Ika-124 nga Gradwasyon sang Gilead

Ang mga Misyonero Ginapaanggid sa mga Apan

ANG Watchtower Bible School of Gilead nagahiwat sang gradwasyon kada anom ka bulan, kag imbitado sa sini ang bug-os nga pamilya Betel sang Estados Unidos. Sang Marso 8, 2008, ang mga bisita gikan sa kapin sa 30 ka pungsod nagbuylog sa pamilya Betel sa gradwasyon sang ika-124 nga klase sang Gilead School. Nagkalipay ang 6,411 ka tumalambong upod sa mga estudyante bangod sining pinasahi nga adlaw.

Si Stephen Lett nga miembro sang Nagadumala nga Hubon amo ang tsirman sang programa. Ginsugdan niya ini paagi sa isa ka pamulongpulong nga may tig-ulo “Magbuylog sa Malaragwayon nga mga Apan ni Jehova.” Ginapaanggid sang Bugna 9:1-4 ang gamay nga grupo sang hinaplas nga mga Cristiano nga nangin aktibo liwat sa pag-alagad kay Jehova sang 1919 sa guban sang mga apan nga hinali lang nagpanghikot. Ginpahanumdom ang mga estudyante nga bangod mga miembro sila sang “iban nga mga karnero,” dapat magbuylog sila sa sining malaragwayon nga guban sang mga apan.​—Juan 10:16.

Si Lon Schilling, nga miembro sang Komite sang Sanga sang Estados Unidos, ang masunod nga nagpamulongpulong nga natig-uluhan “Mangin Kabulig.” Ginbase ini sa halimbawa sang unang siglo nga Cristianong mag-asawa nga sanday Aquila kag Priscila (ukon, Prisca). (Roma. 16:3, 4) Sa klase sang Gilead, may beinte-otso ka mag-asawa. Ginpahanumdom sila nga agod mangin madinalag-on ang ila pagmisyonero, dapat nga pabakuron nila ang ila pag-asawahay. Kon patuhuyan gani sang Biblia si Aquila, pirme sia ginasambit upod ang iya asawa nga si Priscila. Busa, gintamod sila ni apostol Pablo kag sang kongregasyon subong isa ka unod. Sing kaanggid, ang mga mag-asawa nga misyonero sa karon dapat manghikot sing magkaupod, mag-alagad sing magkaupod, kag atubangon ang pinasahi nga mga kabudlayan sa iban nga pungsod sing magkaupod, busa nagabuligay sila nga duha.​—Gen. 2:18.

Ang masunod nga pamulongpulong nga natig-uluhan “Maghulag Bangod sa Kaayo ni Jehova,” ginhatag naman ni Guy Pierce sang Nagadumala nga Hubon. Ginpaathag ni Utod Pierce nga agod mangin maayo nga tawo indi lamang naton likawan ang paghimo sang malain. Ang isa ka maayo nga tawo nagahimo sang maayo nga mga butang para sa kaayuhan sang iban. Si Jehova nga Dios wala sing tupong sa kaayo. (Zac. 9:16, 17) Ang pagkaayo sang Dios amo ang makapahulag sa aton nga himuon kon ano ang maayo para sa iban. Gintapos ni Utod Pierce ang iya pamulongpulong paagi sa paghatag sing komendasyon sa mga estudyante: “Maayo gid ang ginahimo ninyo. Nagasalig kami nga padayon kamo nga magahulag bangod sa kaayo sang Dios paagi sa paghimo sing maayo sa kon ano man nga asaynment ang inyo matigayon sa palaabuton nga ihatag sa inyo ni Jehova nga Dios.”

Sunod nga ginpresentar ni Michael Burnett, isa man anay ka misyonero nga kasan-o lang gin-asayn bilang instruktor sa Gilead, ang pamulongpulong nga “Isuksok Ini Subong Pat-in sa Ulot sang Imo mga Mata.” Daw subong bala nga nagasuksok sila sang “pat-in” sa ulot sang ila mga mata, dapat nga dumdumon sang mga Israelita ang milagruso nga pagluwas ni Jehova sa ila gikan sa Egipto. (Ex. 13:16) Ginlaygayan ang mga estudyante nga dumdumon ang madamo  nga mga instruksion nga ila nabaton sa eskwelahan sang Gilead, nga daw subong bala nga may ginasuksok sila nga pat-in sa ila mga mata. Ginpadaku ni Utod Burnett nga kinahanglan ang pagpaubos kag kaugdang kag ang pag-aplikar sang mga prinsipio sang Biblia kon nagahusay sang mga di-paghangpanay sa kaupod nga mga misyonero kag sa iban.​—Mat. 5:23, 24.

