Hupti ang Pagkamainunungon sing Bug-os Tagipusuon

“Magalakat ako sa imo kamatuoran. Bug-usa ang akon tagipusuon sa pagkahadlok sa imo ngalan.”​—SAL. 86:11, NW.

1, 2. (a) Suno sa Salmo 86:2, 11, ano ang makabulig sa aton agod makapabilin kita nga matutom kay Jehova bisan pa nagaatubang sang mga pagtilaw kag mga pagsulay? (b) San-o naton dapat palambuon ang tinagipusuon nga pagkamainunungon?

NGAA ang pila ka Cristiano nga nangin matutom sa sulod sang madamo nga tinuig walay sapayan sang mga pagbilanggo ukon paghingabot, nagpadala sang ulihi sa materyalismo? Ang sabat may yara kaangtanan sa aton malaragwayon nga tagipusuon​—kon ano gid kita sa sulod. Ginapakita sang ika-86 nga Salmo nga may yara kaangtanan ang pagkamainunungon sa pagkabug-os sang tagipusuon, isa ka tagipusuon nga wala natunga. “Bantayi ang akon kalag, kay mainunungon ako,” pangamuyo sang salmista nga si David. “O ikaw nga akon Dios, luwasa ang imo alagad nga nagasalig sa imo.” Nangamuyo man si David: “Tudlui ako sang imo dalanon, O Jehova. Magalakat ako sa imo kamatuoran. Bug-usa ang akon tagipusuon sa pagkahadlok sa imo ngalan.”​—Sal. 86:2, 11, NW.

² Kon indi bug-os tagipusuon ang aton pagsalig kay Jehova, madali lang magluya ang aton pagkamainunungon sa matuod nga Dios bangod sa mga kabalaka kag iban pa nga mga butang nga nagaapektar sa aton. Ang makagod nga mga handum daw mga bomba nga nalubong sa dalan nga ginalaktan naton. Bisan pa gani nakapabilin kita nga matutom kay Jehova walay sapayan sang mga kabudlayan, mahimo gihapon kita mabiktima sang mga siod ni Satanas. Busa,  importante gid nga palambuon naton ang tinagipusuon nga pagkamainunungon kay Jehova subong, antes pa kita makasumalang sang mga pagtilaw kag mga pagsulay! “Bantayi ang imo tagiposoon sa bug-os nga kakugi,” siling sang Biblia. (Hulu. 4:23) Makatuon kita sing importante nga leksion sa eksperiensia sang manalagna gikan sa Juda nga ginpadala ni Jehova kay Hari Jeroboam sang Israel.

‘Hatagan Ko Ikaw sing Regalo’

3. Ano ang reaksion ni Jeroboam sa mabaskog nga mensahe nga ginpaalinton sa iya sang manalagna sang Dios?

³ Handurawa ining hitabo. Ginsugdan ni Hari Jeroboam ang pagsimba sa tinday nga baka sa naaminhan nga napulo ka tribo nga ginharian sang Israel. Ginpaalinton sa iya sang tawo sang Dios ang isa ka mabaskog nga mensahe. Naakig gid ang hari. Ginsugo niya ang iya mga tinawo nga dakpon ang mensahero. Apang, gin-ubayan ni Jehova ang iya alagad. Gulpi lang nga naitos ang kamot sang hari, kag ang altar nga gingamit sa butig nga pagsimba natunga. Hinali nga nagbag-o ang panimuot ni Jeroboam. Nagpakitluoy sia sa tawo sang Dios: “Pakilooyi karon ang kahamuut sang GINOO nga imo Dios, kag pangamuyo ka tungud sa akon, nga iuli sa akon ang akon kamut.” Ang manalagna nangamuyo, kag nag-ayo ang kamot sang hari.​—1 Hari 13:1-6.

4. (a) Ngaa ang pangagda sang hari isa gid ka pagtilaw sa pagkamainunungon sang manalagna? (b) Ano ang sabat sang manalagna?

