagtuon sing Biblia kon posible. Himusa ang pagbalik-duaw.