Si Jehova Mapinalanggaon nga Nagaulikid sa Iya Tigulang nga mga Alagad

“Ang Dios indi di-matarong nga kalimtan ang inyo binuhatan kag ang gugma nga ginpakita ninyo para sa iya ngalan.”​—HEB. 6:10.

1, 2. (a) Ano ang imo madumduman kon makakita ka sing ubanon nga tawo? (b) Ano ang pagtamod ni Jehova sa tigulang nga mga Cristiano?

KON makita mo sa kongregasyon ang mga tigulang nga puti na ang buhok, may madumduman ka bala nga hitabo sa Biblia sa tulun-an nga Daniel? Sa palanan-awon nga ginhatag ni Jehova nga Dios kay Daniel, ginlaragway Niya ang Iya kaugalingon nga may puti nga buhok. Nagsulat si Daniel: “Nakita ko, ginpahamtang ang mga trono kag ang isa nga dumaan sang mga adlaw naglingkod; ang iya panapton maputi subong sang nieve, kag ang bohok sang iya olo kaangay sa [matinlo, NW] nga bulbul.”​—Dan. 7:9.

² Sa masami ang matinlo nga bulbol ukon balahibo sang karnero kinaandan na nga maputi. Amo nga ang puti nga buhok kag ang titulo nga “dumaan sang mga adlaw” nagapakita nga ang Dios wala sing ginsuguran kag wala sing katapusan kag may daku nga kaalam, busa takus gid sia sang aton tudok nga pagtahod. Paano, nian, ginatamod sang “dumaan sang mga adlaw,” nga si Jehova, ang matutom nga mga tigulang nga lalaki kag babayi? Ang Pulong sang Dios nagsiling nga “ang ubanon nga olo amo ang purung-purung sang himaya; [kon] makita ini sa dalanon sang pagkamatarung.” (Hulu. 16:31) Huo, kon ang buhok sang isa ka matutom nga Cristiano mangin ubanon na ukon puti, ang iya hamtong nga panagway matahom sa panan-aw sang Dios. Kaangay man bala sina ang imo pagtamod sa tigulang nga mga kauturan?

Ngaa Ginapabaloran Gid?

3. Ngaa ginapabaloran gid naton ang tigulang nga mga kauturan?

³ Ang pila sa sinang pinalangga nga tigulang nga mga alagad sang Dios amo ang mga katapo sang Nagadumala nga Hubon sang mga Saksi ni Jehova, ang mga nagpangalagad anay kag nagapangalagad gihapon nga mga nagalakbay nga manugtatap, makugi nga mga payunir, kag hamtong nga mga manugbantala sang Ginharian​—mga utod nga lalaki kag babayi nga nagaalagad sing matutom sa aton mga kongregasyon. Mahimo may kilala ka nga makugi nga nagbantala sing maayong balita sa madamo nga tinuig kag ang iya maayo nga halimbawa nagpalig-on sa mga pamatan-on kag nag-impluwensia sa ila kabuhi. Ang pila ka tigulang nga kauturan nag-abaga sang mabug-at nga mga responsibilidad kag nagbatas sang mga paghingabot para sa maayong balita. Ginapabaloran gid ni Jehova kag sang “matutom kag mainandamon nga ulipon” ang ila nabulig sang una kag sa karon sa hilikuton sang Ginharian.​—Mat. 24:45.

4. Ngaa dapat naton tahuron kag ilakip sa aton mga pangamuyo ang tigulang nga mga Cristiano?

⁴ Ining matutom nga mga tigulang takus gid pasalamatan kag tahuron sang iban nga mga alagad ni Jehova nga Dios. Sa pagkamatuod, ginapakita sang Mosaikong Kasuguan nga may kaangtanan ang pagtahod sa mga tigulang sa kahadlok kay Jehova. (Lev. 19:32) Dapat nga ilakip naton pirme sa aton pangamuyo ining matutom nga mga tigulang kag pasalamatan ang Dios sa ila pagpangabudlay bangod sa gugma. Ginlakip ni apostol Pablo sa iya mga pangamuyo ang iya pinalangga nga mga kauturan, bata man ukon tigulang.​—Basaha ang 1 Tesalonica 1:2, 3.