⁴ Nian ginsilingan ni Jeroboam ang tawo sang matuod nga Dios: “Pauli ka upud sa akon, kag magpaumpaw sang imo kaugalingon, kag hatagan ko ikaw sing [regalo, NW].” (1 Hari 13:7) Ano karon ang himuon sang manalagna? Sikwayon bala niya ang pangagda sang hari bangod bag-o lang niya sia ginhatagan sing mensahe sang pagpakamalaut? (Sal. 119:113) Ukon batunon bala niya ini, kay daw naghinulsol man ang hari? Sigurado nga makasarang gid maghatag si Jeroboam sing malahalon nga mga regalo sa iya mga abyan. Kon ang manalagna sang Dios may ginatago nga handum sa materyal nga mga butang, isa gid ka daku nga pagsulay sa iya ang ginatanyag sang hari. Apang, ginsugo ni Jehova ang manalagna: “Dili ka magkaon, ukon mag-inum sing tubig, ukon magbalik sa dalan nga imo gin-agihan.” Gani, ang manalagna malig-on kag maathag nga nagsabat: “[Bisan pa] ihatag mo sa akon ang katunga sang imo balay, indi ako mag-upud sa imo. Kag indi ako magkaon sing tinapay ukon mag-inum sing tubig sa sining duug.” Busa, naghalin ang manalagna sa Betel kag nag-agi sa iban nga dalan. (1 Hari 13:8-10) Ano nga leksion ang matun-an naton tuhoy sa tinagipusuon nga pagkamainunungon sa ginhimo sang manalagna?​—Roma 15:4.

“Mangin Kontento”

5. Paano ang materyalismo nagatilaw sang aton pagkamainunungon?

⁵ Sa pagkamatuod, ang materyalismo isa gid ka pagtilaw sang aton pagkamainunungon. Nagatuo bala kita sa pasalig ni Jehova nga amanan kita sang aton mga kinahanglanon? (Mat. 6:33; Heb. 13:5) Sa baylo nga maghingamo sang materyal nga mga butang nga indi naton masarangan, mahimo bala kita mabuhi nga wala ini? (Basaha ang Filipos 4:11-13.) Ginasulay bala kita nga isakripisyo ang aton teokratikong mga pribilehiyo agod matigayon naton karon ang aton mga handum? Ginauna bala naton sa aton kabuhi ang mainunungon nga pag-alagad kay Jehova? Ang aton mga sabat sa sini nga mga pamangkot nagadepende gid kon bala bug-os tagipusuon kita nga nagaalagad sa Dios ukon indi. “Isa ini ka paagi nga makaganar sing daku,” sulat ni apostol Pablo, “ining diosnon nga debosyon nga may pagkakontento. Kay wala kita sing nadala sa kalibutan, kag wala man kita sing mapagua. Gani, kon kita may pagkaon, panapton kag pasilungan, mangin kontento na kita sa sini nga mga butang.”​—1 Tim. 6:6-8.

6. Ano nga mga “regalo” ang mahimo itanyag sa aton, kag ano ang makabulig sa aton sa pagdesisyon kon bala batunon naton ini ukon indi?

⁶ Halimbawa, mahimo kita tanyagan sang aton amo sing promosyon nga may daku nga sueldo kag iban pa nga mga benepisyo. Ukon ayhan marealisar naton nga mas daku ang kitaon naton kon mag-obra kita sa iban nga pungsod. Sa umpisa, ining mga oportunidad daw isa ka pagpakamaayo halin kay Jehova. Apang antes kita magdesisyon, indi bala nga dapat usisaon anay naton ang aton mga motibo? Importante nga binagbinagon naton ini nga pamangkot, “Paano ang akon desisyon makaapektar sa akon kaangtanan kay Jehova?”

7. Ngaa importante nga kakason naton ang materyalistiko nga mga handum?

⁷ Ang sistema ni Satanas wala untat nga nagapasanyog sang materyalismo. (Basaha ang 1 Juan 2:15, 16.) Ang tulumuron sang Yawa amo ang pagpalain sang aton tagipusuon. Busa, kinahanglan mangin maabtik kita sa pagkakas sang bisan ano nga materyalistiko  nga mga handum sa aton tagipusuon. (Bug. 3:15-17) Sang gintanyag ni Satanas ang tanan nga ginharian sa kalibutan, wala nabudlayan si Jesus sa pagsikway sini. (Mat. 4:8-10) Nagpaandam sia: “Magbantay kamo kag mag-andam batok sa tanan nga sahi sang pagkamahamkunon, bangod bisan pa may kabuganaan ang isa ka tawo ang iya kabuhi indi nagagikan sa mga butang nga ginapanag-iyahan niya.” (Luc. 12:15) Ang pagkamainunungon amo ang magabulig sa aton nga magsandig kay Jehova sa baylo nga sa aton kaugalingon.

