Maglambo sa Sibu nga Ihibalo nga May “Kalangkag”

LUYAG gid sang tanan nga alagad ni Jehova nga mapahamut-an sia. Bangod sini, nalangkag gid kita nga pabakuron ang aton pagtuo kag mangin makugi sa aton pag-alagad sa iya. Apang, ginpatalupangod ni apostol Pablo nga mahimo mangin problema man naton ang naeksperiensiahan sang mga Judiyo sadto: “May kakugi sila sa Dios; apang indi suno sa sibu nga ihibalo.” (Roma 10:2) Maathag nga ginapakita sini nga ang aton pagtuo kag pagsimba kay Jehova dapat wala lamang napasad sa emosyon. Kinahanglan naton ang sibu nga ihibalo tuhoy sa aton Manunuga kag sa iya kabubut-on.

Sa iban nga sinulatan ni Pablo, gin-angot niya ang mga buhat nga nakapahamuot sa Dios sa aton kalangkag sa pagkuha sing ihibalo. Ginpangamuyo niya nga ang mga sumulunod ni Jesus ‘mapuno sing sibu nga ihibalo’ tuhoy sa kabubut-on sang Dios “agod maglakat [sila] sing takus kay Jehova sa tuyo nga pahamut-an sia sing bug-os” samtang padayon sila nga “nagapamunga sa tagsa ka maayong buhat kag nagalambo sa sibu nga ihibalo tuhoy sa Dios.” (Col. 1:9, 10) Ngaa importante gid ang pagkuha naton sing “sibu nga ihibalo”? Kag ngaa dapat naton palambuon ini?

Ang Sadsaran sang Pagtuo

Ang sadsaran sang aton pagtuo amo ang aton sibu nga ihibalo tuhoy sa Dios kag sa iya kabubut-on nga masapwan naton sa Biblia. Kon wala kita sini, ang aton pagtuo mangin kaangay sing balaybalay nga nahuman sa ginsampawsampaw nga mga baraha nga gamay lang nga huyop mapuklid dayon. Ginapalig-on kita ni Pablo nga maghatag sing sagrado nga pag-alagad sa Dios upod ang “ikasarang sa pagpangatarungan” kag ‘pagbag-o sang aton hunahuna.’ (Roma 12:1, 2) Mahimo naton ini kon regular naton nga ginatun-an ang Biblia.

Ang isa ka regular payunir sa Poland nga si Ewa, nag-ako: “Kon wala ko gintun-an sing regular ang Pulong sang Dios, wala gid naglambo ang akon sibu nga ihibalo tuhoy kay Jehova. Mahimo nga nadula ang akon identidad subong Cristiano, kag nagluya ang akon pagtuo kay Jehova nga nagresulta sing pagkahamulag ko sa iya.” Kabay nga indi ini matabo sa aton! Binagbinaga ang halimbawa sang isa ka tawo nga nagpalambo sang iya sibu nga ihibalo tuhoy kay Jehova gani naagom ang kahamuot Niya.

“O Daw Ano ang Paghigugma Ko sang Imo Kasogoan!”

Ang mabinalaybayon nga ambahanon nga narekord sa Salmo 119 nagapakita kon ano ang pagtamod sang salmista sa mga kasuguan, mga pahanumdom, mga mando, mga sugo, kag hudisyal nga mga desisyon ni Jehova. Ang salmista nagsulat: “Magakalipay ako sa imo mga palatukuran . . . Nalipay man ako sa imo mga pahanumdom.” Sia nagdugang: “Ginahigugma ko gid ang imo kasuguan! Ginapamalandungan ko ini sa bug-os nga adlaw.”​—Sal. 119:16, 24, 47, 48, 77, 97, NW.