5. Paano kita makabenepisyo sa pagpakig-upod sa tigulang nga mga sumilimba ni Jehova?

⁵ Dugang pa, ang tanan sa kongregasyon makabenepisyo sa pagpakig-upod sa tigulang nga mga Cristiano. Paagi sa ila pagtuon, pagpanilag, kag eksperiensia, ining matutom nga mga  tigulang nakatigayon sing bilidhon katama nga kaalam. Natun-an nila nga mangin mapailubon kag mahinangpanon, kag ang pagtudlo sang ila natun-an sa mga bataon nagahatag sa ila sing daku nga kalipay kag kaayawan. (Sal. 71:18) Mga pamatan-on, magmaalam kag magkuha sing ihibalo sa sining mga tuburan sang kaalam subong sa pagkuha sing tubig sa madalom nga bubon.​—Hulu. 20:5.

6. Paano mo mapakita sa mga tigulang nga ginapabaloran mo gid sila?

⁶ Ginapahibalo mo bala sa mga tigulang nga ginapabaloran mo sila subong sa pagpabalor ni Jehova? Isa ka paagi nga mahimo mo ini amo ang paghambal sa ila kon daw ano mo sila ka palangga bangod sang ila katutom kag ginapabaloran mo gid ang ila mga opinyon. Dugang pa, paagi sa pagsunod sang ila laygay ukon panugda, ginapakita mo nga sinsero gid ang imo pagtahod sa ila. Madamo sa tigulang nga Cristiano ang nagahinumdom nga sila mismo nakabaton man sing maalamon nga laygay gikan sa matutom nga mga tigulang kag kon paano sila nakabenepisyo sa sini sa bug-os nila nga kabuhi. *

Ipakita ang Imo Pagpalangga sa Praktikal nga mga Paagi

7. Sin-o ang ginhatagan ni Jehova sang panguna nga responsibilidad sa pag-atipan sa mga tigulang?

⁷ Ang panguna nga responsibilidad sa pag-atipan sa mga tigulang ginhatag sang Dios sa ila mismo pamilya. (Basaha ang 1 Timoteo 5:4, 8.) Nalipay gid si Jehova kon tungdan sang mga pamilya ang ila obligasyon sa ila tigulang nga mga himata kag ginapakita sini nga nagaulikid sila sa mga tigulang subong sa pag-ulikid niya. Ginasakdag sang Dios ining mga pamilya kag ginapakamaayo sila sa ila panikasog kag sa tanan nila nga mga pagsakripisyo. *

8. Ngaa dapat magpakita sing pag-ulikid ang kongregasyon sa nagatigulang nga mga Cristiano?

⁸ Sing kaanggid, nahamuot si Jehova kon atipanon sang lokal nga kongregasyon ang matutom nga mga tigulang nga bululigan apang wala sing himata nga Saksi ukon wala sing himata nga luyag mag-atipan sa ila. (1 Tim. 5:3, 5, 9, 10) Busa ginapakita sang kongregasyon nga may ‘simpatiya sila, utudnon nga pagpalangga, kag mapinalanggaon nga kaawa’ sa mga tigulang. (1 Ped. 3:8) Ang ila pag-ulikid sa mga tigulang nga katapo sang kongregasyon ginlaragway sing maayo ni Pablo sang nagsiling sia nga kon ang isa ka bahin sang lawas  nagaantos, “ang tanan iban pa nga bahin nagaantos upod sini.” (1 Cor.12:26) Ang paghimo sing praktikal nga mga tikang para sa mga tigulang nahisanto sa prinsipio sang laygay ni Pablo nga: “Padayon ninyo nga dalhon ang mga lulan sang isa kag isa, kag sa amo matuman ninyo ang kasuguan ni Cristo.”​—Gal. 6:2.