Ginlimbungan Sia sang Tigulang nga Manalagna

8. Paano natilawan ang pagkamainunungon sang manalagna sang Dios?

⁸ Maayo kuntani ang nangin resulta kon ang manalagna sang Dios nagpadayon sa paglakbay pauli. Apang, wala gani madugayi, nakaatubang naman sia sing isa pa ka pagtilaw. “Karon may nagpuyo sa Bet-el nga tigulang nga manalagna,” siling sang Biblia, “kag nag-abut ang isa sang iya mga anak nga lalaki kag nagsugid sa iya” sang tanan nga natabo sina nga adlaw. Sang nabatian ini sang tigulang, ginsugo niya ang iya mga anak nga silyahan ang asno agod sakyan niya kay lagson niya ang manalagna sang Dios. Wala madugay, nakit-an niya ang manalagna nga nagapahuway sa idalom sang daku nga kahoy kag ginsilingan sia: “Pauli ka upud sa akon kag magkaon sing tinapay.” Sang ginpangindian sang tawo sang matuod nga Dios ang iya pangagda, ang tigulang nagsabat: “Ako man manalagna subong sa imo, kag ang manugtunda nagpamolong sa akon paagi sa polong sang GINOO, nga nagasiling, ‘Pabalika sia upud sa imo sa imo balay agud nga magkaon sia sing tinapay kag mag-inum sing tubig.’” Apang ang Kasulatan nagsiling: “Ginbutigan niya sia.”​—1 Hari 13:11-18.

9. Ano ang ginasiling sang Kasulatan tuhoy sa malimbungon nga mga tawo, kag sin-o ang ila ginahalitan?

⁹ Bisan pa wala kita nakahibalo kon ano ang motibo sang tigulang nga manalagna, maathag nga nagbinutig sia. Mahimo nga ining tigulang isa anay ka matutom nga manalagna ni Jehova. Apang, sa sini nga punto, nangin malimbungon sia. Ining buhat ginapakamalaut gid sang Kasulatan. (Basaha ang Hulubaton 3:32. *) Ang mga malimbungon wala lamang nagahalit sang ila espirituwalidad kundi pati man sa espirituwalidad sang iban.

“Nagbalik Sia” Upod sa Tigulang

10. Ano ang ginhimo sang manalagna sang Dios sang gin-agda sia sang tigulang, kag ano ang nangin resulta?

¹⁰ Dapat namutikan na kuntani sang manalagna gikan sa Juda nga ginlimbungan sia sang tigulang nga manalagna. Dapat ginpamangkot niya ang iya kaugalingon, ‘Ngaa abi mapadala si Jehova sing anghel sa iban nga tawo agod maghatag sing instruksion para sa akon?’ Dapat ginpamangkot kuntani sang manalagna si Jehova agod pat-uron ini,  apang wala ginpakita sang Kasulatan nga amo sini ang iya ginhimo. Sa baylo, “nagbalik sia upod sa [tigulang], kag nagkaon sia sang tinapay sa iya balay, kag nag-inum sing tubig.” Wala nahamuot si Jehova sa iya ginhimo. Sang nagpauli na ining nalimbungan nga manalagna pabalik sa Juda, ginsugata sia sang leon kag ginpatay. Daw ano gid ka makahalanusbo nga katapusan sang iya hilikuton subong manalagna!​—1 Hari 13:19-25. *

11. Anong maayo nga halimbawa ang ginpahamtang ni Ahias?

¹¹ Sa pihak nga bahin, si manalagna Ahias nga ginpadala sa paghaplas kay Jeroboam subong hari, nagpabilin nga matutom tubtob sa iya katigulangon. Sang tigulang na si Ahias kag indi na makakita, ginsugo ni Jeroboam ang iya asawa agod pamangkuton si Ahias tuhoy sa kahimtangan sang ila nagamasakit nga bata nga lalaki. Maisog nga gintagna ni Ahias nga mapatay ang anak ni Jeroboam. (1 Hari 14:1-18) Ang isa sa mga pagpakamaayo nga naagom ni Ahias amo ang pribilehiyo nga makaamot sa inspirado nga Pulong sang Dios. Paano? Ang iya mga sinulatan gingamit sang ulihi ni Esdras nga saserdote subong reperensia.​—2 Cron. 9:29.