Ang tinaga nga “magakalipay” kag “ginapamalandungan” nagapakita sang gugma sang salmista sa pagtuon sa kasuguan sang Dios. Indi ini resulta sang nagadabadaba lamang niya nga balatyagon. Kundi, sinsero gid sia nga nagatinguha nga ‘pamalandungan’ ang kasuguan agod mahantop niya ang mga pulong ni Jehova. Makita naton sa panimuot sang salmista nga handum gid niya nga makilala sing sibu ang Dios kag mahibaluan ang iya kabubut-on.

Ginahigugma gid sang salmista ang Pulong sang Dios. Gani, mahimo naton pamangkuton ang aton kaugalingon: ‘Amo man bala ako sina? Nalipay bala ako sa pagbasa kag pag-usisa sang  Biblia kada adlaw? Maukod bala ako sa pagbasa sing Biblia? Nagapangamuyo bala ako antes basahon ini?’ Kon huo ang aton sabat sa sining mga pamangkot, mahimo gid nga ‘magalambo ang aton sibu nga ihibalo tuhoy sa Dios.’

Si Ewa nagsiling: “Padayon ko nga ginapanikasugan nga pauswagon ang kalidad sang akon personal nga pagtuon. Sang nabaton ko ang brosyur nga ‘See the Good Land’, pirme ko na ini ginagamit kada magtuon. Labi ko na gid nga ginagamit sa karon ang libro nga Insight on the Scriptures kag ang iban pa nga mga reperensia sa pagtuon.”

Binagbinaga man ang mga halimbawa ni Wojciech kag Małgorzata. Bisan pa masako sila sa pag-atipan sang pamilya, may iskedyul sila gihapon sa personal nga pagtuon sa Biblia. Paano? “Ginahimo sang tagsatagsa sa amon ang amon nga masarangan agod personal namon nga matun-an ang Pulong sang Dios. Dayon, kon magtuon kami subong pamilya, kag sa amon mga pag-istoryahanay, ginapaambit namon sa isa kag isa ang maayo kag makapalig-on nga mga punto nga amon natun-an.” Nangin malipayon gid sila kag ‘naglambo sa sibu nga ihibalo’ bangod sang ila maid-id nga personal nga pagtuon.

Magtuon nga May Bukas nga Panghunahuna

Subong mga Cristiano, nagapati kita nga kabubut-on gid sang Dios nga “ang tanan nga sahi sang mga tawo maluwas kag makadangat sa sibu nga ihibalo tuhoy sa kamatuoran.” (1 Tim. 2:3, 4) Ginapadaku sini nga kinahanglan naton basahon ang Biblia kag ‘mahangpan ang kahulugan sini.’ (Mat. 15:10) Ang isa ka paagi nga mahimo naton ina amo ang paghupot sing bukas nga panghunahuna. Amo ini ang panimuot sang mga taga-Berea sang una sang ginpaambit sa ila ni Pablo ang maayong balita: “Nalangkag gid sila sa pagbaton sa pulong, nga ginausisa sing maayo ang Kasulatan sa adlaw-adlaw kon bala matuod gid ini nga mga butang.”​—Binu. 17:11.

Ginasunod mo bala ang halimbawa sang mga taga-Berea? Nalangkag ka man bala sa pagtuon sa Biblia kag wala mo ginatugutan nga matublag ang imo hunahuna kon nagatuon? Mahimo mailog sang isa ka Cristiano ang mga taga-Berea bisan pa sang una wala sia sing hilig magtuon. Dugang pa, ang iban wala na sing gana magtuon bangod nagaedaran na sila, apang tuhay ang mga Cristiano. Bisan ano man ang aton edad, mahimo gihapon naton malikawan ang mga tublag sa pagtuon. Kag samtang nagabasa ka, tandai ang mga punto nga mahimo mo ipaambit sa iban. Halimbawa, ginapaambit mo gid bala sa imo tiayon ukon mga abyan sa kongregasyon ang imo mga nabasa ukon natun-an? Indi lamang sila ang imo nabuligan, kundi mapatudok man ini mismo sa imo hunahuna kag tagipusuon.