9. Ano nga mga kabudlayan ang ginaatubang sang mga tigulang?

⁹ Ano nga mga kabudlayan ang ginaatubang sang mga tigulang? Madamo ang madali na kapuyon. Mahimo magbatyag sila nga daw indi na sila makasarang nga himuon ang simple nga mga hilikuton kaangay sang pagkadto sa doktor, pag-asikaso sang mga balayran, pagtinlo sa balay ukon pagluto. Bangod masami nga nagakadula ang ila gana sa pagkaon ukon igbalatyag sa kauhaw, mahimo nga nagahunahuna sila nga indi na nila kinahanglan magkaon ukon mag-inom suno sa kon ano gid ang kinahanglan sang ila lawas. Mahimo nga amo man sini ang kahimtangan sang ila pagtuon sa Biblia kag pagtambong sa mga miting. Ang ila nagadulom nga panan-aw kag nagapigaw nga palamatin-an mahimo nagapabudlay sa ila, bisan gani ang paghimos lang pakadto sa Cristianong mga miting mahimo nga makalalapyo na. Ano nian, ang mahimo sang iban para sa sining mga tigulang?

Kon Paano Ka Makabulig

10. Ano ang mahimo sang mga gulang agod masigurado nga nagabaton sing praktikal nga bulig ang mga tigulang?

¹⁰ Sa madamo nga kongregasyon, maayo gid ang pag-atipan sa mga tigulang. Ginabuligan sila sang mahigugmaon nga mga kauturan sa pagpaninda, pagluto, kag pagpaninlo. Ginabuligan nila ang mga tigulang sa pagtuon, paghanda sa mga miting kag sa pagpabilin nga regular sa ministeryo. Ginaupdan sila sang pamatan-on nga mga Saksi kag ginasugat-dul-ong sang salakyan. Kag kon indi makahalin ang mga tigulang sa ila puluy-an, ginapabati nila sila sang miting paagi sa telepono ukon ginarekord ini para sa ila. Tubtob posible, nagahimo sing praktikal nga mga kahimusan ang mga gulang agod maaman ang mga kinahanglanon sang mga tigulang sa kongregasyon. *

11. Isugid kon paano ginbuligan sang isa ka pamilya ang isa ka tigulang nga utod.

¹¹ Ang tagsa ka Cristiano makapakita man sing pagkamaabiabihon kag pagkamahinatagon. Sang napatay ang asawa sang isa ka tigulang nga utod, indi na sia makasarang magbayad sang arkila sa balay kay wala na ang pension sang iya asawa. Sila nga mag-asawa may gintun-an anay sa Biblia nga isa ka pamilya nga may duha ka bata nga babayi. Ini nga pamilya may daku nga balay kag amo ini ang nagsapupo sa iya. Sa sulod sang 15 ka tuig, nangin bahin sia sang ila pamilya, kag nangin masadya gid ang ila pag-inupdanay. Ang mga pamatan-on madamo sing natun-an sa iya pagtuo kag madamo nga eksperiensia, kag sia man nakabenepisyo sa malipayon nga pagpakig-upod sa ila. Ining tigulang nga utod nagpuyo sa ila tubtob nga mapatay sia sa edad nga 89 anyos. Nagapasalamat gihapon sa Dios ining pamilya bangod sa madamo nga pagpakamaayo nga natigayon nila sa ila pagpakig-upod sa sining tigulang. Wala nila ‘mawasi ang ila padya’ bangod ginbuligan nila ang isa ka disipulo ni Jesucristo.​—Mat. 10:42. *

12. Ano ang mahimo mo agod ipakita ang imo pag-ulikid sa tigulang nga mga kauturan?

¹² Mahimo wala ka sa kahimtangan nga buligan ang isa ka tigulang nga utod kaangay sa pagbulig sining pamilya, apang mahimo mo updan ang mga tigulang nga makatambong sa mga miting ukon makabantala sa latagon. Mahimo mo man sila agdahon sa imo puluy-an kag updon sila kon maggua kamo sa pagliwaliwa. Mahimo mo sila duawon ilabi na gid kon nagamasakit sila. Dugang pa, dapat mo sila pakig-angutan subong hamtong nga mga adulto. Tubtob makasarang pa sila dapat ilakip sila sa tanan nga desisyon nga nagadalahig sa ila. Bisan pa medyo ulianon na ang iban nga mga tigulang, makamutik gihapon sila kon ang ila dignidad ginatahod ukon wala.