12-14. (a) Ano nga leksion ang aton matun-an sa natabo sa bataon nga manalagna? (b) Maghatag sing halimbawa kon ngaa kinahanglan ipangamuyo kag binagbinagon ang pasad sa Biblia nga laygay nga ginhatag sang mga gulang.

¹² Wala ginasugid sang Biblia kon ngaa wala anay ginpamangkot sang mas bataon nga manalagna si Jehova antes sia nagbalik kag nagkaon kag nag-inom upod sa tigulang. Indi ayhan nga ang ginsiling sang tigulang amo ang butang nga luyag niya mabatian? Ano ang matun-an naton sa sini? Dapat kumbinsido gid kita nga matarong ang mga ginapatuman ni Jehova. Kag dapat mangin determinado kita nga tumanon sia bisan ano man ang matabo.

¹³ Kon tuhoy sa laygay, ginapamatian lamang sang iban ang mga butang nga luyag nila pamatian. Halimbawa, ang isa ka manugbantala gintanyagan sang trabaho nga magabuhin sang iya tion sa iya pamilya kag sa iban pa nga teokratikong mga hilikuton. Nangayo sia sing laygay sa isa ka gulang. Ginsugdan sang gulang ang iya laygay paagi sa pagsiling nga wala sia sa posisyon nga magdesisyon kon paano dapat suportahan sang utod ang iya pamilya. Nian, ginpatalupangod sang gulang sa utod ang mga katalagman sa espirituwal nga nadalahig kon batunon niya ang trabaho nga ginatanyag sa iya. Dumdumon lang bala sang utod ang una nga ginsiling sang gulang, ukon binagbinagon niya sing serioso ang masunod nga ginhambal sini? Maathag nga kinahanglan binagbinagon sang utod kon ano ang labing maayo para sa iya sa espirituwal nga paagi.

¹⁴ Binagbinaga ang isa pa ka posible nga kahimtangan.  Halimbawa, namangkot ang isa ka utod nga babayi sa isa ka gulang kon bala dapat niya bulagan ang iya di-tumuluo nga bana. Walay duhaduha nga ipaathag sang gulang nga ang desisyon kon bala magbulag ukon indi dapat himuon sang utod nga babayi. Pagkatapos, mahimo ipakita sa iya sang gulang ang laygay sang Biblia tuhoy sa sini nga kahimtangan. (1 Cor. 7:10-16) Binagbinagon bala sang utod nga babayi ang laygay sang gulang? Ukon desidido na sia nga daan nga bulagan ang iya bana? Antes sia magdesisyon, maalamon nga mangamuyo anay sia kag binagbinagon ang laygay nga pasad sa Biblia.

Mangin Maugdang

15. Ano ang matun-an naton sa sayop sang manalagna sang Dios?

¹⁵ Ano pa ang aton matun-an sa sala sang manalagna gikan sa Juda? Ang Hulubaton 3:5 nagasiling: “Salig sa GINOO sa bug-os mo nga tagiposoon, kag dili magsandig sa imo kaugalingon nga paghangup.” Sang una, ining manalagna gikan sa Juda nagsandig kay Jehova. Apang sa sining higayon, nagsalig sia sa iya kaugalingon nga paghangop. Ining sayop nagresulta sa iya kamatayon kag pagkaguba sang iya maayo nga ngalan sa Dios. Daw ano gid ka daku nga leksion tuhoy sa importansia sang pagkaugdang kag pagkamainunungon sa pag-alagad kay Jehova!

16, 17. Ano ang makabulig sa aton agod makapabilin kita nga mainunungon kay Jehova?