Maayo gid nga halimbawa ang isa ka alagad sang Dios sang una nga si Esdras kon tuhoy sa paagi sang pagtuon bangod ‘gintugyan niya ang iya tagiposoon sa pag-usisa sang kasogoan sang GINOO.’ (Esd. 7:10) Paano mo sia mailog? Mahimo ka magpili sing nagakaigo nga lugar para mahapos sa imo ang pagtuon. Dayon, mangamuyo kay Jehova nga tuytuyan ka niya kag hatagan sing kaalam. (Sant. 1:5) Pamangkuta ang imo kaugalingon, ‘Ano ayhan ang matun-an ko sa akon pagtuon subong?’ Samtang nagabasa ka, talupangda ang panguna nga mga ideya. Mahimo mo ilista ukon markahan ang mga bahin nga indi mo luyag malipatan. Binagbinaga kon paano mo ini magamit sa imo pagbantala, sa paghimo sing mga desisyon, ukon sa pagpalig-on sa mga kauturan. Kon nagahingapos ka na sa pagtuon, repasuha sing malip-ot ang imo gintun-an agod indi mo ini malipatan.

 Ginlaragway ni Ewa ang iya paagi sa pagtuon: “Samtang nagabasa ako sing Biblia, ginagamit ko ang mga cross-reference, ang Watch Tower Publications Index, kag ang Watchtower Library sa CD-ROM. Nagahimo man ako sing listahan sang mga punto nga ginaplano ko nga gamiton sa pagbantala.”

Ang iban madugay na nga nanamian kag nawili gid sa maid-id nga pagtuon tuhoy sa Dios. (Hulu. 2:1-5) Ugaling, madamo sila sing mga responsibilidad kag wala na sing tion sa personal nga pagtuon. Kon amo man sina ang imo kahimtangan, ano nga mga pagpasibu sa imo iskedyul ang puede mo himuon?

Paano Ako Makatiempo?

Mahimo ka mag-ugyon nga mahapos himuon ang isa ka butang kon interesado ka gid sa sini. Nakita sang madamo nga makabulig gid ang paghimo sing realistiko nga tulumuron subong sang pagbasa sing bug-os nga Biblia agod indi mangin makatalaka ang personal nga pagtuon. Ibutang ta nga mahimo natak-an ka sa pagbasa sing malaba nga listahan sang mga kaliwatan, detalyado nga paglaragway sang dumaan nga templo, ukon ang tuhoy sa masibod nga mga tagna bangod daw wala man ini sing praktikal nga mga kapuslanan. Tilawi ang paghimo sing praktikal nga mga tikang agod mangin mapuslanon ang imo pagbasa. Halimbawa, antes mo basahon ang daw makatalaka nga bahin sang Biblia, mahimo mo anay basahon ang rekord tuhoy sa kon ano ang kahimtangan sadto ukon ang mga kapuslanan sini sa karon. Mahimo masapwan mo ining mga impormasyon sa libro nga “All Scripture Is Inspired of God and Beneficial,” nga mahimo matigayon sa halos 50 ka lenguahe.

Mapahulag pa gid kita sa pagtuon sa Biblia kon ginagamit naton ang aton imahinasyon. Nagabulig ini sa imo nga mahanduraw ang mga karakter kag ang mga kahimtangan. Kon gamiton mo ining pila ka mga panugda, mahimo gid nga mangin makawiwili kag mapuslanon ang imo mga pagtuon. Gani, malipay ka na sa paghatag sang imo tion sa pagtuon kag mangin mahapos lang sa imo nga padayunon ang rutina sa pagbasa sing Biblia kada adlaw.