Indi Pagkalimtan ni Jehova ang Imo Hinimuan

13. Ngaa importante nga pakitaan sing konsiderasyon ang balatyagon sang tigulang nga mga Cristiano?

¹³ Importante nga pakitaan sing konsiderasyon ang balatyagon sang mga tigulang. Sa masami,  ang mga tigulang nasubuan gid bangod indi na nila mahimo ang mga ginahimo nila anay sang bataon pa sila kag mabaskog. Halimbawa, may isa ka utod nga babayi nga nag-alagad sing makugi sa sulod sang 50 ka tuig kag isa anay ka regular payunir. Sang ulihi, nagbalatian sia kag amat-amat nga nagluya amo nga mabudlay gid para sa iya ang pagtambong sa mga miting. Kon ipaanggid niya ang iya anay pagministeryo sa iya karon kahimtangan, nagahilibion sia. Nagduko sia kag nagahibi nga nagahambal, “Daw wala na gid ako sing pulos.”

14. Ano nga paumpaw ang matigayon sang tigulang nga mga alagad ni Jehova sa mga salmo?

¹⁴ Kon ikaw may edad na, nagabatyag ka man bala sang subong sini ka sakit nga mga balatyagon? Ukon may mga tion bala nga nagabatyag ka nga basi ginbiyaan ka na ni Jehova? Ang salmista mahimo nagbatyag man sing kaanggid nga balatyagon sang nagahingapos na ang iya kabuhi, bangod nakiluoy sia kay Jehova: “Dili ako pag-isikway sa tion sang katigulangon; dili ako pagbayai kon magluya ang akon kusug. . . . Gani bisan ako tigulang na kag ubanon, O Dios, dili ako pagbayai.” (Sal. 71:9, 18) Siempre pa, indi gid pagbiyaan ni Jehova ang manugkomposo sang amo nga salmo, kag indi man Sia magabiya sa imo. Sa isa pa ka salmo, ginpabutyag ni David ang iya pagsalig sa pagsakdag sang Dios. (Basaha ang Salmo 68:19.) Kon isa ikaw ka matutom nga tigulang nga Cristiano makasalig ka nga si Jehova kaupod mo kag padayon sia nga magasakdag sa imo sa adlaw-adlaw.

15. Ano ang makabulig sa mga may edad na nga mahuptan ang positibo nga panimuot?

¹⁵ Kamo nga nagatigulang na nga mga Saksi ni Jehova, ginadumdom gid ni Jehova ang tanan ninyo nga hinimuan kag ginahimo para sa iya himaya. “Ang Dios indi di-matarong nga kalimtan ang inyo binuhatan kag ang gugma nga ginpakita ninyo para sa iya ngalan,” siling sang Biblia. (Heb. 6:10) Busa, likawi ang negatibo nga panghunahuna nga bangod tigulang ka na, indi ka na mapuslan ni Jehova. Hunahunaa pirme ang positibo nga mga butang sa baylo sang mga makapasubo kag negatibo nga panghunahuna. Magkalipay sa mga pagpakamaayo nga natigayon mo kag sa imo paglaum sa palaabuton! May yara kita labing maayo nga ‘palaabuton kag paglaum’ nga ginpasalig mismo sang aton Manunuga. (Jer. 29:11, 12, NW; Binu. 17:31; 1 Tim. 6:19) Pamalandungi ang imo paglaum, mangin positibo sa kabuhi, kag indi pagpakadiutaya ang imo presensia sa kongregasyon! *

16. Ngaa naghunahuna ang isa ka tigulang nga utod nga mag-untat sa pag-alagad subong isa ka gulang, apang paano sia ginpalig-on sang hubon sang mga gulang?