¹⁶ Mahimo kita patalangon sang makagod nga huyog sang aton tagipusuon. “Ang tagiposoon malimbongon labaw sa tanan nga butang, kag lakas gid kadunut.” (Jer. 17:9) Agod makapabilin nga mainunungon kay Jehova, dapat manikasog gid kita nga ubahon ang aton daan nga personalidad nga may huyog sa kakahas kag pagsandig sa kaugalingon. Kag dapat kita magsuklob sang bag-o nga personalidad, “nga gintuga suno sa kabubut-on sang Dios sa matuod nga pagkamatarong kag pagkamainunungon.”​—Basaha ang Efeso 4:22-24.

¹⁷ “Ang kaalam yara sa mga maugdang,” siling sang Hulubaton 11:2 (NW). Ang pagsandig kay Jehova sa baylo nga sa aton kaugalingon, nagabulig sa aton agod malikawan ang mabug-at nga mga kasaypanan. Halimbawa, mahapos lang patikuon sang pagluya sang buot ang aton pangatarungan. (Hulu. 24:10) Basi kapuyon kita sa pagpakigbahin sa isa ka aspekto sang sagrado nga pag-alagad kag magsugod sa pagbatyag nga bastante na ang nahimo naton sang nagliligad nga mga tinuig, kag maghunahuna nga tion na nga iban naman ang mag-abaga sini. Ukon ayhan maghandum kita nga magkabuhi na lang sing “normal.” Apang, ang ‘pagpanikasog sing lakas’ kag “may madamo pirme nga ginahimo sa hilikuton sang Ginuo” nagaamlig sang aton tagipusuon.​—Luc. 13:24; 1 Cor. 15:58.

18. Ano ang himuon naton kon daw indi kita makahibalo kon paano magdesisyon?

¹⁸ Kon kaisa, nagaatubang kita sa mabudlay nga mga desisyon kag daw indi makahibalo kon ano ang himuon. Magadesisyon lang bala kita sa kon ano sa banta naton ang husto? Kon mabutang kita sa sini nga sitwasyon, maalamon gid nga mangayo kita sing bulig kay Jehova. “Kon may isa sa inyo nga kulang sang kaalam,” siling sang Santiago 1:5, “magpangayo [sia] sa Dios, kay maalwan Sia nga nagahatag sa tanan.” Hatagan kita sang aton langitnon nga Amay sang balaan nga espiritu nga kinahanglanon naton agod makahimo kita sing maayo nga mga desisyon.​—Basaha ang Lucas 11:9, 13.

Mangin Determinado sa Pagpabilin nga Mainunungon

19, 20. Ano dapat ang determinado naton nga himuon?

¹⁹ Sang naglisa si Solomon sa matuod nga pagsimba, ginsundan ini sang magamo nga mga tinuig nga nagtilaw gid sa pagkamainunungon sang mga alagad sang Dios. Matuod, ang iban nagkompromiso. Apang, may nagpabilin man nga mainunungon kay Jehova.

²⁰ Kada adlaw, nagaatubang kita sa mga pagpili kag mga desisyon nga nagatilaw sang aton pagkamainunungon. Mapamatud-an man naton nga matutom kita. Kabay nga magpabilin kita pirme nga mainunungon kay Jehova samtang ginabug-os naton ang aton tagipusuon, nga nagasalig gid nga padayon niya nga pakamaayuhon ang mga mainunungon sa iya.​—2 Sam. 22:26.

[Mga footnote]

Paano Mo Sabton?

• Ngaa dapat gid naton kakason ang materyalistiko nga mga handum sa aton tagipusuon?

• Ano ang makabulig sa aton agod makapabilin kita nga mainunungon kay Jehova?

• Paano makabulig ang pagkaugdang agod makapabilin kita nga mainunungon sa Dios?

[Mga Pamangkot sa Pagtinuon]

[Mga piktyur sa pahina 9]

Nabudlayan ka bala nga pamatukan ang pagsulay?

[Mga piktyur sa pahina 10]

Binagbinagon mo bala kag ipangamuyo ang ginhatag sa imo nga laygay nga napasad sa Biblia?