Epektibo gid ang mga ginsambit nga mga panugda sa tagsa ka indibiduwal. Apang, ano naman ang maayo nga himuon sang masako nga pamilya? Ngaa indi ninyo pagpungkuan kag istoryahan  sing maayo kon ano ang mga benepisyo sa pagtuon subong pamilya? Paagi sa sini, makahimo kamo sing praktikal nga mga paagi sa pagtuon. Halimbawa, mahimo nga mas temprano na kamo magabugtaw kada aga, ukon sa pila lamang ka adlaw kada semana agod mahinun-anunan ninyo ang isa ka bahin sang Biblia, ukon basi kinahanglan ninyo nga bag-uhon ang iskedyul sang pamilya. Halimbawa, nasapwan sang iban nga pamilya nga praktikal ang paghinun-anon sang teksto sa sina nga adlaw ukon ang pagbasa sang isa ka bahin sang Biblia pagkatapos nila kaon. Antes pa himuson ang kinan-an ukon maglakat sa paghimo sang iban nga obra, ang pamilya nagahinguyang anay sing 10 ukon 15 minutos agod binagbinagon ang Kasulatan ukon basahon ang nakaiskedyul nga pagbasa sa Biblia. Mahimo nga mabudlay ini sa una nga tion, apang sa ulihi mangin bahin na ini sang kabuhi sang pamilya kag mangin makalilipay na ang pagtuon.

Ginpaathag ni Wojciech kag Małgorzata kon ano ang nakabulig sa ila pamilya: “Sang una, nagakaubos ang amon tion sa mga indi importante nga mga buluhaton. Nagdesisyon kami nga buhinan ang amon tion sa pagpadala sing mga e-mail kag sa paglingawlingaw. Sa baylo, ginhatagan namon sing espesipiko nga adlaw kag oras ang amon maid-id nga pagtuon.” Wala gid naghinulsol ini nga pamilya sa mga pagpasibu nga ginhimo nila, kag mahimo man ini maeksperiensiahan sang imo mismo pamilya.

Mapuslanon Gid ang Pagpalambo sang Sibu nga Ihibalo!

Kon ginatun-an mo sing maid-id ang Pulong sang Dios, ‘magapamunga ka sa tagsa ka maayong buhat.’ (Col. 1:10) Kon ginahimo mo ini, ang imo pag-uswag mapadayag sa tanan. Mangin espirituwal ka nga tawo nga may madalom nga paghangop sa kamatuoran sa Biblia. Indi kaangay sang mga wala sing ihibalo, mangin mas maalamon ang imo mga desisyon kag mangin mas handa ka sa paglaygay sa iban. Labaw sa tanan, mangin suod ka kay Jehova. Labi nga apresyahon mo ang iya mga kinaiya, kag madayag ini samtang ginasugid mo sa iban ang tuhoy sa iya.​—1 Tim. 4:15; Sant. 4:8.

Bisan ano man ang imo edad ukon eksperiensia, panikasugi nga mahuptan mo ang kalipay sa maid-id nga pagtuon sa Pulong sang Dios upod ang bukas nga panghunahuna. Makasalig ka nga ginadumdom gid ni Jehova ang imo mga pagpanikasog. (Heb. 6:10) Ibubo niya sa imo ang iya bugana nga pagpakamaayo.

[Kahon sa pahina 13]

KON ‘MAGLAMBO KITA SA SIBU NGA IHIBALO’. . .

Mapabakod naton ang aton pagtuo sa Dios kag makalakat kita sing takus kay Jehova.​—Col. 1:9, 10

Matigayon naton ang paghangop kag paghantop, kag mangin maalamon sa paghimo sing mga desisyon.​—Sal. 119:99

Mangin mas malipayon kita sa pagbulig sa iban nga mangin suod kay Jehova nga Dios.​—Mat. 28:19, 20

[Mga piktyur sa pahina 14]

Mahimo mabudlay ang magpangita sing nagakaigo nga lugar sa pagtuon, apang mapuslanon gid ini

[Piktyur sa pahina 15]

Ang iban nga pamilya nagabasa sing isa ka bahin sang Biblia pagkatapos nila kaon