¹⁶ Binagbinaga ang halimbawa ni Johan, nga sa edad nga 80 anyos nagaatipan adlaw-gab-i sa iya matutom apang nangin inutil nga asawa nga si Sannie. * Ang mga kauturan nga babayi nagbulosbulos bantay kay Sannie agod makatambong si Johan sa miting kag makagua sa latagon. Apang sining karon lang, si Johan nagbatyag nga daw indi na niya madala ang iya emosyon kag nagahunahuna sia nga indi na sia sangkol sa pag-alagad subong isa ka gulang sa kongregasyon. “Ano pa ang pulos sang akon pagkagulang?” nagapamangkot sia nga nagalumawlumaw ang mga mata. “Indi na ako mapuslan sang kongregasyon.” Ginpasalig sia sang iya kaupod nga mga gulang nga ang iya eksperiensia kag paghantop ginapabaloran gid nila. Ginpalig-on nila sia nga magpadayon sa pag-alagad subong isa ka gulang, bisan pa limitado na lang ang iya mahimo. Napalig-on gid si Johan amo nga nagpadayon sia sa pagpangalagad subong isa ka gulang nga isa gid ka pagpakamaayo sa kongregasyon.

Nagaulikid Gid si Jehova

17. Ano ang ginapasalig sang Biblia para sa tigulang nga mga Cristiano?

¹⁷ Maathag nga ginapakita sang Biblia nga ang mga tigulang makapadayon gihapon sa pag-uswag  sa pag-alagad kay Jehova bisan pa sang mga kabudlayan nga dala sang katigulangon. Ang salmista nagsiling: “Ginatanum sila sa balay sang GINOO, . . . magapamunga pa sila sa katigulangon, mapuno sila sang duga kag kalab-as.” (Sal. 92:13, 14) Si apostol Pablo, nga mahimo nag-antos sang balatian, ‘wala nangampo, bisan ang iya lawas nagaluya.’​—Basaha ang 2 Corinto 4:16-18.

18. Ngaa ang tigulang nga mga kauturan kag ang mga nagaatipan sa ila nagakinahanglan sing bulig?

¹⁸ Madamo sa modernong adlaw nga mga halimbawa ang nagapamatuod nga ang mga tigulang mahimo gihapon mangin ‘mabungahon.’ Bisan pa may nagaatipan nga mga himata mahimo mabudlay gihapon atubangon ang mga kabudlayan nga dala sang balatian kag katigulangon. Ang mga nagaatipan mahimo nga ginalapyo man. May pribilehiyo kag responsibilidad ang kongregasyon nga ipakita ang ila gugma sa mga tigulang kag sa mga nagaatipan sa ila. (Gal. 6:10) Ang paghimo sini nagapakita nga indi kita kaangay sang mga nagahambal lang sa ila nga maglakat kag “magpainit-init kag magpakabusog” apang wala man sing ginaaman nga praktikal nga bulig.​—Sant. 2:15-17.

19. Ngaa makasalig ang matutom nga tigulang nga mga Cristiano nga maayo ang ila palaabuton?

¹⁹ Bangod sa katigulangon mahimo nga limitado na lang ang mahimo sang isa ka Cristiano, apang wala ini nagapaugdaw sang gugma ni Jehova sa iya matutom nga mga alagad. Sa baylo, ang tanan nga matutom nga Cristiano bilidhon sa iya mga mata, kag indi gid niya sila pagpabay-an. (Sal. 37:28; Isa. 46:4) Si Jehova magasakdag kag magagiya sa ila sa tion sang ila katigulangon.​—Sal. 48:14.

[Mga footnote]

Ano ang Imo Sabat?

• Ngaa ginakabig mo nga importante ang matutom nga tigulang nga mga Cristiano?

• Paano naton mapakita ang aton pag-ulikid kag kaayo sa tigulang nga mga kauturan?

• Ano ang makabulig sa tigulang nga mga alagad ni Jehova nga mahuptan ang positibo nga pagtamod sa kabuhi?

[Mga Pamangkot sa Pagtinuon]

[Mga piktyur sa pahina 18]

Ginapabaloran gid sang mga katapo sang kongregasyon ang mga tigulang