Ang madugay na nga instruktor sa Gilead nga si Mark Noumair naghatag sang pamulongpulong nga “Ano nga Ambahanon ang Ipatuhoy sa Imo?” Nangin kinabatasan na sang una nga panahon nga ginaselebrar ang mga kadalag-an sa inaway paagi sa ambahanon. Ang isa sa sining mga ambahanon nagbuyagyag sang tribo nanday Ruben, Dan, kag Aser nga nagpahapos lang sang ila kaugalingon, apang gindayaw ang tribo ni Zebulon bangod sang ila masinakripisyuhon nga panimuot. (Huk. 5:16-18) Kaangay sang mga tinaga sang mga ambahanon, mahibaluan man sang iban ang ginahimo sang tagsa ka  Cristiano. Ang kakugi sang isa sa hilikuton sang Dios kag sa pagtuman sang mga panuytoy sang Iya organisasyon, kalahamut-an kay Jehova, kag mangin maayo nga halimbawa para sa iban nga mga kauturan. Samtang ginapamatian sang iban sa kongregasyon ang malaragwayon nga ambahanon nga ginapakita sang aton paggawi, ginapahulag sila sini nga sundon ang aton maayo nga halimbawa.

Subong bahin sang paghanas sa Gilead, ang ika-124 nga klase naghinguyang sing mga 3,000 ka oras sa pagbantala. Sa tema nga “Pagsunod sa Panuytoy sang Balaan nga Espiritu,” nga ginhatag ni Sam Roberson sang Theocratic Schools Department, ginsaysay sang mga estudyante ang pila ka mga eksperiensia sa ila paggua sa latagon kag gin-akto pa gani liwat ang pila sa sini. Ginsundan ni Patrick LaFranca, Komite sang Sanga sang Estados Unidos, ining makapalig-on nga mga eksperiensia, paagi sa pag-interbyu sa mga naggradwar sa Gilead nga nagapangalagad na karon sa iban nga mga pungsod. Ginaapresyar gid sang mga estudyante ang praktikal nga mga panugda nga ila nabaton sa sining mga kauturan.

Si Anthony Morris sang Nagadumala nga Hubon ang naghatag sang katapusan nga pamulongpulong, “Dumduma, ang mga Butang nga Makita Umalagi Lamang.” Ginalaygayan kita sang Kasulatan nga ituon ang aton panghunahuna sa mga pagpakamaayo ni Jehova sa palaabuton sangsa talupangdon ang umalagi nga mga kabudlayan nga mahimo ginaatubang naton karon. (2 Cor. 4:16-18) Makita naton sa karon ang tuman nga kapigaduhon, inhustisya, pagpamigos, balatian, kag kamatayon. Mahimo nga maeksperiensiahan sang mga misyonero ang pila sa sini. Apang ang pagdumdom nga ining mga butang temporaryo lamang makabulig sa aton nga makapabilin nga balanse sa espirituwal kag may maathag nga paglaum.

Samtang yara sa entablado ang mga estudyante, ginhinakpan sang katapusan nga pamulongpulong ni Utod Lett ang programa. Ginpalig-on niya sila nga indi mangampo kag nagsiling: “Ano man ang aton maatubang, mahimo naton mabatas kag mahuptan ang aton integridad kon sakdagon kita ni Jehova.” Ginhingyo niya ang bag-o nga mga misyonero nga mangin determinado sa pag-alagad kay Jehova kag magpabilin nga makugi, mainunungon kag matinumanon tubtob sa walay katubtuban nga kaangay sang guban sang mga apan.

[Kahon sa pahina 30]

ESTADISTIKA SANG KLASE

Kadamuon sang pungsod nga gintiglawas: 7

Kadamuon sang pungsod nga ginpadal-an: 16

Kadamuon sang estudyante: 56

Promedyo nga edad: 33.8

Promedyo nga tuig sa kamatuoran: 18.2

Promedyo nga tuig sa bug-os tion nga ministeryo: 13.8

[Piktyur sa pahina 31]

Ika-124 nga Naggradwar nga Klase sang Watchtower Bible School of Gilead

Sa listahan sa ubos, ang mga raya nanumeruhan halin sa atubangan pa likod, kag ang mga ngalan nalista halin sa wala pa tuo sa tagsa ka raya.

(1) Nicholson, T.; Main, H.; Senge, Y.; Snape, L.; Vanegas, C.; Pou, L. (2) Santana, S.; Oh, K.; Lemaitre, C.; Williams, N.; Alexander, L. (3) Woods, B.; Stainton, L.; Huntley, E.; Alvarez, G.; Cruz, J.; Bennett, J. (4) Williamson, A.; González, N.; Zuroski, J.; Degandt, I.; May, J.; Diemmi, C.; Tavener, L. (5) Lemaitre, W.; Harris, A.; Wells, C.; Rodgers, S.; Durrant, M.; Senge, J. (6) Huntley, T.; Vanegas, A.; Pou, A.; Santana, M.; Bennett, V.; Tavener, D.; Oh, M. (7) Zuroski, M.; Rodgers, G.; Diemmi, D.; Nicholson, L.; Alvarez, C.; Snape, J. (8) Harris, M.; González, P.; Main, S.; Woods, S.; Stainton, B.; Williamson, D.; Durrant, J. (9) Cruz, P.; Degandt, B.; Williams, D.; Wells, S.; Alexander, D.; May, M.

[Piktyur sa pahina 32]

Nahamtang ang Gilead School sa Watchtower Educational Center